IBhayibhili Lithini Ngokuzicomba Lokuzicecisa?
Impendulo yeBhayibhili
IBhayibhili alikhulumi ngayo kangako indaba le, kodwa aliyali ukuthi abantu bazicombe loba ukuthi bazicecise. Lanxa kunjalo likhuthaza “ubuhle obungapheliyo bomoya omnene lothuleyo.”—1 UPhetro 3:3, 4.
IBhayibhili alikwalisi ukuzicomba
Abesifazana abathembekileyo abaseBhayibhilini babezicomba. Umka-Isaka uRabheka wayegqoka indandatho emakhaleni, ececa ngamasongo egolide langeminye imigqizo yegolide edulayo ayeyiphiwe ngu-Abhrahama. (UGenesisi 24:22, 30, 53) U-Esta laye wavuma lapho enikwa “okokuzilungisa kuhle” njengoba wayelungiselela ukuthi abe yindlovukazi yePhesiya. (U-Esta 2:7, 9, 12) Ukuzilungisa kuhle lokhu kwakugoqela ukusebenzisa amafutha lokuzicecisa ngendlela ezitshiyeneyo.
IBhayibhili lilemizekeliso ekhuluma ngezinto zokuzicecisa. Ngokwesibonelo umuntu onika iseluleko esihle ufaniswa ‘lecici legolide kolalelayo.’ (IZaga 25:12) IBhayibhili lifanisa indlela uNkulunkulu ayephatha ngayo abako-Israyeli lendoda ececisa umkayo ngamangqongqo, umgaxo wentamo lamacici. Ukuceciswa okunjalo kwenza isizwe sako-Israyeli ‘saba sihle kakhulu.’—UHezekheli 16:11-13.
Imibono engaqondanga mayelana lokuzicomba lokuzicecisa
Umbono ongaqondanga: Ku-1 Phetro 3:3 iBhayibhili lithi akufanelanga ‘seluke izinwele njalo sigqize imigqizo yegolide.’
Okuqondileyo: Amanye amavesi asesahlukweni lesi atshengisa ukuthi ubuhle bangaphakathi yibo obuqakatheke kakhulu ukwedlula ukuzicomba. (1 UPhetro 3:3-6) Eyinye indaba eseBhayibhilini isinceda sibone ukuthi ingaphakathi yiyo eqakathekileyo.—1 USamuyeli 16:7; IZaga 11:22; 31:30; 1 KuThimothi 2:9, 10.
Umbono ongaqondanga: Ukuzifaka isibhuda emehlweni okwenziwa nguJezebheli kutshengisa ukuthi ukuzicomba kubi.—2 AmaKhosi 9:30.
Okuqondileyo: Okwenza uJezebheli waba ngumuntu omubi yizenzo zakhe hatshi indlela ayebukeka ngayo.—2 AmaKhosi 9:7, 22, 36, 37.