2 Vakorinte
8 Wari hama, tinoda kuti muzive ngo pamusoro po unyasha hucikaezaniswi hwa Mwari hwakaitihwa ungano jo Masedhoniya. 2 Pavainga vari pa kuejwa kwakakura no kutambujika, ivona vakavonesa mudakaro no kukova kwakakura, pikija vainga vari pa urombo hwakakura maningi. 3 Ngokuti ivona vakaita mukuzwirana no zvavainga nazvo. Inini ndinotonanga kuti vakajinesa maningi kuti vazviite. 4 Ivona vaindotideketerera ngo mwoyo wese ngo kuda kwavo, veciti vanodavo kuita basa ro kupa kuti vabesere vandhu va Mwari. 5 Ivona vakatoita kupinda zvataivetera, zvecivoneka kuti ivona vakatanga kujipira kuna Mambo no kwatiri mu kuzwirana na Mwari. 6 Ngo kudaro, takavangisa Tito kuti apejise kuita muhengo-muhengo wo zvipo pakati penyu ngokuti ndiyena wakatanga pa basa iri. 7 Zvecivoneka kuti imwimwi makakhupuka* mu zviro zvese, mu rutendo, mu soko, mu zivo, mu kuvangisira no mu rudo hwedu kwamuri, khupukanyizve* ngo cipo ici.
8 Andiripi kubhuya zviro izvi kuti ndimuvhunje zviro zvokuita. Asi kuti muzive kuvangisira ko vamweni, kuti ndivone rudo hwenyu hwokadi. 9 Ngokuti imwimwi munoziva unyasha hucikaezaniswi hwa Mambo wedu, Jesu Kristu, pikija wainga mukhupuki* iyena wakaita murombo ngo ndava jenyu, kuti mukhupuke* ngo ndava jake.
10 Mushwiro iyi ndinomuvhunja mavonero angu okuti: Kuita izvi kunomubesera, zvecivoneka kuti maano gore kuvhira pamakatanga kuita basa iri, mecikhombijazve kuti munoda kuriita. 11 Waro pejisanyi zvamakatanga kuita, kuti mukwanirise cido cenyu co kupa mu kuzwirana no zvamunazvo. 12 Mwari anoashira cipo cinoithwa ngo mwoyo wese, ngokuti iyena anovetera kuti mundhu apekeje zvaanazvo, kuciripi zvaacina. 13 Andidi kuti ndirerusire vamweni, ndopekeja mutoro imwimwi. 14 Kuti zviezane, zviro zvenyu zvinosara pa kushandiswa mu upfumi hwenyu, ngazvifukije zvinodiwa zvavo, kuitira kuti zvinosara kushandiswa mu upfumi hwavo zvifukije zvinodiwa zvenyu. Ngo njira yakadari, imwimwi na ivona munozova makaezana. 15 Inga zvakatahwa kuti: “Mundhu wainga no zvizinji aazivi kuva no zvizinji maningi, mundhu wainga no zvishoma aazivi kuva no zvishoma maningi.”
16 Ngaabongwe Mwari ngo kudira mu mwoyo ma Tito, kukaya-kaya kwatinako ngo pamusoro penyu, 17 ngo kuti iyena aaripi basi kuita zviro zvatakamuvhunja. Zvecivoneka kuti iyena ano cido cakanaka, iyena ari kuviyeyo kuzomuvona ngo kuda kwake. 18 Itusu tiri kumutumira pamwepo no hama iri kusimbhwa mu ungano jese ngo pamusoro po mabasa airi kuita ngo ndava yo masoko akanaka. 19 Andizvopi zvega, iyena wakagajwavo ngo ungano kuti atiperekeje mu hwendo hwedu, patinonga tecipa cipo ici co mwoyo wese kuti Mambo akujwe, ngokuti itusu tinoda kubesera. 20 Tiri kuita kudari kuti patame kuwanika ciri cese cinotishoresa ngo pamusoro po muhengo mukuru watinotungamirirari. 21 Asi ‘tinoita zviro zvese takagondeka pamberi pa Jehovha* no pamberi po vandhu.’
22 Tiri kutumazve hama yedu imwe kuti iviye pamwepo na ivona. Takaieja toivona kuti inovangisira pa kuita zviro zvakawanda. Iyona wari iri kuvangisira maningi ngo kuthemba kwainomuita. 23 Kudari pakava no muvhunjo ngo pamusoro pa Tito, iyena ndiyena mudoni wangu, anoshanda pamwepo na inini ngo pamusoro po zvido zvenyu. Kudari pakava no muvhunjo ngo pamusoro po hama jedu, ivona ndivona vapostori vo ungano pomwe no hama ja Kristu. 24 Ngo kudaro, vakhombijenyi kuti munovada. Khombijanyi ungano kuti ngenyi itusu tinodada ngo pamusoro penyu.