Amabhuku Asetshenziswe Ku-Gwalo Lwempilo Lenkonzo YamaKhristu
JUNE 4-10
AMAGUGU ASELIZWINI LIKANKULUNKULU UMAKHO 15-16
“UJesu Wagcwalisa Isiphrofetho”
(UMakho 15:3-5) Abaphristi abakhulu bamethesa amacala amanengi. 4 Ngakho uPhilathu wambuza njalo wathi, “Kanti kungani ungaphenduli na? Khangela, bakubeka amacala amanengi.” 5 Kodwa uJesu wala elokhu ethule, uPhilathu wamangala.
(UMakho 15:24) Base bembethela. Bahlukanisa izigqoko zakhe base besenza inkatho ukuze babone ukuthi ngulowo athathe kuphi.
(UMakho 15:29, 30) Labo ababedlula lapho babemthuka benikina amakhanda abo besithi, “Ehe! Wena ozadiliza ithempeli ulakhe ngezinsuku ezintathu, 30 yehla [“esigodweni sokuhlutshwa,” NW] uzisindise!”
nwtsty imicijo yokutaditsha ekuMak 15:24, 29
Bahlukanisa izigqoko zakhe: Indaba ekuJoh 19:23, 24 ingezelela okunye okungabhalwanga nguMathewu, uMakho kanye loLukha: Amasotsha amaRoma enza inkatho ngesigqoko sangaphandle lesaphakathi; asesehlukanisa izigqoko zangaphandle ‘zaba zingxenye ezine, ezilingene ibutho ngalinye’; ayengafuni ukwehlukanisa isigqoko sangaphakathi yikho enza inkatho; njalo ukwenziwa kwenkatho kwagcwalisa isiphrofetho esimayelana loMesiya esikuHu 22:18. Kwakungumkhuba ojayelekileyo ukuthi amasotsha agcine izigqoko zalabo abetheswa icala, yikho izigebenga zazikhitshwa izigqoko futhi zithathelwe konke ezazilakho zingakabulawa. Konke lokhu kwakusenza ziyangeke.
benikina amakhanda abo: Lokhu kwakutshengisa ukweyisa, ukudelela kumbe ukwenza inhlekisa futhi umuntu wayesenza lokhu ekhuluma. Ngokungazi abadlulayo bagcwalisa isiphrofetho esibhalwe kuHu 22:7.
(UMakho 15:43) uJosefa wase-Arimathiya indoda elesithunzi eNkundleni, yona ngokwayo eyayilindele uMbuso kaNkulunkulu, yaqunga isibindi yaya kuPhilathu yacela isidumbu sikaJesu.
(UMakho 15:46) Ngakho uJosefa wasethenga amalembu elineni, wathatha isidumbu wasigoqela ngelineni wasibeka ethuneni elaligujwe edwaleni. Wasegiqela ilitshe emlonyeni wethuna.
nwtsty umcijo wokutaditsha okuMak 15:43
uJosefa: Ukwehlukana kobuntu babalobi bamaVangeli kukhanya endleleni abachaza ngayo uJosefa. UMathewu umthelisi uthi, ‘wayeyindoda enothileyo’; uMakho yena owayebhalela kakhulu amaRoma uthi, ‘wayeyindoda elesithunzi eNkundleni’ owayelindele uMbuso kaNkulunkulu; uLukha udokotela olozwelo uthi, ‘wayeyindoda elungileyo njalo eqondileyo’ engazange isekele lokho okwenziwa yiNkundla kuJesu; nguJohane yedwa obika ukuthi ‘wayengumfundi kaJesu, ekucatshisa ngoba wayesesaba amaJuda.’—Mat 27:57-60; Mak 15:43-46; Luk 23:50-53; Joh 19:38-42.
Ukuchwayisisa IMibhalo
(UMakho 15:25) Kwakulihora lesithathu isikhathi abambethela ngaso.
