Dhanyeri
1 Mu gore rocitatu ro kutonga ka Jehoyakimi mambo wo Judha, Nebhukadhinezari mambo wo Bhabhironi, wakaguma ku Jerusarema woritendeneja.* 2 Pa kufamba ko nguva, Jehovha wakapa mambo wo Judha Jehoyakimi mu nyara ja Nebhukadhinezari pamwepo no zviro zvimweni zvo nyumba* ya Mwari wo cokwadi. Nebhukadhinezari wakazvitora woenda nazvo ku nyika yo Shinari* mu nyumba* ya mwari wake. Iyena wakazvidira mu ndau inovigihwa pfuma ya mwari wake.
3 Ngo kudaro, mambo wakavhunja Ashipenazi mutungamiriri mukuru wo nyumba yake kuti aviise Vaiziraeri vamweni, kubatanijavo no vamweni vo mu nyumba yake no mubarihwana yo vazivi. 4 Ivona vaidikana kuva majaha, acizivi kuremara, akaseja,* ano uzivi, ano zivo, anozwisisa, anokwanisa kushandira pa nyumba ya mambo. Iyena waidikana kuvajijisa ndumi yo Vakaradhiya no matarihwe ayo. 5 Mambo wakananga kuti ivona vaidikana kuha njiku jese zviro zvaaiha, vamwevo no vhinyu yaaimwa. Vaidikana kujijiswa* ko makore matatu. Pasure po mukuvo uwu vaizoenda koshandira mambo.
6 Pakati pavo painga pano vamweni vo vhumbo ra Judha: Dhanyeri,* Hananiya,* Mishaeri* na Azariya.* 7 Mutungamiriri mukuru wo nyumba ya mambo wakavapa mazina* amweni aya: Dhanyeri wakamupa zina rokuti Bheriteshazari, Hananiya wakamupa zina rokuti Shadhreki, Mishaeri wakamupa zina rokuti Meshaki, Azariya wakamupa zina rokuti Abhedhinego.
8 Asi Dhanyeri wakasunga mu mwoyo make kuti atame kujisvipisa ngo kuha no kumwa vhinyu ya mambo. Ngo kudaro, wakakumbira mutungamiriri mukuru wo mu nyumba ya mambo, kuti amutendere kutama kuha zviro izvi. 9 Mwari wo cokwadi wakaita kuti mutungamiriri mukuru wo mu nyumba ya mambo, aitire usizi no unyasha Dhanyeri. 10 Asi mutungamiriri mukuru wo mu nyumba ya mambo, wakati kuna Dhanyeri: “Inini ndiri kuthya mambo wangu, wiya wakananga zvamunodikana kuha no kumwa, ngokuti kudari iyena akamuvona makaonda maningi kupinda majaha amweni o ndanga yenyu, inini ndinozova no ndava na mambo ngo ndava yenyu.” 11 Asi Dhanyeri, wakavhunja mungwariri wainga akagajwa ngo mutungamiriri mukuru wa mambo waingwarira Dhanyeri, Hananiya, Mishaeri na Azariya, iyena wakamuvhunja kudari: 12 “Tabata murenje, ejanyi vashandiri venyu ko gumi ro njiku, tipenyi zvokuha zvinomera mu munda no kumwa yo kumwa. 13 Tevere ezanisanyi hope jedu no hope jo majaha anoha zvo kuha zva mambo, mozosunga kuitira vashandiri venyu mukuzwirana no zvamunonga mavona.”
14 Ngo kudaro, iyena wakatendera kuita zvavakakumbira, wovaeja ko gumi ro njiku. 15 Pakupera ko gumi ro njiku, ivona vainga no kara jaushoni no uhomi hwaushoni* kupinda majaha ese aiha zvokuha zva mambo. 16 Ngo kudaro, mungwariri acaivapepi zvokuha zva mambo no vhinyu zvaitumihwa kwavari. Asi iyena waivapa zvokuha zvinomera mu munda. 17 Mwari wo cokwadi wakapa majaha marongomuna aya zivo no kuzwisisa zviro zvese zvakatahwa, ovapazve uzivi. Dhanyeri wakabesehwazve kuti akwanise kuzwisisa zvivoniso zvese no hope jese.
18 Pakupera ko mukuvo wakanangwaya ndi mambo kuti vaizoenda pamberi pake, mutungamiriri mukuru wa mambo wakavatora woenda navo ka Nebhukadhinezari. 19 Mambo paakabhuya navo, apana na umwe hake pa cikwateco wainga wakaezana na Dhanyeri, Hananiya, Mishaeri na Azariya. Ivona vakaenderera mberi vacishanda pamberi pa mambo. 20 Mukuvo wese mambo paaivavhunjisa ngo shwiro yaida uzivi no kuzwisisa, mambo waivavona vecinyisa kwakapetwa rugumi, vapiri vese vo masaramuso no vafemberi vainga mu umambo hwake. 21 Dhanyeri wakagareyo mbhera mu gore rakatanga kutonga Mambo Siro.