Besanyi Vajiji Venyu vo Bhaibheri Kuti Vaite Cikhetwa co Kushandira Jehovha

1-2. (a) Ngenyi vajiji vamweni vo Bhaibheri vesilamba kutsigira cokwadi? (b) Tinozojijenyi mu cijijo cino?

YEMWI pano zvaimunesa kuti mutame kuva umwe wo Zvapupu zva Jehovha? Nguva imweni maitya vamunoshanda navo, shamwari jenyu kana vo pambhuri penyu ngo ndava yo kuva kenyu Capupu. Kana mailangarira kuti mainga musingazokoni kulalama maererano no zvinodiwa ndi Mwari. Kudai zvakadalo, yemwi mungava mundhu anosengerera kuvajiji venyu vo Bhaibheri vanokhombijaya kuti avadi kuita cikhetwa co kuva umwe wo Zvapupu zva Jehovha.

² Jesu waizviziva kuti kutya kakadai kaizoita kuti mundhu asakura muno zvo kunamata. (Mateu 13:20-22) Asi iyena aato kusiya kubesa vaya vainga vasingamuteveri. Pano kudalo, iyena wakakhombija vajiji vake kuti ungavabesesa kudini, (1) kuti vakwanise kuwona cineso cinovaita kuti vasahambira mberi pakunamata, (2) kuti vaengejere kuda kavanoita Jehovha, (3) vacinje kuti vakande zviro zvinokosha pakutanga uye (4) kuti vakone kunyisa zvineso zvavo. Tingashandisa kudini zvakabhuya Jesu patinonga tesishandisa bhuku la Raramanyi Nokusingaperi Mesidakala! patinonga tesibesa mujiji wo wedu wo Bhaibheri kuti aite cikhetwa co kushandira Jehovha?

BESANYI MUJIJI WENYU KUTI AWONE KUTI ZVICINYI ZVIRI KUITA KUTI ATAME KUSHANDIRA JEHOVHA

3. Zvicinyi zvakanesa kuti Nikodhemo ave mujiji wa Jesu?

³ Nikodhemo mutungimiriri uno mbiri wo Cijudha, wakasangana no cibingamupini kuti ave muteveri wa Jesu. Inoita inga mweji 6 basi pasure pokunge Jesu atanga basa lake, Nikodhemu wakaziva kuti Jesu wainga muemereri wa Mwari. (Johani 3:1, 2) Ngo kudalo, Nikodhemo wakakheta kusangana na Jesu mucivande ngo ndava “yo kutya vaJudha.” (Johani 7:13; 12:42) Iyena wakalangarira kuti waizorasikirwa ngo zvakawanda ngo kuva mujiji wa Jesu.a

4. Jesu wakabesesa kudini Nikodhemo kuti azwisise zvaidiwa ndi Mwari kuti iyena aite?

⁴ Nikodhemo waiziva mutemo, asi waida kubeswa kuti azwisise zvaisotererwa ndi Jehovha kaari. Jesu wakamubesesa kudini? Jesu waipawo vamweni nguva yake ngo kuenda koosangana na Nikodhemo no usiku. Uye Jesu wakabhuya zvakajeka zvaidikana kuizwa ndi Nikodhemo kuti ave mujiji wake paakati: Khauyai zvishaishi zvako ubhabhatijwe uye tendai Mwana wa Mwari.—Johani 3:5, 14-21.

5. Tingabesesa kudini mujiji wo Bhaibheri kuti azive zviri kumuita kuti asahambira mberi muno zvo kunamata?

⁵ Kunyange mujiji wo Bhaibheri esinasa kuziva mavhesi, ungada kubeswa kuti azive ciri kumuita kuti asahambira mberi. Basa lo kunyika kana kushorwa ngo mbhuri zvingamupausa pazvinangwa zvake zvokunamata. Ngo kudalo, zvipirenyi kuti mubesere mujiji wenyu. Yemwi mungamukoka kuti muende koomwa mese thii kana kuti kuhamba mese. Pamunoita zviri zvese pamwepo, mungabesa vajiji venyu vo Bhaibheri kuti vabhuye zvineso zvavo. Kurujiranyi mujiji wenyu wo Bhaibheri kuti aite cinjo jinodikana, haiwa kuti amudakajise, asi kuitira kukhombija rudo wake kuna Jehovha.

