Bangaki oFakazi bakaJehova obaziyo? Abanye bethu bangaba ngomakhelwane bakho, abantu osebenza labo, kumbe bangaba ngofunda labo esikolo. Mhlawumbe sake saxoxa lawe ngeBhayibhili. Singobani vele, njalo kungani sitshela abanye ngesikukholwayo?

Singabantu nje abafanana labanye. Sakhulela emiphakathini etshiyeneyo njalo sivela ezimulini ezitshiyeneyo. Abanye bethu babengena amanye amasonto, abanye babengakholwa kuNkulunkulu. Loba kunjalo, sonke singakabi ngoFakazi sazinika isikhathi sokuhlolisisa izimfundiso zeBhayibhili. (ImiSebenzi 17:11) Sakuzwisisa lokho esasikufunda sasesizikhethela ukukhonza uJehova uNkulunkulu.

Ukufunda iBhayibhili kuyasinceda. Njengabantu bonke silezinhlupho zethu njalo silakho esikuphambanisayo. Kodwa ukuzama ukusebenzisa izimiso zeBhayibhili ekuphileni kwethu kwansuku zonke sekwenze impilo zethu zaba ngcono kakhulu. (IHubo 128:1, 2) Lesi ngesinye isizatho esenza sitshele abanye izinto ezinhle esizifundileyo eBhayibhilini.

Siphila ngezimiso zikaNkulunkulu. Izimiso lezi ezifundiswa eBhayibhilini zenza sibe lenhlalakahle, zenza sihloniphe abanye njalo zenza sibe ngabantu abathembekileyo labalomusa. Zikhuthaza ukuthi sibe ngamalunga omphakathi aloncedo lempilakahle njalo zikhuthaza ukuziphatha lokuthi izimuli zibambane. Sileqiniso lokuthi ‘uNkulunkulu kathandi abanye abantu kulabanye,’ yikho siyingxenye yabazalwane abangokomoya bomhlaba wonke abangehlukaniswa yikuthi bavela kuliphi ilizwe noma ukuthi bangumhlobo bani. Lanxa singabantu nje, akula abanye abantu abafanana lathi.​—ImiSebenzi 4:13; 10:34, 35.

• Kuyini okwenza oFakazi bakaJehova bafanane labanye abantu?

• Yiziphi izimiso oFakazi abazifundileyo ngokufunda iBhayibhili?

Abanengi bacabanga ukuthi ibizo elithi oFakazi bakaJehova libizo lenkolo entsha. Kodwa eminyakeni edlula 2 700 eyadlulayo, izinceku zikaNkulunkulu weqiniso zazibizwa kuthiwa ‘ngofakazi.’ (Isaya 43:10-12) Kungakabi ngu-1931 sasisaziwa njengaBafundi beBhayibhili. Kungani sathola ibizo elithi oFakazi bakaJehova?

Litshengisa ukuthi uNkulunkulu wethu ungubani. Imibhalo ebhalwe ngesandla yasendulo itshengisa ukuthi ibizo likaNkulunkulu elithi Jehova, litholakala izikhathi ezidlula i-7 000 eBhayibhilini. Ibizo leli selakhitshwa emaBhayibhilini amanengi kwasekufakwa amabizo okuhlonipha anjengokuthi Nkosi kumbe Nkulunkulu. Loba kunjalo, uNkulunkulu weqiniso wayeziveze kuMosi ngebizo lakhe yedwa elithi Jehova ngokuthi: “Leli libizo lami laphakade.” (Eksodusi 3:15) Ngaleyo ndlela wayezehlukanisa kubo bonke onkulunkulu bamanga. Siyaziqhenya ngokuthi sibizwa ngebizo likaNkulunkulu elingcwele.

Lichaza umsebenzi wethu. Kusukela endodeni elungileyo u-Abela abantu abanengi bakudala bafakaza ngokholo lwabo kuJehova. Phakathi kwamakhulu eminyaka, uNowa, u-Abhrahama, uSara, uMosi, uDavida labanye, bazihlanganisa ‘lexuku elikhulu labofakazi.’ (Hebheru 11:4–12:1) Njengomuntu ongafakazela umuntu ongelacala emthethwandaba, sizimisele ukwenza ukuthi iqiniso ngoNkulunkulu laziwe.

Silingisela uJesu. IBhayibhili limbiza ngokuthi “ufakazi othembekileyo loqotho.” (ISambulo 3:14) UJesu wathi “ngibazisile ibizo lakho” njalo waqhubeka ‘efakaza iqiniso’ ngoNkulunkulu. (Johane 17:26, The Holy Bible in Ndebele; 18:37) Yikho-ke, abalandeli bakaKhristu beqiniso kumele balenze laziwe ibizo likaJehova njalo balimele. Yikho kanye oFakazi bakaJehova abazama ukukwenza.

• Kungani abafundi beBhayibhili bathola ibizo elithi oFakazi bakaJehova?

• Sekulesikhathi esinganani uJehova elabofakazi emhlabeni?

• Ngubani onguFakazi kaJehova omkhulu kulabo bonke?

IBhayibhili labikezela ukuthi ngemva kokufa kukaKhristu, kwakuzavela abantu abafundisa amanga phakathi kwamaKhristu okuqala baphambanise iqiniso leBhayibhili. (ImiSebenzi 20:29, 30) Ngokuhamba kwesikhathi, yikho kanye okwenzakalayo. Baxubanisa izimfundiso zikaJesu lezimfundiso zabantu abangakhonzi uNkulunkulu, kwasekuvela ukukhonza kwamanga. (2 Thimothi 4:3, 4) Kuyini okungenza sibe leqiniso lokuthi sizwisisa okuyikho ngalokho okufundiswa liBhayibhili?

