Imibuzo Ebuzwa Ngabafundi
IBhayibhili lithi indaba kumele iqiniswe ngobufakazi babantu ababili kumbe abedlula lapho. (Nani. 35:30; Dute. 17:6; 19:15; Mat. 18:16; 1 Tim. 5:19) Kodwa uMthetho kaMosi wawusithi nxa indoda ingabamba intombi esikhombile [esithembise ukutshada lejaha layo, NWT] iganyavu “egangeni” futhi intombi leyo ihlabe umkhosi, iyabe ingelacala lokufeba kodwa indoda yona iyabe ilalo. Kungani intombi yayingabi lecala kodwa indoda isibalalo khona kungelabofakazi?
Umthetho okuDutheronomi 22:25-27 kayisiwo wokutshengisa ukuthi indoda le yayilecala ngoba vele kwakuzikhanyela ukuthi ilalo. Wawungowokuveza ukuthi intombi kayilacala. Ake sihlole amanye amavesi ukuze sikuzwisise lokhu.
UDutheronomi 22:23 lo-24 ukhuluma ngendoda ehlangana “edolobheni” lentombi esikhombile ibe isilala layo. Indoda le yayisiba lecala lokufeba ngoba intombi esikhombile kwakufanana lokuthi isitshadile. Pho kuthiwani ngentombi? ‘Kayihlabanga umkhosi ukuthi ilanyulelwe edolobheni.’ Aluba yakwenza lokhu abanye babezayizwa besebeyinceda. Yikho layo yayihlanganyela ebufebeni futhi bobabili babelecala.—Dute. 22:23, 24.
Ngemva kwalokho uMthetho wakhuluma ngendaba ephose ihambelane lale, wathi: “Kodwa nxa kungenzeka ukuthi indoda ihlangane lentombi esikhombile egangeni ibe isiyibamba, indoda ekwenzileyo lokhu yiyo kuphela ezakufa. Lingenzi lutho entombini; kayenzanga sono esibangela ukuthi ife. Lindaba iyafanana leyomuntu ohlasela abulale umakhelwana wakhe, ngoba indoda ifumene inkazana egangeni, noma intombi le ekhombileyo ibihlabe umkhosi, bekungelamuntu wokuyilamulela.”—Dute. 22:25-27.
Endabeni le abahluleli babekholwa ukuthi ababekutshelwe yintombi kuliqiniso. Kungani kunjalo? Kwakucatshangelwa ukuthi ‘iwuhlabile umkhosi kodwa kwangabi lomuntu wokuyilamulela.’ Yikho yayingafebanga. Kodwa indoda yayilecala lokubamba iganyavu lelokufeba ngoba ‘yayibambe’ intombi ekhombileyo ngenkani ukuthi ilale layo.
Lanxa umthetho lo wawutshengisa ukuthi intombi kayilacala, wawuphinda uveze ukuthi indoda ilecala lokubamba iganyavu lelokufeba. Sileqiniso lokuthi abahluleli ‘babeyichwayisisa ngokupheleleyo’ indaba besebekhipha isinqumo esihambelana lalokho uJehova ayekucacisile njalo wakutsho kanenginengi.—Dute. 13:14; 17:4; Eks. 20:14.