Mungaitisa Kudini Kuti Muve Shamwari yo Cokwadi?
MAKAMBOJIZWA here kuti maidikana kurwisana no zvineso muri mega? Tiri kurarama ‘munguva jakaoma, jinonesa kurarama majiri’, jingatiita kuti tinyangajwe no kujizwa tiri tega. (2 Tim. 3:1) Ngokudalo, atidikani kurwisana no zvineso zvoupenyu tiri tega. Bhaibheri rinobhuya ngo kukosha kunoita shamwari jo cokwadi pakubesera pa “nguva yokutambujika”.—Zvi. 17:17.
SHAMWARI JO COKWADI JINGAMUBESESA KUDINI?
Kunyange mu postori Pauro paainga akasungwa mumba, wakakwanisa kuita basa lake lo kuparijira ngo besero lo cokwadi lo shamwari jake
Mu postori Pauro wakabesereka ngo shamwari jaaiinga najo paakavhakaca. (VaK. 4:7-11) Mu postori Pauro paakasungwa ku Roma, shamwari jake jakaita mabasa okuti Pauro wainga asingamakoni ari ega. Inga muezaniso, Epafrodhito wakapa Pauro zviro zvakatumirwa ngo hama no hanzvaji jo ku Firipi. (VaF. 4:18) Tikiko wakaenda koosiya tsamba ja Pauro kuungano jakasiana-siana. (VaK. 4:7; wonanyi masoko okujija.) Ngo besero lo shamwari jake, Pauro wakaparijira kunyange akasungwa no kuva mujere kunyange ari ega. Nyamasi uno, mungaitisa kudini kuti muve shamwari yo cokwadi?
Muezaniso jo mazuva ano, jinokhombija kukosha ko kuva no shamwari jo cokwadi. Wonanyi zvakaitika no hanzvaji iyi yakakhombija kuva shamwari ya Erizabheti, piyona wo nguva jese anogala ku Espanya. Amake Erizabheti povakabatwa ngo mawajo o kankro, hanzvaji iya yakatumira Erizabheti ma mensajhi okumuvangisa akavakirwa mu mavhesi o Bhaibheri. Erizabheti wakati: “Mavhesi aya, akandibesa kuti ndirwisane no zvineso zvo zuva ngo zuva,” “ndisikajizwi ndiri ndega.”—Zvi. 18:24.
Tingavangisa ushamwari wedu no hama ngo kuvabesa mabasa o ungano. Inga muezaniso, mungajipira kootola hama kana hanzvaji yaamusharuka kuti muende nayo kumusangano kana kooparijira? Nguva imweni, mukazviita munobesereka ngo kuvangisana komunonga mesiita. (VaR. 1:12) Makristu amweni, avakoni kubuda pa muzi. Ngo kudalo, tingaitisa kudini kuti tive shamwari yo cokwadi kovari?
IVANYI SHAMWARI YO COKWADI KUNA VAYA VASIKAKONI KUBUDA PA MUZI
Hama jimweni jino zvineso co utano no mugariro jimweni jinovaita kuti vasava pa musangano no vamweni. Wonanyi muezaniso wa hama Dhavhidhi, vakabatwa ngo marwajo anodaijwa kuti Lifoma. Wakapeja mweji mushanu na umwe vesilapwa. Pa nguva yese iyi yavainga vesilapwa, hama Dhavhidhi no mukaji wavo Ridhiya, vaizwa musangano vari ngo kanyi.
Shamwari javo jo muungano jakavabesesa kudini nguva jese paipera musangano, hama jimweni jainga jiri mu Nyumba yo Kunamatira jaiita zvese zvajinokona kuti jiverekete na hama Dhavhidhi no mukaji wavo Ridhiya vesishandisa foni. Mukuengejera, hama Dhavhidhi na Ridhiya pavaipa mupingulo pamusangano, vaiashira mensajhe jaivavangisa jaivha ku hama javo jo muungano. Ngaupi wakava muviyo? Hama Dhavhidhi na Ridhiya vainga vasikajizwi vari vega.
