U-1925​—⁠Iminyaka Engu-100 Eyadlulayo

ABABEKUKHANGELELE AKWENZAKALANGA

Abafundi beBhayibhili abanengi babekhangelele ukuthi ngo-1925 umhlaba uzakuba lipharadayisi. Kungani babekhangelele lokho? Umfowethu u-Albert Schroeder owacina eselilunga leQula Elikhokhelayo wathi: “Ngalesosikhathi kwakucatshangwa ukuthi amaKhristu agcotshiweyo ayesele emhlabeni ayezakuya ezulwini ukuze ayebusa loJesu, besekusithi amadoda ayethembekile njengo-Abrahama loDavida labanye wona abesevuswa abuse emhlabeni emele uMbuso kaNkulunkulu.” Njengoba umnyaka wawuqhubeka uhamba futhi kungenzakali lutho, abanye abafowethu labodadewethu badana.—Zaga. 13:12.

Lanxa kunjalo, abafundi beBhayibhili abanengi baqhubeka bekhuthele emsebenzini wokutshumayela. Baqalisa lokunanzelela ukuthi umsebenzi wokufakaza ngoJehova yiwo owawuqakatheke kakhulu. Khathesi asixoxeni ngokuthi babatshumayeza njani abantu besebenzisa umsakazo.

UKUTSHUMAYELA NGEREDIYO KUQHUBEKELA PHAMBILI

Ngo-1924 abafundi beBhayibhili babephumelele ukwakha isititshi serediyo okuthiwa yi-WBBR, kwazothi ngo-1925 bakha esinye isititshi serediyo eduze kweChicago e-Illinois. Umsakazo lo wawubizwa ngokuthi yiWORD okutsho ILIZWI. URalph Leffler umanjinela owasebenza ekwakheni isititshi lesi wathi: “Ngesikhathi somqando isititshi lesi sasizwakala ezindaweni ezikhatshana kakhulu.” Ngokwesibonelo eyinye imuli eyayihlala edolobheni okuthiwa yiPilot Station e-Alaska yalalela umsakazo lo. Lapho ababehlala khona kwakungaba ngamakhilomitha edlula angu-5 000 nxa usuka lapho okwakulesititshi lesi khona. Ngemva kokulalela umsakazo, imuli le yabhala incwadi ibonga labo ababesebenza esititshini lesi ngomsebenzi omkhulu ababewenza wokubakhuthaza ukuthi babemazi uNkulunkulu futhi babale leBhayibhili.

INqabayokulinda ka-1 December 1925 yakhuluma ngesititshi lesi yathi: “Isititshi okuthiwa yiWORD ngesinye sezititshi ezilamagagasi alamandla kakhulu e-United States. Abantu abahlala ekhunjini lolwande olusempumalanga lolusentshonalanga kwe-United States bayenelisa ukusibamba isititshi lesi. LabaseCuba kanye lalabo abakhonale khatshana enyakatho ye-Alaska bayasibamba. Abantu abanengi ababengakaze balizwe iqiniso, sebelizwile futhi sebelithanda ngenxa yokulalela umsakazo lo.”

Ngalesosikhathi abafundi beBhayibhili babedinga izindlela zokuthi batshumayele izindaba ezinhle ngomsakazo werediyo eCanada. Ngo-1924 kwakhiwa isititshi serediyo okwakuthiwa yiCHUC eSaskatoon eSaskatchewan. Isititshi lesi sasiphakathi kwezokuqala ezazisakaza izindaba ezimayelana leBhayibhili eCanada. Ngo-1925 inhlanganiso yathenga esinye isakhiwo esilendawo enkulu eSaskatoon ukuze kusakazelwe lapho.

Umsakazo lo wasebenza kakhulu ngoba abantu abanengi ababehlala endaweni ezikhatshana eSaskatchewan bezwa izindaba ezinhle okokuqala ngqa kuwo emsakazweni lo. Ngokwesibonelo, omunye umama okuthiwa nguMrs. Graham wabhala incwadi ecela amabhuku. Umfowethu uGeorge Naish wathi: “Umama lo wayewafuna ngabomvu sibili amabhuku yikho bahle bamthumezela imiqulu yonke yamabhuku athi Studies in the Scriptures.” Kungakayi ngaphi, uMrs Graham wayesetshumayela izindaba zoMbuso khonale khatshana.

