Uthando LukaJehova Lusinceda Sinqobe Ukwesaba

1. Kuyini okwesatshwa ngabanye abantu?

CABANGA ngalokho okwenzakala kwabanye oFakazi bakaJehova. UNestor lomkakhe uMaría babefuna ukuyancedisa lapho okulabamemezeli abalutshwana khona.b Kwakuzadingeka ukuthi batshintshe indlela ababephila ngayo ukuze bakwenze lokhu. Kodwa babesesaba ukuthi kungenzeka bangathokozi nxa sebephila ngemali encane. UBiniam waba nguFakazi elizweni lapho umsebenzi wethu owawungavunyelwa khona njalo wananzelela ukuthi lokho kwakungabangela ukuthi ahlukuluzwe. Wayesesaba sibili kodwa ayekwesaba kakhulu yikuthi abangakibo babezakuthini besizwa ukuthi senguFakazi kaJehova. UValérie wabanjwa umkhuhlane wemvukuzane (i-cancer) njalo wathwala nzima ukuthola udokotela owayezam-opharetha engamfakanga igazi. Wayesesaba ukuthi uzakufa.

2. Kungani kumele sisebenze nzima ukuze singakhulelwa yikwesaba?

² Inengi lethu sesake sazesaba izinto eziqanjwe phezulu. Nxa singavumela ukwesaba kusikhulele singacina sesisenza izinqumo ezimbi ezingaphambanisa ubungane bethu loJehova. Lokhu yikho kanye okufunwa nguSathane. Uzama ukusebenzisa ukwesaba ukuze singayilaleli imilayo kaJehova egoqela lowokutshumayela izindaba ezinhle. (Isam. 12:17) USathane mubi, ulolunya njalo ulamandla. Kodwa ungenelisa ukumelana laye. Njani?

3. Kuyini okuzasinceda singakhulelwa yikwesaba?

³ Nxa siqiniseka ukuthi uJehova uyasithanda lokuthi ulathi, sizenelisa ukumelana lamacebo kaSathane. (Hubo. 118:6) Umlobi weHubo 118 waba sezimeni ezinzima. Wayelezitha ezinengi njalo ezinye zazo zazilezikhundla eziphezulu (amavesi 9 lo-10). Ngezinye izikhathi wayekhathazeka kakhulu (ivesi 13). Kanti njalo uJehova wamnika iseluleko esilamandla (ivesi 18). Lanxa kunjalo umhubi lo wathi: “Angiyikwesaba.” Kuyini okwenza wahlaliseka? Wayekwazi ukuthi lanxa uYise osezulwini wayemkhuzile wayelokhu emthanda kakhulu. Wayekwazi lokuthi uzamncedisa kungelani lobunzima ayephakathi kwabo.—Hubo. 118:29.

4. Kuyini esingasoze sikwesabe nxa siqiniseka ukuthi uJehova uyasithanda?

⁴ Kumele siqiniseke ukuthi uJehova uyasithanda. Lokhu kuzasinceda singesabi izinto ezintathu ezijayele ukwesatshwa ngabantu. Okokuqala yikwesaba ukuthi asisoze senelise ukondla imuli yethu. Okwesibili yikwesaba abantu. Okwesithathu yikwesaba ukufa. Abafowethu labodadewethu esikhulume ngabo endimeni yokuqala benelisa ukunqoba ukwesaba ngenxa yokuthi babeqiniseka ukuthi uJehova uyabathanda.

UKWESABA UKUTHI AWUSOZE WENELISE UKONDLA IMULI YAKHO

5. Kuyini okungenza inhloko yemuli yesabe? (Khangela umfanekiso ongaphandle.)

⁵ Inhloko engumKhristu iyawuqakathekisa umsebenzi wokunakekela imuli yayo. (1 Tim. 5:8) Nxa uyinhloko yemuli mhlawumbe ngesikhathi sokumemetheka komkhuhlane we-COVID-19 wawusesaba ukuthi uzaphelelwa ngumsebenzi. Ungabe wawukhathazekile ngokuthi lizakudlani lokuthi lizayibhadalela ngani indlu elihlala kuyo. Kungenzakala wawusesaba ukuthi nxa ungaphelelwa ngumsebenzi awusoze uwuthole omunye. Engxenye lawe njengoNestor loMaría wawuthikaza ukwenza utshintsho emsebenzini wakho usesaba ukuthi awusoze wenelise ukuphila ngemali encane. USathane usebenzise ukwesaba lokhu ukuze enze abanengi bayekele ukukhonza uJehova.

