Isaya
32 Izwanyi! Mambo anozotonga kuti pave no urungami,
Vatongi vanozotonga mu njira yakarurama.
2 Umwe na umwe wavo anozoita inga ndau yokutizira panoitika mbhepo,
Inga ndau yokufindara panoitika dutu,
Inga mugere wo kumwa mu nyika yakavoma,
Inga munvuriri wo buwe rakakura mu nyika yo cipare.
3 Majiso o vaya vanovona aazoendereri mberi akafungwa,
Njeve ja vaya vanozwa jinozonasa kuzwisisa.
4 Mwoyo ya vaya vanoita zviro vacizivi kurangarira ushoni, inozorangarijisisa ngo pamusoro po zivo,
Rurumi wa vaya vanokakamira unozovereketa ushoni, mu njira yakajeka.
5 Benji arizodaninjwi kuti mundhu anokova,
Mundhu acina ndhungamiriro aazodaninjwi kuti mundhu anoreremejwa;
6 Ngokuti benji rinozobhuya zvoupenji,
Rinozoronga mazano akashata mu mwoyo mwaro,
Kuti ripanduse vandhu no kubhuya manyepo ngo pamusoro pa Jehovha,
Kuti risiye mundhu ano njara acina zvokuha
No kuramba kupa kumwa mundhu ano nyota.
7 Mazano o mundhu acina ndhungamiriro akashata;
Iyena anoitira vandhu zviro zvinopseruja
Kuti anese mundhu anotambujika ecishandisa manyepo,
Pikija murombo ano razau.
8 Asi mundhu anokova ano cido cokukova,
Iyena anoenderera mberi ecikova.
9 “Mukanyi muzwe izwi rangu, imwimwi vanakaji vacina zvokuita!
Nasanyi kuteya njeve ku zviya zvandinonanga, imwimwi vasikane vacikakai-kai!
10 Mukati mo gore rimwe no njiku nganani, imwimwi vandhu vacikakai-kai munozozungunyiswa.
Ngokuti panonga pacina mucero unonga wakaviwa* mukuvo wo kukotora uvha paunonga wapera.
11 Tetemeranyi imwimwi vanakaji vacina zvokuita!
Zungunyiswanyi imwimwi vandhu vacikakai-kai!
Vhisanyi nguvo,
Musimire mapendera o saku mu zvihunu zvenyu.
12 Jitakenyi paditi muceme
Ngo ndava yo munda jakanaka no muuvha jinonasa kubara.
13 Ngokuti nyika yo vandhu vangu inozofukijwa ngo muzwa no sora rinobaya;
Izvona zvinozofukija nyumba jese jainga jecidakara maningi,
Hina, dhorobha rainga reciita mabuso.
14 Ngokuti rusingo hwakavangiswa unozosiiwa;
Dhorobha rinoita joweyowe rinozosara ricina vandhu,
Oferi no ndau yo kurindira zvinozosara zvakadaro,
Wozova mudakaro ku mbongoyo jo musora
No ndau yo kuhavira mushambi.
15 Mbhera mujimu udururihwe kwatiri wecivha mudenga,
Cipare cive munda wo mucero,
Munda wo mucero uve inga gwasha.
16 Ngo kudaro, ururami hunozogara mu cipare,
Urungami hunozogara mu munda wo mucero.
17 Kururama ko cokwadi kunozoita kuti kuve no runyararo,
Mucero wokururama ko cokwadi unozova rugarisiko no kungwaririka ko kwenda no kwenda.
18 Vandhu vangu vanozogara mu ndau ino runyararo,
Mu nyumba jakangwaririka, mu ndau jino rugarisiko, pacina zvinovaphingaija.
19 Asi nvura ino mapuwe inozoparaja gwasha,
Dhorobha rinozophwanyiwa-phwanyiwa mukuperera.
20 Munodakara imwimwi munosima mbeu mu ndau jese jino kumwa,
Moregejera n’gombe no mbongoyo.”