Enhlanganisweni yethu kasila bafundisi ababhadalwayo. Njengoba kwakunjalo kuqalisa ibandla lobuKhristu, ababonisi abafaneleyo lamuhla babekwa ‘njengabelusi bebandla likaNkulunkulu.’ (ImiSebenzi 20:28) Abadala laba bangamadoda alobuhlobo obuqinileyo loJehova. Bakhokhela njalo beluse ibandla ‘bengabanjwa ngamandla, kodwa ngenxa yokuthanda kwabo, bengelamhawu wemali, kodwa befisa ukusiza.’ (1 Phetro 5:1-3) Kuyini abasenzela khona?

Balendaba lathi njalo bayasivikela. Abadala banika isiqondiso esivela eMibhalweni njalo basiza ibandla ukuthi lihlale liseduze loJehova. Abadala kababusi abantu bakaJehova kodwa benza babe lenhlalakahle njalo benza bajabule ngoba bayakwazi ukuthi uNkulunkulu nguye obanike lo msebenzi oqakathekileyo. (2 Khorinte 1:24) Njengomalusi onakekela imvu ngayinye ngonanzelelo, abadala bayazama ukwazi ilunga ngalinye lebandla.​—Izaga 27:23.

Basifundisa ukwenza intando kaNkulunkulu. Iviki ngayinye abadala bayasifundisa emihlanganweni yebandla ukuze baqinise ukholo lwethu. (ImiSebenzi 15:32) Amadoda la, azinikeleyo akhokhela umsebenzi wokutshumayela njalo asebenza lathi esifundisa izinto ezitshiyeneyo eziphathelene lokutshumayela.

Bakhuthaza omunye lomunye wethu. Abadala abasemabandleni ethu basinceda ukuthi siqinise ubuhlobo bethu loJehova ngokusivakatshela emakhaya ethu lokukhuluma lathi eWolu loMbuso ukuze basincede njalo basiduduze ngeMibhalo.​—Jakhobe 5:14, 15.

Eminye imisebenzi abalayo ngaphandle kweyebandla ngeyokuziphilisa lokunakekela izimuli zabo. Konke lokhu kudinga isikhathi sabo. Kumele sibahloniphe abafowethu laba abasebenza nzima.​—1 Thesalonika 5:12, 13.

• Yiwuphi umsebenzi wabadala bebandla?

• Abadala batshengisa njani ukuthi bayakukhathalela?

IBhayibhili likhuluma ngamaqembu amabili awamadoda angamaKhristu ayenza imisebenzi yebandla, “ababonisi lezinceku ezikhonzayo.” (Filiphi 1:1, NW) Ebandleni ngalinye kujayele ukuba labadala lezinceku ezikhonzayo. Yimiphi imisebenzi eyenziwa yizinceku ezikhonzayo enceda thina?

Bancedisa iqula labadala. Izinceku ezikhonzayo ezingamadoda amadala lamancane zilobuhlobo obuqinileyo loJehova, zithembekile njalo zisebenza nzima. Benza imisebenzi eqakathekileyo yebandla leyeWolu loMbuso. Lokhu kwenza abadala benelise ukwenza kuhle umsebenzi wokufundisa lokwalusa.

Benza imisebenzi edingakalayo. Ezinye izinceku ezikhonzayo zenza umsebenzi wokwamukela abafika emhlanganweni. Abanye bangalungisa imitshina yokukhulisa ilizwi, bangabela amabhuku, bangakhangela ngezimali zebandla njalo bangahlela indawo lapho amalunga ebandla angatshumayela khona. Bayancedisa njalo ekunakekeleni iWolu loMbuso. Abadala bangabacela ukuthi bancedise abagugileyo. Ukuvuma lokuzimisela kwezinceku ezikhonzayo ukwenza loba yiwuphi umsebenzi abawuphiwayo kwenza sonke sibahloniphe.​—1 Thimothi 3:13.

Bayisibonelo esihle samadoda angamaKhristu. Izinceku ezikhonzayo zikhethwa ngenxa yobuntu bazo bobuKhristu. Nxa benika izinkulumo ezitshiyeneyo baqinisa ukholo lwethu. Isibonelo sabo esihle ekutshumayeleni senza lathi sisebenze nzima. Benza ibandla limanyane njalo benza kube lenjabulo ngenxa yokuthi basebenza kuhle lequla labadala. (Efesu 4:16) Ngokuhamba kwesikhathi, labo bangacina sebengabadala.

• Izinceku ezikhonzayo zingamadoda anjani?

• Izinceku lezi zinceda njani ukuthi izinto zihambe kuhle ebandleni?

