UJesu Uyaliqakathekisa Ibizo LikaJehova

1-2. (a) Kuyini okwenziwa nguJesu ngobusuku bokucina engakabulawa? (b) Sizaxoxa ngani esihlokweni lesi?

KUNGOLWESINE ntambama mhlaka 14 ngenyanga kaNisani, ngo-33 C.E. Sekuseduze ukuthi uJesu athengiswe, etheswe icala angalaziyo, ahlulelwe kubi, ahlukuluzwe abesebulawa. Usanda kusungula iSidlo Senkosi Sakusihlwa elabaphostoli bakhe abathembekileyo. Bathi beqeda kudla iSidlo endlini ephezulu, uJesu abesekhuthaza njalo aqinise abaphostoli bakhe njengoba ebavalelisa. Bengakaphumi uqala athandaze futhi umthandazo lo oqakathekileyo utholakala kuJohane isahluko 17.

² Kuyini uJesu ayekhathazeke ngakho esezakufa? Umthandazo wakhe utshengisa ukuthi kuyini ayekuqakathekisa ngesikhathi esemhlabeni? Asiphenduleni imibuzo le.

“SENGENZE BALAZI IBIZO LAKHO”

3. UJesu wathini ngebizo likaJehova futhi wayesitshoni? (Joh. 17:​6, 26)

³ UJesu wathandaza wathi: “Sengenze ibizo lakho laziwa.” Siyakwazi ukuthi lokhu kwakuqakathekile kuJesu ngoba wakuqamba kwaze kwaba kabili emthandazweni lo. (Bala uJohane 17:​6, 26.) Wayesitshoni uJesu? Kambe ukuthi kwakumele abachasisele ukuthi ibizo likaNkulunkulu nguJehova? Abafundi bakaJesu babengamaJuda yikho babevele bekwazi ukuthi ibizo likaNkulunkulu nguJehova. Phela ibizo leli litholakala emibhalweni yesiHebheru okwezikhathi eziphosa zifike 7 000. Lapha uJesu wayesitsho ukuthi wayebatshelile abafundi bakhe ukuthi uJehova nguNkulunkulu onjani. Wanceda abafundi bakhe babona ukuthi kuyini uJehova ayekwenzile kanye lalokho ayezakwenza. Akula omunye umuntu owake wachasisa ukuthi uJehova nguNkulunkulu onjani ukwedlula indlela uJesu enza ngayo.

4-5. (a) Kuyini okungenza siqakathekise omunye umuntu? Nika isibonelo. (b) Kuyini okwenza abafundi bakaJesu baliqakathekisa ibizo likaJehova?

⁴ Ake sithi ebandleni lenu kulomdala ongudokotela osekuleminyaka eminengi umazi. Besekusithi ngelinye ilanga ugule uze uthwalelwe esibhedlela lapho umdala lo asebenza khona. Uhle ufikele ezandleni zakhe njalo akwelaphe uze usile. Iqiniso yikuthi kusukela mhlalokho uzamqakathekisa kakhulu umzalwane lo. Uyabe ungasamboni engumdala webandla kuphela kodwa engudokotela owakusindisayo.

⁵ Kwakunjalo langabafundi bakaJesu, babevele belazi ibizo likaJehova. Kodwa lokho uJesu abafundisa khona ngoJehova kwabenza baliqakathekisa kakhulu ibizo lelo. Kungani sisitsho njalo? Ngoba uJesu wayelingisela uYise kukho konke ayekwenza layekukhuluma. Ukulalela lokho uJesu ayebatshela khona lokubona indlela ayephatha ngayo abantu kwenza abaphostoli bamazi ngcono uJehova.—Joh. 14:9; 17:3.

