Yiwo Wonke Yini Amaholideyi Athokozisa UNkulunkulu?

UJehova ufuna siyikholise impilo njalo sibe lezikhathi ezimnandi. Kodwa yiyo yonke yini imibuthano lamaholideyi athokozisa uNkulunkulu? Singatshengisa njani ukuthi siyamthanda uJehova endabeni le?

1. Kungani amaholideyi amanengi engamthokozisi uJehova?

Amaholideyi amanengi awavumelani lalokho okutshiwo liBhayibhili ngoba asekela imfundiso zamanga. Amanye alesidimoni ikanti amanye asekela imfundiso yokuthi umphefumulo awufi. Amanye njalo asekela imfundiso zabantu ezimayelana lenhlanhla. (U-Isaya 65:11) UJehova uthi kulabo abamkhonzayo: “Phumani kubo, lehlukane labo, . . . njalo lingathinti into engcolileyo.”—2 KwabaseKhorinte 6:17.a

2. UJehova uthini ngemibuthano lamaholideyi aqakathekisa abantu?

UJehova uthi akumelanga ‘sithembele ebantwini.’ (Bala uJeremiya 17:5.) Amanye amaholideyi ngawokuqakathekisa ababusi, amasotsha, uphawu lwesizwe kumbe usuku lokuthola uzibuse. (1 UJohane 5:21) Amanye njalo ngawokuqakathekisa ukutshintsha izinto emphakathini. Ubona angani uJehova uzwa njani nxa siqakathekisa abantu kumbe inhlanganiso eziphikisana lenjongo yakhe?

3. Kuyini okwenzakala kweminye imibuthano okungathokozisi uJehova?

IBhayibhili lithi sixwaye ‘ukunatha kakhulu, lamadili axokozelayo, lemibuthano yokunatha utshwala.’ (1 UPhetro 4:3) Kwamanye amadili kujayele ukuba lokuziphatha okulihlazo. Nxa sifuna ukuhlala singabangane bakaJehova kumele sibalekele ukuziphatha okunjalo.

GEBHA UJULE

4. Ungahlanganyeli emibuthanweni lakumaholideyi azondwa nguJehova

Bala u-Efesu 5:10 beselixoxa ngemibuzo le:

• Kuyini okumele sicabange ngakho nxa sikhetha ukuthi sizananza yini iholideyi ethile loba hatshi?

• Yiwaphi amaholideyi ajayelekileyo lapho ohlala khona?

• Ucabanga ukuthi ayamthokozisa yini uJehova?

Uyake uzibuze yini ukuthi uNkulunkulu uthini ngokuthakazelela usuku lokuzalwa? Akulanceku kaJehova okukhulunywa ngayo eBhayibhilini eyathakazelela usuku lwayo lokuzalwa. Kodwa iBhayibhili lisitshela ngabantu ababili ababengamkhonzi uJehova abathakazelela insuku zabo zokuzalwa. Bala uGenesisi 40:20-22 loMathewu 14:6-10 beselixoxa ngemibuzo elandelayo:

• Amadili la afanana njani?

• Nxa ukhangela izibonelo lezi, ubona angani uJehova uzwa njani ngokuthakazelela insuku zokuzalwa?

Kodwa engxenye uyazibuza ukuthi, ‘UJehova ulendaba yini nxa ngingabakhona embuthanweni wokuthakazelela usuku lokuzalwa loba omunye nje ongavumelani lalokho okutshiwo liBhayibhili?’ Bala u-Eksodusi 32:1-8. Ngemva kwalokho bukelani IVIDIYO beselixoxa ngemibuzo elandelayo.

IVIDIYO: Amakhefu Lamadili Angamthokozisiyo UNkulunkulu (5:07)

• Kungani kuqakathekile ukudinga ukuthi kuyini okuthokozisa uJehova?

• Ungakwenza njani lokhu?

Ungabakwazi njani ukuthi iholideyi ethile iyamthokozisa yini uNkulunkulu?

