Abantu abanengi kabasayi emasontweni ngoba kabatholi induduzo loba impendulo zemibuzo eqakathekileyo empilweni. Kungani manje kumele uye emihlanganweni yobuKhristu ehlelwa ngoFakazi bakaJehova? Kuyini ozakuthola khonangale?

Uzathola injabulo ngokuba phakathi kwabantu abakuthandayo njalo abalendaba lawe. Ekhulwini lakuqala, amaKhristu ayehlelwe njengamabandla, njalo ayesiba lemihlangano ukuze akhonze uNkulunkulu, afunde iMibhalo njalo akhuthazane. (Hebheru 10:24, 25) Lapho bebuthene, babezizwa bephakathi kwabangane beqiniso abalothando, abangabafowabo labodadewabo abangamaKhristu. (2 Thesalonika 1:3; 3 Johane 14) Lamuhla silandela isibonelo samaKhristu ekhulu lokuqala njalo siba lenjabulo efananayo.

Uzafunda ukusebenzisa izimiso zeBhayibhili. Amadoda, abafazi labantwana bahlangana ndawonye njengoba kwakunjalo ezikhathini ezichasiswe eBhayibhilini. Amadoda akwazi ukufundisa asebenzisa iBhayibhili ukuze asincede sibone ukuthi singazisebenzisa njani izimiso zalo empilweni zethu nsukuzonke. (Dutheronomi 31:12; Nehemiya 8:8) Wonke umuntu ulethuba lokukhuluma ezingxoxweni ezenziwa lezilaleli njalo ulethuba lokuhlabela. Lokhu kusenza senelise ukutshengisa ithemba esilalo njengamaKhristu.​—Hebheru 10:23.

Uzakuba lesibusiso sokuthi ukholo lwakho kuNkulunkulu luqiniswe. Umphostoli uPhawuli watshela elinye lamabandla esikhathini aphila ngaso ukuthi: ‘Ngiyafisa ukulibona ukuze lina lami siqiniswe lukholo lomunye wethu.’ (Roma 1:11, 12) Ukuhlala sibonana lesikholwa labo emihlanganweni kuyaluqinisa ukholo lwethu njalo kuqinisa lokuzimisela kwethu ukuthi sisebenzise izimiso zeBhayibhili empilweni zethu.

Siyakumema ukuthi ubuye emhlanganweni webandla lethu evikini elizayo ukuze uzozibonela lezizinto ngawakho. Uzemukelwa kuhle kakhulu. Imihlangano yonke ngeyamahala, kakulamali ecelwayo.

• Imihlangano yethu yebandla ilandela siphi isibonelo?

• Ukungena imihlangano yobuKhristu kungasinceda njani?

Lanxa kumele sihambe egangeni elesabekayo kumbe siphume umkhathi umubi kasiyekeli ukuhamba emihlanganweni yethu yobuKhristu. Kungani oFakazi bakaJehova bezama ngamandla ukuhlangana lamaKhristu abakhonza lawo lanxa belezinhlupho zempilo kumbe bediniwe ngemva kokusebenza nzima emisebenzini yabo?

Kwenza sibe lenhlalakahle. Ekhuluma ngalabo esihlangana labo ebandleni uPhawuli wabhala, “kasicabangeni ukuba singakhuthazana kanjani.” (Hebheru 10:24) Lokhu kungatsho ukuthi sazane ngcono. Ngakho la mazwi omphostoli uPhawuli asikhuthaza ukuthi sibe lendaba labanye. Ukwazi ngcono ezinye izimuli zamaKhristu kwenza sazi izinhlupho ababelazo ezifanana lezethu, abaphumelela ukuzixazulula. Lokhu kungasisiza ukuthi lathi senelise ukuxazulula ezethu.

