Nduyo
Ku mutungamiriri. Ndumbo inobhuya ngo pamusoro po “Njiva Yakanyararisa Iri Ndhambo.” Mikitamu.* Nduyo ya Dhavhidhi yaakaimba pa mukuvo waakatohwa ngo Vafiristi ku Gati.
56 Mwari wangu ndiitirenyivo unyasha, ngokuti vandhu vari kuhwisana neni.
Njiku jese vanotakana neni no kundinesa.
2 Vavengi vangu vanonditeverera njiku jese,
Vandhu vakawanda vanondihwisa vecizvikuja.
3 Pandinonga ndecithya, ndinothemba imwimwi.
4 Ndinothemba Mwari, uwo ano soko randinokuja.
Ndinothemba Mwari; andithyi.
Mundhu angandiitenyi?
5 Njiku jese ivona vanoenderera mberi vecitakana neni no kundinesa;
Ivona vanorangarira basi kundiitira zviro zvakashata.
6 Ivona vanondifindarira kuti vandihwise;
Mukuvo wese vanosotesesa kwandinoenda,
Kuti vandiuraye.
7 Mwari wangu, varambenyi ngo ndava yo zviro zvakashata zvavanoita,
Wisanyi majinja makanyangajwa.
8 Imwimwi munonasa kuziva ushonyi makwanja ese andinofamba.
Ndapota, diranyi musoji jangu mu botiri* renyu.
Izvona azvizivi kutahwa mu bhuku renyu here?
9 Vavengi vangu vanozohwirira sure pa njiku yandinozomudaninja ndecida besero.
Inini ndinothemba kuti Mwari ari ku divi rangu.
10 Ndinothemba Mwari, uwo ano soko randinokuja.
Ndinothemba Jehovha, uwo ano soko randinokuja.
11 Ndinothemba Mwari; andithyi.
Mundhu angandiitenyi?
12 Mwari wangu, ndinozoita zvandakagondesa kwamuri;
Ndinozoita mupiro jo kubongesera kwamuri.
13 Ngokuti imwimwi makandiponesa kuti nditame kuurawa
Moita kuti murenje jangu jitame kukhugunyika,
Kuti ndienderere mberi ndecipona no kufamba pamberi pa Mwari.