Varoma
4 Tikadaro, tinganangenyi ngo pamusoro po zvakawana Abhirahama, cekuru wo mubarihwana hwedu? 2 Inga muezaniso, kudari Abhirahama wakanangwa kuti mururami ngo pamusoro po mabasa, iyena waizova no thangwe ro kujikuja, kuciripi pa mavonero a Mwari. 3 Waro matahwa anonangenyi? “Abhirahama wakatenda Jehovha,* wonangwa kuti mururami.” 4 Mundhu anoshanda, mupocero waanopuwa auvi unyasha hucikaezaniswi, asi unova mupocero waanofanera. 5 Ngo divi rimweni, mundhu acikashandi, asi ecitenda Wiya anoita kuti mundhu ano cishaishi ave mururami, kutenda kwake kunozwi ururami. 6 Inga zvakanangwavo ndi Dhavhidhi ngo pamusoro po mudakaro wo mundhu anonangwa ndi Mwari kuti mururami, pikija eciita zviro zvicikazwirani no mutemo, eciti: 7 “Vanodakara vaya vakaregerehwa kuposa kwavo, zvishaishi zvavo zvakafukijwa. 8 Anodakara mundhu anokanganihwa cishaishi cake ndi Jehovha.”*
9 Kunanga kuti mudakaro uwu unowanika ngo vandhu vakasokwa basi, kana unowanikavo ngo vandhu vacizivi kusokwa? Ngokuti itusu tinonanga kuti: “Rutendo hwainga na Abhirahama, hwakamuita kuti adanijwe mururami.” 10 Iyena wakanangwa kuti mururami ari pa mugariro wapi? Paainga akasokwa kana paainga acito asokwa? Iyena wainga acito asokwa. 11 Iyena wakaashira citatijo co kusokwa ngo ndava yo ururami hwo rutendo hwaainga nahwo acito asokwa, kuti ave baba wo vandhu vese vano rutendo pikija vacikazivi kusokwa, kuti vave varurami; 12 kuti ave baba wo mubarihwana wo vakasokwa, kuciripi basi ku vaya vanosokwa, asi na vaya vanonasa kuteveja mudanyu jo rutendo hwa baba wedu Abhirahama pavainga vacito vasokwa.
13 Abhirahama no vana vake avazivi kuwana cigondiso co kugara utaka hwo nyika ngo kuzwira mutemo, asi vakaciwana ngo ururami hunowanika ngo rutendo. 14 Ngokuti kudari vaya vanozwira mutemo vakambhera ngo kuva vagari vo utaka, rutendo hunova hucikashandi ciro, cigondiso cinonga cicikashandi. 15 Kutama kuzwira Mutemo kunoviisa ushungu, asi pacina mutemo, apanavo cishaishi.
16 Ngo kudaro, cigondiso cinoviya ngo pamusoro po rutendo, kuti cive mukuzwirana no unyasha hucikaezaniswi. Icona cinova cokadi ku vana vake vese, kuciripi ku vanozwira Mutemo asi kuno vano rutendo hwakakhombijwa ndi Abhirahama baba wo vandhu vese vano rutendo. 17 (Inga zvakatahwa kuti: “Ndakakugaja kuti uve baba wo majinja mazinji.”) Izvi zvaizivika ndi Mwari waaitenda, anoita kuti vandhu vakafa vave no upenyu, wobhuya zviro zviciko wozviita inga zviriyo. 18 Pikija wainga aperehwa ngo vetero, iyena wainga ano rutendo hwo vetero hwokuti njiku imweni anozova baba wo majinja mazinji, mukuzwirana no zvakanangwa kuti: “Vana vako vanozowandavo maningi.” 19 Pikija kuti rutendo hwake ahuzivi kuremba, iyena wairangarira ngo pamusoro po kupera simba ko muviri wake (ngokuti wainga waano zana* ro makore). Wairangarirazve kuti Sara aacabari ngokuti wainga waamusharuka.* 20 Ngo ndava yo cigondiso ca Mwari, iyena aazivi kukana-kana pa rutendo; asi wakava akavanga ngo rutendo, ecikuja Mwari, 21 ano cokwadi cokuti Mwari waizokwanisa kuita zvaakagondesa. 22 Ngo ndava yazvo, “wakanangwa kuti mururami.”
23 Ngo kudaro, masoko okuti “wakanangwa kuti,” aazivi kutahwa basi ngo ndava yake, 24 asi akatahwavo ngo ndava yedu. Itusu tinozodanijwa kuti varurami ngokuti tinotenda Wiya wakamusa Jesu Mambo wedu mu kufa. 25 Mwari wakamutendera kuti aurawe ngo ndava yo zvishaishi zvedu, womuswa kuti tivoniwe kuva varurami.