ISIFUNDO 10

Ntshintshantshintsha Ilizwi

IZaga 8:4

OKUMELE UKWENZE: Khweza ilizwi lakho loba ulehlise, untshintshe ijubane kanye lephimbo olisebenzisayo ukuze okutshoyo kucace njalo kuthinte inhliziyo.

UNGAKWENZA NJANI?

Khweza ilizwi lakho loba ulehlise. Bala ngelizwi eliphezulu ukuze ucacise imicijo eqakathekileyo futhi ukhuthaze abakulaleleyo. Kwenze lokhu langesikhathi ubala umbhalo okhuluma ngesahlulelo. Yehlisa ilizwi nxa ufuna abakulaleleyo balangazelele ukuzwa okunengi kumbe nxa uveza imizwa yokwesaba kumbe eyokukhathazeka.

Ungalikhwezi kanenginengi ilizwi lakho abakulaleleyo baze babone angathi usubatshingela. Ungazidonseli amehlo ngokukhuluma ngentshiseko edlulisa amalawulo.
Ntshintshantshintsha iphimbo. Nxa kuvuma ngolimi lwakho, khuluma ngephimbo eliphezulu ukuze uveze intshiseko loba uchaze ubukhulu bento ethile kumbe ubude bomango. Nciphisa iphimbo nxa uveza imizwa yosizi loba eyokudana.
Ntshintshantshintsha ijubane. Ngezelela ijubane nxa uveza imizwa yokuthaba. Yehlisa ijubane nxa uchaza imicijo eqakathekileyo.

Ilizwi lakho akumelanga liphonguntshintsha ngendlela ezakwethusa obafundisayo basale bezibuza ukuthi kanti sekutheni. Ungakhulumi ugijima kakhulu uze ucine usuginya amabala.