6. USathane ufuna sicabangeni?

⁶ USathane ufuna ucabange ukuthi uJehova kalandaba lawe lokuthi uzazibonela ukuthi uzayinakekela njani imuli yakho. Lokhu kungenza ucabange ukuthi kumele wenze loba yini ongayenza ukuze ungaphelelwa ngumsebenzi lanxa lokho kungatsho ukungalaleli okutshiwo liBhayibhili.

7. UJesu usiqinisekisa ngani?

⁷ UJesu umazi mhlophe uYise yikho esitshela ukuthi ‘uyakwazi esikuswelayo singakaceli lakucela.’ (Mat. 6:8) Kanti njalo uyakwazi ukuthi uNkulunkulu uzimisele ukusinika okokuziphilisa. Thina amaKhristu siyimuli kaNkulunkulu. UJehova nguye inhloko yemuli le njalo siyaqiniseka ukuthi uzakwenza lokho akutsho ku-1 Thimothi 5:8.

8. (a) Kuyini okuzasinceda nxa sisesaba ukuthi ngeke senelise ukondla imuli zethu? (UMathewu 6:31-33) (b) Singayilingisela njani imuli esemfanekisweni ephathele udadewethu ukudla?

⁸ Nxa singathandabuzi ukuthi uJehova uyasithanda lokuthi uyazithanda imuli zethu, sizakholwa sibili ukuthi uzasinika esikudingayo. (Bala uMathewu 6:31-33.) UJehova nguNkulunkulu olothando njalo ophanayo futhi uyafuna ukusinakekela. Ngesikhathi edala umhlaba wadala izinto esizidingayo ukuze siqhubeke siphila. Kodwa kaphelelanga lapho, waphinda wadala izinto ezinengi ezenza sikholise ukuphila. (Gen. 2:9) Lanxa ngezinye izikhathi siyabe siswela ezinye izinto esizifunayo, kumele sikhumbule ukuthi esilakho sikunikwe nguJehova. (Mat. 6:11) Kumele sihlale sikhumbula lokuthi loba yini esiyidelayo ayitsho lutho nxa iqathaniswa lalokho uJehova asinika khona khathesi lazasinika khona esikhathini esizayo. Lokhu yikho kanye uNestor loMaría abazibonela khona.—Isaya. 65:21, 22.

9. Ufundani kuNestor loMaría?

⁹ UNestor loMaría babephila impilo emnandi eColombia. Bathi: “Sacabanga ukuthi singabi lezinto ezinengi empilweni, senze okunengi enkonzweni. Kodwa sasisesaba ukuthi asisoze sithokoze nxa sesiphila ngemali encane.” Kuyini okwabanceda ukuthi bangakhulelwa yikwesaba? Bacabangisisa ngendlela ezinengi uJehova ayetshengise ngazo ukuthi uyabathanda. Batshiya imisebenzi yabo emihle ngoba babengasathandabuzi ukuthi uJehova uzahlala ebanakekela. Bathengisa indlu yabo bathuthela kwenye indawo eyayilabamemezeli abalutshwana. Bathini ngalokho abakwenzayo? UNestor uthi: “Sibonile ukuthi aliqiniso sibili amazwi akuMathewu 6:33. Asikaze siswele lutho oluqakathekileyo empilweni. Kanti njalo sesithokoza kakhulu.”

UKWESABA ABANTU

10. Kungani abantu besesabana?

¹⁰ Kusukela kudala abantu bebehlala belimazana. (UmTshu. 8:9, NWT) Ngokwesibonelo, abasezikhundleni bawasebenzisa kubi amandla abo. Izigebenga zihlasela abantu. Abanye abantwana bathethisa abanye esikolo futhi bayabethusela. Kanti njalo abanye abantu baphatha kubi imuli zabo. Yikho abantu bemesaba umuntu. Manje uSathane ukusebenzisa njani ukwesaba lokhu?

11-12. USathane ukusebenzisa njani ukwesaba abantu?

¹¹ USathane usebenzisa ukwesaba abantu ukuze asenze siyekele ukutshumayela lokwenza okunye uNkulunkulu athi sikwenze. Usebenzisa ohulumende ukuthi bavimbe umsebenzi wethu njalo basihlukuluze. (Luk. 21:12; Isam. 2:10) Abantu abanengi emhlabeni kaSathane bakhuluma amanga ngaboFakazi bakaJehova, bekhohlisa abanye. Abantu abakholwa amanga la bangakhuluma kubi ngathi kumbe basilimaze. (Mat. 10:36) Okwenziwa nguSathane akusimangalisi ngoba wayevele esekwenza ngesikhathi samaKhristu akuqala.—ImiSeb. 5:27, 28, 40.

