1 Timoti

4 Asi soko rakafemehwa rinonanga* pambhene kuti pa nguva inozoviya vandhu vamweni vanozopauswa pa rutendo, vozwira masoko akafemehwa anocengeja* no jijiso jo madhimoni, 2 vecikweviwa ngo ucengeji hwo vandhu vanonyepa, vano hana yakatindivara.* 3 Ivona vanorambija mucadho, vecivhunja vandhu kuti varegere zvokuha zvakasikwa ndi Mwari; iyena wakazvisika kuti zvihiwe no kubongwa nga vaya vano rutendo no vanonasa kuziva cokwadi. 4 Zvokadi, zvese zvakasikwa ndi Mwari, zvakanaka nee apana na cimwe haco cinodikana kunyenywa kudari cikaashihwa ngo kubonga, 5 ngokuti cinoceneswa ngo soko ra Mwari no mukumbiro.

6 Kudari ukapa hama zano iri, unozova mushandiri wakanaka wa Kristu Jesu, wakavangiswa ngo masoko o rutendo no majijisiro akanaka auri kutevera ngo mwoyo wese. 7 Asi rambai ngano jo kunyepa jinoshatisa zviro zvakanaka, inga jinoithwa ngo vanakaji vaavasharuka. Ngo divi rimweni, jirovejei no kugaja cido co kujipira kuna Mwari. 8 Kuroveja* muviri kunobesa padoko, asi kujipira kuna Mwari kunobesera mu zviro zvese, ngokuti kunotigondesa upenyu hwa nyamasi uno no upenyu hunozoviya. 9 Soko iri rinogondeka, rinodikana kunasa kuthembhwa. 10 Ndizvona zvinotiita kuti tishande ticikarembi no kuvangisira, ngokuti vetero yedu iri kuna Mwari anopona. Ndiyena muponesi wo vandhu vese, maningi-ningi ku vagondeki.

11 Rambai wecipa mutemo iyi no kuijijisa. 12 Ucadotendera kudheerehwa ngo mundhu ari wese ngokuti uri mwana mudoko. Asi ivai muezaniso ku vandhu vakagondeka pa kuvereketa, pa mufambiro, mu rudo, rutendo no mu uceni. 13 Weciimira kuguma kwangu, rambai wecivangisira kuverenga pamberi po vamweni, wecivangisa vamweni no kuvajijisa. 14 Ucareja-reja cipo caunaco, cawakapuwa ngo njira yo ciporofita mu njiku yawakadihwa nyara ngo dare ro vakuru. 15 Rangarijisisai zviro izvi; zvibatisisei kamare, kuti kubudirira kwako kuvoneke ngo vandhu vese. 16 Jingwarirei ushoni pamwepo no majijisiro ako. Cungirirari mu zviro izvi, ngo kuita kudaro unozojiponesa iwewe, na vayani vanokupurutana.