UKUCHASISELWA IQINISO

INqabayokulinda ka-1 March 1925 yayilesihloko esiqakathekileyo esithi: “Ukuzalwa Kwesizwe.” Kungani isihloko leso sasiqakathekile? Abafundi beBhayibhili babekwazi ukuthi uSathane ulenhlanganiso yakhe ebunjwa ngamadimoni, inkolo yamanga, ezentengiselwano kanye lezombusazwe. “Inceku ethembekileyo lehlakaniphileyo” yasebenzisa isihloko lesi ukuze incede abafowethu labodadewethu bazwisise ukuthi uJehova ulayo inhlanganiso etshiyene kakhulu lekaSathane futhi ephikisana layo. (Mat. 24:45) Yacacisa lokuthi uMbuso kaNkulunkulu wasungulwa ngo-1914. Ngalowomnyaka kwaba lempi futhi uSathane lamadimoni akhe banqotshwa basebexotshwa ezulwini.—Isam. 12:​7-9.

Kwakunzima ukuthi abanye bakuzwisise lokhu, yikho esihlokweni lesi inceku ethembekileyo yabhala yathi: “Nxa bekhona ababala iNqabayokulinda le abangavumelani lalokho okutshiwo lapha, esikucelayo yikuthi baqhubeke bebekezela futhi bethembele kuJehova njalo baqhubeke bemsebenzela bethembekile.”

UTom Eyre, owayehlala eBritain futhi eliphayona wacacisa ukuthi abafundi beBhayibhili abanengi bathini ngesihloko leso, wathi: “Abafowethu bathaba kakhulu besizwa indlela uSambulo 12 ayecaciswe ngayo. Sathi sinanzelela ukuthi uMbuso wawusubekiwe ezulwini, satshiseka ekutsheleni abanye izindaba ezinhle. Isihloko leso senza sakhuthala emsebenzini wokutshumayela njalo sasinceda sabona ukuthi uJehova wayezakwenza izinto ezinengi ezimangalisayo phambili.”

UKUFAKAZELA UJEHOVA

Khathesi oFakazi bakaJehova bawajayele sibili amazwi aku-Isaya 43:10 athi: “‘Lingofakazi bami,’ kutsho uJehova, ‘Inceku yami engiyikhethileyo.’” Kungakafiki u-1925, umbhalo lo kwawungaxoxwa kangako ngawo emabhukwini ethu kodwa lokho kwatshintsha ngoba ngo-1925 iNqabazokulinda ezingu-11 zakhuluma kabanzi ngo-Isaya 43:​10, 12.

Ekupheleni kuka-August ngo-1925 abafundi beBhayibhili baba lomhlangano e-Indianapolis e-Indiana. Ehlelweni lomhlangano kwakulamazwi ayebhalwe ngumfowethu uJoseph F. Rutherford ayewabhalela ababeze emhlanganweni, ayesithi: “Silapha nje, silande ukuzoqiniswa yiNkosi. Lokhu kuzasinceda ukuthi nxa sesibuyela sifike sikhuthale emsebenzini wokutshumayela sesizimisele kakhulu ukufakazela iNkosi.” Umhlangano lo wathatha amalanga angu-8 futhi bonke ababekuwo bakhuthazwa ukuthi loba nini lapho okuvela khona ithuba bafakaze ngoJehova.

NgoMgqibelo mhlaka 29 August, umfowethu uRutherford wenza inkulumo eyayilesihloko esithi, “Asiwenzeni Umsebenzi.” Enkulumeni le wagcizelela ukuqakatheka kokutshumayela wathi: “UJehova uthi ebantwini bakhe: ‘Lingofakazi bami, mina nginguNkulunkulu.’ Wasephinda wabatshela lokho okwakumele bakwenze wathi : ‘Phakamiselani izizwe uphawu.’ Akula abanye abantu abangaphakamisela izizwe uphawu ngaphandle kwabantu bakaJehova ngoba yibo abalomoya weNkosi futhi bangofakazi bayo.”—Isaya. 43:12; 62:10.