¹² Ukwesaba ukuhlukuluzwa yiziphathamandla ayisiso sodwa isikhali uSathane asisebenzisayo. Abanye besaba ukuthi izihlobo zabo zizabaphatha njani nxa bengaba ngoFakazi ukwedlula ukutshaywa kumbe ukuphathwa kubi ngohulumende. Bayazithanda kakhulu izihlobo zabo njalo bafisa ukuthi lazo zifunde ngoJehova, zimkhonze. Kubazwisa ubuhlungu ukuzwa izihlobo zabo zikhuluma kubi ngoNkulunkulu weqiniso langezinceku zakhe. Ezinye izihlobo ezaziphikisa oFakazi zacina sezilamukele iqiniso. Kodwa sizakwenzani nxa izihlobo zethu zisilahla ngoba sesingoFakazi?

13. Ukukholwa ukuthi uJehova uyasithanda kusinceda njani nxa sidelwa yizihlobo? (IHubo 27:10)

¹³ Amazwi akuHubo 27:10 angasiduduza. (Bala.) Ukuhlala sikhumbula ukuthi uJehova uyasithanda kuzasinceda singakhathazeki nxa izihlobo zethu zisilahla. Kanti njalo kasithandabuzi ukuthi uzasinika umvuzo nxa singaqinisela. UJehova uzasinika okokuziphilisa njalo uzasinceda sihlaliseke, sithokoze futhi sihlale singabangane bakhe. UBiniam esike sakhuluma ngaye wazibonela ngawakhe lokho.

14. Ufundani kuBiniam?

¹⁴ UBiniam waba nguFakazi kaJehova lanxa wayekwazi ukuthi wayengahlukuluzwa yiziphathamandla. Ukwazi ukuthi uJehova uyamthanda kwamnceda njani ukuthi angesabi abantu? Uthi: “OFakazi babehlukuluzwa okuzwayo. Kodwa engangikwesaba kakhulu yikuphikiswa yimuli yangakithi. Ngangisesaba ukuthi ngizadanisa ubaba owayengasiFakazi ngenxa yesinqumo engangisenzile lokuthi labanye emulini bazangeyisa.” Kodwa uBiniam wayengathandabuzi ukuthi uJehova uzahlala ebanakekela labo abathandayo. Uqhubeka esithi: “Ngacabangisisa ngendlela uJehova ayencedise ngayo abanye ukuthi babekezele ngesikhathi beswela okokuziphilisa lokuthi baqinisele ngesikhathi bebandlululwa njalo behlukuluzwa ngabanye. Ngangikwazi ukuthi uJehova uzangibusisa nxa ngingahlala ngithembekile kuye. Ngabotshwa kanengi njalo ngangize ngitshaywe, kodwa ngazibonela ngawami ukuthi uJehova uyasincedisa nxa sihlala sithembekile kuye.” UJehova waba nguBaba sibili kuBiniam, futhi abazalwane baba yimuli yangakibo.

UKWESABA UKUFA

15. Kungani sikwesaba ukufa?

¹⁵ IBhayibhili lithi ukufa yisitha. (1 Khor. 15:25, 26) Nxa sigula kumbe omunye esimthandayo egula, singezwa sikwesaba ukufa. Siyakwesaba ukufa ngoba uJehova wasidala silesifiso sokuphila phakade. (UmTshu. 3:11) Ukwesaba ukufa kungasivikela ezintweni ezingasibulala. Ngokwesibonelo, kuyasinceda ukuthi sidle ukudla okwakha umzimba, siqeqetshe umzimba, sihambe kubodokotela nxa sigula, sinathe amaphilisi njalo singenzi izinto eziyingozi ezingasibulala.

16. USathane usebenzisa njani ukwesaba ukufa ukuze asenze sitshiye uJehova?

¹⁶ USathane uyakwazi ukuthi siyakwesaba ukufa. Uthi singenza loba yini size sitshiye uJehova ukuze siqhubeke siphila. (Jobe. 2:4, 5) La ngamanga aluhlaza tshoko. Lanxa kunjalo, nguye “olamandla okubangela ukufa.” Yikho usebenzisa ukwesaba ukufa ukuze asenze siyekele ukukhonza uJehova. (Heb. 2:14, 15) Ngezinye izikhathi uSathane usebenzisa abantu ukuthi basethusele ngokuthi bazasibulala ukuze silahle ukholo lwethu. Kanti njalo nxa sigula angazama ukusenza sikhethe ukwelatshwa ngendlela engamthokozisiyo uJehova. Odokotela lezinye izihlobo ezingakhonziyo bangazama ukusibamba ngamandla ukuthi sifakwe igazi. Abanye bangazama ukusincenga ukuthi selatshwe ngezinye indlela eziphikisana lalokho okutshiwo liBhayibhili.

