Woba Labangane Abehlukeneyo

Uhlupho Olujayelekileyo

Nxa uhlala uninela khatshana abantu bemihlobo ongayithandiyo ubandlululo olalo lungakhula. Kanti njalo nxa singaba labangane abafanana lathi kuphela, singacina sibona angathi indlela esicabanga ngayo, esizwa ngayo lesenza ngayo yiyo yodwa eqondileyo.

Isimiso EsiseBhayibhilini

“Lizivule ngokupheleleyo izinhliziyo zenu.”—2 KWABASEKHORINTE 6:13.

Ivesi le isifundisani? Ibala elithi ‘inhliziyo’ lingatsho lokho esikuzwayo ngaphakathi. Nxa singathanda abantu abahambelana lathi kuphela kungaba nzima ukuthi sivule izinhliziyo zethu. Yikho kuqakathekile ukuthi sizame ukuba lobungane labantu abatshiyene lathi.

Ukuba Labangane Abehlukeneyo Kusinceda Ngani?

Ukwazi abanye abantu ngcono kuzasinceda sizwisise ukuthi kungani besenza izinto ngendlela etshiyene leyethu. Ukujayelana labo kuzakwenza sibe ngabantu banye. Siyabe sesibazwisisa, sijabula ndawonye futhi sibazwela nxa bephakathi kohlupho.

Ake ucabange ngesibonelo sowesifazana okuthiwa nguNazaré. Wayebandlulula abantu abavela kwamanye amazwe. Manje kuyini okwamncedayo? Uthi: “Ngangitshona labo futhi ngisebenza labo. Indlela abantu laba ababeyiyo yayitshiyene kakhulu lalokho okwakuhlala kukhulunywa ngabantu emphakathini. Ukuba labangane abalamasiko angafanani lawakho kuyakufundisa ukuthi ungahluleli abanye ulandela izinto ozizwe zikhulunywa. Kwenza lokuthi ucine ubathanda futhi ubaqakathekisa.”

Ongakwenza

Dinga amathuba okuxoxa labantu abavela kwamanye amazwe, abeminye imihlobo kumbe abakhuluma olunye ulimi. Nanku ongakwenza:

Bacele bakutshele okunengi ngabo.
Banxuse ukuthi lizokudla ndawonye.
Balalelisise nxa bexoxa uzame ukubona ukuthi kuyini abakuthandayo.

Nxa ungakuzwisisa lokho abahlangane lakho empilweni uzabona ukuthi kungani besenza izinto ngendlela abenza ngayo. Lokhu kuzakwenza ubathande.

Isibonelo: UKandasamy LoSookammah (Abahlala ECanada)

“Sakhulela eSouth Africa ngesikhathi ubandlululo lubhahile (i-apartheid). Abantu bemihlobo etshiyeneyo babebanjwa ngamandla ukuthi bangahlali ndawonye. Lokhu kwenza ubandlululo lwaqina ngamandla. Sasibazonda abantu abamhlophe ngoba abanye babo babesikhangelela phansi. Ngalesosikhathi sasicabanga ukuthi asilalo ubandlululo. Sasizitshela ukuthi yithi esibandlululwayo.

“Okwasinceda ukuthi sitshintshe umbono wethu yikuzama ukuvula izinhliziyo zethu. Saba labangane beminye imihlobo njalo saqalisa ukujayelana labamhlophe. Lokhu kwenza sabona ukuthi kasitshiyananga labo kangako. Okwenzakala empilweni zethu lezabo kuyahambelana futhi sehlelwa yibunzima obufananayo.

“Kanti njalo sake sahlala lenye imuli yabamhlophe okwesikhathi eside emzini wethu. Sayijayela kakhulu imuli le sacina sesingabangane abakhulu. Lokhu kwenza satshintsha indlela esasibona ngayo abantu abamhlophe.”