“NGENXA YEBIZO LAKHO ONGIPHE LONA”

6. Kutshoni ukuthi uJehova wanika uJesu ibizo lakhe? (Joh. 17:​11, 12)

⁶ UJesu wathandazela abafundi bakhe wathi: “Bakhangele ngenxa yebizo lakho ongiphe lona.” (Bala uJohane 17:​11, 12.) Kambe lokhu kutsho ukuthi uJesu wayezabizwa ngebizo likaJehova? Hatshi. Nanzelela ukuthi uJesu wasebenzisa umutsho othi “ngenxa yebizo lakho.” Lokhu kutshengisa ukuthi uJesu kazange abizwe ngebizo likaNkulunkulu. Manje wayesitshoni ngesikhathi esithi uphiwe ibizo likaNkulunkulu? UJesu wayengummeli lomkhulumeli kaJehova. Zonke izimangaliso ayezenza wayezenza ngebizo likaYise. (Joh. 5:43; 10:25) Okunye okumele sikukhumbule yikuthi ibizo elithi Jesu litsho ukuthi “uJehova uyasindisa.” Ingcazelo yebizo likaJesu ilebizo likaJehova phakathi.

7. Kungani uJesu wayengakhulumela uJehova? Nika isibonelo

⁷ Asisebenziseni umzekeliso olandelayo ukuze sizwisise ukuthi kungani uJesu wayengenelisa ukukhuluma emele uJehova. Asikhulumeni ngalokho okungenziwa ngumongameli welizwe nxa efuna ukufikisa umlayezo othile ebantwini. Angakhetha ukuthuma ummeli wakhe. Nxa ummeli lo ekhuluma kuyabe kungani ngumongameli ngokwakhe okhulumayo. Lokhu yikho kanye okwenziwa nguJesu ngesikhathi ekhuluma labantu, wayemele uJehova.—Mat. 21:9; Luk. 13:35.

8. Kungani uJehova wathi ibizo lakhe likuJesu? (Eks. 23:​20, 21)

⁸ IBhayibhili lithi uJesu nguLizwi ngoba wasetshenziswa nguNkulunkulu njengomkhulumeli wakhe ukuze atshele abantu lezingilosi lokho uNkulunkulu ayekufuna. (Joh. 1:​1-3) Kungenzakala ukuthi ingilosi eyathunywa nguJehova ukuthi inakekele abako-Israyeli ngesikhathi besenkangala kwakunguJesu. UJehova watshela abantu bakhe ukuthi bayilalele ingilosi le. Kungani wayefuna bayilalele? Wathi: “Ngoba ibizo lami likuyo.”a (Bala u-Eksodusi 23:​20, 21.) UJehova wathi ibizo lakhe lalikuJesu ngoba akula omunye umuntu olwela futhi angcwelise ibizo lakhe njengoJesu.

“BABA KHAZIMULISA IBIZO LAKHO”

9. UJesu wayeliqakathekisa kangakanani ibizo likaJehova? Chasisa.

⁹ Sesibonile ukuthi langesikhathi uJesu engakabuyi emhlabeni wayevele eliqakathekisa ibizo likaJehova. Konke okwakusenziwa nguJesu ngesikhathi elapha emhlabeni kwakutshengisa ukuthi uyaliqakathekisa ibizo likaYise. UJesu esezaqeda inkonzo yakhe wathi: “Baba khazimulisa ibizo lakho.” Khonokho nje kwezwakala ilizwi elikhulu livela ezulwini lisithi: “Ngilikhazimulisile futhi ngizaphinda ngilikhazimulise.”—Joh. 12:28.

10-11. (a) UJesu walikhazimulisa njani ibizo likaYise? (Khangela lomfanekiso.) (b) Kungani kumele ibizo likaJehova lingcweliswe?

¹⁰ UJesu walikhazimulisa ibizo likaYise. Wavezela abantu ukuthi uJehova nguNkulunkulu omuhle kangakanani, waphinda wabachazela lalokho azakwenzela abantu. Kodwa kulokunye futhi akwenzayo. UJesu wayefuna wonke umuntu abe kwazi ukuthi ibizo likaJehova lingcwele lokuthi konke akwenzayo kuhlala kuqondile.b Indlela uJesu aqakathekisa ngayo ibizo likaYise yakhanya langesikhathi efundisa abalandeli bakhe ukuthandaza. Wathi: “Baba wethu osezulwini, kalingcweliswe ibizo lakho.”—Mat. 6:9.

