Johani
21 Pasure pazvo, Jesu wakajivonesazve ku vajiji vake ku Jombe ro Tibheriyasi. Iyena wakajivonesa ngo njira iyi: 2 Simoni Pedhru, Tomasi (waidanijwaya kuti Manyambiri), Natanaeri wo Kanaa yo Garireya, vana va Zebhedhi no vajiji vamweni vaviri, vainga vese. 3 Simoni Pedhru wakavavhunja kuti: “Ndiri kwenda kotanda.” Ivona vakati kwaari: “Ngatende tese.” Ivona vakaenda, vopakira ngarava. Asi pa usiku hwondhohwo avazivi kubata ciri cese.
4 Kunja no kwaeja, Jesu wainga akaima mu mbhiripiri mo jombe, asi vajiji avazivi kumuziva kuti ndi Jesu. 5 Jesu wakavavhunja kuti: “Vana, muno ciri cese* cokuha?” Ivona vakadavira kuti: “Atina!” 6 Iyena wakavavhunja kuti: “Wisiranyi juya ngo divi ro mukono muho wo ngarava, munozobata ciri cese.” Ivona vakariwisira, asi vakakonehwa kuripakija ngo ndava yo kuwanda ko hove. 7 Mujiji umweni waidiwaya ndi Jesu, wakavhunja Pedhru kuti: “Ndi Mambo!” Simoni Pedhru paakazvizwa kuti ndi Mambo, wakasimira nguvo ngokuti wainga ari mitu,* wophukira mu jombe. 8 Asi vajiji vamweni vakaviya vari mu ngarava doko, vecikweva juya rakazara ngo hove ngokuti vainga vaaphedo no kumutundhu. Paicota mutengo unokhwedera kuita makumapfumbamwe o metru kuti vagume kumutundhu.
9 Pavainga vaambuka, vakavona masimbe o muriro ecibwaka. Pamuriropo painga no hove jaikocwa pamasimbe, vovonazve pau. 10 Jesu wakavavhunja kuti: “Viisanyi kuno hove jimweni jamabataro.” 11 Simoni Pedhru wakapakira mu ngarava wokwevera kumutundhu juya rakazara ngo hove. Hove iji, jainga jakakura maningi, jaikwana kuita zana na makumashanu na ndhatu.* Pikija kuti jaiwanda, juyero arizivi kumweka. 12 Jesu wakavavhunja kuti: “Viyanyi tihe.” Apana na umwe wainga no cicunge co kumuvhunjisa kuti: “Ndimwi ani?” Ngokuti vaiziva kuti wainga Mambo. 13 Jesu wakakhwedera wotora pau no hove wovapa. 14 Kujivonesa ka Jesu uku ku vajiji vake, kwainga kocitatu, sure ko kumuka ko vakafa.
15 Pavakapera kuha, Jesu wakavhunjisa Simoni Pedhru kuti: “Simoni mwana wa Johani, unondida* kupinda iji?” Iyena wakamudavira kuti: “Hina Mambo! Imwimwi munozviziva kuti ndinomuda* maningi.” Iyena wakamuvhunja kuti: “Ipai mavhuta angu zvokuha.” 16 Jesu wakamuvhunjisazve hwocipiri kuti: “Simoni mwana wa Johani, unondida* here?” Iyena wakadavira kuti: “Hina Mambo! Imwimwi munozviziva kuti ndinomuda* maningi.” Iyena wakamuvhunja kuti: “Havisai zvimavhuta zvangu.” 17 Jesu wakamuvhunjisazve hwocitatu kuti: “Simoni mwana wa Johani, unondida* maningi here?” Pedhru wakasuruvara ngo kuvhunjiswazve hwocitatu kuti: “Unondida* here?” Ngo kudaro, iyena wakamuvhunja kuti: “Mambo, apana camucikazivi; imwimwi munozviziva kuti inini ndinomuda* maningi.” Jesu wakamuvhunja kuti: “Ipai zvimavhuta zvangu zvokuha. 18 Ndinokuvhunja zvokadi kuti, pawainga mudoko waisimira wega, wecifamba kwenda kwawaida. Asi ukaita harahwa, unozotambanuja nyara jako kuti mundhu umweni akusimije perapo wokutora kuti akuendese kwaucikadi.” 19 Jesu wakananga izvi, kuti avonese mukhaindi wo rufu hwaaizosongana nahwo kuti akuje Mwari. Paakapera kunanga izvi, wakavhunja Pedhru kuti: “Endererai mberi wecinditevera.”
20 Pedhru wakatendeuka wovona mujiji waidiwaya ndi Jesu ecivatevera. Mujiji uwu, ndiyena waingaya akacamira paditi ra Jesu pavaingaya vecirarira, wovhunjisa kuti: “Mambo, ndiyani ari kumutengesaro?” 21 Ngo kudaro, Pedhru paakamuvona, wakavhunjisa Jesu kuti: “Mambo, zvicinyi zvinozoitikavo no mundhu uwu?” 22 Jesu wakamuvhunja kuti: “Kudari ndikada kuti iyena aenderere mberi ano upenyu pasi pano mbhera pa kuviya kwangu, unenyi nazvo? Iwewe endererai mberi wecinditevera.” 23 Masoko o kuti mujiji uwu aacaizofepi, akaguma pakati po hama jese. Jesu aazivi kunanga kuti mujiji uwu aacaizofepi, asi wakananga kuti: “Kudari ndikada kuti iyena aenderere mberi ano upenyu pasi pano mbhera pa kuviya kwangu, unenyi nazvo?”
24 Mujiji uwu ndiyena wakaita ucapupu hwo zviro izvi no kuzvitara. Itusu tinozviziva kuti ucapupu uhu ngo hwocokwadi.
25 Kuno zviro zvizinji zvakaithwa ndi Jesu zvicizivi kutahwa zvese kamare. Ngokuti, nozvainga zvakatahwa zvese, mabhuku akona aacaizokwanepi mu nyika.