‘UMbuso Wakho Kawuze’ Nini?

1, 2. (a) Kuyini okungenza singananzeleli izinto esizibonayo? (b) Kuyini esikwaziyo ngoMbuso kaNkulunkulu?

UYAKE ukunanzelele yini ukuthi abantu ababone into ethile isenzakala basala bekhumbula izinto ezehlukeneyo? Lomuntu ovela kudokotela angakhohlwa imilayezo ayitsheliweyo ngesikhathi eselatshwa. Kanti njalo omunye angadinga amakhiye kumbe amangilazi akhe wona esegcekeni. Konke lokhu kungabangelwa yilokhu abacubunguli abathi luhlobo lobuphofu olwenza umuntu angananzeleli izinto kumbe akhohlwe okuthile ngenxa yokulibala ngokuthile. Kwezinye izikhathi ingqondo yethu isebenza njalo.

² Abantu abanengi lamuhla “balobuphofu” obunjalo, mayelana lezehlakalo zomhlaba. Bayakuvuma ukuthi umhlaba suntshintshe kakhulu kusukela ngo-1914, kodwa kabakuzwisisi ukuthi izehlakalo zonke lezi zitshoni. Thina esifunda iBhayibhili siyakwazi ukuthi uMbuso kaNkulunkulu wafika ngo-1914 lapho uJesu ebekwa ukuthi abe yiNkosi ezulwini. Kodwa kuseselokunye esikulindeleyo ekuphendulweni komthandazo othi: ‘UMbuso wakho kawuze, intando yakho yenziwe emhlabeni njengalokhu isenziwa ezulwini.’ (Mat. 6:10) Kucacile ukuthi lokhu kugoqela lokuphela komumo lo wezinto omubi. Nxa lokhu sekwenzakele, yikho lapho intando kaNkulunkulu ezakwenziwa khona emhlabeni njengasezulwini.

3. Kusinceda ngani ukufunda iLizwi likaNkulunkulu?

³ Siyakubona ukuthi iziphrofetho ziyagcwaliseka ngoba sihlala silifunda iLizwi likaNkulunkulu. Abanengi kabakuboni lokhu. Bagijimisana lezinto ezinengi empilweni, yikho bengabuboni ubufakazi obucace kangaka bokuthi uKhristu ubelokhu ebusa kusukela ngo-1914 njalo usezaletha isahlulelo sikaNkulunkulu. Nanku umbuzo oqakathekileyo: Nxa usuleminyaka eminengi ukhonza uNkulunkulu, lokhu usazihlupha yini njengakuqala ngokuthi okwenzakalayo khathesi kutshoni? Lanxa usanda kuba nguFakazi kuyini okuqakathekisa kakhulu empilweni yakho? Kungelani ukuthi izimpendulo zethu zithini, asikhangeleni izizathu ezintathu eziqakathekileyo zokuthi kungani siqiniseka ukuthi iNkosi ebekwe nguNkulunkulu isizathatha amanye amanyathelo ukuze intando kaNkulunkulu yenziwe ngokugcweleyo emhlabeni.

ABAGADI BAMABHIZA SEBEVELILE

4, 5. (a) UJesu ubesenzani kusukela ngo-1914? (Khangela umfanekiso osekuqaliseni.) (b) Yiziphi izehlakalo ezimelwa ngabagadi bamabhiza abathathu, njalo unjani umumo wezinto khathesi?

⁴ UJesu Khristu, umgadi webhiza elimhlophe, waphiwa umqhele wobukhosi ezulwini ngo-1914. Wahle waqhubeka ngomsebenzi wakhe wokunqoba umumo wezinto kaSathane. (Bala iSambulo 6:1, 2.) Isiphrofetho esikuSambulo isahluko-6 sitshengisa ukuthi ngemva kokumiswa koMbuso kaNkulunkulu izinto zazizaqalisa ukuba zimbi emhlabeni, kube lezimpi, indlala, imikhuhlane lezinye izinto ezibulala abantu. Izehlakalo lezi zimelwa ngabagadi bamabhiza abathathu abagijima belandela eduze kukaJesu Khristu.​—Isam. 6:3-8.