Kwenza sibe lobungane obuqinileyo labanye. Emihlanganweni yethu kasibuthani ndawonye labantu esibaziyo kuphela, kodwa sibuthana labangane bethu esibathandayo. Kwezinye izikhathi, siba lesikhathi sibuthene ndawonye ukuze sizilibazise ngendlela enhle. Ukuzilibazisa okunjalo kusinceda ngani? Kusinceda ukuthi sizwisisane kakhulu njalo kusincede lokuthi siqinise uthando lwethu njengabangane. Nxa abangane bethu laba bangahlangana lezinhlupho siyaphangisa ukubancedisa ngoba vele siyabe sesilobungane obuqinileyo labo. (Zaga 17:17) Ukuzihlanganisa lamalunga ebandla kwenza sitshengise ukuthi ‘silokuzwelana okufananayo.’​—1 Khorinte 12:25, 26.

Sikukhuthaza ukuthi ukhethe abangane abenza intando kaNkulunkulu. Uzathola abangane abanjalo kuboFakazi bakaJehova. Siyakucela ukuthi ungavumeli ukuthi kube lolutho oluzakwenza wekele ukuhlanganyela lathi.

• Kungani kusinceda ukuthi sihlangane ndawonye emihlanganweni?

• Ungafuna ukubuya nini emihlanganweni yethu ukuze ubazi ngcono oFakazi bakaJehova?

Emihlanganweni yamaKhristu akuqala, kwakuhlatshelwa, kukhulekwa, kubalwa iMibhalo njalo kuxoxwa ngayo. Konke lokhu kwakusenziwa kungela mikhuba phakathi. (1 Khorinte 14:26) Emihlanganweni yethu, ungakhangelela ukuthola kusenziwa okufananayo.

Esikufundayo kusekelwe eBhayibhilini njalo kuyasebenza ekuphileni kwethu. Ngempelaviki, ibandla ngalinye lihlangana ndawonye ukuze lilalele inkulumo esekelwe eBhayibhilini ethatha imizuzu engu-30, esisiza sibone ukuthi iMibhalo isebenza njani ekuphileni kwethu lasezikhathini esiphila kizo. Sonke sikhuthazwa ukuthi sikhangele emaBhayibhilini ethu nxa kubalwa iBhayibhili. Ngemva kwenkulumo le, kuba lesifundo semagazini okuthiwa yi-“Nqabayokulinda” esithatha ihola. Kulesisifundo, izilaleli zikhululekile ukuthi ziphendule imibuzo esendabeni eyabe ifundwa ku-Nqabayokulinda. Lesi sifundo sisinceda ukuthi sisebenzise isiqondiso seBhayibhili empilweni zethu. Emhlabeni wonke, amabandla adlula i-110 000 afunda okufananayo.

Sincediswa ukuthi sithuthukise indlela esifundisa ngayo. Okunye esikwenzayo yikuhlangana phakathi kweviki ukuze singene umhlangano olengxenye ezintathu othi Impilo Lenkonzo YamaKhristu. Sisebenzisa ibhukwana elithi Ugwalo Lomhlangano. Ingxenye yokuqala yomhlangano lo ithi Amagugu AseLizwini LikaNkulunkulu njalo iyasinceda ukuthi sizwisise ngcono ingxenye ethile eseBhayibhilini esiyabe siyibale sisezindlini. Ingxenye elandelayo ethi Zinikele Emsebenzini Wokutshumayela ileziboniso ezitshengisa ukuthi singabatshumayeza njani abanye. Kulomeluleki oyabe ekhangele indlela iziboniso lezi ezenziwa ngayo abesenika iseluleko esinceda sonke ukuthi senelise ukubala lokukhuluma kuhle. (1 Thimothi 4:13) Ingxenye yokucina ethi Impilo YamaKhristu iyasisiza ukuthi senelise ukuzisebenzisa ezimpilweni zethu izimiso esizifunda eBhayibhilini. Engxenyeni le kulengxoxo elemibuzo lezimpendulo ezisinceda ukuthi siyizwisise ngokujulileyo iMibhalo.

Nxa ungahamba emihlanganweni yethu, akulambuzo ukuthi uzamangaliswa yibuhle bemfundo yeBhayibhili ozayithola.​—Isaya 54:13

• Kuyini ongakhangelela ukukuthola emihlanganweni yaboFakazi bakaJehova?

• Yiwuphi umhlangano wethu ongathanda ukuya kiwo?