IMibhalo yamaKhristu yesiGiriki ikhuluma kanengi ngoBhanaba lomphostoli uPhawuli. La madoda ayengababonisi abahambelayo, ehambela amabandla akuqala. Kungani ayesenza njalo? Kungenxa yokuthi babelendaba lenhlalakahle yabafowabo abangamaKhristu. UPhawuli wathi wayefuna ‘ukubuyela emuva ayebona abazalwane ukuthi baqhuba njani.’ Wayezimisele ukuhamba amakhilomitha angamakhulu ukuze ayeqinisa abazalwane. (ImiSebenzi 15:36) Ababonisi abahambelayo lamuhla balesifiso esifananayo.

Basihambela ukuze bazosikhuthaza. Umbonisi wesiqinti munye ngamunye uhambela amabandla angaba ngu-20 ethatha iviki kubandla ngalinye kabili ngomnyaka. Sithola okunengi elwazini lwababonisi abahambelayo labafazi babo. Bazama ukwazi ngcono abasakhulayo labantu abadala njalo bayakuthanda ukuhamba lathi ekutshumayeleni lakulabo esifunda labo iBhayibhili. Ababonisi laba benza ukuhambela kokwalusa labadala. Basiqinisa ngokusinika izinkulumo ezikhuthazayo emihlanganweni emincane lemikhulu.​—ImiSebenzi 15:35.

Balendaba lathi sonke. Ababonisi besiqinti abahambelayo balendaba kakhulu lokuthi ibandla lilobuhlobo obunjani loJehova. Benza umhlangano labadala lezinceku ezikhonzayo ukuze bakhangele ingqubelaphambili yebandla njalo babanike iseluleko esingabanceda ekwenzeni umsebenzi wabo. Bancedisa amaphayona ukuthi aphumelele enkonzweni yawo njalo bajabulela ukwazi abantu abatsha lokuzwa ukuthi sebethuthuke njani ekwazini iqiniso. Abazalwane laba bazinikela ngokukhululekileyo ‘njengezisebenzi kanye lathi phakathi [kwethu].’ (2 Khorinte 8:23) Kumele silingisele ukholo lwabo lokuzinikela kwabo kuNkulunkulu.​—Hebheru 13:7.

• Kungani ababonisi besiqinti bevakatshela amabandla?

• Ukuvakatsha kwabo kungakunceda njani?

Nxa oFakazi bakaJehova bengehlelwa ngumonakalo, abanye babo bayaphangisa ukuthatha amanyathelo okubasiza. Imizamo enjalo itshengisa ukuthi siyathandana okweqiniso. (Johane 13:34, 35; 1 Johane 3:17, 18) Sinceda ngaziphi izindlela?

Sinikela ngemali. Lapho kusiba lendlala enkulu eJudiya, amaKhristu akuqala ayese-Antiyokhi athumela imali kubazalwane babo ababeseJudiya. (ImiSebenzi 11:27-30) Ngokufananayo, thina emabandleni ethu singezwa ukuthi abazalwane kwezinye izindawo basebunzimeni siyanikela ngezinto ezingabanceda ngalesosikhathi.​—2 Khorinte 8:13-15.

Sibanika usizo abalufunayo. Abadala abayabe belapho okulomonakalo, bayadinga ilunga ngalinye lebandla ukuze babe leqiniso lokuthi wonke umuntu utholakele njalo uvikelekile. Ikhomithi ebona ngokunika usizo lapho okuyabe kulomonakalo ihlela ukuhanjiswa kokudla, amanzi okunatha ahlanzekileyo, okokugqoka, uncedo lwezokwelatshwa kanye lendawo yokuhlala. OFakazi abanengi abalolwazi olufunakalayo bayazinikela njalo basebenzisa izimali zabo. Benza imisebenzi yokusiza njalo balungisisa izindlu lamaWolu oMbuso ayabe edilikile. Ukumanyana esiyikho njengenhlanganiso lokusebenza kwethu ndawonye okwesikhathi eside kusisiza ukuthi senelise ukuqoqa ngokuphangisa izisebenzi lokokuyasiza okufunakalayo ngezikhathi zobunzima. Sinceda “abangabemuli yabakholwayo,” kodwa nxa sisenelisa siyasiza labanye esingakhonzi labo.​—Galathiya 6:10.

Sibanika induduzo evela eMibhalweni njalo sibenze bazizwe ngcono. Abadinga kakhulu induduzo ngabehlelwa ngumonakalo. Ngezikhathi ezinjalo, siqiniswa nguJehova ‘uNkulunkulu wenduduzo yonke.’ (2 Khorinte 1:3, 4) Sitshela abakhathazekileyo izithembiso ezivela eBhayibhilini, sibanika ithemba lokuthi uMbuso kaNkulunkulu uzaqeda wonke umonakalo obangela ubuhlungu lokuhlupheka.​—ISambulo 21:4.

