Ufuna Udumo Oluvela Kubani?

1. Yisiphi isifiso wonke umuntu alaso futhi sigoqelani?

UNGEZWA njani nxa umuntu omaziyo njalo omhloniphayo engakutshela ukuthi kalazi ibizo lakho futhi kalaqiniso ukuthi liyazana? Ukuzwa amazwi anjalo kuzwisa ubuhlungu sibili. Lokhu kungenxa yokuthi sonke sadalwa silesifiso sokwaziwa kanye lesokuqakathekiswa ngabanye. Kasifuni ukuthi abantu basazi ukuthi singobani nje kuphela kodwa sifisa ukuthi bazi ubuntu bethu kanye lalokho esikufezileyo empilweni.—Nani. 11:16; Jobe. 31:6.

2, 3. Ukufuna ukwaziwa kungasiphambanisa njani? (Khangela umfanekiso osekuqaliseni.)

² Kumele sinanzelele ngoba isono esilaso singabangela ukuthi sidlulise amalawulo endabeni yokufuna ukwaziwa lokunikwa udumo ngabantu. Abantu abanengi emhlabeni lo obuswa nguSathane bagijimisa ukuthola udumo kanye lokuba ngomhlonitshwa. Lokhu kwenza bakhohlwe ngoJehova uBaba wethu osezulwini onguye okumele akhonzwe futhi anikwe udumo.—Isam. 4:11.

³ Ngesikhathi sikaJesu abakhokheli benkolo babekuthanda ukudunyiswa ngabantu. UJesu waxwayisa abalandeli bakhe wathi: “Limukani abafundisi bomthetho. Bathanda ukuhambahamba becece ngezigqoko ezinde eziphephezelayo njalo bathanda ukubingelelwa emisikeni, futhi bathanda izihlalo ziqakathekileyo emasinagogeni lezindawo zabahlonitshwa emadilini.” Waseqhubeka wathi: “Abantu abanjalo bazajeziswa okwesabekayo.” (Luk. 20:46, 47) UJesu kazange athatheke ngalokho okwakusenziwa ngabakhokheli benkolo kodwa wakhangwa yisenzo somfelokazi ongumyanga owanikela ngemadlana eyayingakhanya ingatsho lutho kwabanye. (Luk. 21:1-4) Siyabona-ke ukuthi lokho okwakuqakathekiswa nguJesu kwakutshiyene kakhulu lokwabanye abantu. Esihlokweni lesi sizaxoxa ngalokho okungasinceda ukuthi sibe lombono kaJehova mayelana lendaba yokufuna udumo lokwaziwa ngabantu.

UKWAZIWA KANYE LOKUNIKWA UDUMO NGUMDALI WEZINTO ZONKE

4. Ngubani okufanele siqakathekise ukwaziwa nguye njalo kungani?

⁴ Ukwaziwa nguJehova lokuthola udumo oluvela kuye kuqakatheke ukwedlula loba yini esingayithola emhlabeni lo. Abantu abanengi bakufuna ngabomvu ukuthola udumo lokwaziwa yikho bexotshana lemfundo ephezulu, amabhizimusi kanye lokuba zintshantshu kwezemidlalo loba kwezokuzilibazisa. Kodwa uPhawuli wabhala ngalokho okufanele sikuqakathekise, wathi: “Khathesi uNkulunkulu selimazi, loba ngithi uNkulunkulu uselazi—pho kwenzakala njani ukuthi liyabuyela emuva kuleyana imikhuba ebuthakathaka leyize na? Liyafuna yini ukuba ligqilazwe yiyo njalo na?” (Gal. 4:9) ‘Ukwaziwa nguNkulunkulu’ umbusi wendawo yonke yisibusiso esikhulu kakhulu. UJehova uyasazi sonke, uyasithanda kakhulu futhi ufuna sibe ngabangane bakhe. Wasidala ngoba wayehlose ukuthi sihlale silobuhlobo obuhle laye.—UmTshu. 12:13, 14.

5. Kuyini okumele sikwenze ukuze saziwe nguJehova?

⁵ UMosi wakubona ukuthi ukwaziwa nguJehova kuhle kakhulu. Ngelinye ilanga wacela uJehova wathi: “Uma uthokoza ngami ngifundisa izindlela zakho ukuze ngikwazi.” UJehova wamphendula wathi: “Ngizakwenza khona kanye lokhu okucelileyo ngoba ngiyathokoza ngawe, njalo ngikwazi ngebizo.” (Eks. 33:12-17) Lathi sizathola izibusiso nxa uJehova esesazi njengoMosi. Kodwa kuyini okumele sikwenze ukuze saziwe nguJehova? Kufanele simthande ngenhliziyo yonke njalo sizinikele kuye.—Bala u-1 Khorinte 8:3.

