Kuva no Ushamwari Wakavanga no Hama no hanzvaji Jedu Kakanakira Yesu!

1-2. Ngacipi ciro co zviro zvinokosha maningi kuna Jehovha uye iyena unotivangisa kuti tiitenyi?

MAKAMBOEMA here molangarira kuti ciro co zviro zvinokosha maningi kuna Jehovha injira yatinobata ndiyona vamweni. Jesu wakatijijisa kuti tinodikana kuda umweni wedu inga madire atinozviita. (Mateu 22:37-39) Izvi zvinobatanija kuva no usizi kunyange vaya vasikanamati Jehovha. Patinoita kudalo, tinonga tesitevejera Mwari wedu uwo unoita kuti ‘zuva lake ribudire vanoita zvakashata no vanoita zvakanaka uye unoita kuti kunaye kuno vakarurama no vasito kururama.’—Mateu 5:45.

² Jehovha unoda vandhu vese asi uno rudo wakakura na vaya vanoita zvakarurama. (Johani 14:21) Iyena unoda kuti timutevejere. Ngo kudalo, unotikurujira kuti tive no “rudo ukuru” uye kuti tivakhombijire ‘rudo wo ukama.’ (1 Ped. 4:8; VaR. 12:10) Masoko aya anobhuya mukhaindi wo rudo watinokhombija kuna umwe wo mumbhuri medu kana kuti shamwari yo phedo.

3. Ngazvipi zvatinodikana kulangarira ngo pamuslo po rudo?

³ Rudo lakatojana no zvirimwa zvinoda kusakurirwa kuti zvikure. Mu postori Pauro wakapa zano iri ku vaKristu: ‘Galanyi mesidisana inga hama.’ (VaH. 13:1) Jehovha unoda kuti kuda katinoita hama no hanzvaji jedu kulambe kesikura. Mu cijijo cino tinozobhuisana kuti ngenyi zvesidikana kuvangisa ushamwari wedu no hama no hanzvaji jedu uye kuti tingaitisa kudini kuti tilambe tesidalo.

NGENYI TESIDIKANA KUVANGISA USHAMWARI WEDU NO HAMA NO HANZVAJI JEDU

4. Inga zvakanyorwa pana Pisarema 133:1, ngazvipi zvatingaita kuti tireremeje kubatana kotakaita no hama no hanzvaji jedu? (Wonanyi foto.)

⁴ Verenganyi Pisarema 133:1. Tinotenderana no munyori wo pisarema uwo wakati: ‘Zvakanaka’ uye ‘zvinodakaja’ kushamwarijana na vaya vanonamata Jehovha. Asi pano ngozi, ambolangariranyi mundhu unodarika pa mumbuti wakakura no kuseja mazuva ese, ngo kuhamba ko nguva angazoregera kukoshesa kuseja ko mumbhuti uwu. Mukutojanawo tiri pamwepo no hama no hanzvaji jedu kakawanda pavhiki, ngo kudalo tingapejisira tisingasakoshesi kubatana kotakaita navo. Tingaitenyi kuti izvi zvisaitika? Rudo latinaro ku hama no hanzvaji jedu rinokura kudai tikawana nguva yo kulangarira ngo kukosha kuna umwe na umwe wavo mu ungano uye katiri.

5. Ngazvipi zvingaitika vandhu vakatiwona tesikhombijirana rudo?

⁵ Vaya vanopinda musangano jedu kokutanga vanoemurira maningi rudo ratinaro kuna umwe no umweni. Zvonazvo nguva jimweni zvinokwana kuti vagume pakuziva kuti tiri maKristu o cokwadi. Jesu pacake wakati: ‘Mukaita kudalo vese vanozoziva kuti imwimwi muri vajiji vangu kudai mukadisana ngo cenyu.’ (Johani 13:35) Ambolangariranyi ngo muezaniso wa Chaita mujiji umweni wo pa univhersidhadhe waijija Bhaibheri no Zvapupu zva Jehovha. Iyena wakatenda mukoka kuti aende koona gungano. Pasure po zuva lo kutanga wakavhunja mujijisi wake kuti: “Vabereki vangu avato kumbondikumbatira. Asi pa gungano renyu ndakakumbatirwa ngo vandhu 52 pa zuva rimwe basi! Ndakazwa rudo la Jehovha kuvha ku hama no hanzvaji uye ndinoda kuva pakati po mbhuri iyi.” Chaita wakaenderera mberi esijija uye wakabhabhatijwa mu gore la 2024. Izvi zvinokhombija kuti kakawanda vandhu vanodakarira pavanoona mabasa edu akanaka kubatanija rudo ravanoona pakati pedu izvi zvinoita kuti vade kunamata Jehovha.—Mateu 5:16.