⁵ Njengoba kwakuphrofethiwe, ukuthula ‘kwasuswa emhlabeni’ lanxa abantu babethembisa ukuhlalisana kuhle kanye lokumanyana komhlaba wonke. Singathi iMpi Yomhlaba Wonke Yokuqala, yayingeyokuqala ezimpini ezaziphrofethiwe njengoba sibona okwenzakala emhlabeni kulezinsuku. Lanxa kube lentuthuko emangalisayo kwezomkhonomi lakwezesayensi kusukela ngo-1914, indlala ilokhu ibangela ukuthi kungabi lokuhlaliseka emhlabeni. Kanti njalo ngubani ongaphikisa ukuthi kufa izigidi zabantu minyaka yonke ngenxa ‘yezifo’ eziyingozi, izehlakalo zemvelo, lemikhuhlane eminenginengi? Izehlakalo lezi sezimemetheke ngendlela engakaze ibonakale embalini, zibulala abantu abanengi njalo zilokhu zisiba zinengi. Uyake uzihluphe yini ngokuthi kutshoni konke lokhu?

6. Ngobani abakunanzelelayo ukuthi isiphrofetho seBhayibhili siyagcwaliseka, njalo bakhetha ukwenzani?

⁶ Abantu abanengi balibala ngenxa yokuqalisa kweMpi Yomhlaba Wonke Yokuqala kanye lomkhuhlane okuthiwa yi-Spanish influenza. Kodwa amaKhristu agcotshiweyo ayelindele ngabomvu ukuthi “izikhathi zabeZizwe” ziphele ngo-1914. (Luk. 21:24) Ayengelaqiniso ukuthi kwakuzahamba njani sibili. Kodwa ayesazi ukuthi ngo-1914 uMbuso kaNkulunkulu wawuzakwenza okuthile. Athi ezwisisa nje ukuthi isiphrofetho seBhayibhili sasesigcwalisekile atshumayela ngesibindi etshela abanye ukuthi uMbuso kaNkulunkulu usuqalisile ukubusa. Imizamo yawo yokumemezela uMbuso yabangela ukuthi ahlutshwe kakhulu. Ukuhlutshwa kwawo emazweni amanengi lakho kwakugcwalisa isiphrofetho. Eminyakeni eyalandelayo izitha zoMbuso ‘zaseziletha izinhlupheko ngezimemezelo zazo.’ Zasezisenza okokubahlukuluza, ukubavalela emajele, ukubalengisa, ukubadubula loba ukubaquma amakhanda abazalwane bethu.​—Hubo. 94:20; Isam. 12:15.

7. Kungani abantu abanengi bengakuzwisisi ukuthi izehlakalo ezenzakala emhlabeni zitshoni?

⁷ Kungani abantu abanengi bengavumi ukuthi uMbuso kaNkulunkulu usubusa ezulwini lanxa kulobufakazi obunengi kangaka? Kungani besehluleka ukubona ukuthi indlela umhlaba oyiyo yona khathesi igcwalisa iziphrofetho ezicacileyo okukade zamenyezelwa ngabantu bakaNkulunkulu? Kungabe kuyikuthi abantu abanengi kuyabasinda ukukholwa into abangayiboniyo? (2 Khor. 5:7) Kumbe ukuphatheka ezindabeni zalumhlaba kubenza bangaboni ukuthi uMbuso kaNkulunkulu wenzani? (Mat. 24:37-39) Mhlawumbe abanye babo badungwa ingqondo ngamanga kaSathane obuqili. (2 Khor. 4:4) Kumele sibe lokholo njalo siqedisise injongo kaNkulunkulu ukuze sibone lokho uMbuso kaNkulunkulu osukwenzile. Siyajabula kakhulu ngoba siyakubona sibili okwenzakalayo!

