Mazwi Akangwara
10 Mazwi akangwara a Soromona nga aya:
Mwana ano uzivi anodakajisa baba wake,
Asi mwana wakaungwa, anonyangajisa mai wake.
2 Upfumi hunowanika munjira yakashata, aushandi ciro,
Asi ururami ndiwona unoponesa mu rufu.
3 Jehovha aazosiyi mundhu wakanaka ecifa ngo njara,
Asi anozonyima vandhu vakashata zviro zvavanoemura.
4 Nyara jo mundhu wakaremba, jinoviisa urombo,
Asi nyara jo mundhu anobata basa, jinoviisa upfumi.
5 Mwana anoita zviro ngo hwiru,
Anozokotora pa nguva yo cirimo,*
Asi mwana anoita zviro zvinopseruja
Anovata pa nguva yo kukotora.
6 Panyezuru po musoro wo mundhu wakanaka,
Pano makomborero,
Asi muromo wo mundhu wakashata,
Unoviga zviro zvakashata.
7 Mundhu anoita zvakanaka,
Anozoceukijwa no kukomborehwa,*
Asi zina ro mundhu wakashata, rinozovora.
8 Mundhu ano mwoyo wo uzivi,
Anozotendera zvaanojijiswa,*
Asi mundhu anovereketa inga benji, anozocangajwa.*
9 Mundhu anofamba akagondeka,
Anozofamba acikathyi ciro.
Asi mundhu ano mufambiro wakashata, anozobatika.
11 Muromo wo vandhu vakanaka,
Ndiwona cinyuke co upenyu,
Asi muromo wo mundhu wakashata,
Unoviga zviro zvakashata.
12 Mundhu anonyenya, anobara kupipana.
Asi rudo, unofukija zvishaishi zvese.
13 Uzivi, unowanika pa muromo wo mundhu anozwisisa,
Asi mushakwe, unotaka pa musana po mundhu acina hwiru.*
14 Vazivi vanoviga uzivi mu mwoyo,
Asi muromo wo benji uri phedo no kucangajwa.
15 Upfumi hwo vakhupuki,
Idhorobha ravo rakavangiswa,
Asi varombo, vanopera ngo urombo hwavo.
16 Mabasa o vandhu vakanaka, anovaendesa ku upenyu,
Asi mucero wo mabasa o vandhu vakashata
Unovaendesa ku ushaishi.
17 Mundhu anotendera kupangihwa,
Anokhombija vamweni gwanja ro upenyu,*
Asi mundhu anoramba kupangihwa, anopausa vamweni.
19 Panoverekethwa masoko akawanda, apacoti zvakaposeka,
Asi mundhu anongwarira rurumi hwake, wakangwara.
20 Rurumi wo mundhu wakanaka,
Wakaita inga sirivha yo mutengo mukuru,
Asi mwoyo wo mundhu wakashata, aubesi ciro.
21 Masoko o mundhu wakanaka,
Anobesera vandhu vakawanda.
Asi mapenji, anofa ngo kutama hwiru.
22 Makomborero a Jehovha anopfumisa,
Iwona nee aaviisi dambujiko.
23 Kuno benji, kuva no mufambiro unopseruja,
Kwakaita inga mutambo kwariri,
Asi mundhu ano ungwaru, ano uzivi.
24 Zviro zvinothyiwaya ngo vandhu vakashata, zvinozovaviira,
Asi zviro zvinodiwa ngo vandhu vakanaka, vanozozvipuwa.
25 Dutu* rikapinda, vakashata avazowanikizve,
Asi vandhu vakanaka, vanozova njiki jinogara kwenda no kwenda.
26 Zviro zvinoshasha, zvinozizirisa meno,
Usi, unohwajisa majiso.
Mukufananavo, mundhu ano umbhwa,* anonyangajisa patarau wake.
27 Kuthya Jehovha, kunoengejera upenyu,
Asi makore o vandhu vakashata, anozopunguhwa.
28 Zvinovetehwa ngo vandhu vakanaka, zvinoviisa mudakaro,
Asi vetero yo vandhu vakashata, inozopera.
29 Gwanja ra Jehovha, rakaita inga cijiviriro kuno vakagondeka,
Asi ku vandhu vakashata, rinoreva kuurawa.
30 Vandhu vakanaka, avazowiswi,
Nee vandhu vakashata, avazogarizve pasi pano.
31 Muromo wo vandhu vakanaka, unobara* uzivi,
Asi rurumi wakashata, unozocekwa.
32 Muromo wo vandhu vakanaka, unoziva zvinodakajisa,
Asi mukanwa mo vandhu vakashata, munobuda zvakashata.