UJehova Ungibona Ngingumuntu Onjani?
1. IBhayibhili lifanana njani lesibuko?
1 Uzibuka kangaki esibukweni? Inengi lethu lizibuka nsuku zonke ngenxa yokuthi lokhu kusinceda sibone ukuthi kungaphi lapho esingalungisa khona. IBhayibhili lifananiswa lesibuko. ILizwi likaNkulunkulu liyasinceda ukuze sibone ukuthi sinjani enhliziyweni, ngoba uJehova ubona izinhliziyo zethu. (1 Sam. 16:7; Jak. 1:22-24) ILizwi likaNkulunkulu “lahlulela imicabango lomumo wenhliziyo.” (Heb. 4:12) Ukubala iBhayibhili nsuku zonke kanye lokucabangisisa ngalokho esikubalayo kusinceda ukuthi sibone lokho esingakulungisa ukuze sibe ngabatshumayeli abaphumelelayo.—Hubo. 1:1-3.
2. IBhayibhili lingasinceda njani ukuthi sizihlole?
2 Sebenzisa IBhayibhili Njengesibuko: Izindaba eziseBhayibhilini zezinceku zikaJehova ezithembekileyo zisifundisa izimpawu zobuntu azithandayo. Ngokwesibonelo, uDavida watshengisa ukuthi uyalithanda ibizo likaNkulunkulu. (1 Sam. 17:45, 46) U-Isaya watshengisa isibindi ngokuzinikela ukuthi ayetshumayela ebantwini abangalaleliyo. (Isaya. 6:8, 9) UJesu wayemthanda kakhulu uYise osezulwini futhi lokho kwamenza wabona inkonzo imnandi futhi imenza asuthiseke. Kazange ayibone ingumthwalo onzima. (Joh. 4:34) AmaKhristu ekhulu lokuqala atshumayela ngentshiseko, athembela kuJehova futhi aqhubekela phambili ngokuzimisela. (ImiSeb. 5:41, 42; 2 Khor. 4:1; 2 Tim. 4:17) Ukucabangisisa ngezibonelo lezi kusinceda ukuthi sizihlole ngenjongo yokufuna ukuthuthukisa inkonzo yethu engcwele.
3. Kungani kungamelanga sibalise nxa kulalapho okumele silungise khona?
3 Lungisa Okumele Ukulungise: Kakusincedi ukuzibuka esibukweni besesitshiya okuphambanisekileyo kungalungiswanga. Singacela uJehova asincedise ukuthi sizibone ngendlela eqondileyo futhi silungise lapho okumele silungise khona. (Hubo. 139:23, 24; Luk. 11:13) Kakumelanga sibalise nxa kulalapho okumele silungise khona ngoba isikhathi esiseleyo sincane futhi izimpilo zabantu zisengozini.—1 Khor. 7:29; 1 Tim. 4:16.
4. Kwenzakalani emuntwini obala iLizwi likaNkulunkulu abesesenza lokho elikutshoyo?
4 UJehova ubona inhliziyo ngakho yiyo eqakatheke ukwedlula ukukhangeleka kwethu kwangaphandle. (1 Phet. 3:3, 4) Kwenzakalani emuntwini obala iLizwi likaNkulunkulu abesesenza lokho elikutshoyo? ‘Kakhohlwa asekuzwile, kodwa uyakwenza-uzabusiswa kulokho akwenzayo.’ (Jak. 1:25) Sizathokoza futhi sincede abantu ekutshumayeleni ngenxa yokuthi siyabe “sibonakalisa inkazimulo yeNkosi.”—2 Khor. 3:18.