6. Tingabesesa kudini mujiji kuti ave no cicunge pakutsigira cokwadi? (1 VaKorinde 16:13)

⁶ Kudai mujiji wo Bhaibheri unothemba kuti Jehovha unozomubesa kulalama maererano no zvinobhuiwa ngo Bhaibheri, iyena unozova akacunga kushandisa zvaari kujija. (Verenganyi 1 VaKorinde 16:13.) Basa renyu ringaezaniswa no lo mujijisi wo cikola. Mesilangarira pomaijija kucikora, mujijisi upi wo maidakarira maningi? Nguva imweni wainga mujijisi wiya wakamubesa kuziva kuti munokwanisa kuita zviya zvamunodikana kuita. Mu njira yakatojana, mujijisi wo Bhaibheri wakanaka aajijisi basi zviya zvaanoda Mwari kuti tiite, asi unothembesa mujiji wake kuti ngo besero la Jehovha ungakona kuita nasiriro inodikana mu upenyu wake. Ungazviitisa kudini?

BESANYI MUJIJI WENYU KUTI AENGEJERE KUDA JEHOVHA

7. Jesu wakabesesa kudini vaimuyaeya kuti vaengejere rudo wavo kuna Jehovha?

⁷ Jesu waiziva kuti kuda Mwari kaizoita kuti vajiji vake vashandise zvavainga vajija. Waivajijisa zviro zvaizobesa vajiji vake kuti vaengejere kuda Baba wavo vo kudenga. Inga muezaniso, wakaezanisa Jehovha inga baba vanopa mwana wavo zviro zvakanaka. (Mateu 7:9-11) Vateveri vamweni va Jesu, nguva jimweni vainga vasina baba vano rudo wakadai. Langariranyi kuti vakazwa kudini apo Jesu wakapa muezaniso wa baba vano usizi avo vakaashira mwana wainga apanduka. Vaikona kuwona unyasha wa Jehovha ku vana vake vo panyika.—Ruka 15:20-24.

8. Tingabesesa kudini mujiji wedu wo Bhaibheri kuti avangise ushamwari wake kuna Jehovha?

⁸ Na yemwiwo munokonawo kubesa mujiji wenyu wo Bhaibheri kuti aengejere kuda kake Jehovha ngo ku mujijisa mugariro ja Mwari. Mukati mo cijijo cimwe nga cimwe, mubesenyi kuti abatanije zvaari kujija uye no rudo la Jehovha. Pamunobhuya ngo pamusolo po muripo, mubesenyu kuwona kuti muripo unoshanda kudini kaari. (VaR. 5:8; 1 Joh. 4:10) Zvingaita kuti mujiji angazwa kuda Jehovha, paanolangarija ngo zvo rudo la Jehovha kaari inga mundhu ega.—VaG. 2:20.

9. Zvicinyi zvakabesa mwanarume umweni unodanijwa Michael kuti acinje mararamire ake?

⁹ Ambolangariranyi basi ngo zva Mishaeri wo ku Indoneziya. Iyena wakarerwa mu mbhuri yainga iri mucokwadi asi aato kubhabhatijwa. Paainga no makore 18, wakaenda nyika jo kunja kooshanda inga mucovhi wo kamiyau. Pakuhamba ko nguva wakazocata, asi pasure pazvo wakazosiya mbhuri yake kuti aenderere mberi esishanda kunja ko nyika. Pa nguva iyi, mukaji wake no mwana wake wo musikane vakatanga kujija Bhaibheri uye vakahambira mberi. Pasure po kufa kaamake, Mishaeri wakakheta kuhwirira kumuzi kuti angwarire abake uye wakatendera kujija Bhaibheri. Paaijija pa divi lakazwi: “Jijanyi Zvizinji” mucijijo 27 co bhuku Raramanyi Nokungaperi Mesidakala!, Mishaeri wakanasa kubatwa-batwa ngo cijijo ici. Paakalangarijisisa kuti Jehovha wakazwa kudini paakawona mwana wake esitambujika Mishaeri wakacema maningi. Wakatanga kubonga maningi muripo kunyange zvakamuita kuti acinje mararamire ake ngo kuva anobhabhatijwa.

