Vaefeso

6 Vana, zwiranyi vabari venyu mu njira inodakajisa Mambo, ngokuti ndizvona zvakarurama. 2 “Kujai baba na mai wako,” uwu ndiwona mupango wokutanga uno cigondiso: 3 “Kuti zvese zvikufambire ushoni, urarame mazuva akawanda pa nyika.” 4 Majibaba, mucacamwisa vana venyu, asi endereranyi mberi mecivarera mu mbhangiro no jijiso* ya Jehovha.*

5 Varanda, zwiranyi majipatarau enyu o pasi pano,* no nderemejo no kuthya, inga kuzwira kwamunoitira Kristu, 6 kuciripi basi pamunonga mecivoniwa, kuti mudakajise vandhu,* asi inga varanda va Kristu, meciita kuda ka Mwari ngo simba renyu rese. 7 Ivanyi varanda vano murangariro jakanaka, mecishanda inga muri kushandira Jehovha,* haiwa vandhu, 8 imwimwi munozviziva kuti Jehovha* anopa umwe nga umwe mukuzwirana no zvakanaka zvaanoita, kuno muranda no musujunuki. 9 Imwimwivo majipatarau, nasanyi kuvataja ushoni mucingavanesi, ngokuti munozviziva kuti Mambo wavo no wenyu ari kumatenga, kwaari akuna mukheto.

10 Pakupejisira, endereranyi mberi mecivangiswa ndi Mambo pamwepo no simba rake guru. 11 Simiranyi zvijito zvo hondo zvinovha ka Mwari, kuti mukwanise kuhwisana no murau ja Dhiyabhu; 12 ngokuti atihwisani no vandhu vano ngazi no nyama, asi tinohwisana no utongi, masimba, majimambo o nyika ino yo cidima, no masimba o mujimu jakashata jiri kudenga.

13 Ngo ndava yazvo, simiranyi zvijito zvakakwana zvo hondo zvinovha ka Mwari, kuti mukwanise kuvangirira mu njiku yakashata, kuti pasure po kuita zvese, muenderere mberi makavanga.

14 Ngo kudaro, endereranyi mberi makaima, sunganyi mu cihunu cenyu ngo bhande ro cokwadi no kusimira muthavo wo ururami, 15 musoka jenyu nga muve no magwada, kuti muve makanasiririka pa kucumaira masoko akanaka o runyararo. 16 Kusiyapo zvese izvi, simiranyi muvhiko wo rutendo, kuti mukwanise kujima mupasha jese jinobwaka ja Sathana.* 17 Simiranyivo cigoko co ruponeso no banga ro mujimu, riri soko ra Mwari, 18 mecienderera mberi meciita mukhaindi wese wo mukumbiro no kudeketera nguva jese mu mujimu. Ngo ndava yazvo, endereranyi mberi makamuka, meciita mukumbiro jo kudeketera mukuvo wese ngo pamusoro po vatendi doni vese 19 Ndiitirenyivo mukumbiro, kuti ndipuwe masoko o kunanga pandinofunungura muromo, kuti ndikwanise kuvereketa ngo kucunga pa kuzivisa cakafisika ca Mwari co masoko akanaka. 20 Masoko aya, ndiwona andiri kushandirari inga muimiriri wakasungwa ngo magaragajero, kuti ndiverekete ngo kucunga ngo pamusoro pawo, inga manera andinodikana kumavereketa.

21 Kuti muzivevo ngo pamusoro po mugariro wangu no zvandiri kusongana nazvo, Tikiko, hama inodiwa no mushandiri wakagondeka kuna Mambo anozomuzivisa zviro zvese. 22 Ngo zvandiri kumutumiraro kondhoyo, kuti amuzivise mugariro wedu no kunyaraja mwoyo yenyu.

23 Hama ngajive no runyararo, rudo no rutendo hunovha ka Mwari Baba na Mambo Jesu Kristu. 24 Unyasha hucikaezaniswi ngahuve no vese vano rudo hucikaperi na Mambo wedu Jesu Kristu.