Uke wakhangela imifanekiso esebhukwini leli yini, wabona indlela oFakazi bakaJehova abagqoka kuhle ngayo nxa besiya emihlanganweni yabo yebandla? Kungani silendaba lendlela esizilungisa ngayo lesigqoka ngayo?

Sifuna ukutshengisa ukuthi sihlonipha uNkulunkulu wethu. Kuliqiniso ukuthi uNkulunkulu kakhangeli ingaphandle yethu kuphela. (1 Samuyeli 16:7) Loba kunjalo, isifiso sethu esikhulu nxa sibuthana ukuze sikhonze uNkulunkulu, yikutshengisa ukuthi siyamhlonipha njalo sihlonipha lesikhonza labo. Nxa kumele sime phambi kukamahluleli emthethwandaba, kuyabe kumele sigqoke kuhle ukuze sitshengise ukuthi siyasihlonipha isikhundla sakhe. Ngokufananayo, indlela esigqoka ngayo emihlanganweni yethu itshengisa ukuthi sihlonipha uJehova uNkulunkulu ‘onguMahluleli womhlaba wonke,’ kanye lendawo esimkhonzela khona.​—Genesisi 18:25.

Sifuna ukutshengisa izimiso esiphila ngazo. IBhayibhili likhuthaza amaKhristu ukuthi agqoke “izigqoko ezifaneleyo, . . . ngokuhlonipha langokuqonda.” (1 Thimothi 2:9, 10, The Holy Bible in Ndebele) Ukugqoka “izigqoko ezifaneleyo” kutsho ukungagqoki izigqoko zokufuna ukubonakala, ezenza umuntu acabange ngezemacansini njalo ezikhanyelayo. Kuyasinceda njalo ukuthi sikhethe izigqoko ezinhle, ezilesithunzi njalo ezingatshengisi ubutshapha. Lanxa kulezimiso ezinjengalezi, kulokunengi esingazikhethela ukukugqoka. Indlela enhle esikhangeleka ngayo ‘ingenza imfundiso ngoMsindisi wethu ibe ngehugayo’ njalo ‘idumise uNkulunkulu.’ (Thithusi 2:10; 1 Phetro 2:12, The Holy Bible in Ndebele) Ukugqoka kuhle nxa sisiya emihlanganweni kwenza abanye babone ukuthi ukukhonza uJehova kuhle.

Akumelanga uyekele ukubuya eWolu loMbuso ngenxa yokuthi awula zigqoko ezifaneleyo. Akudingeki ukuthi ube lezigqoko ezidulayo kumbe ezimangalisayo. Ungagqoka izigqoko ezifaneleyo, ezihlanzekileyo njalo ezibukeka kuhle.

• Indlela esigqoka ngayo iqakathekile yini nxa sikhonza uNkulunkulu?

• Yiziphi izimiso ezisiqondisayo ekukhetheni izigqoko zethu lendlela esizilungisa ngayo?

Nxa ufunda iBhayibhili laboFakazi bakaJehova, akulambuzo ukuthi uyazama ukukhangela kusaselesikhathi lokho eliyabe lizakufunda. Kuhle ukuthi wenze okufananayo ungakayi emhlanganweni webandla ukuze uthole okunengi. Nxa silohlelo oluhle lokwenza njalo sithola okungcono kakhulu.

Cabanga ngokuthi uzafunda nini njalo ngaphi. Kunini lapho ongafunda ufake ingqondo yakho yonke? Kusekuseni kakhulu yini ungakaqalisi imisebenzi yakho kumbe kusebusuku abantwana sebelele? Lanxa ungenelisi ukufunda okwesikhathi eside, nquma ukuthi uzafunda okwesikhathi esinganani njalo ungavumeli lutho lukuphambanise. Dinga indawo ethuleyo njalo ucitshe izinto ezingakuphambanisa ezinjenge-TV, irediyo lomakhalekhukhwini. Ukuthandaza ungakaqalisi ukufunda kuzakunceda ukuthi ungacabangi inhlupho ohlangane lazo ngalelolanga, ukuze wenelise ukufaka ingqondo yakho yonke eLizwini likaNkulunkulu.​—Filiphi 4:6, 7.

