Lambanyi Mujimu wo Kuzvida wo Nyika Ino

Makamboona here kuti mu nyika ino, vandhu vakawanda vanolangarira kuti vano citenderwa co kuwana makomborero akanaka kana kuti kulapwa zvakanaka? Azvinenyi kuti vanoashira mare yakadini, vanotenda kuti vakafaneiwa ngo zvakawanda maningi. Mulangariro uwu unovha pamaitiro okuzvida no wokurega kubonga, izvi zvinokhombija kuti tiri mu mumazuva okupejisira.—2 Tim. 3:2.

Zvakajeka kuti mujimu wo kuzvida asipi mupsa. Adhamu na Evha, vakazvikhetera vega zvakanaka no zvakashata no muviyo jakashata. Mu makore akatevera, Mambo Uziya wo ku Judha wakalangarira kuti wainga no citenderwa co kupisira rusenzi asi waizvinyepera. (2 Mk. 26:18, 19) Mukutojanawo, Vafarisi no Vasadhusi vailangarira kuti vainga no citenderwa ca Mwari ngokuti vainga mubarirwana wa Abhirahama.—Mateu 3:9.

Takatendenejwa ngo vandhu vano zvida uye maitire avo angatipsasawo. (VaG. 5:26) Tingalangarira kuti tino citenderwa cokuashira makomborero akanaka no kulapwa zvakanaka. Tingaitenyi kuti tisava no malangarire akadai? Pakutanga, tinodikana kuzwisisa mawonero a Jehovha ngo pamusolo po shwiroyo. Ndhungamiriro mbiri jo Bhaibheri jingatibesa.

Jehovha unobhuya zvatinodikana kuashira. Wonanyi muezaniso munganani.

• Mu mbhuri, mwamuna unoda kuzwa esireremejwa ngo mukaji wake uye mukaji unoda kuzwa esidiwa ngo mwamuna wake. (VaE. 5:33) Varovorani vanodikana kuashira rudo lo mukaji no mwamuna no wo vakarovorana naye basi. (1 VaK. 7:3) Vabereki vano citenderwa cokuti vana vavo vavazwire uye vana vanodikana kuashira rudo lakakwana no besero lo vabereki vavo.—2 VaK. 12:14; VaE. 6:2.

• Jehovha wakabhuya kuti vakuru vo ungano vanodikana kuashira nderemejo ngo kushanda kavanoita ngo simba. (1 VaT. 5:12) Ngo kudalo, ivona avana citenderwa cokundzvinyirira hama no hanzvaji javo.—1 Ped. 5:2, 3.

• Mwari wakapa citenderwa utongi wo nyika kuti vaashire musoho uye kureremejwa.—VaR. 13:1, 6, 7.

Ngo rudo wese Jehovha unotipa zvakawanda kudarika zvatifaneya. Ngo ndava yazvo, ngo kubarwa tiri vashaishi taifaneya kufa. (VaR. 6:23) Ngo kudalo, Jehovha unotipa makomborero akawanda ngo ndava yo rudo wake wo cokwadi katiri. (Ps. 103:10, 11) Isusu tinoashira makomborero, ngo ndava yo unyasha wake usito kufaneya.—VaR. 12:6-8; VaE. 2:8.

TINGAITENYI KUTI TISASAKURIRA MUGARIRO WO MUJIMU WO KUZVIDA?

Ngwariranyi maitiro onyika. Tisingazviwoni, tingatanga kulangarira kuti tinokosha maningi kudarika vamweni. Jesu wakakhombija kuti mulangariro uwu unoviisa kudini, esishandisa muezaniso wo vashandi vakaashira dhinari. Vashandi vakatakatira vesishanda zuva resipisa, asi vashandi vamweni vakashanda ko nguva imwe basi. Vashandi vakatangaya kushanda, vakabhuya kuti vakafeneya kuashira mare yakawanda ngo ndava yo basa lo vainga vaita. (Mateu 20:1-16) Esishandisa muezaniso uwu, Jesu wakakhombija kuti vateveri vake vanodikana kugutsikana ngozvo vanopuwa ndi Mwari.

Ivanyi mundhu anobonga haiwa asingagutsikani. (1 VaT. 5:18) Tevejeranyi mupostori Pauro, iyena aato kukumbira zvokurarama ndizvona ku hama jo ku Korinde kunyange wainga no citenderwa cokuzviita. (1 VaK. 9:11-14) Tinodikana kubonga ngo makomborero otinoashira uye tisava no mujimu wo kutama kugutsikana.

Ivanyi vanozvidodokesa. Mundhu paanozvilangarira pacake, kakawanda unotanga kulangarira kuti uno citenderwa cokuwana zvakawanda kudarika zvaanazvo. Kuzvidodokesa mutombo wokuti tisava no mulangariro uwu unokhuvaza.

Mu porofita Dhanyeri wakapa muezaniso wakanaka wo kukhombija kuzvidodokesa. Mu mbhuri yaakavha, ciemo cake cakanaka, uzivi wake, zvaaikwanisa kuita uye no makomborero aakaashira, zvaizomuita kuti alangarire kuti waifaneya kubathwa zvakanaka kudarika vamweni. (Dha. 1:3, 4, 19, 20) Ngo kudalo, Dhanyeri wakalamba esizvidodokesa uye vara iri lakava rinokosha kuna Jehovha.—Dha. 2:30; 10:11, 12.

Ngativhise mujimu wo kuzvida no kuzvikuja wakapararira mu nyika mazuva ano. Kunja ka izvi, ngatirambe tesigutsikana ngo makomboreero atimnopuwa ndi Jehovha ngo ndava yo unyasha wake watisito kufaneya.