Inceku Ezikhonzayo Zenza Umsebenzi Oqakathekileyo

UPHAWULI wabhalela ibandla laseFiliphi wathi: “Mina Phawuli loThimothi esiyizinceku zikaKhristu uJesu, kini lonke abangcwele abaseFiliphi abamanyene loKhristu uJesu, lakubabonisi lezinceku ezikhonzayo.” (Flp. 1:1) Nanzelela ukuthi evesini le uPhawuli wakhuluma langezinceku ezikhonzayo. Lokhu kutshengisa ukuthi zazisenza umsebenzi oqakathekileyo wokuncedisa abadala ebandleni. Lalamuhla lokhe kunjalo. Inceku ezikhonzayo zincedisa abadala njalo zenza kube lokuhleleka ebandleni.

² Uyabazi yini abazinceku ezikhonzayo ebandleni okulo? Uyayazi yini imisebenzi abayenzayo ukuze bancedise ibandla? UJehova uyayiqakathekisa imisebenzi abayenzayo. UPhawuli wabhala wathi: “Phela nxa amadoda eyiphatha kuhle imisebenzi yawo yenkonzo, aba ngadume ngokuhle futhi aba lenkululeko enkulu yokukhuluma ngokukholwa kwawo kuKhristu uJesu.”—1 Tim. 3:13.

INCEKU EZIKHONZAYO KUMELE ZIBE NGABANTU ABANJANI?

³ Inceku ezikhonzayo kumele zithembeke, ziphile ngendlela etshengisa ukuthi zingamaKhristu njalo ziyenze kuhle yonke imisebenzi eziyiphathiswayo. Lokhu sikubona emazwini uPhawuli awabhalela uThimothi echasisa lokho okwakukhangelelwe encekwini ezikhonzayo. Wathi: “Izinceku ezikhonzayo lazo kumele zingathathi izinto lula, zingabi lobuqili kwezikukhulumayo, zinganathi kakhulu iwayini, zingabi yizihwaba ezithanda ukuthola inzuzo ngokungathembeki, kodwa zibambelele emfihlweni engcwele yokholo zilomzwangedwa ohlanzekileyo. Kanti njalo laba kabaqale bahlolwe ukuthi bafanele yini. Ngemva kwalokho sebengaba yizinceku nxa kungelalutho abasolwa ngalo. Inceku ekhonzayo kayibe yindoda elenkosikazi eyodwa, ekhokhela kuhle abantwabayo lomuzi wayo.” (1 Tim. 3:8-10, 12) Nxa abadala behlola abazalwane abazakuba zinceku ezikhonzayo kumele babeleqiniso lokuthi abazalwane labo balandela okutshiwo yiMibhalo ukuze abantu bangakhulumi kubi ngebandla.

⁴ Kungelani lokuthi zisakhula kumbe sezingabantu abadala, inceku ezikhonzayo kumele zikhuthale ekutshumayeleni. Nxa zisenza njalo ziyabe zilingisela uJesu futhi ziyabe zitshengisa ukuthi zilesifiso esinjengesikaJehova sokuthi abantu basindiswe.—Isaya. 9:7.

⁵ Amadoda azinceku ezikhonzayo kumele abe yisibonelo esihle ekugqokeni, ekuzilungiseni, ekukhulumeni lasekuziphatheni. Kufanele kukhanye lokuthi asebenzisa kuhle ingqondo zawo njalo lokhu kuzakwenza abanye bawahloniphe. Kanti njalo kumele aqakathekise ubungane alabo loJehova kanye lemisebenzi ayiphathisiweyo.—Tit. 2:2, 6-8.

⁶ Amadoda la ‘aqala ahlolwe ukuthi afanele yini.’ Engakabekwa ukuba zinceku ezikhonzayo, kumele kukhanye ukuthi azinikele ukwenza loba yiwuphi umsebenzi awuphiwayo. Indlela aphila ngayo kufanele itshengise ukuthi abeka uMbuso kuqala lokuthi azimisele ukwenza loba yiphi imisebenzi angayiphiwa. Kumele abe yisibonelo esihle sibili kwabanye.—1 Tim. 3:10.

IMISEBENZI EYENZIWA ZINCEKU EZIKHONZAYO

⁷ Inceku ezikhonzayo zenza imisebenzi etshiyeneyo enceda abafowethu labodadewethu, njalo lokhu kwenza abadala bathole isikhathi esithe xaxa sokufundisa lokwelusa ibandla. Iqula labadala linika inceku lezi imisebenzi kusiya ngalokho ezikwenelisayo kanye lalokho okudingakalayo ebandleni.

⁸ Nanzi izibonelo zaleyo misebenzi: Omunye angacelwa ukuthi akhangele amabhuku ukuze senelise ukuthola esiyabe siwafuna, kungaba ngesiwasebenzisa ekutshumayeleni kumbe awokuzibalela. Omunye angaphiwa umsebenzi wokukhangela izimali kumbe amamephu endawo esitshumayela kuyo. Abanye bangacelwa ukuthi bakhangele ama-microphone kanye lemitshina yokudlala izingoma lamavidiyo. Inceku ezikhonzayo ziyancedisa lasekulungiseni iWolu yoMbuso lokuyigcina ihlanzekile. Abanye njalo bangaba ngama-asha kumbe bancedise kweminye imisebenzi etshiyeneyo.