6. Ushamwari wakavanga no hama no hanzvaji jedu ungatingwaririsa kudini?

⁶ Kuva no ushamwari wakavanga no hama no hanzvaji jedu kunotijivirira. Pauro wakapa zano iri ku vaKristu: ‘Lambanyi mesivangisana zuva ngo zuva . . . kuti patamike na umwe wenyu anonyiswa ngo simba lo cishaishi.’ (VaH. 3:13) Nguva jimweni tinozvirhya mweyo zvokuti tinotanga kusiya kunamata Jehovha asi tingakona kuwona izvi uye Jehovha ungakwanisa kushandisa hama kuti itibese. (Ps. 73:2, 17, 23) Ngozvo cokwadi kuti kubeswa kakadai no kukurujirwa kakanaka maningi katiri.

7. Rudo ungatibesesa kudini kuti tilambe takabatana? (VaKorose 3:13, 14)

⁷ Tiri vandhu vanokhombija rudo kuno umwe na umwe wedu, zviro izvi zvinotiivisiira makomborero akawanda. (1 Joh. 4:11) Inga muezaniso, rudo rinotibesa kuti ‘tilambe tesizwisisana kuna umwe nga umwe wedu’ uye izvi zvinozoita kuti tibatane pakati pedu. (Verenganyi VaKorose 3:13, 14; VaE. 4:2-6) Rudo no runyararo latinaro pamusangano jedu zvinoita kuti tisiyane no vamweni, apana sangano rimweni pasi pano rinokona kuita izvi.

KUJANYI VAMWENI

8. Jehovha unotibesesa kudini kuti tilambe takabatana?

⁸ Kubatana kuripo ko hama no hanzvaji cishamaiso cinovha kuna Jehovha. Ngokuti tese tino cishaishi. (1 VaK. 12:25) Bhaibheri rinobhuya kuti: ‘Tinojijiswa ndi Mwari kudanana.’ (1 VaT. 4:9) Mu soko lake, Jehovha unotivhunja zvatinodikana kuita kuti tive no ukama wakavanga nguva jese na umwe nga umwe wedu. Asi kuti “tijijiswe ndi Mwari” tinodikana kujija zvaanobhuya uye tozvishandisa. (VaH. 4:12; Jak. 1:25) Izvi ndizvona zvinovangisirwa kuizwa ngo Zvapupu zva Jehovha.

9. Ngazvipi zvatajija pana VaRoma 12:9-13 ngo pamusolo po kukuja umwe kuno umweni?

⁹ Bhabheri rinotijijisa kudini kuti tive no ushamwari wakavanga kuna umwe nga umwe wedu? Inga muezaniso, ambolangariranyi ngo zvakabhuiwa ndi Pauro pana VaRoma 12:9-13. (Verenganyi.) Fundo rinokosha riri mu masoko a Pauro ngo lokuti: ‘Tinodikana kutanga kukuja vamweni.’ Izvi zvinobhuyenyi? Izvi zvinobatanija kutanga kukhombija ‘mazwiro omukati’ kana rudo ku hama no hanzvaji jedu, mungakwanisa kuita izvi mu njira jakasiyana-siyana zvakadai inga kuregerera, kuva no usizi uye kuva vanokova. (VaE. 4:32) Amudikani kuemera kuti hama iviye kamuri. Pano kudalo madini “kutanga” kubhuya navo. Mukaita kudalo munozowona kuti Jesu wakabhuya masoko o cokwadi paakati: ‘Kupa kuno mudakalo kupinda kuashira.’—Mabasa 20:35.