Dwebela izimpendulo njalo ulungiselele ukuphendula. Qala ngokuzwisisa ukuthi kukhulunywa ngani endabeni oyifundayo. Cabanga ngesihloko sendaba kumbe sesahluko, ubusukhangela ukuthi izihloko ezincane zihambisana njani lesihloko esikhulu njalo ukhangele lemifanekiso lemibuzo yokuzwisisa etshengisa imicijo eqakathekileyo. Ngemva kwalokhu ubusubala isigaba ngasinye udinge impendulo yombuzo wakhona. Khangela njalo ubale imibhalo ekhona esigabeni, ubusucabanga ngokuthi isekela njani okubalayo. (ImiSebenzi 17:11) Nxa usuyibonile impendulo, dwebela amabala amalutshwana kumbe imitsho emilutshwana esigabeni ezakwenza ukhumbule impendulo nxa ususemhlanganweni. Nxa ufuna, ungaphakamisa isandla emhlanganweni ubusuphendula kafitshane ngamazwi akho.

Ngokuhlola indaba ezitshiyeneyo okukhulunywa ngazo iviki ngalinye emihlanganweni, uzengezelela ulwazi lwakho lweBhayibhili ‘esiphaleni sakho samagugu.’​—Mathewu 13:51, 52.

• Yiluphi uhlelo lokulungiselela imihlangano ongaba lalo?

• Ungazilungiselela njani ukuthi uphendule emhlanganweni?

Kusukela kudala uJehova ubelokhu efuna ukuthi imuli ngayinye ibe lesikhathi sokuba ndawonye ukuze iqinise ubuhlobo bayo laye njalo iqinise uthando phakathi kwamalunga ayo. (Dutheronomi 6:6, 7) Ngenxa yalokhu, iviki ngayinye oFakazi bakaJehova baba lesikhathi sokukhonza ndawonye njengemuli ukuze baxoxe bezikhululekele ngezindaba zeBhayibhili ezihambelana labakudingayo. Lanxa uhlala wedwa, ungasebenzisa isikhathi lesi ukufunda loba yini esekelwe eBhayibhilini ukuze usondele eduze loNkulunkulu.

Yisikhathi sokusondela eduze loJehova. “Sondelani phansi kukaNkulunkulu laye uzasondela kini.” (Jakhobe 4:8) Ukufunda okunengi ngobuntu bukaJehova kanye lezenzo zakhe eLizwini lakhe iBhayibhili kwenza simazi ngcono. Indlela elula yokuqalisa ukukhonza kwemuli yikubala iBhayibhili ndawonye, mhlawumbe lilandela ukubala kweBhayibhili kwamaviki onke okusegwalweni lomhlangano. Umuntu ngamunye emulini anganikwa ingxenye yokubala, omunye lomunye abesekhuluma ukuthi ufundeni okusemiBhalweni.

Yisikhathi sokuthi imuli iqinise uthando phakathi kwayo. Uthando phakathi kwamadoda labafazi babo kanye labazali labantwana luyaqina nxa befunda iBhayibhili bendawonye njengemuli. Kufanele kube yisikhathi sentokozo, esilokuthula njalo esiyabe sikhangelelwe ngumuntu wonke iviki ngayinye. Abazali bangakhetha indaba ezisebenza emulini yabo, mhlawumbe besebenzisa ezikumagazini okuthiwa yi-Nqabayokulinda le-Awake! kumbe ezikuwebhusayithi yethu, i-jw.org kodwa bakhethe okuhambelana leminyaka yabantwana babo. Bangakhuluma ngezindlela abantwana babo abangaxazulula ngazo inhlupho abahlangana lazo esikolo. Okunye abangakwenza yikubukela i-JW Broadcasting (tv.jw.org) besebexoxa ngalokhu abakade bekubukele. Kanti njalo bangafundela ukuhlabela ingoma eziyabe zizahlatshelwa emihlanganweni njalo bangaba lokudliwayo kumbe okunathwayo ngemva kokukhonza kwemuli.

