Vaefeso
3 Ngo ndava yazvo, inini Pauro, musungwi ngo ndava ya Kristu Jesu ngo pamusoro penyu, vandhu vo majinja . . .* 2 Zvokadi, imwimwi makazwa kuti ndakapuwa mutoro wo kumubesera ngo unyasha hucikaezaniswi hwa Mwari, 3 kuti ndakaziviswa cakafisika ca Mwari ngo civoniso, inga zvandakapera kumutarira ngo masoko mashoma. 4 Waro pamunoverenga masoko aya, mungakwanisa kuvona kuzwisisa kwandinoita cakafisika ca Mwari ngo pamusoro pa Kristu. 5 Cakafisika ici, acizivi kuziviswa ku mubarihwana yo kare inga zvacavoneswa wari ngo mujimu ku vapostori no vaporofeti vakasanwa,* 6 cakafisika nga ici: Vaya vacaingepi Vajudha, asi vari mu kuzwirana na Kristu Jesu, vanozogara utaka hwakagaraya iyena, vozova divi ro muviri. Ivona vanoashira ciro condhoco cakagondeswaya ndi Mwari kwatiri ngo ndava yo masoko akanaka. 7 Inini ndakava mushandiri wazvo mu kuzwirana no cipo cicikapagahwi co unyasha hucikaezaniswi hwa Mwari hwandakaitihwa ngo kushanda ko simba rake.
8 Unyasha hucikaezaniswi uhu hwakapuwa inini, mudoko kupinda mudoko wo vatendi doni vese, kuti ndicumaire masoko akanaka ku vandhu vo majinja, ngo pamusoro po upfumi hucikazwisisiki hwa Kristu 9 ndiite kuti vese vavone mashandire anoita cakafisika ca Mwari. Kuvhira kare no kare, cakafisika ici cainga cakavigwa ndi Mwari, musiki wo zviro zvese. 10 Cinangwa cainga cokuti, vatongi no vano simba vanogara kumatenga vaziviswe uzivi hwakakura hwa Mwari, hunokhombijwa ngo njira jakasiyana-siyana ngo pamusoro po ungano. 11 Izvi zvinozwirana no cidisiso cake co kwenda no kwenda mukuzwirana na Kristu, Jesu Mambo wedu. 12 Iyena anoita kuti tive no rusujunuko pa kubhuya no kukhwedera kuna Mwari ticingathyi ngo rutendo hwedu kuna iyena. 13 Ngo kudaro ndinomukumbira kuti mutame kuremba ngo ndava yo matambujiko angu ngo pamusoro penyu, ngokuti iwona anoreva rukujo kwamuri.
14 Ngo ndava yazvo, ndinogwadama pamberi pa Baba, 15 mbhuri yese yo kumatenga no yo pasi pano iripo ngo ndava yake. 16 Ndinokumbira kuti, iyena ngaavangise mwoyo wenyu* ecishandisa simba ro mujimu wake, ngo pamusoro po nduma yake huru, 17 kuti ngo ndava yo rutendo hwenyu, Kristu agare mu mwoyo mwenyu ngo rudo. Kuti muve makaima inga muti mukuru uno muji jakavanga, 18 kuti pamwepo no vatendi doni vese, mukwanise kunasa kuzwisisa kuti ngohwapi upambhi, urebu, thuru* no ujiki, 19 no kuziva rudo hwa Kristu hunopinda uzivi hwese, kuti muashire mugariro jese jinovha ka Mwari.
20 Kuna wiya anokwanisa kuita zvinopinda zviro zvese zvatinokumbira kana zvatinorangarira, mukuzwirana no simba rake riri kushanda mwatiri, 21 ngaapuwe nduma pecishandiswa ungano na Kristu Jesu ku mubarihwana yese mbhera narini, kwenda no kwenda. Ameni.