Indlela Ubunyonyo Obuklina Ngayo Impondo Zabo

Kuqakathekile ukuthi izibungu zihlale zihlanzekile ukuze zenelise ukuphapha, ukuqansa indawo ezithile kanye lokuzwa izinto ezisemaceleni. Ngokwesibonelo, ubunyonyo busebenzisa impondo zabo ukuze buzwe iminuko, bukhulumisane njalo buhlole izinto ezisemaceleni. Yikho nxa impondo lezi zingcolile, kubanzima ukuthi ubunyonyo benze izinto lezi. U-Alexander Hackmann ohlola indlela inyamazana eziphila ngayo uthi: “Awusoze wafa wathola isibungu esingcolileyo. Okwenza zihlale zihlanzekile yikuthi zilendlela yokuziklina.”

Cabanga ngalokhu: UHackmann labanye bakhe bahlola indlela umhlobo wobunyonyo obuthiwa yi-carpenter ant obuklina ngayo impondo zabo. Bathola ukuthi ubunyonyo lobu buyenelisa ukukhipha ingcekeza esempondweni lezi kungelani lokuthi zingcole okunganani. Okwenzakalayo yikuthi buyagobisa inyawo zaphambili besobudonsa impondo buzifake enyaweni zabo buqalise ukuziklina. Inyawo lezi zilengxenye eloboya obuqinileyo leyinye eloboya obusasibrasho ikanti obunye uboya bubuthakathaka kakhulu. Uboya obuqinileyo busebenza ukukhipha ingcekeza engaphumi lula. Obunjengesibrasho bona yibo obukhipha engahluphiyo ukuphuma ikanti uboya obubuthakathaka bukhipha loba yiphi ingcekeza engabe isalele.

Bukela ividiyo etshengisa indlela ubunyonyo lobu obuklina ngayo impondo zabo

UHackmann leqembu lakhe bacabanga ukuthi ukukopa indlela ubunyonyo lobu obuklina ngayo impondo zabo kunganceda kakhulu. Ngokwesibonelo kunganceda ukuthi kubunjwe imitshina ezakwenelisa ukuziklina ukuze ingangcoli. Ukwenza njalo kuzayilondoloza imitshina le ngoba eminye yakhona iyaphangisa ukufa nxa ingangcola.

Ucabangani: Kwazenzakalela yini ukuthi ubunyonyo obuthiwa yi-carpenter ant benelise ukuklina impondo zabo kumbe kwadalwa?