Batanijanyi vasikakoni kubuda pamuzi mubasa renyu lo kuparijira
Tingabatanijawo vaya vasikakoni kubuda pamuzi patinonga tesiparijira here? Patinocinja padoko ulongwa wedu, tinokhombija kuti atito kukanganwa vaya vononeseka vasikakoni kuita zvakawanda. (Zvi. 3:27) Madini kupsaka cinguva kuti muparijire navo mesishandisa foni kana tsamba? Vasikakoni kubuda pamuzi vangawonawo musangano wo basa lokooparijira vesishandisa foni. Hama Dhavhidhi na Ridhiya vakadakarira maningi ulongwa uwu. Hama Dhavhidhi vakati: “Kuva nocikwata cedu cokooparijira paiizwa cimusangano cidoko no mukumbiro zvaitivangisa.” Cimwenizve, kudai mugariro wenyu wesitendera madini kukoka mujiji wenyu wo Bhaibheri moenda naye kumupariji umweni asikakoni kubuda pamuzi moitisa cijijo munaye?
Patinoshanda no hama no hanzvaji jedu jisikakoni kubuda pamuzi, uye patinosotesesa undhu wavo unodakajisa tinolamba tesikula muno zvokunamata. Inga muezaniso, patinonga tino vapariji vaanouzivi mu basa lo kuparijira, patiwona vesinasa kushandisa soko la Mwari kuti vabaye mweyo wo mundhu, nguva jimweni tingajizwa tesida kugara tinavo. Pamunobesa hama no hanzvaji jenyu pa mabasa okunamata, vanozodakarira kuita shamwari jenyu.—2 VaK. 6:13.
Pauro wakawana nyalajo ngo kuva no shamwari yake Tito. (2 VaK. 7:5-7) Ciitiko ici, cinotijijisa kuti tinodikana kunyalajana haiwa basi kuzwira usizi valombo, asi kupeja nguva navo tesivabesa.—1 Joh. 3:18.
IVANYI SHAMWARI YO COKWADI PA NGUVA YO KUTEVERERWA
Hama no hanzvaji jedu jo kuRusiya, jakapa muezaniso wakanaka wokukhombijirana kubesana. Wonanyi zvakaitika na Sergey no mukaji wake Tatyana. Mu masure mokuti nyumba yavo yaseciwa ngo maphorisa, vakatorwa kuti vaende koovhunjurujwa. Tatyana ndiyena wakatanga kusunungurwa ohwirira kanyi. Sergey wakati: “Tatyana paakandoguma kanyi, hanzvaji imweni inocicunge yakaviya pamuzipo. Shamwari jakawanda jakaviya kuzotibesa kuti pamuzi pedu pasare pakalongeka.”
Sergey unotizve: “Nguva yese ndaidakarira bhuku la Zvirevo 17:17, panobhuya kuti: ‘Shamwari yo cokwadi inokhombija rudo nguva yese uye ihama yakaberekerwa kubesera pa nguva yo matambujiko.’ Magama aya akashanda maningi kandiri pa nguva yo ndainga ndisikakwanisi kurwisana no kutevererwa ndiri ndega. Jehovha wakaita kuti pave no shamwari jainga jakacunga kugara kudivi langu.”a
Patinosangana no mugariro jinonesa tinoda shamwari jinotibesa. Tinozonasa kujida maningi panguva yo kutambujika kukuru. Ngo kudalo, ngatiite zvese zvatinokona kuti tive shamwari jo cokwadi zvino!—1 Ped. 4:7, 8.
a Wonanyi mu saiti jw.org pamusolo unoti: “ Jehovha Wakaita Kuti Pave no Shamwari Jainga Jakacunga Kugara Kudivi Langu.”