Nduyo
Nduyo ya Dhavhidhi. Ndumbo yo kutanga kushandiswa ko nyumba.
30 Inini ndinozomukuja imwimwi Jehovha Mwari wangu, ngokuti makandimusa;
Amuzivi kutendera kuti vavengi vangu vadakare ngo ndava yangu.
2 Jehovha Mwari wangu, ndakamudeketerera ndecida besero, imwimwi makandirapa.
3 Jehovha Mwari wangu, imwimwi makandivhisa mu Guva.*
Makaita kuti inini ndienderere mberi ndecipona no kuita kuti nditame kuwira mu rindi.
4 Imbanyi ndumbo jokusimba Jehovha, imwimwi vandhu vakagondeka kwaari,
Simbanyi zina rake rakacena.
5 Ushungu hwa Mwari ngo wo mukuvo mushoma,
Asi kuitihwa unyasha ndiyena kunogara kwenda no kwenda.
Zuva parinovira kangaije tingacema, asi comangwanani tinodakara maningi.
6 Pandakajizwa ndakangwaririka, ndakati:
“Andizozungunyiswi.”
7 Jehovha Mwari wangu, pamaindikhombijira unyasha hwenyu, makandivangisa maningi inga dundhu.
Asi pamakandivigira kumeso kwenyu, ndakatanga kuthya.
8 Jehovha Mwari wangu, inini ndaikhuwira kwamuri;
Inini ndakaenderera mberi ndecideketerera Jehovha kuti andiitire unyasha.
9 Ndikafa ndoenda mu rindi, zvinozomubeserenyi?
Kureva kuti bukuta rinozomusimba? Kureva kuti irona rinozozivisa kugondeka kwenyu?
10 Jehovha Mwari wangu, ndizwenyi mundikhombijire unyasha.
Jehovha Mwari wangu, ivanyi mubeseri wangu.
11 Makacinja kucema kwangu, moita kuti nditambe ngo kudakara;
Makandivhurisa mapendera o saku, mondisimija mudakaro.
12 Kuti inini nditame kugara ndakanyarara, asi ndomuimbira ndumbo yokumusimba.
Jehovha Mwari wangu inini ndinozomusimba mbhera narini.