nwtsty umcijo wokutaditsha okuMak 15:25
Kwakulihora lesithathu: Lapha kutshiwo ngabo-9 ekuseni. Abanye bathi kulokwehlukana endabeni le laleyo ekuJoh 19:14-16 ethi uPhilathu wanikela uJesu ukuba abethelwe “ngehora lesithupha.” Lanxa iMibhalo ingachasisi ukuthi yindaba kulomehluko, nanku okunye esingacabanga ngakho: AmaVangeli wonke ayavumelana ngezikhathi zezenzakalo zosuku lukaJesu lokucina emhlabeni. Wonke amaVangeli athi abaphristi labadala bahlangana ngemva kokusa kwelanga basebethatha uJesu bamhambisa kuSibalukhulu wamaRoma uPhontiyu Philathu. (Mat 27:1, 2; Mak 15:1; Luk 22:66–23:1; Joh 18:28) UMathewu, uMakho kanye loLukha bonke bathi ngesikhathi uJesu esesigodweni sokuhlutshwa umnyama wembesa lonke ilizwe kusukela “ngehora lesithupha kusiya kwelesificamunye.” (Mat 27:45, 46; Mak 15:33, 34; Luk 23:44) Okunye okungabe kwenza kwatshiyana izikhathi zokubethelwa kukaJesu yilokhu: Abanye babebala ukubhaxabulwa kumbe ukutshaywa njengesigaba sokuqala sokuyabulawa. Kwezinye izikhathi umuntu olecala wayetshaywa kubi okokuthi wayesifa. UJesu waqalisa ezithwalele isigodo sokuhlutshwa kodwa ngendlela ayetshaywe ngayo kwakudingeka omunye umuntu ukuthi amthwalele. (Luk 23:26; Joh 19:17) Nxa ukutshaywa kwakubalwa njengesigaba sokuqala sokuyabulawa, kutsho ukuthi kwadlula isikhathi uJesu engakabethelwa esigodweni sokuhlutshwa. Indaba ekuMat 27:26 lakuMak 15:15 iyakusekela lokhu yikho ihlanganisa isikhathi sokutshaywa lesokubethelwa esigodweni. Engxenye lokhu yikho okwenza uPhilathu wamangala esizwa ukuthi uJesu wahle wafa esanda kubethelwa. (Mak 15:44) Ngakho-ke ngenxa yemibono etshiyeneyo abantu bengatsho izikhathi ezitshiyeneyo zokuthi ukubulawa kukaJesu kwaqala nini. Kanti njalo izikhathi ezinengi abalobi beBhayibhili balandela umkhuba owawujayelekile wokwehlukanisa usuku lube zingxenye ezine ezilamahora amathathu ngayinye njengalokho okwakusenziwa ngobusuku. Ukwehlukanisa usuku ngaleyondlela kwenza sizwisise ukuthi kungani iBhayibhili lijayele ukukhuluma ngehora lesithathu, elesithupha kanye lelesificamunye. Izikhathi lezo zazibalwa kusukela ekuphumeni kwelanga ngabo-6. (Mat 20:1-5; Joh 4:6; ImiS 2:15; 3:1; 10:3, 9, 30) Ikanti abantu babengela ndawo eqondileyo yokukhangela isikhathi yikho kujayele ukusetshenziswa ibala elithi “kwakungaba” njengoba sikubona kuJoh 19:14, NW. (Mat 27:46, NW; Luk 23:44; Joh 4:6; ImiS 10:3, 9) Isifinqo: Kungenzakala ukuthi uMakho wahlanganisa ukutshaywa lokubethelwa, uJohane yena wakhuluma ngokubethelwa kuphela. Abalobi laba bangabe bakhetha isikhathi esiseduzane kwehora lesithathu yikho uJohane wasebenzisa ibala elithi “kwakungaba” ekhombela esikhathini ayesitshilo. Lokhu yikho okwenza izikhathi ezisendabeni zehlukane. Kanti njalo ukuthi uJohane wabhala eminyakeni eminengi phambili futhi wakhuluma isikhathi esitshiyeneyo loMakho kutshengisa ukuthi kazange athathe lokho okwakubhalwe nguMakho.
(UMakho 16:8) Abesifazana baphuma bethuthumela njalo bedidekile bebaleka ethuneni. Kabazange batsho ulutho lakubani ngokuba babesesaba.
nwtsty umcijo wokutaditsha okuMak 16:8
ngokuba babesesaba: Ngokwalokho okusemibhalweni yakudala ingxenye yokucina yeVangeli likaMakho iphetha ngamazwi akuvesi 8. Abanye bathi isiphetho lesi siphelela emoyeni okokuthi asingeke sibe yiso esasivele sikhona ekuqaleni. Kodwa uMakho wayebhala efitshanisa yikho lokho abakutshoyo akusebenzi kangako. Kanti njalo izikhwicamfundo ezaphila eminyakeni engaba ngu-300 uJesu efile uJerome lo-Eusebius zitshengisa ukuthi umbhalo lo uphetha ngamazwi athi, “ngokuba babesesaba.”