• Isekelwe emfundisweni ezingavumelani lalokho okutshiwo liBhayibhili yini? Hlolisisa ukuthi yaqalisela ngaphi.

• Iqakathekisa kakhulu abantu, inhlanganiso kumbe uphawu lwesizwe yini? Kumele sihloniphe uJehova ukwedlula loba ngubani futhi sithembe ukuthi nguye ozaqeda inhlupho ezigcwele emhlabeni.

• Okwenzakala emadilini akhona akuphikisani yini lalokho esikutshelwa liBhayibhili? Kumele sihlale sihlanzekile ekuziphatheni.

5. Bachasisele ngenhlonipho abanye

IVIDIYO: Chasisa Ngenhlonipho Lokho Okukholwayo (2:01)

Bala uMathewu 7:12 beselixoxa ngemibuzo le:

• Kuqondile yini ukutshela izihlobo zakho ukuthi akumelanga zihlanganyele embuthanweni loba kuholideyi ethile?

• Ungenzani ukuze utshengise izihlobo zakho ukuthi uyazithanda lanxa ungahlanganyeli lazo kweminye imibuthano?

6. UJehova ufuna sithokoze

UJehova ufuna sikholise ukuba ndawonye lezihlobo zethu labangane bethu. Bala umTshumayeli 8:15 beselixoxa ngombuzo olandelayo:

• Ivesi le itshengisa njani ukuthi uJehova ufuna sithokoze?

UJehova ufuna sibe lezikhathi ezimnandi sindawonye. Bukelani IVIDIYO ukuze ubone ukuthi abafowethu labodadewethu bakholisa njani nxa besemihlanganweni yezizwe.

IVIDIYO: Ukwamukela Abafowethu Labodadewethu Emihlanganweni Yezizwe (5:40)

Bala uGalathiya 6:10 beselixoxa ngemibuzo le:

• Kumele silindele iholideyi ethile yini ukuze senzele abanye okuhle?

• Ubona angani kuyini okungakuthokozisa phakathi kokunika abantu izipho lapho okhangelelwe khona ukuthi wenze njalo kumbe ukubanika loba nini lapho owenelisa khona?

• OFakazi abanengi bajayele ukwenzela abantwababo izinto ezinhle kumbe ukubanika izipho loba nini. Kuyini ongakwenzela abantwabakho?

ISIFINQO

UJehova ufuna sikholise ukuba ndawonye lezihlobo labangane, kodwa kafuni sinanze amaholideyi angamthokozisiyo.

Ufundeni?

• Ungabakwazi njani ukuthi umbuthano loba iholideyi ethile iyamthokozisa yini uJehova?

• Ungabachasisela njani abangakini kumbe abangane bakho ukuthi kungani ungahlanganyeli labo kweminye imibuthano?

• Sikwazi njani ukuthi uJehova ufuna sikholise njalo sibe lezikhathi ezimnandi?

THOLA OKUNENGI

Bala isihloko lesi uzwe ukuthi yiwaphi amanye amaholideyi okungamelanga amaKhristu eqiniso ahlanganyele kuwo.

“Kungani OFakazi BakaJehova Bengananzi Amaholideyi?” (Isihloko esikuwebhusayithi yethu)

Bala isihloko lesi ubone izizatho ezine ezenza ukuthakazelela insuku zokuzalwa kungamthokozisi uNkulunkulu.

“Kungani OFakazi BakaJehova Bengananzi Izinsuku Zokuzalwa?” (Isihloko esikuwebhusayithi yethu)

Bukela ividiyo le ubone ukuthi abantwana bangenzani ukuze bathokozise uJehova.

Uligugu KuJehova (11:35)

Bala isihloko lesi uzwe ukuthi kungani amaKhristu eqiniso engananzi iKhisimusi.

“Akulanto Eyabalahlekelayo” (INqabayokulinda, December 1, 2012)