¹¹ Kungani kumele ibizo likaJehova lingcweliswe? Kungenxa yokuthi ensimini yase-Edeni uSathane uDeveli wahutshuza amanga futhi wangcolisa ibizo likaJehova uNkulunkulu. Wathi uJehova ungumqambimanga futhi wenza kwakhanya angani uJehova uncitsha u-Adamu lo-Eva izinto ezinhle. (Gen. 3:​1-5) Okwakhulunywa nguSathane kwenza kwakhanya angani uJehova kakwazi akwenzayo. Amanga kaSathane alingcolisa sibili ibizo likaJehova ngoba enza ukuthi abantu bacabange ukuthi uJehova nguNkulunkulu omubi. Ngezinsuku zikaJobe uSathane wathi bonke abakhonza uJehova abakwenzi ngenxa yokuthi bayamthanda kodwa bamkhonza ngenxa yezinto abenzela zona. Usomangase lo waphinda wathi abantu bazatshiya ukukhonza uJehova nxa bangavele bahlangane lobunzima. (Job. 1:​9-11; 2:4) Yikho kwakuzakhanya ngokuhamba kwesikhathi ukuthi owayekhuluma amanga phakathi kukaJehova loSathane ngubani.

“NGINIKELA NGEMPILO YAMI”

12. Kwakhanya njani ukuthi uJesu uyalithanda ibizo likaJehova?

¹² UJesu wayemthanda kakhulu uYise yikho wayezimisele ukuthi angcwelise futhi akhazimulise ibizo lakhe. Wathi: “Nginikela ngempilo yami.” (Joh. 10:​17, 18) UJesu wayezimisele sibili ukulifela ibizo likaYise.c Abazali bethu bokuqala u-Adamu lo-Eva bahlamukela uJehova basekela uSathane. Kodwa uJesu yena kazange enze njalo. Wazimisela ukubuya emhlabeni ukuze atshengise ukuthi uyamthanda uJehova. Waqhubeka eqotho okwempilo yakhe yonke. (Heb. 4:15; 5:​7-10) Walilwela sibili ibizo likaJehova ngoba wathembeka kwaze kwaba sekufeni esigodweni sokuhlutshwa. (Heb. 12:2) Lokhu kwatshengisa ukuthi uyamthanda uJehova kanye lebizo lakhe.

13. Kungani kunguJesu kuphela owayengaveza egcekeni ukuthi uSathane ulamanga? (Khangela lomfanekiso.)

¹³ Konke okwenziwa nguJesu kwatshengisa ukuthi uSathane ngusomangase lokuthi uJehova nguNkulunkulu weqiniso. (Joh. 8:44) Akula omunye umuntu ongathi umazi ngcono uJehova ukwedlula uJesu. Aluba konke okwakhulunywa nguSathane kwakuliqiniso uJesu wayezakufakaza. Kodwa uJesu wayezimisele ukulwela ibizo likaJehova. Langesikhathi sekukhanya angani uJehova semlahlile, uJesu wayezimisele ukufa kulokuthi afulathele uYise futhi angcolise ibizo lakhe.—Mat. 27:46.d

“NGIWUQEDILE UMSEBENZI ONGIPHE WONA”

14. UJehova wambusisa njani uJesu?

¹⁴ Ngobusuku bokucina engakabulawa, uJesu wathandaza kuNkulunkulu wathi: “Ngiwuqedile umsebenzi ongiphe wona.” Wayengathandabuzi lakancane ukuthi uJehova wayezambusisa (Joh. 17:​4, 5). Lakanye uJehova wambusisa ngoba wamvusa kwabafileyo. (Imiseb. 2:​23, 24) UJesu wathi esevusiwe waphiwa isikhundla esiphezulu kakhulu ezulwini. (Flp. 2:​8, 9) Ngokuhamba kwesikhathi waba yinkosi yoMbuso kaNkulunkulu. Kuyini okuzakwenziwa nguMbuso lo? Impendulo siyithola emthandazweni kaJesu, wathi: “UMbuso wakho kawuze. Intando yakho [Jehova] kayenziwe emhlabeni njengasezulwini.”—Mat. 6:10.