10. Tingazviitisa kudini kuti: “Tireremeje vamweni”? (Wonanyi foto.)

¹⁰ Ngo njira yakanaka, pasure pokubhuya ngo kutanga kukuja vamweni Pauro wakati: ‘Ivanyi vanovangisira haiwa vano umbwa.’ Mundhu unovangisira unozvipira, unoreremeja maningi mabasa aanopuwa uye unoshanda ngo simba kuti amazajise. Zvirevo 3:27, 28 inotikurujira kuti: ‘Musaregera kuita zvakanaka kumundhu unoda besero kudai mesikwanisa kuzviita.’ Ngo kudalo kudai tikaziva kuti pano mundhu unoda besero tinodikana kumubesa ngo kukasika. Atizvisiiri nguva imweni kana kuti atizvisiiriwo vandhu vamweni kuti vazozviita.—1 Joh. 3:17, 18.

11. Ngaipi njira imweni yo kureremeja hama no hanzvaji jedu?

¹¹ Njira imweni yo kukuja hama no hanzvaji jedu, ngoyokutama kunonoka kuregerera pajinotishaishira. VaEfeso 4:26 inoti: ‘Musasiya kuti zuva rivire makanyangajwa.’ Ngenyi izvi zvesikosha? Inga zvinobhuya vhesi 27 Izvi zvingaita kuti ‘tipe ndau sathana.’ Tinoziva kuti musoko lake, Jehovha unokurujira kakawanda kuti tiregererane. VaKorose 3:13 inobhuya kuti tinodikana ‘kulamba . . . tesiregererana ngo mweyo wese.’ Kuregerera mundhu pano zvaanotishaishira nga imwe njira yo kuvangisa ushamwari wedu naye. Patinoita izvi zvinotibesa kuti ‘tilambe takabatana mu cisungo co runyararo.’ (VaE. 4:3) Fundo ngo lokuti kutanga kunokosha maningi kuvanamati va Jehovha kuti vadanane uye kuti vave no runyararo.

12. Jehovha unotibesesa kudini kuti tiregerere vamweni?

¹² Icokwadi kuti azvito kureruka kuregerera mundhu akatishaishira. Asi izvi tinozvikona tesibeswa ngo mweya mupsene wa Mwari. Pasure pokutikurujira izvi kuti ‘tinodikana kuva no usizi kuna umwe na umwe wedu’ uye “kuvangisira,” Bhaibheri rinobhuya kuti: ‘Vangisiranyi muno zvo kunamata.’ Soko iri lokuti ‘kuvangisira’ rinotipa mulangariro wokuti: “Tinodikana kushanda ngo simba uye kuvangisira kuita zviro zvo kunamata. (Wonanyi masoko okujija ari pana VaRoma 12:11.) Izvi zvinobhuya kuti mweya wa Mwari unokona kutibesa kuti tikhombije rudo ku hama no hanzvaji jedu uye kujiregerera zvesivha mu mweyo. Kuti tiite izvi tinodikana kukumbira besero la Jehovha.—Ruka 11:13.

“APADIKANI KUVA NO KUPARAJANA PAKATI PENYU”

13. Icinyi cingaita kuti tirege kubatana mu ungano?

¹³ Mu sangano la Jehovha tinowona vandhu “vo majinja ese” umwe nga umwe wedu vakarerwa zvakasiya no zvo umweni. (1 Tim. 2:3, 4) Uye zvatakasangana nazvo mu upenyu azvito kutojana izvi zvinokhombija kuti nguva jimweni tingaita zvikhetwa zvakasiyana azvinenyi kuti taita zvikhetwa zvo mundhu ega zvakadai inga patinokheta zvo kusimira, wokulovorana naye, valaijo uye kukheta marapirwo atinoda kuizwa kudai tikatama kungwarira kusiyana uku, izvi zvinokona kutanga kuita kuti ungano itange kuparajana. (VaR. 14:4; 1 VaK. 1:10) Asi Jehovha unotijijisa kuti: ‘Tidanane kuna umwe no umweni,’ uye tinodikana kungwarira kuti zvikhetwa zvedu zvisaita inga zvakanaka maningi kudarika zvovamweni.—VaF. 2:3.

