UNkulunkulu Wamukela Wonke Amasonto Yini?

Impendulo yeBhayibhili

Hatshi. IBhayibhili likhuluma ngezinye indlela zokukhonza ezingamthokozisiyo uNkulunkulu. Ake sixoxe ngezimbili zakhona.

Eyokuqala: Ukukhonza onkulunkulu bamanga

IBhayibhili lithi ukukhonza onkulunkulu bamanga ‘kuyize’ njalo ‘akusizi ngalutho.’ (UJeremiya 10:3-5; 16:19, 20) UJehovaa uNkulunkulu walaya isizwe sako-Israyeli wathi: “Ungabi labanye onkulunkulu ngaphandle kwami.” (U-Eksodusi 20:3, 23; 23:24) ‘UNkulunkulu wayethukuthela kakhulu’ nxa abako-Israyeli bekhonza abanye onkulunkulu.—AmaNani 25:3; ULevi 20:2; ABahluleli 2:13, 14.

Lalamuhla uJehova uyathukuthela nxa ebona abantu bekhonza labo “ababizwa ngokuthi ngonkulunkulu.” (1 KwabaseKhorinte 8:5, 6; KwabaseGalathiya 4:8) Kafuni ukuthi labo abamkhonzayo bazihlanganise labantu abamkhonza ngendlela angayifuniyo. Uthi: “Phumani kubo, lehlukane labo.” (2 KwabaseKhorinte 6:14-17) Nxa kuyikuthi uNkulunkulu wamukela wonke amasonto, pho kungani esinike umlayo lo?

Eyesibili: Ukukhonza uNkulunkulu weqiniso ngendlela engamthokozisiyo

Kwezinye izikhathi ama-Israyeli ayekhonza uNkulunkulu elandela imikhuba lamasiko abantu ababekhonza onkulunkulu bamanga. Kodwa uJehova wayengakwamukeli lokhu ngoba babehlanganisa ukukhonza kweqiniso lokwamanga. (U-Eksodusi 32:8; UDutheronomi 12:2-4) UJesu wasola abakhokheli benkolo ngenxa yendlela ababekhonza ngayo. Babezenza abantu abalokholo bona bengabazenzisi ngoba ‘babedela izindaba eziqakathekileyo zoMthetho eziphathelane lokwahlulela okuhle, ukuba lesihawu kanye lokuthembeka.’—UMathewu 23:23.

Lalamuhla uNkulunkulu ulendlela eyodwa afuna simkhonze ngayo futhi indlela le singayithola ngokuhlola iqiniso eliseBhayibhilini. (UJohane 4:24; 17:17; 2 KuThimothi 3:16, 17) Amasonto afundisa amanga enza abantu babe khatshana loNkulunkulu. Izimfundiso ezinengi ezinjengobuthathu bukaNkulunkulu, ukuthi umphefumulo awufi, lokuthi abantu bayatshiswa esihogweni azifundiswa liBhayibhili kodwa zivela ebantwini ababekhonza onkulunkulu bamanga. Ukukhonza okunjalo “akusizi ngalutho” ngoba kuqakathekisa amasiko enkolo ukwedlula okufunwa nguNkulunkulu.—UMakho 7:7, 8.

UNkulunkulu uyakwenyanya ukukhonza okulobuzenzisi. (KuThithusi 1:16) Ukukhonza kweqiniso kunceda abantu ukuthi basondele kuNkulunkulu ngoba kubenza baphile ngendlela ayifunayo kulokuthi baqakathekise imikhuba engamthokozisiyo. Ngokwesibonelo, iBhayibhili lithi: “Loba ngubani ocabanga ukuthi uyamkhonza uNkulunkulu kodwa engalubambi ulimi lwakhe uyaziyenga enhliziyweni yakhe njalo ukukhonza kwakhe akuncedi ngalutho. Indlela yokukhonza ehlanzekileyo lengangcolanga ngokubona kukaNkulunkulu uBaba wethu yile: ukunakekela izintandane labafelokazi ekuhluphekeni kwabo kanye lokuzigcina singelasici emhlabeni.” (UJakhobe 1:26, 27; khangela amabala angaphansi) I-King James Version isebenzisa umutsho othi “ukukhonza okumsulwa” nxa ikhuluma ngokukhonza lokhu okuhlanzekileyo futhi okungelabuzenzisi.