Umfowethu uRutherford wathi eseyiqedile inkulumo yakhe, wabalela bonke ababesemhlanganweni lo amazwi ayelesihloko esithi “Umlayezo Wethemba.” Amazwi la ayegcizelela ukuthi uMbuso kaNkulunkulu yiwo kuphela ozakwenza kube lokuthula emhlabeni. Abantu babe lempilakahle, bavikeleke futhi bathokoze kuze kube nini lanini. Ngokuhamba kwesikhathi umlayezo lo wahunyutshwa ngezindimi ezinengi wasuphrintwa waba liphetshana. Kwadindwa amakhophi angaba ngu-40 miliyoni aphiwa abantu.

Lanxa abafundi beBhayibhili bengazange babizwe ngokuthi ngoFakazi bakaJehova ngalowomnyaka, baqhubeka befakaza ngoJehova.

UKUPHINDELA EBANTWINI ABAFUNA UKUFUNDA

Njengoba abafundi beBhayibhili babelokhu besiba banengi emhlabeni, bakhuthazwa ukuthi babuyele bayebona abantu ababefuna ukuzwa izindaba ezinhle. Bathi sebeqede umkhankaso wokunika abantu iphetshana elithi Umlayezo Wethemba, i-Bulletina yathi: “Hlelani ukubuyela ebantwini abaphiwa iphetshana elithi Umlayezo Wethemba kodwa abangazange baphiwe amanye amabhuku.”

I-Bulletin kaJanuary 1925 yayilombiko owakhulunywa ngomunye umfundi weBhayibhili owayehlala ePlano eTexas owawusithi: “Sesithole ukuthi nxa sitshumayela ezindaweni esike satshumayela kuzo kuba labantu abanengi abasilalelayo ukwedlula ezindaweni esiyabe siqalisa ukutshumayela kuzo. Ensimini yethu kuledolobho elincane osekutshunyayelwe kulo kahlanu eminyakeni engu-10 edlulileyo. Udade Hendrix lomama baphinde babuyela bayatshumayela endaweni lezo futhi batshiye amabhuku amanengi kakhulu ukwedlula ngaloba yisiphi isikhathi kuze kutshunyayelwe lapho.”

Elinye iphayona elaliselizweni lePanama labhala lathi: “Abantu abanengi ababengixotsha ezindlini zabo nxa ngizama ukubatshumayeza bengisithi nxa sengiphindela kubo okwesibili kumbe okwesithathu babe sebetshintshile. Umnyaka wonke lo ngiwuqede ngiphindela ebantwini esasike sabatshumayeza futhi abanengi babo bebengamukela kuhle kakhulu.”

UKULUNGISELELA UMNYAKA OLANDELAYO

Umfowethu uRutherford wabhalela wonke amaphayona incwadi ekhuluma ngomsebenzi owawenziwe ngo-1925, waphinda wakhuluma ngomsebenzi okwakumele wenziwe ngo-1926. Wabhala wathi: “Emnyakeni odlulileyo libe lesibusiso sokududuza abantu abanengi abakade bedanile futhi lokhu kwenze lathokoza kakhulu. Ngomnyaka ozayo lizaphinda libe lethuba lokufakaza ngoNkulunkulu langoMbuso wakhe lokutshengisa ukuthi lingabantu bakhe. Kwangathi singavungama ngelizwi eliphezulu, sihlabele sidumisa uNkulunkulu oyiNkosi yethu.”

Umnyaka ka-1925 wathi ususiyaphela abafowethu baqalisa ukwenza amalungiselelo okuqhelisa izakhiwo zenhlanganiso ezasiseBrooklyn. Ngo-1926 babezaqalisa umsebenzi omkhulu wokwakha owawungakaze wenziwe enhlanganisweni yethu.