Ikhona eminye imibhalo yesiGrikhi kanye lamanye amaBhayibhili ahunyutshwe ngezinye izindimi angezelela isiphetho eside kumbe esifitshane ngemva kukavesi 8. Isiphetho eside (silamavesi angu-12) sitholakala kuCodex Alexandrinus, kuCodex Ephraemi Syri rescriptus, lakuCodex Bezae Cantabrigiensis, yonke imibhalo le yabhalwa eminyakeni engaba ngu-1 500 eyadlulayo. Siyatholakala futhi eBhayibhilini lesiLathini okuthiwa yi-Vulgate, kuCuretonian Syriac lakuSyriac Peshitta. Kodwa asitholakali emibhalweni emibili yakudala yesiGrikhi okuthiwa yiCodex Sinaiticus leCodex Vaticanus eyabhalwa eminyakeni edlula-1 600, kumbe iCodex Sinaiticus Syriacus eyabhalwa eminyakeni engaba ngu-1 600 eyadlulayo loba emibhalweni yakuqala ekaMakho yeSahidic Coptic eyabhalwa eminyakeni engaba ngu-1 500 eyadlulayo. Ngokufananayo imibhalo yakudala kaMakho yesi-Armenia lesiGeorgia iphela ngovesi 8.
Eminye imibhalo yesiGrikhi eyakhathesi kanye lehunyutshwe kwezinye izindimi ilesiphetho esifitshane (isiphetho lesi silemitsho emilutshwane). ICodex Regius eyabhalwa eminyakeni engaba ngu-1 200 eyadlulayo ileziphetho zombili, iqala ngesiphetho esifitshane. Yethula isiphetho ngasinye ngamabala atshengisa ukuthi izindima lezo zazisamukelwa futhi zisetshenziswa ngabanye abantu abadumileyo kodwa iyavuma ukuthi iziphetho lezi azisingxenye yemibhalo ephefumulelweyo.
ISIPHETHO ESIFITSHANE
Isiphetho esifitshane ngemva kukaMak 16:8 asikho eMibhalweni ephefumulelweyo. Sithi:
Kodwa zonke izinto ababezilayelwe bahamba bayotshela labo ababeseduze loPhetro. Kanti njalo ngemva kwalokho uJesu ngokwakhe wabathuma besuka empumalanga besiya entshonalanga ukuthi bamemezele ubungcwele kanye lokungaboli okuyinsindiso engapheliyo.
ISIPHETHO ESIDE
Isiphetho eside ngemva kukaMak 16:8 asikho eMibhalweni ephefumulelweyo. Sithi:
9 UJesu esevukile ekuseni ngelanga lokuqala evikini waqala wabonakala kuMariya Magadalena yena lowo ayekhuphe kuye amadimoni ayisikhombisa. 10 Yena wahamba wayabikela labo uJesu ayephile labo ababesesililweni sakhe. 11 Bathi besizwa ukuthi uJesu uyaphila lokuthi uMariya wayembonile, kabazange bakukholwe. 12 Ngemva kwalokho uJesu wabonakala ngesinye isimo kwababili babo abafica behamba kulelolizwe emaphandleni. 13 Labo babuyela bayabikela abanye; kodwa labo kabazange babakholwe. 14 Ngemva kwalokho uJesu wabonakala kwaBalitshumi lanye besidla; wabakhuza ngokungakholwa kwabo lokuphikisa kwabo besala ukukholwa labo ababembonile ngemva kokuvuka kwakhe. 15 Wathi kubo, “Hambani emhlabeni wonke litshumayele ivangeli kukho konke okwadalwayo. 16 Loba ngubani okholwayo abhaphathizwe uzasindiswa, kodwa lowo ongakholwayo uzalahlwa. 17 Lezi zibonakaliso zizabalandela labo abakholwayo: Ngebizo lami bazakhupha amadimoni; bazakhuluma ngezindimi ezintsha; 18 bazadobha izinyoka ngezandla zabo; bazakuthi banganatha okubulalayo kungaze kwabalimaza lakancinyane; bazabeka izandla zabo phezu kwabantu abagulayo, basile.”
19 Ngemva kokuba iNkosi uJesu esekhulume labo, wathathwa wakhwela waya ezulwini wahlala ngakwesokunene sikaNkulunkulu. 20 Abafundi bahamba bayatshumayela ezindaweni zonke, iNkosi yasebenza labo yaqinisa ilizwi layo ngezibonakaliso ezazilisekela.
Ukubalwa KweBhayibhili
JUNE 11-17
AMAGUGU ASELIZWINI LIKANKULUNKULU ULUKHA 1
“Lingisela Ukuthobeka KukaMariya”
(ULukha 1:38) UMariya waphendula wathi, “Ngiyincekukazi yeNkosi. Kakwenzeke kimi njengoba utshilo.” Ingilosi yasisuka kuye.