• Kungani oFakazi besenelisa ukuyasiza ngokuphangisa nxa kungaba lomonakalo?

• Abasindileyo singabaduduza njani ngeMibhalo?

UJesu esezakufa waba lengxoxo labafundi bakhe abane kuphela, uPhetro, uJakhobe, uJohane, lo-Andreya. Wathi esebikezela isibonakaliso sokuba khona kwakhe ezinsukwini zokucina, wabuza umbuzo oqakathekileyo othi: “Ngubani kambe oyinceku ethembekileyo lehlakaniphileyo umninimuzi ayibeke esikhundleni sokukhangela izisebenzi zalapha ekhaya ukuthi azinike ukudla kwazo ngesikhathi esifaneleyo?” (Mathewu 24:3, 45; Makho 13:3, 4) UJesu wayengakhulumi ngokudla okungokoqobo kodwa wayefananisa ukudla lolwazi ngoNkulunkulu. Wayesenza abafundi bakhe babe leqiniso lokuthi esikhathini sokucina yena njengenkosi yabo, wayezabeka labo abazanika abalandeli bakhe ulwazi ngoNkulunkulu ngaso sonke isikhathi. Ngobani ababezakuba yileyo nceku?

Liqembu elincane elibunjwa ngabalandeli bakaJesu abagcotshweyo. ‘Inceku’ le yiyo eliQula eLibusayo laboFakazi bakaJehova. Inika abazalwane abakhonza ndawonye layo ukudla okungokomoya okufika ngesikhathi. Sithembele encekwini le ethembekileyo ukuthi iqhubeke isinika ‘isabelo sethu sokudla ngesikhathi esifaneleyo.’​—Lukha 12:42.

Inakekela abendlu kaNkulunkulu. (1 Thimothi 3:15) UJesu wanika inceku umsebenzi oqakathekileyo wokukhangela umsebenzi wenhlanganiso kaJehova yengxenye yasemhlabeni, ohlanganisa ukukhangela impahla yayo, ukuqondisa umsebenzi wokutshumayela, lokusifundisa emabandleni ethu. Ngakho-ke, ukuze siphiwe esikudingayo ngesikhathi, “inceku ethembekileyo” yabela ulwazi ngoNkulunkulu isebenzisa amabhuku esiwasebenzisa ekutshumayeleni langenhlelo ezibakhona emihlanganweni yethu emikhulu lemincane.

Inceku le egcotshiweyo ithembekile eqinisweni leBhayibhili lasemlayweni wokutshumayela izindaba ezinhle, njalo ihlakaniphile endleleni enakekela ngayo zonke izinto ezisemhlabeni uKhristu athi izinakekele. (ImiSebenzi 10:42) UJehova udonsa abantu abanengi ukuthi babe ngoFakazi bakhe njalo unceda inceku yakhe ukuthi iphe ulwazi olunengi ngaye.​—Isaya 60:22; 65:13.

• Ngubani owabekwa nguJesu ukuthi aphe abafundi bakhe ulwazi ngoNkulunkulu?

• Inceku ithembekile njalo ihlakaniphile ngaziphi indlela?

Ekhulwini lakuqala, iqembu elincane ‘labaphostoli labadala elaliseJerusalema’ lalisebenza njengequla elibusayo ukuze lenze izinqumo eziqakathekileyo ezazisiza ibandla lonke lamaKhristu agcotshiweyo. (ImiSebenzi 15:2) Ukuxoxa ngokutshiwo yiMibhalo lokuvuma ukuqondiswa ngumoya kaNkulunkulu yikho okwakusenza ukuthi bavumelane ekwenzeni izinqumo. (ImiSebenzi 15:25) Lalamuhla kulandelwa indlela efananayo.

Lisetshenziswa nguNkulunkulu ukuthi intando yakhe yenziwe. Abazalwane abagcotshiweyo abakuQula eliBusayo basebenzisa kakhulu iLizwi likaNkulunkulu, bayenelisa ukunquma ukuthi umsebenzi wethu ungenziwa njani, njalo baphendula imibuzo ephathelene leBhayibhili. Bayahlangana iviki ngayinye ukuze bakhulume ngokudingwa ngabazalwane emhlabeni wonke. Njengasekhulwini lokuqala, basebenzisa izincwadi kumbe ababonisi abahambelayo labanye ukuze baphe imilayezo eseBhayibhilini. Lokhu kunceda ukuthi abantu bakaNkulunkulu bacabange ngendlela efananayo njalo benze ngendlela efananayo. (ImiSebenzi 16:4, 5) IQula eliBusayo libona ngokulungiswa kwezinto ezisinceda ukuthi sithole ulwazi ngoNkulunkulu njalo likhuthaza bonke ukuthi baqakathekise umsebenzi wokutshumayela. Liqondisa ukubekwa kwabazalwane abazaphatha imisebenzi yebandla.

