Nduyo
Ku mutungamiriri. Ndumbo inobhuya ngo pamusoro po “Mafirori.” Nduyo ya Dhavhidhi.
69 Mwari wangu, ndiponesenyi ngokuti kumwa iri kuda kundiuraya.
2 Ndakandondomera mu matope mucina ndau yakaoma.
Ndakawira mu kumwa yakajika,
Kupopoma ko kumwa kwakanditora.
3 Ndapera simba ngo kudainja.
Izwi rangu rafa,
Majiso angu aremba ngo kusota, ndeciimira Mwari wangu.
4 Vaya vanondinyenya pacina ndava,
Vakawanda maningi kupinda vhuji ro mu musoro mwangu.
Vaya vanoda kundiuraya,
No vavengi vangu vanondicengeja, vawanda maningi.
Ndakavangirijwa kuti ndihwirije zviro zvandicizivi kuba.
5 Mwari wangu, imwimwi munoziva upenji hwangu,
Ndava yangu aizivi kuvigika kwamuri.
6 Jehovha wo hondo, Mambo Mukuru-kuru,
Vaya vanovetera imwimwi, vacadonyowejwa ngo ndava yangu.
Mwari wo Iziraeri,
Vaya vanomupsaka, vacadonyowejwa ngo ndava yangu.
7 Ndiri kutukwa ngo ndava yenyu;
Kumeso kwangu kwazara ngo nyowa
8 Ndakaita inga mundhu anovha ku nyika imweni kuno hama jangu,
Ndakava inga munyikanja kuno vana va mai wangu.
9 Rudo hwandinaho no nyumba yenyu, hwainga hwakaita inga muriro unobwaka mu mwoyo mwangu.
Kutuka ko vandhu vaikutuka, ngakuwire inini.
10 Pandakazvidodokesa ngo kuzira,*
Inini ndakatukwa ngo ndava yazvo.
11 Pandakasimira mapendera o saku,
Inini ndakava ciro cinosekesa kwavari.
12 Vaya vanogara pa musuvo wo dhorobha, vanobhuya ngo pamusoro pangu,
Mumbo jo zvidhakwa, jinobhuya ngo pamusoro pangu.
13 Jehovha Mwari wangu, mukumbiro wangu ngaugume kwamuri,
Pa mukuwo wakanaka.
Mwari wangu, ngo rudo hwenyu hukuru hucikacinji,
Ndidavirenyi ngo zviito zvenyu zvo ruponeso zvicikaposeki.
14 Ndibudisenyi mu matope;
Mucandisiya ndecindondomera.
Ndiponesenyi ku vaya vanondizonda
No mu kumwa yakajika.
15 Mucatendera kuti usore unditore,
Nee kubobojwa ngo kumwa yakajika,
Mucatendera kuti mwimbo* undiboboje.
16 Jehovha Mwari wangu ndidavirenyi, ngokuti rudo hwenyu hucikacinji hwakanaka.
Hwiriranyi kwandiri, mukuzwirana no usizi hwenyu hwakakura,
17 Mucafuratira mushandiri wenyu.
Ndidavirenyi ngo kukasika, ngokuti ndiri kutambujika.
18 Khwederanyi kwandiri mundiponese;
Ndiponesenyi ngo ndava yo vavengi vangu.
19 Imwimwi munoziva kutama kureremejwa kwangu, kunyowejwa kwangu no kudodokeswa kwangu.
Imwimwi munovona vavengi vangu vese.
20 Kutama kureremejwa kwakakhuvaza mwoyo wangu, civonje acirapiki.
Ndakavetera kuitihwa pena, asi andizivi kuitihwa pena,
Ndakavetera kunyarajwa, asi andizivi kunyarajwa.
21 Pa ndau yo zvokuha, vakandipa nvenene,
Kuti vapeje nyota yangu, vakandipa vhinagre kuti ndimwe.
22 Meza yavo ngaiite murau kwavari,
Kubudirira kwavo kova ciro cinovateya.
23 Majiso avo ngaave no cidima kuti vatame kuvona,
Itanyi kuti murenje javo jigare jecindhya-ndhya.
24 Vadururirenyi kucamwa kwenyu,
Ushungu hwenyu unobwaka ngauvabate.
25 Mu akampamento javo ngamugare mucina vandhu;
Mutende javo ngamugare mucina vandhu.
26 Ngokuti ivona vanoenderera mberi veciteverera wiya wamakakhuvaza,
Ivona vanoenderera mberi vecibhuya ngo matambujiko o vaya vamakakhuvaza.
27 Pa ndava javo, engejeranyizve ndava jimweni,
Kuti ivona vatame kukhombijihwa ururami hwenyu.
28 Mazina avo ngaapfujuhwe mu bhuku ro upenyu,
Kuti atame kutahwa pamwepo no mazina o varurami.
29 Inini ndiri kutambujika no kuhwajihwa.
Mwari wangu, simba renyu rinoponesa ngarindingwarire.
30 Ndinozoimba ndumbo jo kusimba zina ra Mwari,
Ndinozomukuja ngo kumubonga.
31 Izvo zvinozodakajisa maningi Jehovha kupinda n’gombe yorume,
Zvinozodakajisa maningi kupinda mwana wo n’gombe ano nyanga no masondo.
32 Vandhu vakapfava vanozozvivona vozodakara.
Imwimwi munopsaka Mwari, mwoyo yenyu ngaidakare.
33 Ngokuti Jehovha anopurukira varombo,
Iyena aazotami kureremeja vandhu vake vakasungwa.
34 Nyika no denga ngazvimukuje,
Jombe no zvese zviri mukati mwaro ngazvimukujevo.
35 Ngokuti Mwari anozoponesa Ziyoni
Anozovakisa madhorobha o Judha,
Vandhu vake vanozogaremo, vozotora nyika yoita yavo.
36 Vana vo vashandiri vake vanozogara pa nyika,
Vaya vanoda zina rake, vanozogaremo.