“Ngiyincekukazi YeNkosi”
12 Abantu abanengi abalokholo bayayazi impendulo yakhe elula etshengisa ukuthi wayethobekile futhi elalela. Wathi kuGabriyeli: “Ngiyincekukazi yeNkosi. Kakwenzeke kimi njengoba utshilo.” (Luk. 1:38) Incekukazi yayisisebenzi esiphansi kulazo zonke futhi impilo yayo yayisezandleni zenkosi yayo. UMariya laye wayebona uJehova eyiNkosi yakhe njalo wayekwazi ukuthi wayezamvikela. Wayekwazi lokuthi unguNkulunkulu othembekileyo kulabo abathembekileyo kanye lokuthi wayezambusisa angenza konke okusemandleni akhe ukuthi enze umsebenzi lo ayemuphe wona.—Hubo. 18:25.
(ULukha 1:46-55) UMariya wathi: “Umphefumulo wami uyayidumisa iNkosi 47 lomoya wami uyathokoza kuNkulunkulu uMsindisi wami, 48 ngokuba unanzile ubuphansi bencekukazi yakhe. Kusukela manje zonke izizukulwane zizakuthi ngibusisiwe, 49 ngokuba uSomandla ungenzele izinto ezinkulu—lingcwele ibizo lakhe. 50 Isihawu sakhe sifinyelela kulabo abamesabayo, kulandela isizukulwane ngesizukulwane. 51 Uyenzile imisebenzi emikhulu ngengalo yakhe: ubachithile labo abazigqajayo ekujuleni kwemicabango yabo. 52 Uwethule amakhosi ezihlalweni zawo kodwa wabaphakamisa abaphansi. 53 Ubagcwalisile abalambileyo ngezinto ezinhle kodwa abanothileyo ubaxotshile beze. 54 Uyisizile inceku yakhe u-Israyeli wakhumbula ukuba lesihawu 55 ku-Abhrahama lesizukulwane sakhe laphakade, njengoba wakutsho kubobaba bethu.”
“Ngiyincekukazi YeNkosi”
15 UMariya laye waphosa elakhe. Amazwi akhe agciniwe eLizwini likaNkulunkulu. (Bala uLukha 1:46-55.) Lapha uMariya wakhuluma okunengi, njalo amazwi akhe aveza lukhulu ngaye. Wadumisa uJehova ngokuthi wayesembusisile ngokumenza unina kaMesiya futhi lokhu kusitshengisa ukuthi wayengumuntu oqakathekisa akuphiwayo, ongadli esesulela phansi njengenkukhu. Kwakhanya ukuthi ukholo lwakhe lwaluzikile. Phela wathi uJehova uyabachitha abazigqajayo labalamandla njalo wathi uyabaphathisa abakhangelelwa phansi labayanga abafuna ukumkhonza. Amazwi akhe aphinda asitshengise ukuthi wayelolwazi olubanzi. Elinye ibhuku lithi lapho ekhuluma amazwi akhe akuLukha 1:46-55, wacaphuna okwezikhathi ezedlula 20 eMibhalweni yesiHebheru!
16 Lanxa uMariya wayeselazi kuhle iLizwi likaNkulunkulu, wazithoba wasebenzisa amazwi akulo. Kazange akhulume okwakuphuma ekhanda lakhe. Indodana yakhe eyayingakazalwa ngalesosikhathi layo yakwenza lokhu isikhulile. Yathi: “Imfundiso yami kayisiyami mina. Ivela kulowo ongithumileyo.” (Joh. 7:16) Kuqakathekile ukuthi lathi sizibuze umbuzo lo othi: ‘Ngiyalihlonipha yini iLizwi likaNkulunkulu njalo nginamathela kulo na, kumbe ngikhetha ukukhuluma eyami imibono loba engikucabangayo?’ Kuyakhanya ukuthi uMariya yena wayelihlonipha.
Ukuchwayisisa IMibhalo
(ULukha 1:69) Iphakamisile uphondo lwensindiso yethu endlini yenceku yayo uDavida.
nwtsty umcijo wokutaditsha okuLuk 1:69
uphondo lwensindiso: Kumbe “umsindisi olamandla.” Izikhathi ezinengi eBhayibhilini impondo zezinyamazana zimela amandla lokunqoba. (1Sa 2:1; Hu 75:4, 5, 10; 148:14) Kanti njalo ababusi kanye labesikhosini bonke abalungileyo lababi bafanekiselwa zimpondo lokunqoba kwabo kufaniswa lokugqubula ngezimpondo. (Dut 33:17; Dan 7:24; 8:2-10, 20-24) Evesini le umutsho othi, “uphondo lwensindiso” utsho uMesiya olamandla okusindisa, umsindisi omkhulu.