⁹ Kwamanye amabandla, inceku ekhonzayo ingaphiwa umsebenzi owodwa oqondane layo kodwa kwamanye ingaphiwa imisebenzi eminengi kusiya ngenani lenceku ezikhonzayo ezikhona ebandleni. Kwezinye izikhathi umsebenzi owodwa ungenziwa zinceku ezinengi. Nxa kuyikuthi inceku ezikhonzayo zilutshwane, abadala bangacela abanye abafowethu ababhabhathiziweyo abayisibonelo esihle ukuthi bancedise kweminye imisebenzi. Lokhu kuzabanika ithuba lokufunda ukwenza imisebenzi etshiyeneyo ebandleni besekubanceda phambili nxa sebezinceku ezikhonzayo. Nxa kungelabafowethu, kungacelwa udade oyisibonelo esihle ebandleni ukuthi ancedise kweminye imisebenzi lanxa yena engasoze abe yinceku ekhonzayo. Umuntu oyisibonelo esihle ngoziphethe kuhle futhi owenza kuhle ekukhonzeni okokuthi abanye bangamlingisela. Ngokwesibonelo, indlela angena ngayo imihlangano, atshumayela ngayo, aphatha ngayo imuli yakhe, akhetha ngayo ezokuzilibazisa, agqoka lazilungisa ngayo lokunye okunengi kumele kube yisibonelo esihle kwabanye.

¹⁰ Emabandleni alabadala abalutshwane, inceku ezikhonzayo ezifaneleyo zingacelwa ukuthi zibuze labo abafuna ukubhabhathizwa imibuzo etholakala “kungxenye 1 ethi: Esikukholwayo.” “Ingxenye 2 elesihloko esithi: Indlela Okumele AmaKhristu Aphile Ngayo” kumele yenziwe ngumdala ngenxa yokuthi imibuzo elapho kumele iphathwe ngabadala kuphela.

¹¹ Kwesinye isikhathi abadala bangabona kungcono ukuthi batshintshanise imisebenzi abayipha inceku ezikhonzayo. Kodwa izikhathi ezinengi kuhle ukuthi inceku ekhonzayo yenze umsebenzi owodwa okwesikhathi eside ukuze iwazi kuhle lowomsebenzi.

¹² Kusiya ngezimo, eminye imisebenzi ingaphiwa inceku ekhonzayo eyenza kuhle futhi elentuthuko ebonwa ‘ngabantu bonke.’ (1 Tim. 4:15) Ngokwesibonelo nxa abadala bebalutshwane, inceku ekhonzayo ingacelwa ukuthi incedise umbonisi weqembu. Kwesinye isikhathi ingaphiwa umsebenzi wokuba yinceku yeqembu iqondiswa ngabadala. Inceku ezikhonzayo zingenza ezinye izingxenye emhlanganweni Wempilo Lenkonzo YamaKhristu, ziqhube Isifundo SeBhayibhili Sebandla nxa kulesidingo njalo ziphe inkulumo kazulu wonke. Kwezinye izikhathi zingaphathiswa leminye imisebenzi eyenziwa ngabadala nxa zifanele. (1 Phet. 4:10) Inceku ezikhonzayo kumele zizimisele ngenhliziyo yonke ukuncedisa abadala.

¹³ Lanxa umsebenzi wazo utshiyene lowabadala akutsho ukuthi awuqakathekanga ngoba lawo uyinkonzo engcwele kuNkulunkulu njalo wenza izinto zitshelele ebandleni. Ngokuhamba kwesikhathi, inceku ezikhonzayo zingabekwa ukuthi zibe ngabadala bebandla nxa sezisenelisa ukwelusa lokufundisa kuhle.

¹⁴ Nxa ungumzalwane osakhulayo kumbe osanda kubhabhathizwa, kukhona yini okwenzayo ukuze ulalamele ukuba yinceku ekhonzayo? (1 Tim. 3:1) Minyaka yonke kulabantu abanengi abeza enhlanganisweni kaJehova yikho kufuneka amadoda afaneleyo azanakekela ibandla. Okungakusiza ukuthi ulalamele umsebenzi lo yikuba lesifiso sokunceda abanye. Isifiso lesi ungaba laso nxa ungacabangisisa ngesibonelo sikaJesu. (Mat. 20:28; Joh. 4:6, 7; 13:4, 5) Okunye okungakunceda yikuzimisela ukwenzela abanye okuhle. (ImiSeb. 20:35) Yikho zimisele ukuncedisa abanye, uncedise nxa kulungiswa iWolu yoMbuso njalo uhlale ulungele ukuvolontiya ukupha inkulumo emhlanganweni Wempilo Lenkonzo YamaKhristu. Ukuzinika isikhathi sokufunda iBhayibhili kuzakunceda ukuthi ulalamele imisebenzi ebandleni. (Hubo. 1:1, 2; Gal. 5:22, 23) Kanti njalo ukwenza yonke imisebenzi oyiphiwayo ebandleni kuzatshengisa ukuthi uthembekile.—1 Khor. 4:2.

¹⁵ Inceku ezikhonzayo zibekwa nguJehova esebenzisa umoya wakhe ongcwele ukuze zincedise ibandla. Bonke ebandleni kumele batshengise ukuthi bayaziqakathekisa inceku ezikhonzayo ngokubambisana lazo kuyo yonke imisebenzi yazo. Ngokwenza njalo siyabe sitshengisa ukuthi siyambonga uJehova ngokwenza ukuthi ibandla libe ngelihlelekileyo.—Gal. 6:10.