ISIFUNDO 20
Ibandla Lihlelwe Njani?
UJehova nguNkulunkulu ohlelekileyo. (1 KwabaseKhorinte 14:33) Yikho kumele labantu bakhe bahleleke. Kodwa lihlelwe njani ibandla lobuKhristu? Singenzani ukuze kube lokuhleleka ebandleni?
1. Ngubani inhloko yebandla?
‘UKhristu yinhloko yebandla.’ (Kwabase-Efesu 5:23) Ukhokhela imisebenzi eyenziwa ngabantu bakaJehova emhlabeni wonke. UJesu ukhethe iqembu lamadoda aselesikhathi eside engabadala ukuthi abe liQula Elikhokhelayo kumbe ‘inceku ethembekileyo lehlakaniphileyo.’ (Bala uMathewu 24:45-47.) IQula Elikhokhelayo linakekela amabandla asemhlabeni wonke njengokwakusenziwa ngabaphostoli labadala ababeseJerusalema. (ImiSebenzi 15:2) Amadoda la awazenzeli akucabangayo kodwa aqondiswa nguJesu futhi ahlolisisa iBhayibhili ukuze azwisise ukuthi uJehova ufuna enzeni.
2. Ngowani umsebenzi wabadala bebandla?
Abadala bebandla ngamadoda aselesikhathi eside ekhonza. Umsebenzi wabo ngowokufundisa abantu bakaJehova besebenzisa iMibhalo, ukubancedisa ekukhonzeni lokubakhuthaza. Ababhadalwa ukuthi benze umsebenzi lo kodwa bawenza ‘ngenhliziyo yonke phambi kukaNkulunkulu, njalo abawenzeli ukuthola inzuzo yokungathembeki, kodwa bazimisele.’ (1 UPhetro 5:1, 2) Abadala bancediswa zinceku ezikhonzayo futhi ngokuya kwesikhathi lazo ziba ngabadala.
IQula Elikhokhelayo liyakhetha abanye abadala ukuthi babe ngababonisi beziqinti. Abadala laba bavakatshela amabandla ukuze bakhuthaze njalo baqinise abafowethu labodadewethu. Okunye abakwenzayo yikubeka amadoda aphila ngendlela evumelana lalokho okutshiwo yiMibhalo ukuthi abe zinceku ezikhonzayo kumbe abadala emabandleni.—1 KuThimothi 3:1-10, 12; KuThithusi 1:5-9.
3. Kuyini okumele kwenziwe nguFakazi ngamunye?
Wonke umuntu ebandleni kumele ‘adumise ibizo likaJehova’ ngokuqinisa abafowethu labodadewethu langokukhuthala emsebenzini wokutshumayela kusiya ngalokho akwenelisayo.—Bala iHubo 148:12, 13.
GEBHA UJULE
Engxenyeni le uzafunda ukuthi uJesu ulikhokhela njani ibandla lokuthi abadala bamlingisela njani. Uzabona lokuthi singenzani ukuze sitshengise ukuthi silalela uJesu labadala bebandla.
4. UJesu ngumkhokheli olomusa
UJesu unxusa abantu ukuthi babuye kuye. Bala uMathewu 11:28-30 beselixoxa ngemibuzo elandelayo:
UJesu ngumkhokheli onjani? Uzwa njani ngendlela uJesu akhokhela ngayo ibandla?
Abadala bamlingisela njani uJesu? Bukelani IVIDIYO.
IBhayibhili liyasitshela ukuthi abadala kumele bawenze njani umsebenzi wabo.
Bala u-Isaya 32:2 lo-1 Phetro 5:1-3 beselixoxa ngemibuzo elandelayo:
Uzwa njani ngokuthi abadala balingisela uJesu endleleni abaphatha ngayo abanye?
Yiziphi ezinye indlela abadala abangamlingisela ngazo uJesu?
5. Abadala benza lokho abakufundisayo
UJesu ufuna abadala bawenze njani umsebenzi wabo? Bukelani IVIDIYO.
UJesu uyisibonelo esihle kakhulu kulabo abaphathiswe umsebenzi wokukhokhela ebandleni. Bala uMathewu 23:8-12 beselixoxa ngemibuzo le:
IBhayibhili lithi abadala kumele bawubone njani umsebenzi wabo? Ucabanga ukuthi abakhokheli bamasonto bayakwenza yini okutshiwo liBhayibhili?
Abadala bazama ngamandla wonke ukuhlala beqinisa ukholo lwabo lolwezimuli zabo
Abadala balendaba lomuntu wonke ebandleni
Abadala bakukhuthalele ukutshumayela
Abadala benza imisebenzi etshiyeneyo ebandleni egoqela ukufundisa lokuklina
6. Kumele silalele abadala bebandla
IBhayibhili liyasitshela ukuthi yindaba kuqakathekile ukulalela abadala. Bala uHebheru 13:17 beselixoxa ngombuzo olandelayo:
Kungani iBhayibhili lisithi kumele sizehlise futhi silalele abakhokhelayo?
Bala uLukha 16:10 beselixoxa ngombuzo lo:
Kungani kumele silalele abadala ezintweni zonke?
ABANYE BATHI: “Akudingakali ukuthi uhlangane labanye, ungazisontela uwedwa endlini.”
Ubona angani kuyanceda yini ukuhlangana labanye ebandleni ukuze ukhonze uNkulunkulu?
ISIFINQO
UJesu yinhloko yebandla. Okwenza silalele abadala yikuthi baqondiswa nguJesu, balingisela isibonelo sakhe futhi benza lokho okutshiwo liBhayibhili.
Ufundeni?
Ngubani inhloko yebandla?
Ngowani umsebenzi wabadala bebandla?
Kuyini okumele kwenziwe nguFakazi ngamunye?
THOLA OKUNENGI
Bukela ividiyo le ubone ubufakazi obutshengisa ukuthi iQula Elikhokhelayo labanye abadala balendaba labafowethu labodadewethu.
Ukuqinisa Abazalwane Ngesikhathi Umsebenzi Wethu Uvinjelwe (4:22)
Bukela ividiyo le ubone umsebenzi owenziwa ngababonisi beziqinti.
Bala isihloko lesi uzwe ngeminye imisebenzi eyenziwa ngabesifazana ebandleni.
“OFakazi BakaJehova Balabatshumayeli Besifazana Yini?” (INqabayokulinda, September 1, 2012)
Bala isihloko lesi uzwe ukuthi abadala benzani ukuze bakhuthaze abanye ebandleni.
“Abadala Basebenza Lathi Ukuze Sithokoze” (INqabayokulinda, January 15, 2013)