(ULukha 1:76) Wena mntanami, uzathiwa ungumphrofethi woPhezukonke; ngokuba uzahamba phambili [kukaJehova, NW] umlungisele indlela,
nwtsty umcijo wokutaditsha okuLuk 1:76
uzahamba phambili [kukaJehova, NW]: UJohane uMbhabhathizi ‘wayezahamba phambili kukaJehova’ okutsho ukuthi wayezabuya kuqala kuloJesu. UJesu wayezamela uYise njalo abuye ngebizo likaYise.—Joh 5:43; 8:29; khangela umcijo wokutaditsha okhuluma ngoJehova evesini le.
kukaJehova: Amazwi esiphrofetho sikaZekhariya asekucineni kwalelivesi ahambelana laku-Isy 40:3 kanye lakuMal 3:1, lapho okulebizo likaNkulunkulu elimelelwa ngongwaqa abane besiHebheru (YHWH) emibhalweni yakuqala yesiHebheru. Lanxa imibhalo yesiGrikhi ekhona isebenzisa elithi Kyʹri·os (Nkosi), evesini le kusetshenziswe elithi Jehova ngenxa yokuthi lasetshenziswa emibhalweni yakuqala yesiHebheru. (Khangela imicijo yokutaditsha ekuLuk 1:6, 16, 17; 3:4) Kanti njalo okunye yikuthi evesini le kanye lakwamanye amanengi asesahlukweni sokuqala sikaLukha ibizo elithi Kyʹri·os lisetshenziswe njengebizo qho hatshi elokuhlonipha. Amanye amaBhayibhili asebenzise amabizo anjengokuthi Jehova, Yahveh, Yahweh, Yahweh, יהוה (YHWH, loba i-Tetragrammaton), NKOSI lelithi ADONAI evesini loba emabaleni angaphansi loba aseceleni ukuze kukhanye ukuthi kukhulunywa ngoJehova uNkulunkulu. Manengi amabhuku lokunye okufakazela lokhu.
Ukubalwa KweBhayibhili
JUNE 18-24
AMAGUGU ASELIZWINI LIKANKULUNKULU ULUKHA 2-3
“Lina Abasakhulayo Liyathuthuka Yini Ekukhonzeni?”
(ULukha 2:41, 42) Iminyaka yonke abazali bakhe baya eJerusalema belanda uMkhosi wePhasika. 42 Kwathi eseleminyaka elitshumi lambili baya eMkhosini njengenjayelo.
nwtsty umcijo wokutaditsha okuLuk 2:41
Iminyaka yonke abazali bakhe: Ngokutsho koMthetho, kwakungadingakali ukuthi abesifazana bahambe eMkhosini wePhasika. Kodwa uMariya wayejayele ukuhamba loJosefa minyaka yonke eJerusalema emkhosini lo. (Eks 23:17; 34:23) Umnyaka ngamunye babehamba amakhilomitha angafika 300 ukuhamba lokuphenduka bendawonye lemuli yabo eyayilokhu isanda.
(ULukha 2:46, 47) Ngemuva kwezinsuku ezintathu bamfumana emagumeni ethempeli, ehlezi phakathi kwabafundisi, elalele njalo ebabuza imibuzo. 47 Wonke umuntu owamuzwayo wamangala ngokuzwisisa kwakhe kanye lezimpendulo zakhe.
nwtsty imicijo yokutaditsha ekuLuk 2:46, 47
ebabuza imibuzo: Lokhu okwenziwa yilabo ababelalele uJesu kutshengisa ukuthi imibuzo yakhe yayingasiyo mibuzo nje yomfana ofuna ukugcwalisa isifiso sakhe sokwazi izinto. (Luk 2:47) Ibala lesiGrikhi elihunyutshwa ngokuthi ‘ukubuza imibuzo’ kwezinye izikhathi lingatsho indlela okubuzwa ngayo imibuzo emthethwandaba nxa kuhluzwa indaba. (Mat 27:11; Mak 14:60, 61; 15:2, 4; ImiS 5:27) Abezembali babika ukuthi abanye abakhokheli benkolo babejayele ukusala ethempelini ngemva komkhosi, befundisa kwezinye indawo ezazilapho. Abantu babengahlala phansi babalalele njalo bababuze imibuzo.
wamangala: NgesiGrikhi ibala eliyisenzo elitsho ‘ukumangala’ lingatsho ukube ulokhu ubamba owangaphansi kumbe ukuqhubeka ubambe owangaphansi.
