Mazwi Akangwara
24 Ucaemura vandhu vakashata,
Nee ucada kufamba navo,
2 Ngokuti mwoyo wavo, unorangarira kuita zvakashata,
Muromo wavo, unovereketa zvakashata.
3 Nyumba inovakwa ngo uzivi.
Ngo ungwaru, iyona inovangiswa.
4 Ngo uzivi, nyumba yese inozara ngo mukhaindi wese wo upfumi hunosisira no kudakajisa.
5 Mundhu ano uzivi, ano simba,
Ngo uzivi hwake, anoengejera simba rake.
6 Iwewe unozohwa hondo yako ngo kutungamirihwa ngo mundhu anonasa kuziva,
Zviro zvinofamba ushoni kudari pakava no vapangiri vakawanda.
7 Uzivi hwokadi, ahuwaniki ngo benji;
Irona arina zvokunanga pa musuvo wo dhorobha.
8 Mundhu anoronga kuita zvakashata,
Anozodanijwa shasha pakuita mapope.
9 Mazano o benji, akashata.
Vandhu, vanonyenya mushori.
10 Kudari iwewe ukanyangajwa pa njiku yo dambujiko,
Simba rako rinozova shoma.
11 Sujunurai vari kuendeswa kourawa,
Ponesai vari kuthobinya veciendeswa kourawa.
12 Kudari iwewe ukati: “Asi apana cataiziva ngo pamusoro pa izvi,”
Kunanga kuti wiya anopopora mwoyo, aazozvizivi izvi?
Wiya ari kukuvona, anozozviziva.
Anozohwirijira mundhu mukuzwirana no zviito zvake.
13 Mwana wangu, ihai uci ngokuti wakanaka,
Mabembhe o uci, anotapira mukanwa.
14 Mu njira yakaezana,
Zivai kuti uzivi hwakanaka maningi,
Kudari ukahuwana, iwewe unozova no kumbeji kwakanaka maningi
Akuna anozovhisa vetero yako.
15 Ucafindara* inga mundhu wakashata,
Phedo no muzi po mundhu wakanaka;
Ucaphwanya ndau yake yokuzororera.
16 Pikija mundhu wakanaka akawa kanomwe,
Iyena anozomukazve,
Asi vakashata, vanozokhugunyika ngo matambujiko.
17 Kudari muvengi wako akawa, ucadakara,
Kudari iyena akakhugunyika, mwoyo wako ucadakara;
18 Ngokuti Jehovha,
Angazozvivona, wotama kudakara ndizvona,
Iyena aazoendereri mberi akanyangajwa ngo mundhu wakashataro.
19 Ucanyangajwa ngo vandhu vakashata;
Ucavaemura,
20 Ngokuti vandhu vakashata avana vetero;
Rujhu yo vandhu vakashata, inozojima.
21 Mwana wangu, ithyai Jehovha na mambo.
Ucashamwarijana no vacikazwiri,
22 Ngokuti dambujiko ravo, rinozovagumira ngo civhumbu.
Ndiyani anoziva kuti vovaviri* vanozovapejesa kudini?
23 Masoko aya anovhavo ku vazivi:
Azvizivi kunaka kuva no mukheto pakutonga shwiro.
24 Wiyani anovhunja mundhu wakashata kuti:
“Iwewe wakanaka,”
Anozotukwa ngo vandhu, wopuwa ndava ngo vomajinja.
25 Asi vandhu vanomupangira, vanozobudirira ushoni;
Vanozokomborehwa ngo zviro zvakanaka.
26 Vandhu vanozobhejhari muromo wa wiya anopingura cokwadi.
27 Tangai kuita basa rako,
Perapo, wonasirira zvese mumunda;
Pakupejisira woita nyumba yako.
28 Ucaitira ucapupu mudoni wako ucina pawakacijikira.
Ucashandisa muromo wako kuti ucengeje vamweni.
29 Ucananga kuti: “Ndinozoita zvakatojana no zvaandiitirari;
Ndinozomuhwirijira, ngo zvaandiitirari.”
31 Ndakavona kuti mundewo waizara ngo sakuro;
Pasipo paifukijwa ngo sora,
Mupfimbiji wawo wo mapuwe, wainga wapera kuphwanyika.
32 Ndakasotesesa izvo, ndogara ndecirangarira;
Ndakavona, ndowana cijijo* ici:
33 Apa ukava no zvihope, apa woozira,
Wecigarira nyara kuti uzorore,
34 Urombo hwako, hunozokugumira inga mbavha,
Kutama kwako, kunozokugumira inga mundhu ano nvuti.