BESANYI MUJIJI WENYU WO BHAIBHERI KUTI AKANDE ZVIRO ZVINOKOSHA PAKUTANGA

10. Jesu wakabesesa kudini vajiji vake vo pakutanga kuti vanasirise zviro zvavo zvinokosha? (Ruka 5:5-11) (Wonanyi foto.)

¹⁰ Vajiji vo kutanga vakakasika kuziva Jesu inga Mesiya wakagondeswa, asi vaida besero kuti vakande pakutanga basa lo kuparijira. Pedhru na Andreya vainga vaavajiji apo Jesu paakavakoka kuti vamutevere. (Mateu 4:18, 19) Ivona vaibatanijwa mubhisimusi lo kuveja hove laibudirira, zvakajeka kuti raibatanija Jakobe na Johani. (Mako 1:16-20) Pedhru na Andreya “povakasiya majuya avo,” nguva imweni ivona vakaita ulongwa kuti vasapote mbhuri javo povainga vesitevera Jesu. Icinyi cakaita kuti vanasirise zviro zvavainyanya kukoshesa? Ndholovondho iri muna Ruka inotivhunja kuti Jesu wakaita cishamiso cakavangisa kuthemba kavo undhu wa Jehovha wo rupo.—Verenganyi Ruka 5:5-11.

11. Tingashandisa kudini zviro zvakaitika katiri kamare kuti tivangise kutenda ko vajiji vedu?

¹¹ Yesu atikoni kuita zvishamiso, inga zvakaizwa ndi Jesu asi tinokona kuvhunjawo vamweni ngo pamusolo pokuti Jehovha unobesesa kudini vaya vanomukanda pakutanga mu upenyu wavo. Inga muezaniso, munoejurira here kuti Jehovha wakamubesesa kudini pamakatanga kupinda musangano? Nguva jimweni, yemwi mungada kubhuisana na patarau kuti mumujekesera kuti ngenyi musingasakwanisi kushanda kupindirija nguva, kudai izvi zvesimunesa kuti mupinde musangano. Inga zvamunovhunja vajiji venyu zvakaitika kamuri, kusanangura kuti kutenda kenyu kakavangiswa kudini ngo kuwona kuti Jehovha uri kutsigira kudini cikhetwa cenyu cokuita kuti kunamata Jehovha kuve pakutanga.

12. (a) Ngenyi tesidikana kukoka vapariji vakasiyana-siyana kuenda ku cijijo cedu? (b) Mungashandisa kudini mavhidhiyo pa kujijisa vajiji venyu? Ipanyi muezaniso.

¹² Mujiji wenyu unobeserekawo ngo kuzwa kuti vaKristu vamweni vakanasirisa kudini zviro zvavo kuti vakande zviro zvinokosha pakutanga. Ngo kudalo, kokanyi vamunonamata navo vanovha mu ndau jakasiyana-siyana kuti vabatane nemwi pakujijisa mujiji wenyu wo Bhaibheri. Vakumbirenyi kuti vasanangure kuti vakapindisa kudini mucokwadi uye zvavakaita kuti basa la Jehovha rive ciro co kutanga mu upenyu wavo. Mukuengejera, toranyi nguva no mujiji wenyu mesiwona mavhidhiyo ari padivi rinoti: “Jijanyi Zvizinji” kana kuti “Jijanyi zvimweni” mu bhuku la Raramanyi Nokusingaperi Mesidakala!. Inga muezaniso, pakubhuisana pacijijo 37, mungavangisa fundo rinovha mu vhidhiyo inoti: Jehovha Unotipa Zvese Zvatinoda Kuti Tirarame.

BESANYI MUJIJI WENYU KUTI UNGAITENYI PAANOSANGANA NO MATAMBUJIKO

13. Jesu wakanasirira kudini vajiji vake kuitira pavaizoshorwa?

¹³ Jesu wakavhunjazve vateveri vake kuti vaizoshorwa ngo vandhu vamweni kunyange hama javo jo kunyama kamare. (Mateu 5:11; 10:22, 36) Jesu paainga aaphedo no kufa, iyena wakangwaja vajiji vake kuti nguva jimweni vangazoulaiwa ngokuti vanonamata Jehovha. (Mateu 24:9; Johani 15:20; 16:2) Wakavapa zano lokuti asanesana no vanovashora uye kuti vave vakangwara kuti valambe vesiparijira.

