ISIFUNDO 18
Ungawabona Njani AmaKhristu Eqiniso?
Abantu abanengi bathi bangamaKhristu kodwa bakholwa izinto ezitshiyeneyo futhi baziphatha ngendlela etshiyeneyo. Manje singawabona njani amaKhristu eqiniso?
1. Kutshoni ukuba ngumKhristu?
Ukuba ngumKhristu kutsho ukuba ngumlandeli kaJesu Khristu. (Bala imiSebenzi 11:26.) Kukhanya njani ukuthi umuntu ungumlandeli kaJesu? UJesu wathi: “Nxa lingahlala liselizwini lami, liyabe lingabafundi bami sibili.” (UJohane 8:31) Lokhu kutsho ukuthi amaKhristu eqiniso alandela lokho okwafundiswa nguJesu. Afundisa izinto eziseBhayibhilini njengoba nje loJesu wayefundisa izinto eziseMibhalweni.—Bala uLukha 24:27.
2. AmaKhristu eqiniso atshengisa njani ukuthi alothando?
UJesu watshela abalandeli bakhe wathi: “Thandanani njengoba nje lami ngilithandile.” (UJohane 15:12) UJesu watshengisa njani ukuthi uyabathanda abafundi bakhe? Wayezinika isikhathi sokubakhuthaza lesokubancedisa. Wayebathanda okokuthi waze wabafela. (1 UJohane 3:16) LamaKhristu eqiniso atshengisa ngezenzo ukuthi ayathandana, awapheleli ekukhulumeni.
3. Yiwuphi umsebenzi owenziwa ngamaKhristu eqiniso?
UJesu wanika abafundi bakhe umsebenzi wokwenza. “Wabathuma ukuthi bayetshumayela ngoMbuso kaNkulunkulu.” (ULukha 9:2) AmaKhristu okuqala ayelanda abantu ezindlini zabo lakwezinye indawo ababetholakala kuzo ukuze abatshumayeze. Ayengameleli ukuthi abantu babalande lapho ayehlangana khona. (Bala imiSebenzi 5:42; 17:17.) Lalamuhla, amaKhristu eqiniso atshumayeza abantu loba ngaphi lapho abatholakala khona. Ayabathanda kakhulu abantu yikho esebenza nzima ukuze abatshele izindaba ezinhle eziseBhayibhilini ezenza babe lethemba.—UMakho 12:31.
GEBHA UJULE
Engxenyeni le uzabona ukuthi amaKhristu eqiniso atshiyene njani lamaKhristu amanga angalingiseli uJesu futhi angalandeli imfundiso zakhe.
4. AmaKhristu eqiniso aqakathekisa iqiniso eliseBhayibhilini
AmaKhristu akuqala ayeliqakathekisa iLizwi likaNkulunkulu
Abanye abantu abazithi bangamaKhristu abalandeli okutshiwo liBhayibhili. Bukelani IVIDIYO beselixoxa ngombuzo olandelayo.
Amasonto amanengi ehluleke njani ukufundisa lokho okwakufundiswa nguJesu?
UJesu wafundisa abantu iqiniso eliseLizwini likaNkulunkulu. Bala uJohane 18:37 beselixoxa ngombuzo lo:
UJesu wathi singawabona njani amaKhristu ‘asekela iqiniso’?
5. AmaKhristu eqiniso afundisa abantu iqiniso eliseBhayibhilini
AmaKhristu akuqala etshumayela
Engakabuyeli ezulwini, uJesu wanika abalandeli bakhe umsebenzi olokhu usenziwa lalamuhla. Bala uMathewu 28:19, 20 lemiSebenzi 1:8 beselixoxa ngombuzo lo:
Umsebenzi wokutshumayela uzakwenziwa kuze kuyefika ngaphi?
6. AmaKhristu eqiniso enza lokho akufundisayo
Kuyini okwenza indoda okuthiwa nguTom yabona ukuthi isithole amaKhristu eqiniso? Bukelani IVIDIYO beselixoxa ngemibuzo elandelayo.
Kuyini okwenza uTom waqalisa ukusola amasonto?
Kuyini okwenza angathandabuzi ukuthi usethole iqiniso?
Esikwenzayo kuqakatheke ukwedlula esikutshoyo. Bala uMathewu 7:21 beselixoxa ngombuzo lo:
UJesu uqakathekisa esikutshoyo yini kumbe esikwenzayo?
7. AmaKhristu eqiniso ayathandana
AmaKhristu akuqala ayathandana
AmaKhristu eqiniso angawafela yini amanye amaKhristu? Bukelani IVIDIYO beselixoxa ngemibuzo elandelayo.
Kuyini okwenza umfowethu uLikhwide wazimisela ukufela umfowethu uJohansson?
Ubona angani okwenziwa ngumfowethu uLikhwide kutshengisa ukuthi ungumKhristu weqiniso yini?
Bala uJohane 13:34, 35 beselixoxa ngemibuzo elandelayo:
AmaKhristu eqiniso abaphatha njani abantu beminye imihlobo?
Angatshengisa njani ukuthi alothando ngesikhathi sempi?
ABANYE BATHI: “Akulandaba ukuthi ungena yiphi isonto ngoba uNkulunkulu uyawamukela wonke.”
Yiwuphi umbhalo ongawusebenzisa ukuze uncedise umuntu otshonjalo?
ISIFINQO
AmaKhristu eqiniso alothando njalo alandela iqiniso alifunda eBhayibhilini abeselifundisa labanye.
Ufundeni?
AmaKhristu eqiniso azithatha ngaphi izinto azikholwayo?
AmaKhristu eqiniso abaphatha njani abanye?
Yiwuphi umsebenzi owenziwa ngamaKhristu eqiniso?
THOLA OKUNENGI
Bukela ividiyo le ubone ukuthi oFakazi bakaJehova bamlingisela njani uJesu.
Bala isihloko lesi uzwe ukuthi kuyini okwenza omunye umama owayengusista eRoma watshiya isonto yakhe.
“Baphendula Yonke Imibuzo Engangilayo Besebenzisa IBhayibhili!” (INqabayokulinda, April 1, 2014)
Bukela ividiyo le ukuze ubone ukuthi amaKhristu eqiniso atshengisa njani ukuthi alothando nxa kulomonakalo.
Ukuncedisa Abazalwane Bethu Nxa Behlelwe Ngumonakalo—Isiqephu (3:57)
Bala isihloko lesi uzwe ukuthi amaKhristu akuqala lawalamuhla atshengisa njani ukuthi alingisela uJesu.
“Akhanya Ngani AmaKhristu Eqiniso?” (INqabayokulinda, March 1, 2012)