Liyavuma ukuqondiswa ngumoya kaNkulunkulu. IQula eliBusayo lamuhla lithembela kuJehova, uMbusi weNdawo yonke lakuNhloko yebandla, uJesu ukuze lithole isiqondiso. (1 Khorinte 11:3; Efesu 5:23) Amalunga alo awaziboni njengabakhokheli babantu bakaNkulunkulu. Bona, lamaKhristu onke agcotshiweyo, “bayalilandela iWundlu [uJesu] loba kungaphi lapho eliya khona.” (ISambulo 14:4) IQula eliBusayo liyabonga kakhulu nxa silithandazela.

• Ngobani ababengamalunga equla elibusayo ekhulwini lakuqala?

• IQula eliBusayo lamuhla lisidinga njani isiqondiso sikaNkulunkulu?

Ibizo lesiHebheru elithi Bhetheli litsho ‘Indlu kaNkulunkulu.’ (Genesisi 28:17, 19) Leli bizo liyazifanela izakhiwo zaboFakazi bakaJehova ezisemhlabeni wonke lapho umsebenzi wokutshumayela oqondiswa khona njalo osekelwa khona. IQula eliBusayo lisebenzela emawofisini amakhulu asedolobheni le-New York, e-U.S.A., njalo likhangela umsebenzi owenziwa emawofisini amagatsha asemazweni amanengi likhonangale. Abasebenza ezindaweni lezi babizwa ngokuthi yimuli yaseBhetheli. Njengemuli, bahlala ndawonye, basebenza ndawonye, badla ndawonye njalo bafunda iBhayibhili ndawonye bemanyene.​—IHubo 133:1.

Yindawo engafanani lezinye elabantu abasebenza ngokuzimisela. Kuwo wonke amaBhetheli kulamadoda labafazi abangamaKhristu abazimisele ukwenza intando kaNkulunkulu lokwenza izinto ezimayelana loMbuso okwesikhathi esigcweleyo. (Mathewu 6:33) Kakula muntu oholiswayo, kodwa bonke baphiwa indlu yokuhlala lokudla njalo lemadlana ebanceda ukuthi bathenge abangabe bekufuna. Bonke abaseBhetheli banikwa imisebenzi okumele bayenze, kungaba sewofisini, ekhitshini loba endlini yokudlela. Abanye basebenza lapho okudindwa khona, ekuhlanzeni izindlu, ekuwatsheni impahla, ekulungiseni izinto ezingabe zingasasebenzi kuhle, loba ekwenzeni eminye nje imisebenzi.

Yindawo okusetshenzwa nzima esekela ukutshunyayelwa koMbuso. Injongo yamaBhetheli onke ngeyokwenza ukuthi iqiniso leBhayibhili laziwe ngabantu abanengi kakhulu. Leli bhuku lalo lenzelwe khonokho. IQula eliBusayo yilo elabona ngokubhalwa kwalo, ngemva kwalokhu ibhuku leli lahanjiswa ngekhompiyutha kumakhulu amaqembu ahumutshayo emhlabeni wonke, ladindwa ngemitshina edinda ngokuphangisa yaseBhetheli njalo lahanjiswa emabandleni adlula i-110 000. Kukho konke ezikwenzayo, izimuli zaseBhetheli zisekela umsebenzi oqakatheke ukudlula yonke wokutshumayela izindaba ezinhle.​—Makho 13:10.

• Ngobani abasebenza eBhetheli njalo banakekelwa njani?

• Yiwuphi umsebenzi oqakatheke ukudlula yonke osekelwa ngokwenziwa eBhetheli ngayinye?

Imuli yaseBhetheli yenza imisebenzi etshiyeneyo, isenza ukuthi umsebenzi wokutshumayela uhambe kuhle elizweni lawo kumbe emazweni amanengana. AbaseBhetheli bangasebenza ekuhumutsheni, ekudindeni amamagazini, ekulungiseni amabhuku, endlini okugcinelwa khona amabhuku, bangenza amavidiyo lama-CD kumbe basebenze kweminye imisebenzi yasendaweni abakiyo.

