2 Vakorinte
11 Ndaikumbiravo kuti mundicungirirevo padoko basi pa upenji hwangu. Asi imwimwi muri kundicungirira kamare! 2 Ndino ushanje na imwimwi, ushanje hwakaezana no hwa Mwari. Ngokuti inini kamare ndakamugondesa kuti ticadhe no mwanarume umwe basi. Mwanarume uwu ndi Kristu. Kuti ndimuendese kwaari inga mbhandwe yakacena. 3 Ndinothya kuti murangariro wenyu ungasvipiswa, woregera kutevera Kristu ngo mwoyo wese makacena, inga zvakaithwa ngo nyoka yecicengeja Evha ngo mazano ayo. 4 Kudari pakaguma mundhu umweni ecicumaera Jesu wakasiyana no watiri kucumaerari, moashira mujimu umweni wakasiyana no mujimu wamakaashira, kana mukaashira masoko akanaka akasiyana no amakatenda, imwimwi munonga mecizwirana naye. 5 Inini andiripi mudoko kupinda vapostori venyu vanoitaya inga vakanaka maningi. 6 Pikija ndicikanasi kuvereketa ushoni, inini ndino uzivi. Zvokadi takanasa kumujekesera mu njira jese pomwe no zviro zvese.
7 Ndakatokotesa masoko akanaka kwamuri ngo pamusoro pa Mwari ndicikaveteri kupuwa ciri cese, ndakadakara. Ndakashaisha here ngo kujidodokesa kuti imwimwi mukujwe? 8 Inini ndakaashira besero recivha ku ungano jimweni. Besero iri raiita inga ndiri kuvabira kuti ndimushandire. 9 Pandainga na imwimwi andizivi kupa mutoro mundhu ari wese pa zviro zvandaida. Hama jakavha ku Masedhoniya jakandipa zvese zvandaida. Ndakangwarira kuti nditame kuita mutoro kwamuri. Inini ndinoenderera mberi ndeciita kudaro. 10 Cokwadi ca Kristu pacinonga na inini, andizoregeri kuzvibhuya ndecijikuja mu mutundhu jo Akaya. 11 Ngenyi? Ngokuti andimudi? Mwari anozviziva kuti inini ndinomuda.
12 Zvandiri kuitari, ndinoenderera mberi ndecizviita, kuti ndifunge muromo ja vaya vanopsaka mathangwe o kuti vavoniwe inga vakaezana na itusu pa zviro zvavanojikuja ndizvona. 13 Vandhu vakadaro ndivona vapostori vokunyepa, vashandi vanocengeja. Ivona vanocengejera kuva vapostori va Kristu. 14 Izvi azvitikahamaji, ngokuti Sathana pacake anojiita ngirozi yo ruvheneko. 15 Azvitikahamajivo ngo kuvona vashandiri vake vecijiita vashandiri vo zvakarurama. Asi mugumo wavo, unozozwirana no mabasa avo.
16 Ndinomuvhunjazve kuti: Mucarangarira kuti inini ndiri benji. Asi kudari mukarangarira kudaro, ndiashirenyi inga ndiri benji, kuti nditame kujikuja maningi. 17 Zvandiri kubhuyari wari andiripi kutevejera muezaniso wa Mambo. Asi ngo zvo mundhu anoita inga ari kupenga, ndecijithemba no kujikuja. 18 Zvecivoneka kuti vazinji vanodada mukuzwirana no nyama, inini ndinodadavo. 19 Zvecivoneka kuti muri “mapenji” kamare, imwimwi munokwanisa kucijikira mapenji doni. 20 Zvokadi imwimwi munocijikira vaya vanomuita varanda, vaya vanoparaja zviro zvenyu, vaya vanomutorera zviro zvamunazvo, vaya vanojikuja kwamuri, na vaya vanomutaka kumeso.
21 Zvinotipseruja kunanga zviro izvi ngokuti zvingaita inga kuti takarembejeka.
Kudari vamweni vakacunga, ndiri kubhuya inga benji, ngokuti inini ndakacungavo. 22 Ivona Vahebheru here? Inini ndirivo Muhebheru. Ivona, Vaiziraeri here? Inini ndirivo Muiziraeri. Ivona asipi mubarihwana wa Abhirahama? Ininivo ndiri mubarihwana wa Abhirahama. 23 Ivona vashandiri va Kristu? Inini ndinodavira inga benji ngokuti ininivo ndinonasa kuzivika maningi: Inini ndakashanda maningi, ndakasungwa kazinji, ndakatakwa kucikaverengeki, ndakaposwa ngo rufu kakawanda. 24 Ndakatakwa kashanu ngo Vajudha. Ndakatakwa mutengo wo makumatatu o mushakwe no mushakwe mupfumbamwe, 25 ndakashaputhwa katatu, ndakafuhwa ngo mapuwe kamwe, ndakandondomera no piketi katatu, ndakapeja usiku humwe no njiku imwe ndiri mukumwa; 26 ndakaita hwendo jakawanda ndecisongana no ngozi jo mumurambo, ngozi jo mbavha, ngozi jaiitiswa ngo vandhu vo jinja rangu, ngozi jaiitiswa ngo vandhu vo jinja rimweni, ngozi jo mudhorobha, ngozi jo muzvipare, ngozi jo mujombe, ngozi jo hama jo kunyepejera, 27 pakushanda ngo simba no mabasa akavanga, kupeja usiku huzinji ndicizivi kuvata, pa njara no nyota, pa kupeja mukuvo muzinji ndicizivi kuha, pa kutondhora no kutama zvo kusimira.
28 Kunja ko matambujiko ese aya, pano zviro zviri kundiremera: Kuthimwa-thimwa ngo ndava yo ungano jese. 29 Ndiyani wakaremba, inini ndotamavo kuremba? Aripo angakhugunyika inini ndotama kunyangajwa here?
30 Kudari zvecidiwa kuti ndidade, ndinodada ngo zviro zvinovonesa kuremba kwangu. 31 Mwari, Baba wa Mambo Jesu, Wiya anodikana kukujwa mbhera narini, anozviziva kuti andiripi kunyepa. 32 Mu Dhamasko, govhernadhori waitungamirihwa ndi mambo Areta, wakadira vangwariri pa musuvo wo dhorobha ro Vadhamasko kuti vandisunge. 33 Asi ndakaderuswa mu citengu, ngo pajhanera yo mupfimbiji wo dhorobha, ndomutiza.