Ubukwazi Yini?

Kungani ama-Israyeli ayekhipha amalobolo?

KUDALA ijaha kumbe imuli yangakibo lalikhipha amalobolo nxa imuli zombili sezivumelene ukuthi kube lomtshado. Amalobolo ayengaba yimpahla eligugu, izifuyo kumbe imali. Ngezinye izikhathi ayebhadalwa ngokwenza imisebenzi ethile. Ngokwesibonelo, uJakhobe wasebenzela uyise kaRakheli okweminyaka eyisikhombisa. (Gen. 29:17, 18, 20) Isiko leli lalisenzelwani?

Esinye isikhwicamfundo seBhayibhili okuthiwa nguCarol Meyers sithi: “Ngezinye izikhathi amalobolo ayekhitshwa ukuze kubhadalwe imuli yentombi njengoba yayiyabe isisehlukana lendodakazi yayo ebincedisa emisebenzini eqakathekileyo enjengokulima.” Kungenzeka amalobolo la ayengawokuqinisa ubuhlobo phakathi kwemuli yejaha leyentombi. Imuli lezo zasezingancedisana ngezikhathi ezinzima. Kanti njalo amalobolo ayetshengisa ukuthi intombi sithembisene lejaha lokuthi isisuka ngakibo lapho ebigcinwe khona nguyise isisiyagcinwa lijaha.

Ukukhipha amalobolo kwakungatsho ukuthi intombi yinto engathengwa kumbe ithengiswe. Elinye ibhuku elithi Ancient Israel—Its life and Institution likhuluma ngalokho okwakusenzakala ko-Israyeli lithi: “Umlandu ijaha elalilawo kanye lemuli yangakibo wokukhipha imali yamalobolo kumbe okunye wawusenza kukhanye angani intombi yayithengiswa. Kodwa kukhanya amalobolo ayeyinhlawulo eyayinikwa abangakibo bentombi. Ayengayisiwo okuyithenga.”

Lamuhla kwamanye amazwe abantu balokhu bekhipha amalobolo. Nxa abazali abangamaKhristu belobolisa akumelanga babize kakhulu ukuze ‘kwaziwe ngabantu bonke ukuthi bangabantu abazwisisayo.’ (Flp. 4:5; 1 Khor. 10:32, 33) Nxa besenza njalo bayabe betshengisa ukuthi ‘kabayithandi imali’ lokuthi kabayisizo zihwaba. (2 Tim. 3:2) Kanti njalo akusoze kudingeke ukuthi ijaha litshintshe ilanga lomtshado lisenzela ukuthi lithole imali yamalobolo ebiziweyo. Akusoze kudingeke lokuthi litshiye ukuphayona lisiyasebenza nsuku zonke ukuze lithole imali enengi kakhulu eyamalobolo ebiziweyo.

Kwamanye amazwe uhulumende nguye otshoyo ukuthi ilobolo lingadluli okunganani. AmaKhristu ahlala emazweni la kumele ayilandele imithetho leyo ngoba iLizwi likaNkulunkulu lithi kumele ‘azehlise kuziphathamandla’ njalo alalele imithetho yazo engaphikisani lemithetho kaNkulunkulu.—Rom. 13:1; ImiSeb. 5:29.