ISIFUNDO 13

Cacisa Ukuthi Okufundisayo Kusebenza Njani

UHebheru 5:14

OKUMELE UKWENZE: Nceda abakulaleleyo bazwisise ukuthi okhuluma ngakho kubasiza ngani njalo ubatshengise ukuthi bangakusebenzisa njani.

Cabanga ngabantu ozabafundisa. Cabangisisa ngokuthi kungani kuqakathekile ukuthi abakulaleleyo bayizwe inkulumo yakho. Yihluze, ukhethe lokho okuzabanceda kakhulu.
Ngesikhathi usenza inkulumo, nceda abalaleli babone lokho okumele bakwenze. Nxa uqala nje inkulumo yakho, umuntu ngamunye kufanele abone ukuthi izamsiza ngani. Veza ukuthi umcijo ngamunye oyisiqokoqela singawusebenzisa njani. Ungabhodabhodi, kodwa yenza kucace ukuthi okutshoyo kubanceda njani abakulaleleyo.

Nxa ubachazela ukuthi bangazisebenzisa njani izimiso eziseBhayibhilini, khuluma labo ngomusa njalo utshengise ukuthi uyabazwisisa. Ungababeki icala kodwa basize ukuthi bamthande kakhulu uJehova futhi baqinise ukholo lwabo, njalo uthembe ukuthi bazakwenza lokho abakufundayo.