14. Tingabesesa kudini mujiji kuti ave akanasiririka paanozoshorwa? (2 Timoti 3:12)

¹⁴ Tingabesa vajiji vedu kuti vave vakanasiririka kushorwa tesivasanangurira zvavanodikana kusoterera kuvha kushamwari javo jo kubasa no hama javo. (Verenganyi 2 Timoti 3:12.) Vamweni vavanoshanda navo vangaseka mararamiro avo mapsa. Nguva imweni, hama javo jo kunyama kamare jingavashora ngo zvitendwa zvavo zvakavakirwa mu Bhaibheri. Patinokasika kunasirira mujiji wedu kuti arwisane no kushorwa, iyena anozova akanasiririka kudai izvi zvikazoitika.

15. Icinyi cinozobesa mujiji paya paanozosangana no kushorwa ngo vo pambhuri?

¹⁵ Ngo ndava yo kushorwa ngo mbhuri, kurujiranyi mujiji wenyu ngo pamusolo pokuti hama jake ngenyi jesinyangajwa. Nguva imweni ivona vanolangarira kuti iyena wakatsauswa kana kuti Zvapupu zva Jehovha, vandhu vanoita zvakashata. Kunyange Jesu wakabatanawo no kushorwa ngo vandhu vaaida kamare. (Mako 3:21; Johani 7:5) Jijisanyi vajiji venyu vo Bhaibheri kuti valambe vesisengerera uye vesingwarira vamweni kubatanijawo vo mu mbhuri mavo.

16. Tingabesa kudini mujiji wo Bhaibheri kuti abhuye no vamweni ngo zvaanotenda akangwarira?

¹⁶ Kudai hama jo kunyama jingakhombija kudakarira, mujiji wakangwara unokheta kutama kusanangura zvese pa nguva imweyo. Mukatama kuita kudalo, hama jenyu jinodiwa jingazwa jakawandirwa ngo masoko uye pakupejisira ivona vangada kucinja mabhuyo. Ngo kudalo, kurujiranyi mujiji wenyu kuti avhunje vamweni zvaanotenda ngo gwanja rinoita kuti avhure mukana pa mabhuyo anotevera. (VaK. 4:6) Dangani ungakoka vo mbhuri yake kuti avhakacire saiti jw.org. Izvi zvingaita kuti vajije zvakawanda ngo pamusolo po Zvapupu zva Jehovha padoko ngo padoko.

17. Mungabesesa kudini mujiji wenyu wo Bhaibheri kuti arwisane no maonero akashata o vamweni ngo pamusolo po Zvapupu zva Jehovha? (Wonanyi foto.)

¹⁷ Yemwi mungashandisa munda-nda-nda uri musaiti jw.org, wakazwi: “Muvhunjo Inonyanya Kuvhunjiswa ngo Pamusolo po Zvapupu zva Jehovha” kuitira kubesa mujiji wenyu kuti anasirire mupingulo jakareruka jingaizwa ngo hama jake kana shamwari jake jo kubasa. (2 Tim. 2:24, 25) Pese pamunopeja cijijo wonanyi divi rinoti: “Vamweni Vanoti” lo bhuku la Raramanyi Nokusingaperi Mesidakala!. Jijisanyi mujiji wenyu kuti ajijire kudavira muvhunjo ngo magama ake kamare. Musakaya-kaya kumupa mazano ngo pamusolo po kuitisa nane mupingulo jake. Mativi aya anoshanda anozomubesa kujivirira kutenda kake no kuthemba kese.

18. Yemwi mungavangisa kudini mujiji wenyu wo Bhaibheri kuti avhunjewo vamweni zvaanotenda mu basa lo kuparijira? (Mateu 10:27)

¹⁸ Jesu wakavangisa vajiji vake kuti ajijise masoko akanaka pakawanda vandhu. (Verenganyi Mateu 10:27.) Mujiji paanokasika kuvhunja vamweni ngo pamusolo po zvaanotenda, iyena unozokasika kujijira kuthemba Jehovha. Mungabesa kudini mujiji wenyu kuti ave no cinangwa ici? Panoziviswa mu shandira pamwe wo basa lo kuparijira mu ungano yenyu, muvangisenyi kuti alangarire kuti zvicinyi zvaangaita kuti ave mupariji. Muvhunjenyi kuti ngenyi vakawanda vanorerukirwa ngo kutanga kuparijira mu nguva yo mushandira pamwe. Unokona kubeswa kuti abhuye pakawanda vandhu ngo zvinojijiswa pamativi o musangano wo pakati po vhiki. Paanonga esieja kuti akwanise kuita zvakanaka mativi, iyena unozojijira kunasa kusanangura zvaanotenda.

