Vafiripi
1 Inini Pauro na Timoti, varanda va Kristu Jesu, ndiri kutarira vatendi doni vese mukuzwirana na Kristu Jesu vari ku Firipi, pamwepo no vavonereri no vabeseri vo ungano:
2 Ivanyi no unyasha hucikaezaniswi no runyararo hwa Mwari Baba wedu pamwepo na Mambo Jesu Kristu.
3 Ndinobonga Mwari wangu, mukuvo wese wo ndinomuceukija
4 mu mukumbiro jangu jo kudeketera jandinomuitira. Inini ndinoita mukumbiro umwe na umwe ndakadakara, 5 ngo kubesera komunoita pa kucumaira masoko akanaka, kutangira njiku yokutanga mbhera wari. 6 Ngokuti ndinothemba kuti wiya wakatanga basa rakanaka pakati penyu, anozoripejisa mbhera pa njiku ya Kristu Jesu. 7 Kwandiri zvakanaka kurangarira kudaro ngo ndava yenyu, ngokuti ndinemwi mu mwoyo mwangu, imwimwi mwese muno unyasha hucikaezaniswi pamwepo na inini, mu kusungwa kwangu no kujivirira masoko akanaka, kakuita kuti atendehwe kucumaihwa zvo pamutemo.
8 Ngokuti Mwari anondiitira ucapupu wokuti inini ndino cisuwo* cakakura maningi nemwi, ngo rudo wakaezana no wa Kristu Jesu. 9 Ndizvona zvandinoramba ndeciitira mukumbiro, kuti rudo hwenyu ngahukure maningi no zivo yakarungama pamwepo no kunasa kuzwisisa; 10 kuti muzive ngozvapi zvinosisira maningi, muve vacina ushaishi, motama kukhugunya vamweni mbhera njiku ya Kristu; 11 muve makazara ngo mucero wo ururami, unowanika ngo ndava ya Jesu Kristu, kuti Mwari apuwe nduma no kusimbhwa.
12 Hama, ndinoda muzive kuti mugariro wangu, zvokadi kamare, wakaita kuti masoko akanaka aenderere mberi, 13 ngokuti kusungwa kwangu ngo ndava ya Kristu, kwakazivika ngo Varindiri vese vo Nyumba ya Mambo no vese vamweni. 14 Wari hama zinji jiri mu basa ra Mambo jakavangiswa ngo kusungwa kwandakaitwa. Ijona jiri kucunga kuti jiverekete soko ra Mwari jicingathyi.
15 Ngo zvokadi kuti vamweni vari kucumaira Kristu no cishatihwa no mapope, asi vamweni vanocumaira no cido cakanaka. 16 Vokupejisira ava, vanocumaira Kristu ngo rudo, ngokuti vanoziva kuti inini ndakagajwa kuti ndijivirire masoko akanaka; 17 asi vokutanga vaya vari kuda kuita mapope, avacumairi ngo cido cakanaka, ngokuti vanoda kundibarira ndhango pandinonga ndakasungwa. 18 Ngo wapi muviyo wakona? Ngo maitiro ariese, mukucengejera kana mu cokwadi, Kristu ari kuziviswa, ngo ndava yazvo ndiri kudakara maningi. Ngo maitiro akadaro, ndinoramba ndecidakara ndizvona, 19 ngokuti ndinoziva kuti izvi zvinozondiponesa ngo pamusoro po mukumbiro jenyu jo kudeketera, pamwepo no besero ro mujimu wakatumihwa ndi Mwari, wiya waingaya na Jesu Kristu, kuti uviye mu mwoyo medu. 20 Ndinothemba no kuimira kuti andizonyowejeki ngo maitiro ariese, asi ndinozobhuya ndicingathyi, Kristu azokujwe ngo ndava yo muviri wangu, inga zvaaikujwa mukuvo wese kareko, ngo kupona kana ngo kufa kwangu.
21 Kondiri, kudari ndikapona, ndinoponera Kristu, kudari ndikafa, ndawina. 22 Kudari ndiciri kupona kunyama, ndinozokwanisa kuitira Kristu zvakawanda; asi andinangi kuti ndinosana capi. 23 Ndiri pakati no pakati po zviro zviviri izvi, ngokuti ndinoda kusujunuhwa ndigare na Kristu, ngo zvaushoni kamare kondiri. 24 Asi, zvakanaka komuri kuti ndirambe ndecipona kunyama. 25 Ngo kudaro, ndecithemba izvi, ndinoziva kuti ndinozoramba ndinemwi, kuti muenderere mberi no kudakara mu kutenda, 26 kuti mudakaro wenyu uzofashukire, mukuzwirana na Kristu Jesu ngo ndava yangu pandinozovazve pakati penyu.
27 Ivanyi no mufambiro unofanera masoko akanaka ngo pamusoro pa Kristu, kuti kudari ndikaza kuzomuvona kana ndicipo, ndinozwa masoko ngo pamusoro penyu, ndoziva kuti makabatana mu murangariro inga mundhu umwe, mucishanda pamwepo kuti muenderere mberi mecitenda masoko akanaka, 28 mucikatendi kuthuswa ngo vavengi venyu. Ici citatijo co kuparajwa kwavo, asi co ruponeso komuri. Citatijo ici cinovha ka Mwari. 29 Ngokuti imwimwi makaashira makomborero ngo ndava ya Kristu, kuciripi basi o kumutenda, asi o kutambujika ngo ndava yake. 30 Kuti muhwevo hondo yo makandivona ndecihwa, yondhoyo yamuri kuzwa kuti ndiri kuihwa wari uno.