ABABI BASUKA KOKUBI BESIYA KOKUBI KAKHULU

8-10. (a) U-2 Thimothi 3:1-5 ugcwaliseka njani? (b) Kungani singathi abantu lokhu besuka kokubi besiya kokubi kakhulu?

⁸ Isizathu sesibili esenza siqiniseke ukuthi sekuseduze ukuthi uMbuso kaNkulunkulu uthathe inyathelo emhlabeni yikuthi: Abantu ababi basuka kokubi besiya kokubi kakhulu. Isiphosa ibe likhulu iminyaka silokhu sibubona ububi okwaphrofethwa ngabo ku-2 Thimothi 3:1-5. Sobugcwele yonke indawo, sebuthethe isikhathi eside njalo buqhubekela phambili. Uyakunanzelela yini ukuthi isiphrofetho lesi sesigcwaliseke ngendlela engakaze ibonakale? Asihloleni izibonelo ezikucacisayo konke lokhu.​—Bala u-2 Thimothi 3:1, 13.

⁹ Cabanga ngomehluko okhona phakathi kwalokho okwakusethusa ngabo-1940 kumbe ngabo-1950 lalokho okwenzakalayo lamuhla emisebenzini, kwezokuzilibazisa, emidlalweni kanye lasekugqokeni. Udlakela olwesabekayo lokungaziphathi kugcwele yonke indawo. Abantu bayancintisana ngokuthi ngubani oyingqwele, ongaziphathanga kumbe ololunya kulabanye bonke. Izinto ezazisethusa ku-TV ngabo-1950 sezibalwa njengezingabukelwa yimuli yonke nje. Abanengi sebekunanzelela ukuthi izitabane lazo azisatshiywa phandle ezindabeni zokuzilibazisa lezokugqoka, zikhankasela lokuthi umphakathi wamukele indlela eziphila ngayo. Siyajabula kakhulu ngenxa yokuthi siyawazi umbono kaNkulunkulu.​—Bala uJuda 14, 15.

¹⁰ UmKhristu angakhangela izinto okwakuthiwa yikuba lihlongandlebe nxa umntwana ezenza ngabo-1950 aqathanise lalokhu osekusenzakala kulezinsuku. Kudala abazali babezihlupha ngokuthi abantwababo bayabhema yini, bayanatha utshwala kumbe bagida okungelasithunzi na. Lamuhla imibiko eyethusayo siyizwa nsukuzonke enjengokuthi: Umntwana wesikolo oleminyaka engu-15 udubula afunda labo, abulale ababili, njalo alimaze abangu-13. Iqembu labasakhulayo abadakiweyo libulala ngesihluku inkazana eleminyaka engu-9 liphinde libhaxabule uyise lomzawakhe. Kubikwa ukuthi eminyakeni engu-10 edlulileyo ingxenye yamacala kwelinye ilizwe lase-Asia ibisenziwa ngabasakhulayo. Ukhona yini ongaphika ukuthi izinto sezizimbi kakhulu khathesi?

11. Kungani abantu abanengi belokhu bengakunanzeleli ukuthi izinto sezizimbi kakhulu?

¹¹ Umphostoli uPhetro wacacisa ukuthi: “Ngezinsuku zokucina kuzafika abaklolodayo baklolode belandela izinkanuko zabo ezimbi. Bazakuthi, ‘kungaphi “ukuza” lokho akuthembisayo? Selokhu obaba bafayo, konke kuqhubeka njengokwakuvele kusenzakala kusukela ekuqaleni kokudaliweyo.’” (2 Phet 3:3, 4) Kuyini okungenza abanye abantu bacine bekhuluma izinto ezinje? Kukhanya angani nxa umuntu angajayela ulutho oluthile kulula ukuthi acine engasalunaki. Ukululazeka kokuziphatha okwenzakala kancane kancane emphakathini akumangalisi kakhulu njengokubona umuntu omjayeleyo ephonguvuka entshintshile indlela enza ngayo. Lanxa lokhu kusenzakala mbijana mbijana kuyingozi.