17. Ngokwalokho okutshiwo nguRoma 8:37-39, kungani kungamelanga sikwesabe ukufa?

¹⁷ Asikufuni ukufa kodwa nxa kungenzakala lokhu, siyakwazi ukuthi uJehova kasoze ayekele ukusithanda. (Bala uRoma 8:37-39.) Nxa abangane bakaJehova bengafa, uhlala ebakhumbula sengathi bayaphila. (Luk. 20:37, 38) Uyafisa sibili ukubavusa. (Jobe. 14:15) UJehova ubhadale inhlawulo edula kakhulu ukuze ‘sibe lokuphila okungapheliyo.’ (Joh. 3:16) Siyakwazi ukuthi uyasithanda sibili lokuthi ulendaba lathi. Yikho asimtshiyi nxa sigula kumbe sisethuselwa ngokufa kodwa sithembela kuye ukuthi asiduduze, asiphe inhlakanipho njalo asiqinise. Lokhu yikho kanye okwenziwa nguValérie lomkakhe.—Hubo. 41:3.

18. Ufundani kuValérie?

¹⁸ Ngesikhathi uValérie eleminyaka engu-35 wabanjwa imvukuzane embi kakhulu. Ukwazi ukuthi uJehova uyamthanda kwamnceda njani ukuthi angakhulelwa yikwesaba ukufa? Wathi: “Mina lomkami sethuka ngesikhathi sitshelwa ukuthi ngile-cancer. Kwakumele ngi-opharethwe. Ngakhuluma labodokotela abanengi ukuthi bangi-opharethe bengangifakanga igazi kodwa bonke bala. Ngangisesaba kodwa ngangingasoze ngephule umthetho kaNkulunkulu ngivume ukufakwa igazi. Okwempilo yami yonke kunengi uJehova ayengenzele khona okutshengisa ukuthi uyangithanda. Khathesi ngasengithole ithuba lokutshengisa ukuthi lami ngiyamthanda. Sonke isikhathi nxa odokotela babengitshela indaba ezimbi ngangizimisela kakhulu ukuthokozisa uJehova ngiyangise uSathane. Ngacina ngi-opharethiwe ngingafakwanga igazi. Lanxa ngilokhu ngigula, uJehova uhlala esinika konke esikudingayo. Ngisakhumbula ngempelaviki ngingakabanjwa imvukuzane. Emihlanganweni yebandla safunda isihloko esithi ‘Ukubhekana Nezinkathazo Zanamuhla Ngesibindi.’c Isihloko lesi sasinceda sibili. Sasibala sasiphindaphinda. Izihloko ezinjengalezi lokuhlala sisenza izinto ezinjengokutshumayela lokungena imihlangano kuncede mina lomkami sahlaliseka njalo senza izinqumo ezinhle.”

UKUNQOBA UKWESABA

19. Kuyini osekuzakwenzakala?

¹⁹ UJehova uncedise abafowethu labodadewethu emhlabeni jikelele ukuthi baqinisele ebunzimeni njalo bamelane loDeveli. (1 Phet. 5:8, 9) Uzakuncedisa lawe. Sekuseduze ukuthi uJehova atshele uJesu lazabusa labo ukuthi ‘babhidlize imisebenzi kaDeveli.’ (1 Joh. 3:8) Ngemva kwalokho abantu bakaNkulunkulu emhlabeni ‘abayikwesaba lutho.’ (Isaya. 54:14; Mik. 4:4) Kuze kube yilesosikhathi kumele sisebenze nzima ukuze sinqobe ukwesaba.

20. Kuyini okuzasinceda sinqobe ukwesaba?

²⁰ Kumele siqhubeke sikholwa ukuthi uJehova uyasithanda lokuthi uzasivikela. Okunye okuzasinceda yikucabangisisa lokukhuluma ngendlela avikela ngayo izinceku zakhe kudala. Kanti njalo okunye okuzasinceda yikuhlala sikhumbula ukuthi uJehova usincedise njani ngesikhathi sisebunzimeni. Singenelisa sibili ukunqoba ukwesaba sincediswa nguJehova.—Hubo. 34:4.