(ULukha 2:51, 52) Wasehamba labo eNazaretha wahlala ebalalela. Kodwa unina wazenza igugu zonke lezi izinto enhliziyweni yakhe. 52 UJesu wakhula ngenhlakanipho, langomzimba langokuthandwa nguNkulunkulu labantu.
nwtsty umcijo wokutaditsha okuLuk 2:51, 52
wahlala ebalalela: Kumbe “waqhubeka elalela.” Ibala lesiGrikhi eliyisenzo esiqhubekayo litshengisa ukuthi ngemva kokumangalisa abafundisi ethempelini ngolwazi lwakhe ngeLizwi likaNkulunkulu, uJesu wahamba endlini njalo waqhubeka ezithoba futhi ebalalela abazali bakhe. Ukulalela lokhu kwakusedlula okwabanye abantwana ngoba kwakugcwalisa konke okwakutshiwo nguMthetho kaMosi.—Eks 20:12; Gal 4:4.
Ukuchwayisisa IMibhalo
(ULukha 2:14) “Inkazimulo kuNkulunkulu phezulu kwaphezulu, emhlabeni ukuthula ebantwini abathokozelwa nguye.”
nwtsty imicijo yokutaditsha ekuLuk 2:14
emhlabeni ukuthula ebantwini abathokozelwa nguye: Eminye imibhalo yabhalwa kanje “lokuthula emhlabeni, isifiso esihle ebantwini,” njalo lokhu kukhona kwamanye amaBhayibhili. Kodwa indlela i-New World Translation ehumutshe ngayo umutsho lo ilesisekelo semibhalo esiqinileyo. Isimemezelo sezingilosi sasingakhulumi ngesifiso sikaNkulunkulu esihle ebantwini bonke kungelani lemicabango kanye lezenzo zabo. Kodwa sitsho labo abazathola ukwamukelwa nguye ngoba betshengisa ukholo lweqiniso kuye njalo belandela iNdodana yakhe.—Khangela umcijo wokutaditsha othi ebantwini abathokozelwa nguye evesini le.
ebantwini abathokozelwa nguye: Ibala lesiGrikhi elithi eu·do·kiʹa lingatsho “ukuthandwa; ukwamukelwa.” Elinye ibala elihambelana lalo elithi eu·do·keʹo lisetshenziswa kuMat 3:17; Mak 1:11 lakuLuk 3:22 ngesikhathi uNkulunkulu ekhuluma leNdodana yakhe ngemva kokubhabhathizwa kwayo (khangela imicijo yokutaditsha ekuMat 3:17; Mak 1:11). Lingatsho “ukuthokoza ngomuntu; ukwamukela.” Ngakho isimemezelo sengilosi sasisitsho ukuthokoza kukaNkulunkulu hatshi ebantwini bonke nje kodwa kulabo abamthokozisayo ngokuba lokholo lweqiniso njalo belandela iNdodana yakhe. Lanxa kwezinye indawo ibala lesiGrikhi elithi eu·do·kiʹa liyabe lisitsho isifiso esihle sabantu (Rom 10:1; Flp 1:15), lijayele ukusetshenziswa lisitsho ukuthokoza kukaNkulunkulu loba indlela ayamukelayo (Mat 11:26; Luk 10:21; Efe 1:5, 9; Flp 2:13; 2Te 1:11). EBhayibhilini okuthiwa yi-Septuagint kuHu 51:18 [50:20, LXX], kusetshenziswe ibala elithi “ukuthanda” kukaNkulunkulu.
(ULukha 3:23) UJesu wayeseleminyaka engaba ngamatshumi amathathu eqalisa umsebenzi wakhe wokutshumayela. Kwakukhulunywa ukuthi uyindodana kaJosefa, indodana kaHeli,
Ubukwazi Yini?
Wayengubani ubaba kaJosefa?
UJosefa umbazi waseNazaretha nguye ubaba owakhulisa uJesu. Kanti yena uJosefa wayezalwa ngubani? Ivangeli likaMathewu lithi nguJakhobe, kodwa kuLuka kuthiwa ‘wayeyindodana kaHeli.’ Yindaba sekukhanya kungasahambelani?—ULukha 3:23; UMathewu 1:16.
Ivangeli likaMathewu lithi: “UJakhobe enguyise kaJosefa,” ibala lesiGiriki elisetshenziswe lapha licacisa ukuthi uJakhobe nguye owayezala uJosefa. UMathewu ulonda usendo lukaJosefa ngokuzalana kwaboyise etshengisa umzila wamakhosi endlu kaDavida kuze kuyefika kuJosefa, onguye owakhulisa uJesu ukuze kucace ukuthi uJesu ulelungelo lobukhosi.