IKhomithi yeGatsha ikhangela konke okwenziwayo. IQula eliBusayo linika iKhomithi yeGatsha umsebenzi wokubona ukuthi iwofisi yegatsha isebenza njani. Le Khomithi ibunjwa ngabadala abafaneleyo abathathu kumbe abedlula lapho. Ikhomithi le itshela iQula eliBusayo ngezinhlupho ezingabakhona lokuthi umsebenzi uhamba njani elizweni ngalinye elikhangelwa yileyo khomithi. Imibiko enjalo inceda iQula eliBusayo ukuthi linqume izihloko okuzabhalwa ngazo esikhathini esizayo kumbe okuzakhulunywa ngazo emihlanganweni emincane lemikhulu. Abameli beQula eliBusayo bathunywa kanengi ukuthi bavakatshele amagatsha njalo bancedise iKhomithi yeGatsha ukuthi ingawenza njani umsebenzi wayo. (Izaga 11:14) Kwenziwa uhlelo oluqakathekileyo olulenkulumo enikwa ngummeli wewofisi elikhulu ukuze ikhuthaze labo abahlala ensimini yalelo gatsha.

Amabandla akuleyo ndawo ayasekelwa. Abazalwane abafaneleyo abasewofisini legatsha bavumela ukuqaliswa kwamabandla. Abazalwane labo baphinde baqondise umsebenzi owenziwa ngamaphayona, abanali lababonisi besiqinti abasebenzela ensimini yegatsha. Bahlela imihlangano emincane lemikhulu, bakhangele langokwakhiwa kwamaWolu oMbuso njalo babone langokuhanjiswa kwamabhuku emabandleni. Konke okwenziwa ewofisini legatsha kwenza umsebenzi wokutshumayela uphumelele ngendlela ehlelwe kuhle.​—1 Khorinte 14:33, 40.

• AmaKhomithi amaGatsha alincedisa njani iQula eliBusayo?

• Kuyini okwenziwa ewofisini legatsha?

Sibhala amabhuku ngezindimi ezidlula i-750 ukuze simemezele izindaba ezinhle ngendlela engcono kakhulu ‘ezizweni zonke, lasezizwaneni, lasezindimini kanye lasebantwini.’ (ISambulo 14:6) Siwenza njani lo msebenzi onzima kangaka? Siwenza sincediswa ngabalobi abasemhlabeni wonke leqembu labahumutshi abazinikeleyo, bonke abangoFakazi ­bakaJehova..

Okuhunyutshwayo kuyabe kubhalwe ngesiNgisi. IQula eliBusayo likhangela umsebenzi woHlangothi lokuLoba ewofisini lethu elikhulu lomhlaba wonke. Lolu hlangothi luhlela umsebenzi wabalobi abasebenza ewofisini elikhulu kanye lakwamanye amagatsha athile. Ukuba labalobi abasendaweni ezitshiyeneyo kwenza senelise ukubhala ngezihloko ezithinta abantu abalamasiko lemikhuba etshiyeneyo, ukuze amabhuku ethu akhange abantu bezizwe ezinengi.

Osekubhaliwe kuthunyezelwa abahumutshi. Nxa lokho okubhaliweyo sekuhloliwe kwabonwa ukuthi kulungile, kuthunyezelwa kubahumutshi abasemhlabeni wonke ngekhompiyutha, abahumutshayo baphinde bahlole abakubhalileyo. Bazama ukukhetha ‘amabala aqondileyo njalo aliqiniso’ okuzakwenza abakuhumutshayo kufanane xathu lalokho okusesiNgisini.​—UmTshumayeli 12:10.

Amakhompiyutha enza ukuthi umsebenzi lo wenziwe ngokuphangisa. Ikhompiyutha ngeke yenze umsebenzi owenziwa ngabalobi labahumutshi. Kodwa umsebenzi wabo uyaphangisa nxa besebenzisa inhlelo ezikukhompiyutha ezifanana lezichazamazwi lokokuchwayisisa. OFakazi bakaJehova benza uhlelo okuthiwa yi-Multilanguage Electronic Publishing System (MEPS). Lolu hlelo lubanceda ukuthi babhale ngamakhulu ezindimi, bafake okubhaliweyo ndawonye lemifanekiso ekhona, njalo benze lokho okubhaliweyo kulungele ukudindwa.

Kungani sisenza umzamo ongaka wokuthi sihumutshe lezindimi ezikhulunywa ngabantu abazinkulungwane ezilutshwana? Ngoba kuyintando kaNkulunkulu ukuthi ‘abantu bonke basindiswe njalo balazi iqiniso.’​—1 Thimothi 2:3, 4.

• Umsebenzi wokuloba amabhuku ethu wenziwa njani?

