IBHOKISI 10C
UJehova Uzakusukumisa Ume Ngenyawo
UMBONO okuHezekheli 37:1-14 ulesifundo esihle esingasinceda ukuthi sithole amandla nxa siphakathi kobunzima. Yisiphi lesosifundo?
Kwezinye izikhathi inhlupho lezilingo esihlangana lazo empilweni ziyasikhulela zisiqede amandla. Kodwa nxa singacabangisisa ngombono kaHezekheli omayelana lokuvuselelwa kokukhonza kweqiniso singathola amandla. Usinceda njani umbono lo? Embonweni lo uNkulunkulu uvuselela amathambo awomileyo abe ngabantu abaphilayo. Ngakho nxa elamandla okwenza lokho, kutsho ukuthi uyenelisa ukusipha amandla okumelana laloba yibuphi ubunzima kungelani lokuthi bukhulu kangakanani.—Bala iHubo 18:29; Flp. 4:13.
Kusasele iminyaka eminengi ukuthi uHezekheli azalwe, umphrofethi uMosi waveza ukuthi uJehova uzimisele ukusebenzisa amandla akhe ukuthi ancedise abantu bakhe. UMosi wabhala wathi: “UNkulunkulu uyisiphephelo kusukela ezinsukwini zakudala, ingalo zakhe zaphakade zingaphansi kwakho.” (Dute. 33:27) Yikho asithandabuzi ukuthi nxa singathembela kuJehova uNkulunkulu wethu ngesikhathi sisebunzimeni, uzafaka ingalo zakhe ngaphansi kwethu asisukumise sime ngenyawo.—Hez. 37:10.