Besekusithi uLukha yena ulandisa esithi: ‘uJosefa, indodana kaHeli.’ Amazwi la athi “indodana,” angatsho “umkhwenyana.” Indaba efanana laleyi siyithola kuLukha 3:27, lapho esithola khona uSheyalithiyeli ozalwa nguJekhoniya kuthiwa ‘uyindodana kaNeri.’ (1 ImiLando 3:17, The Holy Bible in Ndebele; UMathewu 1:12) Kungenzakala ukuthi uSheyalithiyeli wayethethe indodakazi kaNeri engaqanjwanga ngebizo, wasesiba ngumkhwenyana wakhe. UJosefa laye wayebizwa ngokuthi ‘yindodana’ kaHeli, njengoba wayethethe uMariya indodakazi kaHeli. ULukha ulonda usendo lukaJesu ‘ngokwemvelo yakhe’ elususela kunina owamzalayo uMariya. (KwabaseRoma 1:3) IBhayibhili lilonda usendo lukaJesu ngendlela ezimbili, olukayise lolukanina.
Ukubalwa KweBhayibhili
JUNE 25–JULY 1
AMAGUGU ASELIZWINI LIKANKULUNKULU ULUKHA 4-5
“Nqoba Izilingo NjengoJesu”
(ULukha 4:1-4) UJesu, egcwele umoya ongcwele, wabuya evela eJodani waqhutshwa ngumoya wamusa enkangala, 2 lapho alingwa khona nguSathane okwezinsuku ezingamatshumi amane. Kadlanga lutho ngalezonsuku, kodwa wacina eselambile ekupheleni kwazo. 3 USathane wathi kuye, “Uma uyiNdodana kaNkulunkulu, tshela ilitshe leli ukuthi libe yisinkwa.” 4 UJesu waphendula wathi, “Kulotshiwe ukuthi: ‘Umuntu kaphili ngesinkwa kuphela.’”
Linanzelele Ukuthi Lingabantu Abanjani
8 USathane wasebenzisa icebo elifananayo lapho ezama ukulinga uJesu enkangala. UJesu esezile ukudla okwamalanga angu-40 lobusuku obungu-40, uSathane wazama ukumlinga ngesifiso sokudla. USathane wathi: “Uma uyiNdodana kaNkulunkulu, tshela ilitshe leli ukuthi libe yisinkwa.” (Luka. 4:1-3) UJesu kwakumele akhethe phakathi kwezinto ezimbili: Wayengakhetha ukuthi angasebenzisi amandla akhe okwenza izimangaliso ukuze asuthise isidingo sakhe sokudla, kumbe wayengakhetha ukuwasebenzisa. UJesu wayekwazi ukuthi kakumelanga asebenzise amandla la ukuze anelise izifiso zakhe. Lanxa wayelambile, indlala yakhe yayingaqakathekanga ukwedlula ukulondoloza ubuhlobo bakhe loJehova. UJesu waphendula wathi: “Kulotshiwe ukuthi: ‘Umuntu kaphili ngesinkwa kuphela, kodwa ngelizwi lonke eliphuma emlonyeni kaNkulunkulu.’”—Mat. 4:4.
(ULukha 4:5-8) USathane wamholela endaweni ephakemeyo wamtshengisa masinyane yonke imibuso yomhlaba. 6 Wasesithi kuye, “Ngizakunika amandla phezu kwayo kanye lobukhazikhazi bayo, ngokuba ngikuphiwe lokhu, njalo ngingapha loba ngubani engifuna ukumupha. 7 Yikho ungaze ungikhonze, konke kuzakuba ngokwakho.” 8 UJesu waphendula wathi, “Kulotshiwe ukuthi: ‘Khonza iNkosi uNkulunkulu wakho, ubambelele kuye yedwa.’”
Linanzelele Ukuthi Lingabantu Abanjani
10 Kodwa kwenzakalani endabeni kaJesu? USathane “wamtshengisa masinyane yonke imibuso yomhlaba. Wasesithi kuye, ‘Ngizakunika amandla phezu kwayo kanye lobukhazikhazi bayo.’” (Luka. 4:5, 6) UJesu wayengeke ayibone ngamehlo yonke imibuso khonapho nje, kodwa akuthandabuzwa ukuthi uSathane wayebona angani umbono wobukhazikhazi bemibuso le, wawuzakhanga uJesu. Ngesibindi, uSathane wathi: “Ungaze ungikhonze, konke kuzakuba ngokwakho.” (Luka. 4:7) UJesu kazange afune ukuba ngumuntu uSathane ayefuna abe nguye. UJesu wahle wamphendula masinyane. Wathi: “Kulotshiwe ukuthi: ‘Khonza iNkosi uNkulunkulu wakho, ubambelele kuye yedwa.’”—Luka. 4:8.