• Kungani sihumutshela amabhuku ethu ezindimini ezinengi kangaka?

Inhlanganiso yethu idinda njalo yabela mahala izigidi zamaBhayibhili lamabhuku umnyaka ngamunye. Siyakha njalo silungisise amaWolu oMbuso lamawofisi amagatsha. Sinakekela izinkulungwane zabahlala eBhetheli kugoqele labanali, njalo sipha uncedo kulabo abayabe behlelwe ngumonakalo. Ngakho ungahle ube lombuzo wokuthi, ‘Imali yokwenza konke lokhu ivela ngaphi?’

Kasibhadalisi lutho, kasithathi okwetshumi noma inkongozelo. Lanxa ukunakekela umsebenzi wokutshumayela kudula, kasiceli mali. Eminyakeni edlula elikhulu, imagazini yesibili okuthiwa yi-Nqabayokulinda yathi siyakholwa ukuthi uJehova nguye osisizayo njalo “kasisoze sancenga loba sacela uncedo ebantwini.” Kasikaze senze njalo!​—Mathewu 10:8.

Umsebenzi wethu usekelwa ngeminikelo yokuzifunela. Abantu abanengi bayawuqakathekisa umsebenzi wethu wokufundisa iBhayibhili njalo bayanikela ukuze uqhubekele phambili. OFakazi ngokwabo bayajabula ukunikela ngesikhathi sabo, amandla abo, imali yabo lokunye abalakho ukuze intando kaNkulunkulu yenziwe emhlabeni wonke. (1 ImiLando 29:9) EWolu loMbuso lasemihlanganweni emikhulu kulamabhokisi eminikelo lapho labo abafuna ukunikela abangafaka khona iminikelo yabo. Kumbe abanye banganikela besebenzisa iwebhusayithi yethu i-jw.org. Izikhathi ezinengi, abanikelayo yilabo abanganothanga njengomfelokazi ongumyanga, uJesu akhuluma ngaye kuhle kakhulu, owaphosela okuzinhlamvana kwethusi okubili esitsheni. (Lukha 21:1-4) Ngakho loba ngubani ‘angabeka eceleni imali ethile’ ngazo zonke izikhathi ukuze ‘anike lokho amise enhliziyweni yakhe ukukunikela.’​—1 Khorinte 16:2; 2 Khorinte 9:7.

Sileqiniso lokuthi uJehova uzaqhubeka enza ukuthi labo abafuna ‘ukumdumisa ngemfuyo yabo’ baqhubeke besekela umsebenzi woMbuso ukuze intando yakhe yenziwe.​—Izaga 3:9.

• Kuyini okwenza inhlanganiso yethu ingafanani lezinye izinkolo?

• Iminikelo eyenziwa ngokuzifunela isetshenziswa njani?

Njengoba ibizo elithi iWolu loMbuso lisitsho, eWolu loMbuso kufundiswa imfundiso yeBhayibhili eqakatheke kakhulu ephathelene loMbuso kaNkulunkulu oyiwo uJesu ayefundisa ngawo.​—Lukha 8:1.

Ayizindawo zokukhonza kweqiniso emphakathini. AmaWolu oMbuso ayizindawo lapho oFakazi bakaJehova abahlelela khona umsebenzi wokutshumayela endaweni abakiyo. (Mathewu 24:14) AmaWolu oMbuso ayatshiyana ubukhulu lendlela akhiwe ngayo kodwa awakho makhulu kakhulu njalo kawaceciswanga kakhulu. Amanengi asetshenziswa ngamabandla adlula elilodwa. Ukuze amabandla labamemezeli abandayo benele, esikhathini lesi kwakhiwa amatshumi ezinkulungwane zamaWolu oMbuso (okutsho ukuthi amaWolu angu-5 ngelanga). Lokhu kwenzakala njani?​—Mathewu 19:26.

Akhiwa ngeminikelo eya ohlelweni lokwakhiwa kwamaWolu oMbuso. Iminikelo le ithunyelwa ewofisini legatsha ukuze imali le inikwe amabandla afuna ukwakha kumbe ukulungisa kutsha iWolu loMbuso. Kodwa limali ayizali.