Safika isikhathi sokuthi uJehova aveze iqiniso. Wabikezela ukuthi ‘ngesikhathi sokucina abanengi babezandisa ulwazi lweqiniso.’ (Danyeli 12:4) Ngo-1870 iqembu elincane labantu ababedinga iqiniso lananzelela ukuthi izimfundiso zamasonto amanengi zazingasekelwanga emiBhalweni. Yikho-ke, basebeqalisa ukudinga ukuthi bazwisise izimfundiso zokuqala zeBhayibhili, njalo uJehova wababusisa wabenza bazwisisa okutshiwo yimiBhalo.

Abantu abaqotho bahlolisisa iBhayibhili. Labo baFundi beBhayibhili abakhutheleyo baqalisa indlela yokufunda lathi esilokhu siyisebenzisa. Babexoxisana ngendaba yeBhayibhili ethile, bangayiqeda besebeqalisa enye. Babesithi bangahlangana lendima yeBhayibhili enzima, babedinga amanye amavesi ayengayichaza ngcono. Nxa sebethole okuyikho okwakuvumelana leminye imiBhalo, babekubhala phansi. Ngokuvumela ukuthi iBhayibhili lizichasise, bavumbulula iqiniso eliphathelane lebizo likaNkulunkulu loMbuso wakhe, injongo yakhe ngabantu lomhlaba, isimo sabantu abafileyo, langethemba lokuvuswa kwabafileyo. Ukudingisisa kwabo kwabakhulula ezimfundisweni ezinengi zamanga lasemikhubeni yamanga.​—Johane 8:31, 32.

Kwathi kufika umnyaka ka-1879 abaFundi beBhayibhili babona ukuthi kwasekuyisikhathi sokuthi benze ukuthi wonke umuntu alazi iqiniso. Yikho-ke, ngalowo mnyaka baqalisa ukwenza imagazini okuthiwa yi-Nqabayokulinda Ebika NgoMbuso KaJehova, esisayiyenza lalamuhla. Lamuhla sitshela abantu abasemazweni angu-240 iqiniso eliseBhayibhilini ngezindimi ezidlula i-750. Ulwazi lweqiniso kalukaze lube lunengi kangaka!

• UKhristu esefile, kuyini okwenzakala kuqiniso leBhayibhili?

• Kuyini okusenze senelisa ukuvumbulula iqiniso eLizwini likaNkulunkulu?

Okweminyaka eminengi thina njengaboFakazi bakaJehova besisebenzisa imihlobo etshiyeneyo yamaBhayibhili, siwadinda njalo siwasakaza. Kodwa sasesibona isidingo sokwenza iBhayibhili elitsha elalizanceda abantu ukuthi ‘balazi iqiniso eliqondileyo.’(1 Thimothi 2:3, 4) Yikho-ke ngomnyaka ka-1950 saqalisa ukwethula izingxenye zeBhayibhili lethu lalamuhla elithiwa yi-New World Translation ngesiNgisi. IBhayibhili leli lihunyutshwe njengoba linjalo, kungantshintshwanga lutho njalo lihunyutshwe ngezindimi ezidlula i-130.

Kwakudingakala iBhayibhili elalizazwisiseka lula. Njengoba izindimi zintshintsha ngokuhamba kwesikhathi, amaBhayibhili amanengi alolimi oludala olunzima ukuluzwisisa. Okunye njalo yikuthi sokwatholakala imibhalo ebhalwe ngesandla yakudala ephose ifanane lemibhalo yakuqala ngokwayo. Lokhu sekwenze sazwisisa isiHebheru, isi-Aramikhi lesiGiriki seBhayibhili.

Kwakudingeka ukuthi kuhunyutshwe ilizwi likaNkulunkulu njengoba linjalo. Abahumutshi beBhayibhili kumele bathembeke babhale okwakukhona emibhalweni yakuqala, hatshi ukuthi bantshintshe imibhalo kaNkulunkulu ephefumulelweyo. Kodwa emaBhayibhilini amanengi ibizo likaJehova kalikho eMiBhalweni Engcwele.

Kwakudingakala iBhayibhili elidumisa uMlobi walo. (2 Samuyeli 23:2) Ku-New World Translation, ibizo likaJehova selibuyiselwe lapho elivela khona izikhathi ezingaba ngu-7 000 emibhalweni yesandla emidala kakhulu, njengoba kutshengisiwe esibonelweni esingaphansi. (IHubo 83:18) Ngenxa yokuchwayisisa okwenziwa iminyaka eminengi, iBhayibhili leli libaleka kamnandi njengoba litshengisa ngendlela ecacileyo imicabango kaNkulunkulu. Sikukhuthaza ukuthi ube lomkhuba omuhle wokubala iLizwi likaNkulunkulu nsuku zonke, kungelani lokuthi ulayo i-New World Translation ngolimi lwakho kumbe awula.​—Joshuwa 1:8; IHubo 1:2, 3.

• Kungani sabona kufanele ukuthi sihumutshe kutsha iBhayibhili?

• Umuntu ofuna ukufunda intando kaNkulunkulu kumele azijwayeze ukwenzani nsuku zonke?