15. Kuyini okunye okuzakwenziwa nguJesu?

¹⁵ Sekuseduze kakhulu ukuthi uJesu alwe lezitha zikaNkulunkulu njalo azitshabalalise zonke empini ye-Amagedoni. (Isam. 16:​14, 16; 19:​11-16) Ngemva kwalokho uzaphosela uSathane ‘emgodini ongelamkhawulo,’ okutsho ukuthi akulanto uSathane ayabe esenelisa ukuyenza, kuyabe kungathi ufile. (Isam. 20:​1-3) UJesu uzabusa okweminyaka eyinkulungwane, enze ukuthi kube lokuthula emhlabeni futhi akhiphe isono ebantwini. Uzavusa abafileyo, enze umhlaba ube lipharadayisi. Ngalesosikhathi inhloso kaJehova izabe isigcwalisekile!—Isam. 21:​1-4.

16. Impilo izabe isinjani ngemva kweminyaka eyinkulungwane yokubusa kukaJesu?

¹⁶ Impilo izabe isinjani ngemva kweminyaka eyinkulungwane yokubusa kukaJesu? Abantu bayabe sebephelele bengaselasono. Kuyabe kungaselasidingo sokuthi abantu bacele ukuthethelelwa kusetshenziswa inhlawulo kaJesu futhi lomsebenzi kaJesu njengomphristi omkhulu uyabe usuphelile. Lesitha sokucina, ukufa okwabangelwa yikona kuka-Adamu kuyabe sekutshabalalisiwe. Amathuna azabe engaselabantu ngoba abafileyo bazavuswa. Wonke umuntu uzabe engaselasono.—1 Khor. 15:​25, 26.

17-18. (a) Kuzakwenzakalani ekupheleni kweminyaka eyinkulungwane? (b) UJesu uzakwenzani nxa eseqedile ukubusa? (1 Khor. 15:​24, 28) (Khangela lomfanekiso.)

¹⁷ Kuyini okunye okuzakwenzakala ekupheleni kweminyaka eyinkulungwane yokubusa kukaJesu? Ngalesosikhathi kulento eqakathekileyo ezakwenzakala. Akula ngitsho loyedwa ozasala ethandabuza ukuthi uJehova nguNkulunkulu ongcwele futhi owahlulela kuhle. Kungani sisitsho njalo? Khumbula ukuthi ensimini yase-Edeni uSathane wathi uJehova ungumqambimanga futhi kababusi kuhle abantu. Kusukela lapho bonke abathanda uJehova batshengise ukuthi bayayithanda indlela abusa ngayo futhi bayamsekela. Yikho ekupheleni kweminyaka eyinkulungwane yokubusa kukaKhristu ibizo likaJehova lizabe selingcweliswe ngokupheleleyo. UJehova uzabe esetshengisile ukuthi unguBaba olothando.

¹⁸ Wonke umuntu uzazibonela ukuthi okwakhulunywa nguSathane kungamanga aluhlaza tshoko. UJesu uzakwenzani nxa iminyaka eyinkulungwane yokubusa kwakhe isiphelile? Kambe ukuthi uzalingisela uSathane ahlamukele uJehova? Ngitsho lakancane! (Bala u-1 Khorinte 15:​24, 28.) UJesu uzabuyisela uMbuso kuYise njalo aqhubeke ezehlisa kuye. UJesu uzimisele ukunika uYise konke ngenxa yokuthi uyamthanda.

19. UJesu uzatshengisa njani ukuthi uyaliqakathekisa ibizo likaJehova?

¹⁹ Akumangalisi sibili ukuthi kungani uJehova wanika uJesu ibizo lakhe! Asisakuphumputhi ukuthi uJehova nguNkulunkulu onjani ngenxa yokuthi uJesu wakucacisa lokhu. UJesu watshengisa ukuthi uyaliqakathekisa ibizo likaNkulunkulu ukwedlula loba yini. Phela wayezimisele ukulifela futhi uzimisele ukubuyisela intambo kuJehova ekupheleni kweminyaka eyinkulungwane yokubusa kwakhe. Singamlingisela njani uJesu? Umbuzo lo uzaphendulwa esihlokweni esilandelayo.