Akhiwa yizisebenzi ezizinikeleyo ezingabhadalwayo ezivela ezimulini ezitshiyeneyo lasezimweni ezitshiyeneyo. Kuye kwahlelwa Amaqembu oKwakha amaWolu oMbuso emazweni amanengi. Amaqembu ezinceku zokwakha lezisebenzi ezizinikeleyo ahamba emabandleni atshiyeneyo elizweni elilodwa kanye lasemaphandleni ukuze ancedise amabandla la ukuthi akhe amaWolu oMbuso awo. Kwamanye amazwe, oFakazi abalolwazi lwezokwakha babekwa ukuthi bakhangele umsebenzi wokwakha lokulungisa kutsha amaWolu oMbuso. Lanxa esabelweni esithile kulabanengi abalobuciko bezokwakha abazinikela ukusebenza lapho okwakhiwa khona, amalunga ebandla lakuleyo ndawo yiwo ayenza umsebenzi omnengi. Umoya kaJehova lemizamo yabantu bakhe eyenziwa ngenhliziyo yonke yenza konke lokhu kwenzeke.​—IHubo 127:1; Kholose 3:23.

• Kungani indawo zethu zokukhonzela kuthiwa ngamaWolu oMbuso?

• Kuyini okwenza senelise ukwakha amaWolu oMbuso emhlabeni wonke?

Wonke amaWolu oMbuso aboFakazi bakaJehova alebizo likaNkulunkulu elingcwele. Ngakho sikubona kuyisibusiso njalo kuqakathekile ekukhonzeni kwethu okungcwele ukuwagcina ehlanzekile, ekhangeleka njalo lokuba leqiniso lokuthi zonke izinto zisebenza kuhle. Sonke singakwenza lokhu.

Zama ukuhlanza labanye nxa umhlangano usuphelile. Abafowethu labodadewethu bayakuthanda ukuhlanza iWolu loMbuso ukuze lisale lilihle nxa imihlangano isiphelile. Iviki ngalinye kuyahlanzwa okuzwayo. Umdala kumbe inceku ekhonzayo iqondisa umsebenzi lo, izikhathi ezinengi belandela iphepha elibhalwe izinto okumele zenziwe. Kusiya ngokudingakalayo, abantu bangathanyela, bakorobhe kumbe bakhiphe uthuli, balungise izitulo, bahlanze besebefaka umuthi wokubulala amagciwane ezambuzini, bangagezisa amafasitela lezibuko njalo bangalahla ingcekeza kumbe bahlanze phandle egumeni. Kanye ngomnyaka kuba lelanga lokuhlanza okuzwayo. Sifundisa abantwana bethu ukuthi bahloniphe indawo yethu yokukhonzela ngokwenza labo eminye imisebenzi eWolu loMbuso.​—UmTshumayeli 5:1.

Ncedisa ekulungiseni loba yini edinga ukulungiswa. IWolu loMbuso liyahlolwa ngokugcweleyo phandle laphakathi umnyaka ngamunye. Nxa selihloliwe, kwenziwa umsebenzi wokulungisa okuyabe kungasamanga kuhle ukuze iwolu lihlale lisesimweni esihle njalo kubalekelwe izindleko ezingahle zibe khona. (2 ImiLando 24:13; 34:10) Sikhonza uNkulunkulu wethu eWolu loMbuso elihlanzekileyo njalo eligcinwe kuhle. Ngokwenza imisebenzi le, sitshengisa ukuthi siyamthanda uJehova njalo siyayiqakathekisa indawo yethu yokukhonzela. (IHubo 122:1) Lokhu kwenza umphakathi ubone ukukhonza uJehova njengento enhle.​—2 Khorinte 6:3.

• Kungani kungamelanga siyekele ukunakekela indawo yethu yokukhonzela?

• Yiwaphi amalungiselelo akhona okugcina iWolu loMbuso lihlanzekile?

Ungathanda yini ukuchwayisisa iMibhalo ukuze wengezelele ulwazi lwakho ngeBhayibhili? Uyafuna yini ukwazi okuthile okuseBhayibhilini okungaba ngumbhalo, umuntu othile kumbe indawo ethile? Kumbe nxa kulokunye okukukhathazayo wake wazibuza yini ukuthi iLizwi likaNkulunkulu lingakunceda njani? Nxa kunjalo, ungavakatshela isiphala sezingwalo esiseWolu loMbuso.

Silezinto zokuchwayisisa ezincedayo. Mhlawumbe awulawo wonke amabhuku ngolimi lwakho asekelwe eBhayibhilini adindwa ngoFakazi bakaJehova. Isiphala sezingwalo esiseWolu loMbuso silamabhuku phose wonke ayabe esanda kuba khona. Singaba lamaBhayibhili atshiyeneyo, izichazamazwi kanye lamanye amabhuku. Ukhululekile ukusebenzisa konke okukhona esiphaleni sezingwalo umhlangano ungakaqalisi kumbe usuphelile. Nxa kulekhompiyutha, ingaba le-Watchtower Library. Lolu luhlelo lwekhompiyutha olulamabhuku ethu amanengi njalo lulezinto ezenza kube lula ukudinga oyabe ukufuna, kungaba yisihloko esithile, ibala kumbe umbhalo othile.