KHOMBIJANYI KUTI YEMWI MUNO COKWADI COKUTI MUJIJI WENYU UNODA KUITA ZVINODAKAJISA JEHOVHA

19. Jesu wakakhombijisa kudini kuti waithemba vajiji vake uye yesu tingatevejeresa kudini muezaniso wake?

¹⁹ Asati ahwirira kudenga Jesu wakavhunja vajiji vake kuti waizosangana navo. Ivona avato kuzwisisa kuti Jesu waibhuya ngo pamusolo pokuhwirira kake kudenga. Kunyange zvakadalo, iyena wakabatikana pakuthembeka kavo husiripi kutama kavo kuva no cokwadi. (Johani 14:1-5, 8) Iyena waiziva kuti paida nguva yokuti vazwisise zviro zvimweni zvakadai inga soterero yo kurarama kudenga. (Johani 16:12) Yesu tingakhombija kuti tinothemba zviito zvo mujiji wedu zvo kudakaja Jehovha.

20. Hanzvaji imweni yo Malawe yakakhombjisa kudini kuti yaithemba mujiji wayo?

²⁰ Ngatilambe tesithemba kuti mujiji wedu unoda kuita zviro zvakanaka. Wonanyi muezaniso wa hanzvaji Chifundo, vo Malawi. Ivona vakatanga cijijo co Bhaibheri vesishandisa bhuku la Raramanyi Nokusingaperi Mesidakala! no musikane umweni wo Katolika unodanijwa Alinafe. Povakapeja cijijo 14, hanzvaji Chifundo vakavhunjisa mujiji wavo kuti waiwona kudini ngo kushandiswa ko mufananijo pakunamata. Alinafe wakanyangajwa uye wakati: “Ici cikhetwa co mundhu ega!” Hanzvaji Chifundo vailangarira kuti nguva jimweni kaizova kupera ko jijo. Asi ivona ngo kusengerera kese vakalamba vesijija na Alinafe, vesiemera kuti iyena ngo kuhamba ko nguva unozozwisisa fundo. Pa mweji jakazotevera, hanzvaji Chifundo vakazomuita muvhunjo jiri pa cijijo 34 unoti: “Kujija ko wakaita Bhaibheri uye ngo pamusolo pa Mwari wo cokwadi Jehovha kakakubesa kudini mbhera zvino?” Hanzvaji Chifundo vanobhuya madavirire akaita Alinafe vesiti: “Iyena wakasanangura zviro zvakawanda zvinoshamisa uye cimwe cakona ngocokuti Zvapupu zva Jehovha azviiti zviro zvinolambijwa ngo Bhaibheri.” Ngo kukasika, Alinafe wakaema kushandisa mufananijo uye wakaguma pakubhabhatijwa.

21. Tingavangisa kudini cido co mujiji wedu kuti atsigire cokwadi?

²¹ Kunyange kuti ndi Jehovha “unoita kuti zvikure,” yesu tinomutwaro wo kubesa vajiji vedu vo Bhaibheri kuti vaenderere mberi pakunamata. (1 VaK. 3:7) Tinoita zvakawanda kudarika ku mujijisa basi zvinodiwa ndi Mwari kuti aite. Yesu tinomubesa kuti ave no rudo lakakura kuna Jehovha. Uyewo tinomuvangisa kuti akhombije rudo lake pakunasirira zviro zvaanokoshesa. Uye yesu tingamujijisa kuthemba Jehovha paanosangana no zvineso. Patinokhombija kumuthemba, tinovangisa kuthemba kake kuti ungakwanisawo kurarama maererano no mutemo ja Jehovha uye oita cikhetwa co kulamba akavanga mucokwadi.