14. Ngacipi catinodikana kuvangisira kuita nguva yese uye ngenyi?

¹⁴ Nesuwo tinokona kuita kuti ungano ibatane ngokuita zviro zvinokurujira vamweni nguva jese. (1 VaT. 5:11) Mu nguva jakadarika vandhu vakawanda vainga vasingasaiti mabasa kana kuti vainga vakavhiswa mu ungano vakahwirirazve mu ungano. Isusu takavaashira ngo mudakalo! (2 VaK. 2:8) Wonanyi kuti hanzvaji imweni yainga isingasaiti mabasa ko makore 10. Iyona poyakahwirira ku ungano yakati: “Mundhu wese wakandicungamija uye no kunyemwerera.” (Mabasa 3:19) Zviito izvi zvidoko zvo usizi zvakaita kuti hanzvaji iyi izwe kudini? Iyona yakati: “Zvakaita inga kuti Jehovha wakandivhunja kuti ndihwirire mugwanja lo mudakalo.” Patinoeja kugara tesikurujira vamweni, tinokona kushandiswa ndi Kristu kuti tibese “vaya vanoshanda ngo simba uye vanoremerwa.”—Mateu 11:28, 29.

15. Icinyizve cingatibesa kuti tibatane no hama no hanzvaji jedu? (Wonanyi foto.)

¹⁵ Zvatinobhuyawo zvinokona kuita kuti tibatane no hama no hanzvaji jedu. Jobe 12:11 inoti: Njeve aizwi masoko here?’ Inga rurumi rinoravira zvokurhya nguva yokuti mubiki wakanaka paanonga apakura zvokurya unoravira kuti zvinonaka here, mukutojanawo nesuwo tisati taita ciro ciri cese tinotanga talangarira. (Ps. 141:3) Tinokona kuva no cokwadi kuti zvatinobhuya zvinodakaja, zvinokurujira uye “zvingabesawo vayaeyi vedu.”—VaE. 4:29.

16. Ndiyani maningi-ningi anodikana kungwarira zvaanobhuya?

¹⁶ Maningi-ningi mwamuna, majibaba uye vanamai vanodikana kungwarira maningi zvavanobhuya vanodikana kubhuya zviro zvinovangisa mbhuri yavo. (VaK. 3:19, 21; Tito 2:4) Vakuru vo ungano avo vano mutwaro wo kubesa inga vahavisi vanodikanawo kukurujira no kunyalaja magundata a Jehovha. (Isa. 32:1, 2; VaG. 6:1) Tinodikana kulamba tesilangarira masoko ari pana Zvirevo 15:23 anoti: ‘Masoko anobhuiwa pa nguva kwayo akanaka maningi!’

NGATIKHOMBIJE RUDO “NGO ZVIITO NO COKWADI”

17. Tingaitisa kudini kuti tide hama jedu ngo mweyo wese?

¹⁷ Mu postori Johani wakativangisa kuti: ‘Atidikani kuda ngo magama no mulomo asi ngatide vamweni ngozviito no cokwadi.’ (1 Joh. 3:18) Tinodikana kuda hama no hanzvaji jedu ngo mweyo wese. Tingazviitisa kudini? Kudai tikapeja nguva yakawanda no hama no hanzvaji jedu tinozonasa kuvaziva uye rudo wedu navo rinozovanga. Ngo kudalo, psakanyi nguva yokuti muve no hama no hanzvaji, inga muezaniso ku musangano no basa lo kuparijira. Psakanyi nguva kuti moovavhakacirawo. Tikaita kudalo tinozokhombija kuti: ‘Tiri kujijiswa ndi Mwari kuti tidanane ngo cedu.’ (1 VaT. 4:9) Cimwenizve tinozolamba tesizwa ‘kunaka ko zvakaita no kudakajisa kazvo hama kugara pamwepo jakadakala!’—Ps. 133:1.