Mazwi Akangwara
14 Mwanakaji ano uzivi, anovangisa nyumba yake,
Asi mwanakaji anopenga, anoiphwanya ngo nyara jake.
2 Mundhu anofamba mu urungami, anothya Jehovha
Asi mundhu anofamba mu gwanja rinocengeja,
Anomurerusa.
3 Magama okujikuja o mapenji,
Akadari inga kutakwa ngo mushakwe,
Asi muromo o vazivi, unozojivirira.
4 Pacina n’gombe, mujiyo unohira zvinyama unogara wakacena,
Asi simba rino n’gombe yorume, rinobudisa muviyo wakakura.
5 Capupu cakagondeka, acinyepi.
Asi capupu cokunyepa, cinovereketa zvokunyepa.
6 Mushori anopsaka uzivi, asi aahuwani,
Kuveni uzivi hunoguma ngo kukasika ku mundhu ano ungwaru.
7 Garai ndhambo no mapenji,
Ngokuti pamuromo pawo, auzowani uzivi.
8 Uzivi hwo mundhu wakangwara,
Hunomuita kuti azwisise gwanja raari kufamba,
Asi mapenji, anocengejwa ngo* upenji hwawo.
9 Mapenji, aaneseki ngo kushaisha kwawo,
Asi vandhu vakanaka, vanoda kuita runyararo.
10 Kudari mundhu akanyangajwa,
Ndiyena ega basi anoziva kunyangajwa kwake,
Akuna mundhu angaziva kudakara kwake.
11 Nyumba yo vandhu vakashata, inozophwanywa,
Asi tende yo vandhu vakanaka, inozobudirira.
12 Kuno gwanja rinovoneka inga rakanaka ku mundhu,
Asi pakupejisira, rinoendesa ku rufu.
13 Pikija mundhu eciseka, mwoyo wake ungava wecihwajihwa.
Mudakaro, ungapejisira ngo kusuruvara.*
14 Mundhu wakashata mwoyo,
Anozokotora muviyo wo makwanja ake,
Asi mundhu wakanaka, anozokotora mucero wo zviito zvake.
15 Rethe, rinotenda zvese zvarinovhunjwa,
Asi mundhu wakangwara, anorangarira acito aita ciricese.
16 Muzivi anongwarira ushoni wotiza zvakashata,
Asi benji, arirangariri ushoni.
Irona, rinojithemba.
17 Mundhu anonyangajwa ngo kukasika, anoita zvo upenji,
Asi mundhu anonasa kurangarira, anonyenywa.
18 Mapenji, anozogara utaka hwo upenji,
Asi vandhu vakangwara, vanozosimijwa korowa yo uzivi.
19 Vandhu vakashata, vanozogwadama pamberi po vandhu vakanaka.
Vashaishi, vanozogwadama pamusuvo jo vandhu vakanaka.
20 Murombo, anotozondwa ngo mudoni wake kamare,
Asi mukhupuki, anoshamwari jakawanda.
21 Mundhu acikareremeji mudoni wake, anoita cishaishi,
Asi mundhu anoitira unyasha vanojidodokesa, anodakara.
22 Vanoronga kuita zvakashata, avazopauki here?
Asi vaya vanoda kuita zvakanaka,
Vanozodakarihwa no kuitihwa rudo hucikacinji.
23 Kushanda ngo simba rese,
Kunoviisa muviyo jaushoni,
Asi kugara kuri kuvereketa basi, kunoviisa urombo.
24 Korowa yo vazivi, ndihwona upfumi hwavo,
Asi upenji hwo mapenji, hutori upenji kamare.
25 Capupu co cokwadi, cinoponesa vandhu,*
Asi cokunyepa, cinovereketa zvokunyepa.
26 Mundhu anothya Jehovha, anovangisa kuthemba kwake,
Vana vake vanotizira kwaari.
27 Kuthya Jehovha, ndicona cinyuke co upenyu
Kunovhisa mundhu pa murau wo rufu.
28 Kudari mambo akava no vandhu vakawanda vaanotonga,
Zvinoitisa kuti akujwe,
Asi umambo ucina vandhu vaunotonga, apana caunoshanda.
29 Mundhu acikakasiki kunyangajwa, wakangwara,
Asi mundhu acikasengereri, anokhombija upenji hwake.
30 Mwoyo wakathiva, unovangisa muviri,
Asi thima, rinovoja maphondo.
31 Wiya anocikirira mundhu wakaderera, anotuka wakamusikaro,
Asi wiya anoitira unyasha murombo, anokuja wakamusikaro.
32 Mundhu wakashata, anozouraiwa ngo zvishaishi zvake,
Asi mundhu wakanaka, anozojivirihwa ngo kugondeka kwake.
33 Uzivi, unozorora mucinyararire mu mwoyo jo vandhu vanozwisisa,
Asi benji, rinozvibudisa pambhene.
34 Ururami, unokhwijirija jinja,
Asi ushaishi, unopseruja vandhu.
35 Mambo, anodakara ngo mushandi anoita zviro ecishandisa hwiru,
Asi anonyangajwa ngo mushandi anoita zviro zvinopseruja.