6, 7. Kuyini okungaphambanisa ubuhlobo bethu loJehova?

⁶ Okunye okumele sikwenze yikugcina ubuhlobo bethu loJehova buqinile. UPhawuli waxwayisa amaKhristu aseGalathiya ngengozi yokugqilazwa ‘yimikhuba ebuthakathaka leyize’ egoqela lokufuna udumo emhlabeni lo. (Gal. 4:9) Abazalwane baseGalathiya basebemazi uNkulunkulu futhi laye wayesebazi. Kodwa uPhawuli waveza ukuthi abazalwane laba basebeqala ‘ukubuyela’ ezintweni eziyize. Ngamanye amazwi uPhawuli wayesithi kubo: “Kungani selihlehlela emuva njalo selibuyela ezintweni ezingelancedo elazitshiya kudala?”

⁷ Lathi kumele siqaphele ngoba singacina sibuyela ezintweni esazitshiya emuva. Kungenzakala ukuthi sathi siqala ukwazi uJehova salingisela uPhawuli ngokudela izinto ezazingenza sibe ngabantu abadumileyo emhlabeni lo. (Bala uFiliphi 3:7, 8.) Abanye bangabe batshiya imfundo ephezulu, bala ukuphiwa izikhundla emisebenzini njalo badela amabhizimusi ayengabenza babe ngomali iyavuza. Ikanti abanye babelethuba lokuthola udumo lenotho ngenxa yeziphiwo zokuhlabela kanye lokuba zintshantshu kwezemidlalo kodwa bakufulathela konke lokhu. (Heb. 11:24-27) Kuyabe kuyibuthutha sibili ukucabanga ukuthi ukutshiya izinto lezi kwakufana lokukhahlela inhlanhla ngamazwane. Ukuba lomcabango onjalo kungabangela ukuthi sibuyele ‘emikhutsheni ebuthakathaka leyize’a esayitshiya kudala.

QAKATHEKISA UDUMO OLUVELA KUJEHOVA

8. Kuyini okungasisiza ukuthi siqakathekise udumo oluvela kuJehova?

⁸ Kuyini okungasinceda ukuthi sibe lesifiso esikhulu sokuthola udumo oluvela kuJehova njalo singathatheki ngokufuna udumo emhlabeni lo? Kufanele sicabangisise ngemicijo emibili eqakatheke kakhulu. Owokuqala, akumelanga sikhohlwe ukuthi uJehova uyabanika udumo zikhathi zonke abantu abamkhonza ngokuthembeka. (Bala uHebheru 6:10; 11:6) Abantu abanjalo baligugu kakhulu kuye futhi kasoze abalahlele iganga. IBhayibhili lithi: “UJehova uyabazi labo abangabakhe.” (2 Tim. 2:19) Lisitshela lokuthi, “uyayilinda indlela yabalungileyo” njalo uyakwazi ukuhlenga abantu abamesabayo ekulingweni.—Hubo. 1:6; 2 Phet. 2:9.

9. Nika izibonelo ezitshengisa ukuthi uJehova uyabaqakathekisa abantu bakhe.

⁹ Kwezinye izikhathi uJehova wayesebenzisa izindlela ezimangalisayo ukuze atshengise ukuthi uyabaqakathekisa abantu bakhe. (2 ImiLan. 20:20, 29) Khumbula ukuthi uJehova wabavikela njani abantu bakhe eLwandle Olubomvu ngesikhathi ibutho likaFaro lixotshana labo lifuna ukubahlasela. (Eks. 14:21-30; Hubo. 106:9-11) Isenzakalo lesi saba yindaba esegudwini ngoba langemva kweminyaka engu-40 abantu bezinye izizwe babelokhu besibabaza. (Josh. 2:9-11) Ukucabangisisa ngalokho okwenziwa nguJehova endulo kuyasiqinisa futhi kwenza sibone ukuthi kasoze asitshiye ngesikhathi sihlaselwa nguGogi waseMagogi. (Hez. 38:8-12) Ngalesosikhathi sizathokoza kakhulu ngesinqumo esasenzayo sokukhetha ukwaziwa nguNkulunkulu kulofuna udumo emhlabeni lo.