(ULukha 4:9-12) USathane wamholela eJerusalema wayammisa engqongeni yethempeli. “Uma uyiNdodana kaNkulunkulu,” kusitsho uSathane, “ziphosele phansi usuka lapha. 10 Phela kulotshiwe, kuthiwa: “‘Uzathuma izingilosi zakhe kuwe zikulinde ngokunanzelela; 11 zizakuphatha ngezandla zazo, ukuze ungatshayeleli unyawo lwakho elitsheni.’” 12 UJesu waphendula wathi, “Kuthi: ‘Ungayilingi iNkosi uNkulunkulu wakho.’”
nwtsty ividiyo
Engqongeni Yethempeli
Kufanele ukuthi uSathane wamisa uJesu “engqongeni [loba “indawo ephakemeyo”] yethempeli” wasemtshela ukuthi aziphosele phansi, kodwa akwaziwa ukuthi kungaphi sibili lapho uJesu ayemi khona. Ngokusetshenziswa kwalo lapha ibala elithi ‘ithempeli’ lingatsho isakhiwo sonke sethempeli, yikho kungenzeka ukuthi uJesu wayemi ekhoneni eliseningizimu mpumalanga (1) yethempeli. Kumbe wayengabe emi kwelinye ikhona lethempeli. Ukuziphosela umi endaweni lezi kwakungabangela ukufa ngaphandle nxa uJehova engenele.
Linanzelele Ukuthi Lingabantu Abanjani
12 UJesu kenzanga njengo-Eva, kodwa wasitshiyela isibonelo esihle kakhulu sokuthobeka! USathane wazama ukumlinga esebenzisa enye indlela kodwa uJesu kazange avumele ngitsho lomcabango wokwenza into yokubukisa eyayizalinga uNkulunkulu. Lokhu kwakungaba yisenzo sokuzikhukhumeza. Kodwa impendulo kaJesu yayicacile futhi ingabhodi. Wathi: ‘Kuthiwa: “Ungayilingi iNkosi uNkulunkulu wakho.’”—Bala uLukha 4:9-12.
Ukuchwayisisa IMibhalo
(ULukha 4:17) Umgoqwancwadi womphrofethi u-Isaya wedluliselwa kuye. Wawutshombulula wafumana indawo okulotshwe khona kwathiwa:
nwtsty umcijo wokutaditsha okuLuk 4:17
Umgoqwancwadi womphrofethi u-Isaya: Umgoqwancwadi ka-Isaya owatholakala Olwandle Lwesawudo (Dead Sea) wawenziwe ngezikhumba ezingu-17 ezazithungelwe ndawonye futhi wawungamamitha angu-7,3 ubude njalo wawubanzi, ulamakholamu angu-54. Umgoqwancwadi owawusetshenziswa esinagogeni eNazaretha kufanele ukuthi wawungatshiyananga loka-Isaya ngobude. Njengoba ngalesosikhathi kwakungela zahluko lamavesi uJesu kwakumele adinge ingxenye ayefuna ukuyibala. Kodwa ukuthi wafumana indawo eyayilamazwi esiphrofetho kutshengisa ukuthi wayelijayele sibili iLizwi likaNkulunkulu.
(ULukha 4:25) Ngiyaqinisa kini ukuthi babebanengi abafelokazi ko-Israyeli ngesikhathi sika-Elija, lapho umkhathi wavaleka okweminyaka emithathu elengxenye kwaba lendlala enzima elizweni lonke.
nwtsty umcijo wokutaditsha okuLuk 4:25
okweminyaka emithathu elengxenye: Ukulandisa okuku-1Am 18:1 kutshengisa ukuthi u-Elija wethula isimemezelo sokuphela kwendlala “ngomnyaka wesithathu.” Lokhu kwenze abanye bathi uJesu uyaphikisana lalokhu okulotshwe ku-1 AmaKhosi. IMibhalo YesiHebheru ayitsho ukuthi indlala yadonsa iminyaka engaphansi kwemithathu. Umutsho othi “ngomnyaka wesithathu” kumele ukuthi utsho isikhathi esaqalisa lapho u-Elija eqala ukwethula umbiko wendlala ku-Ahabi. (1Am 17:1) Kufanele ukuthi umbiko lo wethulwa isikhathi sezulu singakafiki njalo kwakungathatha inyanga ezingu-6 loba ezidlula lapho ukuthi isikhathi sezulu sifike. Kanti njalo indlala ayizange ihle iphele ngesikhathi u-Elija ephinda ebonana lo-Ahabi “ngomnyaka wesithathu,” kodwa yaphela ngemva komlilo owabakhona eNtabeni iKhameli. (1Am 18:18-45) Yikho-ke amazwi kaJesu alotshwe lapha kanye lalawo akhulunywa ngumfowabo abhalwe kuJak 5:17 ayahambelana lokukhulunywa ku-1Am 18:1.
Ukubalwa KweBhayibhili