Zilibazise Ngezinto Ezamukelwa NguJehova

UJehova ‘nguNkulunkulu othokozayo.’ (1 KuThimothi 1:11) Ufuna lathi sithokoze njalo sikholise impilo. Uyathokoza nxa sisiba lesikhathi sokuzilibazisa. Esifundweni lesi sizaxoxa ngokuthi ungasisebenzisa njani isikhathi leso ngendlela ezakwenza ukholise futhi uthokozise uJehova.

1. Kuyini okumele ucabange ngakho nxa ukhetha okokuzilibazisa?

Ujayele ukuzilibazisa ngani nxa uziphumulele? Abanye bathanda ukuzihlalela nje endlini babale inoveli, balalele izingoma kumbe babukele i-TV. Abanye bona bathanda ukuzilibazisa labangane babo ngokudlala ibhora, ukubhukutsha kumbe ukuvakatsha nje. Kungelani lokuthi sithanda ukwenzani, kumele sibe leqiniso lokuthi esikukhethayo ‘kuyamukeleka eNkosini.’ (Kwabase-Efesu 5:10) Kufanele sinanzelele sibili endabeni le ngoba izinto ezinengi abantu abazilibazisa ngazo azimthokozisi uJehova. Zilokungaziphathi, udlakela lesidimoni. (Bala iHubo 11:5.) Kuyini okuzasinceda ukuthi sikhethe kuhle esizilibazisa ngakho?

Nxa singaba labangane abathanda uJehova bazasinceda ukuthi sikhethe kuhle esizilibazisa ngakho. Esifundweni 48 safunda ukuthi umuntu “ohamba labahlakaniphileyo uzahlakanipha,” kodwa lowo okhetha ukuba labangane abangalandeli imithetho kaNkulunkulu “uzangena emanyaleni.”—IZaga 13:20.

2. Kungani kumele sinanzelele ukuthi siqeda isikhathi esinganani sizilibazisa?

Lanxa esizilibazisa ngakho kuqondile, kumele sinanzelele ukuthi asiqedi isikhathi esinengi kukho ngoba singacina siswela esokwenza izinto eziqakathekileyo. IBhayibhili lisikhuthaza ukuthi ‘sisisebenzise kuhle isikhathi sethu.’—Bala u-Efesu 5:15, 16.

GEBHA UJULE

Engxenyeni le sizaxoxa ngalokho ongakwenza ukuze ukhethe kuhle ezokuzilibazisa.

3. Nanzelela ozilibazisa ngakho

Kungani kuqakathekile ukuthi ukhethe kuhle ozilibazisa ngakho? Bukelani IVIDIYO beselixoxa ngemibuzo elandelayo.

IVIDIYO: Yikuphi Okokuzilibazisa Okumele Ngikukhethe? (4:39)

• Imidlalo eyayisenziwa eRoma ihambelana njani lokunye ukuzilibazisa okukhona lamuhla?

• UDanny wafundani endabeni yokuzilibazisa?

Bala uRoma 12:9 beselixoxa ngombuzo lo:

• Ivesi le ingakunceda njani nxa ufuna ukukhetha okokuzilibazisa?

Yiziphi izinto uJehova azizondayo? Bala iZaga 6:16, 17 loGalathiya 5:19-21. Ngemva kokubala umbhalo ngamunye, xoxani ngombuzo lo:

• Yiziphi izinto eziqanjwe emavesini la ojayele ukuzibona kwezokuzilibazisa ezikhona lamuhla?

Ongacabanga ngakho nxa ukhetha okokuzilibazisa

Zibuze imibuzo elandelayo:

• Kulezinto ezizondwa nguJehova yini kulokho engifuna ukuzilibazisa ngakho?

• Kuzangithathela isikhathi sokwenza izinto eziqakathekileyo yini?

• Kuzangihlanganisa labantu abangamthandiyo uJehova yini?

Uyabe uhlakaniphile sibili nxa ungadlalela khatshana lento engaba yingozi. Yikho kumele ubalekele loba yikuphi ukuzilibazisa okungaba yingozi

4. Sisebenzise kuhle isikhathi sakho

IVIDIYO: Usisebenzisa Njani Isikhathi Sakho? (2:45)

• Njengoba umzalwane ubengazilibazisi ngezinto ezimbi, uhlupho belungaphi?

Bala uFiliphi 1:10 beselixoxa ngombuzo lo:

• Ivesi le ingasinceda njani nxa sihlela ukuthi sizazilibazisa okwesikhathi esinganani?

5. Zilibazise ngezinto ezizakunceda

Lanxa okunye ukuzilibazisa kungamthokozisi uJehova, kunengi okuhle esingazilibazisa ngakho. Bala umTshumayeli 8:15 loFiliphi 4:8 beselixoxa ngombuzo lo:

• Wena uthanda ukuzilibazisa ngani?

ISIFINQO

UJehova uyathokoza nxa sizilibazisa ngezinto ezinhle.

Ufundeni?

• Yikuzilibazisa okunjani okumele amaKhristu eqiniso akuxwaye?

• Kungani kumele sinanzelele ukuthi siqeda isikhathi esinganani sizilibazisa?

• Kungani kumele ukhethe kuhle ozilibazisa ngakho?

THOLA OKUNENGI

Bala isihloko lesi uzwe ukuthi ukhona yini okumele asikhethele esingazilibazisa ngakho.

“Kulamafilimu, Amabhuku Kumbe Izingoma Elikuzondayo Yini?” (Isihloko esikuwebhusayithi yethu)

Bala isihloko lesi uzwe ukuthi ungenzani ukuze ukhethe kuhle ozilibazisa ngakho.

“Ozilibazisa Ngakho Kuyakunceda Yini?” (INqabayokulinda, October 15, 2011)

Bala isihloko esithi “Angisabandlululi Muntu” ukuze ubone ukuthi kuyini okwenza eyinye indoda yatshintsha eyayizilibazisa ngakho.

“IBhayibhili Liyamntshintsha Umuntu” (INqabayokulinda, February 1, 2010)

Bukela ividiyo le ubone ukuthi omunye umama wenzani ngesikhathi kuthutsha ifilimu elesidimoni.

Balekela Ukuzilibazisa Ngezinto Ezilesidimoni (2:02)