10. Yiwuphi umcijo wesibili okungamelanga siwukhohlwe?

¹⁰ Umcijo wesibili okungamelanga siwukhohlwe yilo: UJehova uyenelisa ukusinika udumo ngendlela esiyabe singayicabangeli. UJehova kasoze abanike umvuzo abantu abenza izenzo ezinhle phambi kwabantu ukuze babonwe. Lokhu kungenxa yokuthi udumo abaluphiwa ngabantu yiwo umvuzo wabo. (Bala uMathewu 6:1-5.) Kodwa labo abangalutholiyo udumo ngezenzo zomusa abazenzayo bazabusiswa. UJesu waveza ukuthi uJehova ukhangele ensitha, uyakubona okuhle abakwenzayo futhi uzabanika umvuzo. Kwezinye izikhathi uJehova angakwenza lokhu ngendlela esingayicabangeliyo. Ake sibone ukuthi wakwenza njani kwezinye izinceku zakhe.

WAPHIWA UDUMO NGENDLELA AYENGAYICABANGELI

11. Kuyini okwenza uMariya waphiwa udumo?

¹¹ UJehova wakhetha intombi eyayithobekile okuthiwa nguMariya ukuthi ibe ngunina weNdodana yakhe uJesu. Intombi le yayihlala edolobheni leNazaretha elalikhangelelwa phansi njalo likhatshana leJerusalema kanye lethempeli. (Bala uLukha 1:26-33.) Kuyini okwenza uJehova wakhetha uMariya? UMariya wayemthanda kakhulu uJehova. Lokhu sikubona emazwini awakhuluma ngesikhathi evakatshele isihlobo sakhe u-Elizabethi. Ingilosi uGabhriyeli yafika kuye yathi: “Uthole umusa kuNkulunkulu.” (Luk. 1:46-55) Lokhu kutshengisa ukuthi uJehova wayekubona ukuthembeka kukaMariya futhi wambusisa ngendlela ayengayicabangeli.

12, 13. Chaza okwenziwa nguJehova ngesikhathi uJesu ezalwa langemva kwensuku ezingu-40 uMariya efika laye ethempelini.

¹² Ngesikhathi uJesu ezalwa, uJehova wamnika udumo ngendlela abantu ababengayicabangeli. Kazange abikele ababusi beJerusalema labaseBhethilehema ngokuzalwa kweNdodana yakhe. Kodwa wathuma izingilosi zakhe ukuthi ziyetshela abelusi ababelinde imihlambi yabo emlageni. (Luk. 2:8-14) Ngemva kwalokho abelusi baphuthuma baya eBhethilehema ukuze bayebona lowomntwana ozelweyo. (Luk. 2:15-17) Kumele ukuthi uMariya loJosefa bamangala bebona uJehova esethula umntwana lo owayeqakathekile ebantwini ababekhangelelwa phansi. Lokhu kwenza sibone ukuthi indlela uJehova enza ngayo izinto itshiyene lekaSathane. Ngesikhathi uSathane ethumela izazi zezinkanyezi kuJesu, indaba yokuzalwa kwakhe yahle yamemetheka futhi kwaba lokuxokozela eJerusalema. (Mat. 2:3) Isenzo sakhe lesi sabangela ukuthi kubulawe abantwana abanengi ababengelacala.—Mat. 2:16.

¹³ Ngemva kwezinsuku ezingu-40 uJesu ezelwe, uJosefa loMariya bathatha uhambo lwamakhilomitha angaba ngu-9 besiya ethempelini, eJerusalema. Phela uMthetho kaMosi wawusithi nxa owesifazana angabeletha kumele ayenikela kuJehova ngemva kwezinsuku ezingu-40. (Luk. 2:22-24) Kumele ukuthi ngesikhathi uMariya ephakathi kohambo lolu wayesidla amathambo engqondo, ezibuza ukuthi kukhona yini okuzakwenziwa ngumphristi ukuze anike uJesu udumo? Iqiniso elikhona yikuthi izinto zenzakala ngendlela uMariya ayengayicabangeli. UJehova wasebenzisa indoda elungileyo okwakuthiwa nguSimiyoni lomphrofethikazi u-Anna owayeleminyaka engu-84 ukuze aveze ukuthi umntwana lo nguye owayezakuba nguMesiya owayethenjisiwe.—Luk. 2:25-38.

14. UJehova wambusisa njani uMariya?

¹⁴ UMariya wabusiswa yini ngomsebenzi awenzayo wokondla lokukhulisa iNdodana kaNkulunkulu? Ye wabusiswa sibili. UJehova waphefumulela amadoda athile ukuthi abhale indaba kaMariya eBhayibhilini. Kukhanya uMariya kazange enelise ukuhamba loJesu ngesikhathi esenza inkonzo yakhe okweminyaka emithathu lengxenye. Mhlawumbe ukuba ngumfelokazi yikho okwenza kwaba nzima ukuthi ahlanganyele enkonzweni le. Lanxa engazange athole ithuba lokubona izinto ezinengi ezenziwa nguJesu wenelisa ukuba khona ngesikhathi sokufa kwakhe. (Joh. 19:26) Ngokuya kwesikhathi uMariya simbona ebuthene labafundi bakaJesu eJerusalema ngezinsuku ezandulela umkhosi wePhentekhosti. (ImiSeb. 1:13, 14) Kungenzakala ukuthi uMariya wagcotshwa labanye abafundi ngesikhathi umoya ongcwele usehlela phezu kwabo ngosuku lwePhentekhosti. Lokhu kwamvulela ithuba lokuyaphila ezulwini loJesu kuze kube phakade. Kambe sikhona yini isibusiso esedlula lesi?