12, 13. (a) Kungani kungamelanga siqedwe amandla yizinto ezenzakala emhlabeni? (b) Kuyini okuzasenza senelise ukubekezela lanxa izinto ‘zisibanzima’?

¹² Umphostoli uPhawuli wasilimukisa ukuthi ‘ezinsukwini zokucina’ izinto ‘zizabanzima.’ (2 Tim. 3:1) Lanxa izinto zinzima akumelanga siphelelwe lithemba. Sizanqoba loba yikuphi ukwesaba lobuhlungu obungasehlela ngoba silosizo lukaJehova, umoya wakhe, kanye lebandla lobuKhristu. Kungenzeka ukuthi sihlale sithembekile. “Amandla la amakhulukazi” kawaveli kithi kodwa avela kuNkulunkulu.​—2 Khor. 4:7-10.

¹³ UPhawuli waqalisa isiphrofetho esimayelana lezinsuku zokucina ngomutsho othi, “nanzelela lokhu.” Amazwi la aqinisekisa ukuthi isiphrofetho lesi sizagcwaliseka loba sekutheni. Kucacile ukuthi umphakathi wabantu abangamesabiyo uNkulunkulu uzaqhubeka usuka kokubi usiya kokubi kakhulu, uJehova aze azowuthanyela wonke. Abakhangela imbali babhala ukuthi izizwe ezithile lapha lalaphayana zake zagcwala ukuziphatha okubi njalo ekucineni zadilika. Akukaze kubonakale embalini ukuthi abantu emhlabeni wonke baziphathe ngendlela engalasithunzi njengakhathesi. Abantu bangakuthatha kancane ukuthi lokhu kungabe kusitshoni, kodwa obekusenzakala kusukela ngo-1914 yibufakazi obucacileyo okumele busenze sibe leqiniso lokuthi uMbuso kaNkulunkulu usuzathatha inyathelo eliqinileyo.

ISIZUKULWANE LESI KASIYIKUDLULA

14-16. Yisiphi isizathu sesithathu esenza sikholwe ukuthi sekuseduze ukuthi uMbuso kaNkulunkulu ‘uze’?

¹⁴ Kulesizathu sesithathu esisenza siqiniseke. Izinto ebezisenzakala ebantwini bakaNkulunkulu zitshengisa ukuthi ukuphela sekuseduze. Ngokwesibonelo uMbuso kaNkulunkulu ungakaqalisi ukubusa ezulwini, abagcotshiweyo abathembekileyo babemkhonza uNkulunkulu beliqembu. Kuyini abakwenzayo lapho ezinye izinto ababezilindele ngo-1914 zingenzakali? Abanengi bahlala beqotho baqhubeka bemkhonza uJehova lanxa babelingwa njalo behlukuluzwa. Eminyakeni eyalandelayo, phose bonke abagcotshiweyo bahlale bethembekile kwaze kwaba sekufeni.

¹⁵ Esiphrofethweni sakhe esasiphathelane lokuphela kwesikhathi uJesu wathi: “Lesisizukulwane kasiyikudlula zingakenzakali zonke lezi izinto.” (Bala uMathewu 24:33-35.) Esikuzwisisayo yikuthi uJesu ekhuluma ‘ngalesisizukulwane’ wayesitsho amaqembu amabili amaKhristu agcotshiweyo. Iqembu lokuqala lalikhona ngo-1914 njalo lazwisisa isibonakaliso sokuba khona kukaKhristu ngalowo mnyaka. Leli kwakungasilo qembu labantu nje ababephila ngo-1914 kodwa kwakungamadodana kaNkulunkulu ayegcotshwe ngomoya ngomnyaka lo kumbe umnyaka lo ungakafiki.​—Rom. 8:14-17.