Isikhathi lesi esiqakathekileyo sokukhonza uJehova ndawonye iviki ngayinye sizanceda bonke emulini bajabulele ukufunda iLizwi likaNkulunkulu njalo uJehova uzabusisa imizamo yabo ngendlela enkulu.​—IHubo 1:1-3.

• Kungani sizinika isikhathi sokuba lokukhonza kwemuli?

• Abazali bangenzani ukuze wonke umuntu emulini akholise lesisikhathi?

Kungani abantu laba bekhangeleka bejabule kangaka? Basemhlanganweni wethu omkhulu. Izinceku zikaNkulunkulu zakudala zazitshelwa ukuthi zibuthane kathathu ngomnyaka, yikho lathi sikhangelela ukubuthana ndawonye njengamaqembu amakhulu. (Dutheronomi 16:16) Umnyaka ngamunye silemihlangano emithathu: umhlangano wesiqinti owelanga elilodwa oba khona kabili ngomnyaka kanye lomhlangano wesabelo owamalanga amathathu. Imihlangano le isinceda ngani?

Iqinisa ubudlelwano bethu njengamaKhristu. Ama-Israyeli ayejabulela ukudumisa uJehova ‘emihlanganweni emikhulu,’ ngakho lathi sijabulela ukumkhonza sindawonye emibuthanweni eqakathekileyo. (IHubo 26:12; 111:1) Le mibuthano isinika amathuba okuthi sihlangane njalo sibe lobudlelwano laboFakazi abavela kwamanye amabandla kumbe abavela kwamanye amazwe. Emini ngesikhathi sekhefu sidla ndawonye. Lokhu kwenza sibe lamathuba amanengi okudinga abangane. (ImiSebenzi 2:42) Emihlanganweni le emikhulu sizibonela ngawethu uthando olumanyanisa ‘abazalwane’ bethu emhlabeni wonke.​—1 Phetro 2:17.

Isinceda ukuthi sithuthukise ukukhonza kwethu. Ama-Israyeli ayencedwa ‘yikuzwisisa amazwi’ eMibhalo ababeyichasiselwa. (Nehemiya 8:8, 12) Lathi siyayiqakathekisa imfundo esekelwe eBhayibhilini esiyithola emihlanganweni emikhulu. Uhlelo lomhlangano ngamunye lulesihloko esisekelwe eMibhalweni. Sifunda ukwenza intando kaNkulunkulu empilweni zethu ngokulalela izinkulumo ezimnandi, inkulumo zokutshiyelana lezinkulumo lapho okuyabe kulemidlalo yokuyabe kwenzakele ekutshumayeleni. Kuyasikhuthaza ukuzwa indlela abanye abanqoba ngayo ubunzima abahlangana labo ngenxa yokuphila njengamaKhristu ezikhathini lezi ezinzima. Emihlanganweni yesabelo, imidlalo elabalingiswa abayabe begqoke ezendulo yenza sibone zisenzakala sibili indaba eziseBhayibhilini njalo isifundisa izifundo ezisincedayo. Emhlanganweni ngamunye, kubhabhathizwa labo abafuna ukutshengisa ukuzinikela kwabo kuNkulunkulu.

• Kungani imihlangano emikhulu iyisikhathi sokuthokoza?

• Ukuya emhlanganweni omkhulu kungakunceda njani?

Esezakufa uJesu wathi: “Njalo lelivangeli lombuso lizatshunyayelwa kuwo wonke umhlaba njengobufakazi kuzo zonke izizwe, besekufika ukucina.” (Mathewu 24:14) Kodwa lo msebenzi wokutshumayela emhlabeni wonke wawuzakwenziwa njani? Ngokulingisela isibonelo uJesu asibekela sona esasemhlabeni.​—Lukha 8:1.

Sizama ukudinga abantu emakhaya abo. UJesu wafundisa abafundi bakhe ukutshumayela izindaba ezinhle endlini ngendlu. (Mathewu 10:11-13; ImiSebenzi 5:42; 20:20) Laba batshumayeli bekhulu lokuqala banikwa indawo ezithile okwakumele bazitshumayele. (Mathewu 10:5, 6; 2 Khorinte 10:13) Ngokufanana lalamuhla, umsebenzi wethu wokutshumayela uhlelwe kuhle njalo ibandla ngalinye linikwa indawo ethile okumelwe bayitshumayele baze bayiqede. Lokhu kwenza sifeze umlayo kaJesu ‘wokutshumayela ebantwini bonke njalo sifakaze.’​—ImiSebenzi 10:42.

