Ndumbo ya Soromona
8 “No kwainga kuti iwewe wainga hama yangu,
Yakamwa mazamu a mai wangu!
Pandaizokuwana kunja, ndaizokubhejhari
Apana waizondishora.
2 Ndaizokutora ndokunghwinisa mumba ma mai wangu,
Vakandipangira.
Ndaizokupekeja vhinyu yakadihwa zvinonuhira kuti umwe,
No muto unotondhorera wo maromaa.
3 Mukono wake wo boshwe, waizova panyezuru po musoro wangu,
Mukono wake wo muho, waizondikumbatira.
4 Imwimwi vasikane vo Jerusarema, pikanyi:
Kuti amuzocunguji* no kumusa rudo kwandiri mbhera ihwona hude.”
5 “Ndiyani mwanakaji ari kuviyaro ecivha mubani,
Akakumbatihwa ngo mudiwa wake?”
“Ndakakumusa pasi po muti wo masaa.
Pondhopo mai wako vakazwa kuhwajihwa.
Ivona vakakubara vecihwajihwa.
6 Ndidirei inga cidhindo mu mwoyo mako,
Ndidirei inga cidhindo pa mukono wako,
Ngokuti rudo hwakavanga maningi inga rufu.
Kunamata Mwari basi, akuviyi sure inga Guva.*
Murazvu wawo, wakaita inga muriro unobwaka,
Murazvu wa Jehovha.*
7 Kumwa yakawanda aikwanisi kujima muriro wo rudo,
Nee murambo unopopoma aukwanisi kuutora.
Kudari mundhu akapa upfumi hwese hwaanahwo pamuzi pake ngo kucinjanisa ngo rudo,
Izvona zvaizorejwa-rejwa.”*
8 “Tino hambzaji* iciri mwana mudoko,
Iyona aito yabuda mazamu.
Tinozoitenyi kudari ikakumbihwa kuti irovohwe?”
9 “Nokwainga kuti iyena ibiravira,
Taizomuvakira rusosa wo sirivha panyezuru pake,
Kudari no wainga musuvo,
Taizofunga ngo tabwa yo sedhro.”
10 “Ndiri biravira,
Mazamu angu akaita inga cinyumba co kurindira.*
Ngo kudaro ivona vanondivona inga mundhu anowana runyararo.
11 Soromona wainga no cau co* muuvha ku Bhaari-hamoni,
Iyena wakapekeja cau ici co* muuvha mu nyara jo varimi.*
Umwe na umwe wavo waivapekeja mutengo unokwana kuita 1.000 co mangwenjere o sirivha ngo mucero jawo.
12 Inini ndino cau cangu co* muuvha.
Nandi Soromona, mutengo unokwana kuita 1.000 co mangwenjere o sirivha ngo zvako,
Mutengo unokwana kuita 200 ngo wa vaya vari kungwarira mucero jawo.”
13 “Iwewe unogara mu munda,
Shamwari jiri kuda kuzwa izwi rako.
Ndisiyei ndirizwevo.”
14 “Mudiwa wangu, gogomai,
Kasikai inga mbhwembhwe
Kana inga cimwana co shoma
Panyezuru po matundhu o bharsamo.”