¹⁶ Iqembu lesibili ‘kulesisizukulwane’ ngabagcotshiweyo abaphila ngesikhathi esifananayo leqembu lokuqala. Laba bagcotshwa ngomoya ongcwele ngesikhathi abeqembu lokuqala besesemhlabeni. Ngakho-ke ayisibo bonke abagcotshiweyo abakhona lamuhla abaseqenjini ‘lalesisizukulwane’ esatshiwo nguJesu. Lamuhla labo ababumba iqembu lesibili sebegugile. Kodwa amazwi kaJesu akuMathewu 24:34 enza sibe lethemba lokuthi “lesisizukulwane kasiyikudlula” singakaboni ukuqalisa kokuhlupheka okukhulu. Lokhu kumele kusenze siqiniseke kakhulu ukuthi sekusele isikhathi esifitshane nje ukuthi iNkosi yoMbuso kaNkulunkulu itshabalalise abantu ababi ibisiletha umhlaba omutsha olokulunga.​—2 Phet. 3:13.

SEKUSEDUZE UKUTHI UKHRISTU AQEDISE UKUNQOBA KWAKHE

17. Singaphetha ngokuthini nxa sikhangele ubufakazi obuthathu esibuhlolileyo?

¹⁷ Siphetha ngokuthini ngemva kokubona ubufakazi lobu obuthathu esibuhlolileyo? UJesu wasixwayisa ukuthi kasilazi ilanga kumbe ihora njalo kasisoze silazi. (Mat. 24:36; 25:13) Kodwa siyakwazi ukuthi ‘isikhathi sesifikile ukuba sivuke ebuthongweni’ njengoba uPhawuli wakhuluma. (Bala uRoma 13:11.) Siphila ezinsukwini zokucina. Nxa singahlolisisa iziphrofetho eziseBhayibhilini ngokugcweleyo kanye lalokho okwenziwa nguJehova uNkulunkulu loJesu Khristu, ngeke sehluleke ukubona ubufakazi obusegcekeni bokuthi sesiseduze kakhulu lokuphela komumo lo wezinto.

18. Bazakwenziwani labo abangelandaba loMbuso kaNkulunkulu?

¹⁸ Sekuseduze ukuthi babone ukuthi bayazikhohlisa labo abangavumiyo ukuthi uJesu Khristu, uMgadi webhiza elimhlophe onqobayo usenikwe amandla amakhulu. Abasoze baphunyuke. Abanengi ngokwesaba bazakhala bathi: “Ngubani ongema na?” (Isam. 6:15-17) Impendulo siyithola esahlukweni esilandelayo seSambulo. Abagcotshiweyo kanye lalabo abalethemba lokuphila emhlabeni ‘bazakuma’ ngalelolanga ngoba bazabe bethokozise uNkulunkulu. Ngemva kwalokho, ‘ixuku elikhulukazi’ elibumba ezinye izimvu lizasinda ekuhluphekeni okukhulu.​—Isam. 7:9, 13-15.

19. Kuyini okulindeleyo njengomuntu obona ubufakazi obucacileyo bokuthi sekuseduze ukuthi izinsuku zokucina ziphele?

¹⁹ Nxa singazimisela ukuhlala sicabangisisa ngeziphrofetho eziseBhayibhilini ezigcwaliseka esikhathini sethu, asisoze siphanjaniswe ngokwenzakala emhlabeni obuswa nguSathane njalo asisoze sibe yiziphofu mayelana lokuthi izenzakalo zomhlaba lo zitshoni. Sekuseduze ukuthi uKhristu aqedise ukunqoba kwakhe abantu abangamesabiyo uNkulunkulu ngokulwa impi yokucina ngokulunga. (Isam. 19:11, 19-21) Ukucabanga ngalokho esikuthenjiswayo eBhayibhilini kuzakwenza sithokoze kakhulu.​—Isam. 20:1-3, 6; 21:3, 4.