Sizama ngamandla onke ukudinga abantu noma ngaphi lapho esingabathola khona. UJesu laye wasibekela isibonelo ngokutshumayeza abantu endaweni zomphakathi ezinjengasekhunjini lolwandle lasemthonjeni womphakathi. (Makho 4:1; Johane 4:5-15) Lathi sikhuluma labantu ngeBhayibhili noma ngaphi lapho esingabathola khona, ngokwesibonelo emigwaqweni, endaweni zamabhizimusi, emaphakhi noma ngokubatshayela ucingo. Nxa sithola ithuba siyafakaza lakubomakhelwane bethu, kwesisebenza labo, kwesifunda labo lasezihlotsheni zethu. Imizamo yonke le isiyenze izigidi zabantu emhlabeni wonke zenelisa ukuzwa izindaba ezinhle ‘zensindiso.’​—IHubo 96:2.

Ngubani ongafuna ukumtshela izindaba ezinhle zoMbuso kaNkulunkulu njalo ubusumchasisela ukuthi zizakwenza atholeni kusasa? Ungayekeli ukutshela abanye ngalelithemba. Kwenze ngokuphangisa!

• Yiziphi izindaba ezinhle okumele zimenyezelwe?

• OFakazi bakaJehova bayilingisela njani indlela kaJesu yokutshumayela?

Ibala elithi “phayona” kanengi litsho abantu abadinga indawo ezintsha besebevulela abanye indlela ukuthi balandele. UJesu wayeliphayona ngoba wathunywa emhlabeni ukuthi atshumayeze abantu ukuze bathole ukuphila njalo lokuthi avule ithuba lokuthi bathole insindiso. (Mathewu 20:28) Lamuhla abalandeli bakhe bayamlingisela ngokusebenzisa isikhathi sabo esinengi ‘ekwenzeni abafundi.’ (Mathewu 28:19, 20) Abanye sebenelise ukuhlanganyela enkonzweni esiyibiza ngokuthi ubuphayona.

Iphayona ngumtshumayeli wesikhathi esigcweleyo. Bonke oFakazi bakaJehova bayatshumayela izindaba ezinhle. Abanye bahlele ukuthi bakhonze njengamaphayona esikhathi sonke, betshumayela amahola angu-70 ngenyanga. Ukuze benze lokhu, abanye babo bakhetha ukungasebenzi izikhathi zonke emisebenzini yokuziphilisa. Abanye bakhethwa ukuthi bakhonze njengamaphayona aqakathekileyo lapho okulesidingo sabantu abatshumayela ngoMbuso, njalo batshumayela amahola angu-130 ngenyanga. Amaphayona ayasuthiseka ngempilo engelazinto ezinenginengi njalo alethemba lokuthi uJehova uzawapha izinto eziqakathekileyo empilweni. (Mathewu 6:31-33; 1 Thimothi 6:6-8) Abangenelisi ukuphayona okwesikhathi esigcweleyo bangaba ngamaphayona asizayo ukuze bengeze umsebenzi wabo wokutshumayela ngamahola angu-30 kumbe angu-50 ngenyanga.

Okwenza umuntu aphayone yikuthanda kwakhe uNkulunkulu labantu. Silolwazi olunganceda abantu lamuhla ukuthi babe lethemba eliqinileyo ngekusasa ngoba njengoJesu, siyananzelela ukuthi abanengi lamuhla bayaludinga kakhulu ulwazi ngoNkulunkulu langezinjongo zakhe. (Makho 6:34) Ukuthanda umakhelwane yikho okwenza umuntu oliphayona anikele ngomusa isikhathi sakhe lamandla akhe ukuze asize abanye babezazi izindaba ezinhle. (Mathewu 22:39; 1 Thesalonika 2:8) Ukwenza lokhu kwenza iphayona libe lokholo oluqinileyo, kwenza lisondele eduze loNkulunkulu njalo lijabule kakhulu.​—ImiSebenzi 20:35.

