IHubo 37:4—“Thokoza ENkosini”

“Thokoza kakhulu ngenxa kaJehova, yena uzakupha lokho okufisayo.”—IHubo 37:4, INguqulo Yomhlaba Omutsha.

“Thokoza eNkosini, yona izakukunika izifiso zenhliziyo yakho.”—IHubo 37:4, The Holy Bible in Ndebele.

Okutshiwo nguHubo 37:4

Umhubi utshela labo abakhonza uNkulunkulu ukuthi bathokoze ngenxa yokuba ngabangane bakaNkulunkulu abaseduze. Bonke abangabangane bakaJehovaa uNkulunkulu bangaba leqiniso lokuthi uzazigcwalisa izifiso zabo ezivumelana lentando yakhe.

“Thokoza kakhulu ngenxa kaJehova.” Umutsho lo ungahunyutshwa langokuthi “zithokozise kuJehova,” “thokoziswa yikukhonza INKOSI,” kumbe “thokoziswa yilokho esikuthenjiswe YINKOSI.” Ngamazwi alula nje, umutsho lo usikhuthaza ukuthi ‘sithokoze kakhulu’ ngokukhonza uNkulunkulu weqiniso. (IHubo 37:4) Kungani sisitsho njalo?

Labo abakhonza uJehova balandela okutshiwo liBhayibhili okuyikho okubanceda ukuthi babone izinto ngendlela uJehova azibona ngayo. Bamazi kuhle uNkulunkulu futhi bayamlalela ngoba bayakwazi ukuthi kuyikuhlakanipha ukwenza njalo. Lokhu kuyabanceda ukuthi bahlale belomzwangedwa ohlanzekileyo futhi babalekele lezinto ezinengi ezingabalimaza empilweni. (IZaga 3:5, 6) Ngokwesibonelo, abazondi kumbe bahawukele abantu abangamaqili loba abayizihwaba nxa bebabona bephumelela. (IHubo 37:1, 7-9) Kodwa bathokoziswa yikwazi ukuthi sekuseduze ukuthi uNkulunkulu aqede konke ukungaphathwa kuhle kwabantu abesebusisa labo abathembekileyo kuye. (IHubo 37:34) Okunye okubathokozisayo yikwazi ukuthi bathokozisa uBaba osezulwini.—IHubo 5:12; IZaga 27:11.

“Yena uzakupha lokho okufisayo.” Amazwi la angahunyutshwa langokuthi “uzayiphendula imithandazo yakho” kumbe “uzakunika khona kanye okufisayo.” Kodwa lokho akutsho ukuthi uJehova uzasinika loba yini esiyicelayo. Phela uJehova unjengomzali okwaziyo ukuthi kuyini sibisibili esikudingayo. Izinto esizicelayo lendlela esiphila ngayo kumele kuvumelane lentando kaNkulunkulu. (IZaga 28:9; UJakhobe 4:3; 1 UJohane 5:14) Nxa singakwenza konke lokhu singaba leqiniso lokuthi lowo “olalela imithandazo” uzayizwa imithandazo yethu.—IHubo 65:2; UMathewu 21:22.

Amanye amavesi asinceda sizwisise uHubo 37:4

IHubo 37 labhalwa yiNkosi uDavida owayebusa ko-Israyeli. Wabhala ihubo leli elandela i-alfabhethi yesiHebheru.b

UDavida waphathwa kubi izikhathi ezinengi. INkosi uSawuli kanye labanye babemzingela befuna ukumbulala. (2 USamuyeli 22:1) Kodwa uDavida wayehlala emthemba uNkulunkulu ngoba wayekwazi ukuthi uzabajezisa abantu ababi. (IHubo 37:10, 11) Lanxa abantu ababi bekhanya angani bayaphumelela “njengotshani obuluhlaza” ngelinye ilanga bazatshabalaliswa.—IHubo 37:2, 20, 35, 36.

IHubo 37 litshengisa lokho okuzakwenzakala kulabo abathemba uNkulunkulu lalokho okuzakwenzakala kulabo abaphikisana laye. (IHubo 37:16, 17, 21, 22, 27, 28) Ihubo leli lisinceda ukuthi sihlakaniphe njalo senze izinto ezithokozisa uNkulunkulu.

Bukela ividiyo le emfitshane ukuze ubone okumunyethwe libhuku lamaHubo.