Sinceda labo abalezabelo emhlanganweni Wempilo Lenkonzo YamaKhristu. Ungalungiselela inkulumo zakho usebenzisa isiphala sezingwalo esiseWolu loMbuso. Umbonisi womhlangano Wempilo Lenkonzo YamaKhristu nguye okhangela lesisiphala. Nguye okumele abone ukuthi amabhuku asanda kuba khona ayatholakala njalo lokuthi ahlelwe kuhle. Umbonisi womhlangano lo kumbe umuntu okufundisa iBhayibhili angakutshengisa indlela ongathola ngayo lokho oyabe ukudinga. Kodwa amabhuku asesiphaleni sezingwalo akumelanga aphume eWolu loMbuso. Sifuna ukugcina amabhuku la emahle ngakho akumelanga siwabhalabhale.

IBhayibhili lisitshela ukuthi nxa sifuna ‘ukuzuza ulwazi lukaNkulunkulu,’ kumele sizimisele ‘ukuluphenya njengento eligugu efihliweyo.’ (Izaga 2:1-5) Isiphala sezingwalo esiseWolu loMbuso singakunceda ukuthi uqalise ukuchwayisisa indaba oyidingayo.

• Yiziphi izinto zokuchwayisisa ezikhona esiphaleni sezingwalo esiseWolu loMbuso?

• Ngubani ongakuncedisa ukuthi uthole okufunayo esiphaleni sezingwalo?

UJesu watshela abalandeli bakhe ukuthi: “Yenzani ukukhanya kwenu kukhanye phambi kwabantu ukuze babone izenzo zenu ezinhle baze badumise uYihlo osezulwini.” (Mathewu 5:16) Ukuze senze lokhu, sisebenzisa imitshina yakulezinsuku egoqela i-Internet. Iwebhusayithi yethu okuthiwa yi-jw.org, isemthethweni njalo kulapho okutholakala khona okunengi ngezinkolelo zaboFakazi bakaJehova lemisebenzi yabo. Ilani?

Ilezimpendulo eziseBhayibhilini zemibuzo ejayele ukubuzwa ngabantu. Ungathola izimpendulo zemibuzo eqakathekileyo eyake ibuzwe ngabantu. Ngokwesibonelo amaphetshana athi Ukuhlupheka Kuzaphela Yini? lelithi Abafileyo Bangaphinda Baphile Yini? akhona ebulenjini ngezindimi ezedlula i-600. Ungathola njalo izinto ezinengi ezigoqela i-New World Translation ngezindimi ezedlula i-130, amabhuku akunceda ukuthi uzwisise iBhayibhili, ibhuku elithi IBhayibhili Lifundisani Sibili?, lamamagazini okuthiwa yi-Nqabayokulinda le-Vukani! ayabe esanda kuphuma. Amabhuku la amanengi ungawabala kumbe uwalalele ebulenjini kumbe uwathathe eku-format ye-MP3, i-PDF kumbe eku-format ye-EPUB. Ungacindezela amakhasi amalutshwana ubusunika umuntu othanda ukufunda ngolimi lwakhe! Kulamavidiyo awamabhuku amanengi awolimi lwezandla. Ungazitholela izinto ezinjengokubalwa kweBhayibhili okusadrama lamadrama eBhayibhili kanye lezingoma ezimnandi ongazilibazisa ngazo.

Ileqiniso mayelana laboFakazi bakaJehova. Okunye okufakwayo yizindaba ezisanda kwenzakala, amavidiyo amafitshane mayelana lomsebenzi wethu womhlaba wonke, okwenzakalayo kuboFakazi bakaJehova njalo lemizamo yethu yothando yokunceda abayabe behlelwe ngumonakalo. Ungathola njalo amalanga awemihlangano emikhulu ezayo kanye lamakheli, ucingo kumbe ama-email awamawofisi amagatsha.

Izinto zonke lezi zenza sikhanyise iqiniso ezindaweni ezikhatshana kakhulu emhlabeni. Abantu kuyo yonke indawo, kugoqele kwele-Antarctica bayasizakala. Sikhulekela ukuthi ‘ilizwi leNkosi liqhubeke ngokuphangisa’ emhlabeni wonke ukuze uNkulunkulu adunyiswe.​—2 Thesalonikha 3:1.

• I-jw.org ibanceda njani abantu abanengi ukuthi bafunde iqiniso leBhayibhili?

• Kuyini ongathanda ukukudinga kuwebhusayithi yethu?