• Ungalichaza njani iphayona?

• Kuyini okwenza abanye baphayone okwesikhathi esigcweleyo?

Kusukela kudala, oFakazi bakaJehova bebelokhu bethola imfundo evela kuNkulunkulu. Abazinikelayo ukuthi benze umsebenzi wokutshumayela ngoMbuso okwesikhathi esigcweleyo bangena izikolo ezithile eziqakathekileyo ukuze ‘bayifeze yonke imisebenzi yenkonzo yabo.’​—2 Thimothi 4:5.

ISikolo seNkonzo samaPhayona. Iphayona lesikhathi sonke lingena isikolo samalanga ayisithupha nxa selifikise umnyaka lisenza inkonzo yalo yesikhathi esigcweleyo. Isikolo lesi singenzelwa eWolu loMbuso eliseduze lalapho elihlala khona. Senzelwe ukunceda iphayona ukuthi lisondele eduze loJehova, lithuthuke ekwenzeni umsebenzi walo wokutshumayela kanye lokuthi liqhubeke lisenza inkonzo yalo ngokuthembeka.

ISikolo Sabavangeli BoMbuso. Isikolo lesi sithatha izinyanga ezimbili njalo senzelwe ukuqeqetsha amaphayona aselesikhathi esenza inkonzo yawo. Kumele kube ngazinikele ukutshiya amakhaya awo ukuze ahambe loba ngaphi lapho okufuneka khona abamemezeli. Esasemhlabeni, uJesu Khristu wayengumVangeli omkhulu kulabo bonke. Yikho-ke amaphayona la amlingisela ngokuvuma ukuthunywa loba ngaphi, njengo-Isaya owathi: “Ngilapha. Thuma mina!” (Isaya 6:8; Johane 7:29) Ukusuka emakhaya abo kungatsho ukuthi sekumele bantshintshe ukuphila kwabo, baphile bengelazinto ezinenginengi. Bangabe bengawajayelanga amasiko endawo abayabe sebekuyo, kugoqela lomumo womkhathi kanye lokudla kwakhona. Kungadingeka lokuthi bafunde olunye ulimi. Isikolo lesi singenwa ngamaKhristu atshadileyo, abafowethu abangatshadanga kanye labodadewethu abangatshadanga. Abasingenayo kumele babeleminyaka engu-23 kusiya kwengu-65. Sibanceda ukuthi babe lobuntu obuhle kakhulu obuzakwenza benze ngcono imisebenzi abazayiphiwa lokuthi babe lobuciko obuzabanceda ukuthi basetshenziswe nguJehova kanye lenhlanganiso yakhe ezintweni ezitshiyeneyo.

ISikolo seBhayibhili se-Watchtower saseGileyadi. NgesiHebheru, ukuthi “Gileyadi” kutsho ukuthi “Inqwaba yobuFakazi.” Kusukela isikolo lesi sasungulwa ngo-1943, sekuthunywe abafundi abedlula i-8 000 ukuthi babe ngabanali ukuze bayefakaza “emikhawulweni yomhlaba” njalo bayaphumelela. (ImiSebenzi 13:47) Ngokwesibonelo, ababevela esikolo lesi bathi befika ePeru, kwakungelamabandla kodwa khathesi asedlula i-1 000. Lapho abanali bethu befika eJapan, kwakulaboFakazi abaphansi kwe-10, kodwa khathesi sekulabedlula i-200 000. Esikolo lesi saseGileyadi esithatha izinyanga ezinhlanu kuyabe kufundwa iLizwi likaNkulunkulu njalo lichwayisiswa sibili. Abangangena isikolo lesi ngamaphayona aqakathekileyo, abanali, abasemaBhetheli kumbe ababonisi besiqinti ukuze bayeqeqetshwa okuzwayo besebencedisa ukuthi umsebenzi owenziwa emhlabeni wonke uhambe kuhle njalo uthuthuke.

• Senzelweni iSikolo seNkonzo samaPhayona?

• Isikolo Sabavangeli BoMbuso senzelwe obani?