UJEHOVA WATSHENGISA UKUTHI UYAYITHANDA INDODANA YAKHE

15. UJehova watshengisa njani ukuthi uyayithanda iNdodana yakhe ngesikhathi isemhlabeni?

¹⁵ UJesu wayengalufuni udumo oluvela kubabusi kanye labakhokheli benkolo kodwa wathola udumo oluvela kuYise uJehova. Ngokwesibonelo uJehova wakhuluma laye okwamahlandla amathathu eveza ukuthi uyamthanda kakhulu. Kumele ukuthi ukuzwa lokhu kwamkhuthaza uJesu. Ngokwesibonelo wathi esanda kubhabhathizwa emfuleni uJodani, uJehova wathi: “Lo yiNdodana yami engiyithandayo; ngiyathokoza kakhulu ngayo.” (Mat. 3:17) Kukhanya kulelihlandla uJohane uMbhabhathizi nguye kuphela owezwa uJehova ekhuluma leNdodana yakhe. Kodwa kwathi sekusele phose umnyaka ukuthi uJesu afe, abaphostoli bakhe abathathu bazizwela ngezabo uJehova esithi: “Lo yiNdodana yami engiyithandayo; ngiyathokoza kakhulu ngayo. Yilaleleni!” (Mat. 17:5) UJehova waphinda wakhuluma loJesu ngesikhathi sekusele insukwana ukuthi abulawe.—Joh. 12:28.

16, 17. Chaza ukuthi uJehova wamnika njani uJesu udumo ngendlela ayengayicabangeli.

¹⁶ UJesu waqakathekisa ukwenza intando kaYise lanxa wayekwazi ukuthi wayezaphathwa njengomkhohlisi njalo abulawe ngendlela ebuhlungu. (Mat. 26:39, 42) Wabekezelela ukuphathwa ngendlela elihlazo ngoba wayekwazi ukuthi ukuphiwa udumo nguYise kungcono kulokuphiwa udumo ngabantu. (Heb. 12:2) Pho uJehova wamnika mvuzo bani uJesu?

¹⁷ Ngesikhathi uJesu esemhlabeni wathandaza kuYise ecela ukuthi amnike inkazimulo ayelayo kuqala. (Joh. 17:5) Amazwi la atshengisa ukuthi uJesu wayesuthiseka ngalokho ayelakho kuqala. Kanti njalo wayengakhangelelanga ukuphiwa umvuzo owawuzakuba yimbadalo yokuza kwakhe emhlabeni. Lanxa kunjalo uJehova wamnika udumo ngendlela ayengayicabangeli. IMibhalo iveza ukuthi uJesu esevusiwe waphiwa isikhundla esiphezulu kakhulu njalo waba ngowokuqala ukuthola isipho sokungafi.b (Flp. 2:9; 1 Tim. 6:16) Siyabona ke ukuthi uJesu wabusiswa ngenxa yokuthembeka kwakhe.

18. Kuyini okuzasisiza ukuthi singazikhathazi ngokufuna udumo emhlabeni lo esiphila kuwo?

¹⁸ Kuyini okuzasisiza ukuthi singazikhathazi ngokufuna udumo emhlabeni lo esiphila kuwo? Yikukhumbula ukuthi uJehova uyabanika udumo zikhathi zonke labo abathembekileyo kuye njalo uyabanika umvuzo ngezindlela abangazicabangeliyo. Kakho phakathi kwethu ongachaza zonke izibusiso esizazinikwa nguJehova esikhathini esizayo. Ngakho okwakhathesi kasiqhubekeni sibekezelela inhlupho lobunzima esihlangana labo njalo sihlale sikhumbula ukuthi udumo olutholakala emhlabeni lo luzaphelela emoyeni. (1 Joh. 2:17) UBaba wethu uJehova ‘kasuye ongalunganga kasoke awukhohlwe umsebenzi wethu lothando esamtshengisa lona.’ (Heb. 6:10) Uyakubona konke okuhle esikwenzayo njalo uzasibusisa ngendlela esingayicabangeliyo.