Mateu
17 Sure ko njiku ndhandhatu, Jesu wakatora Pedhru, Jakobo na Johani munukuna wa Jakobo, woenda na ivona vega pa dundhu rakareba. 2 Iyena wakapinduka pambeji pavo; kumeso kwake kwakabwaka inga zuva, nguvo jake jakamonikira* inga rujhu. 3 Pondhopo pakavoneka Mosi na Eriya vecibhuya naye. 4 Pedhru wakavhunja Jesu kuti: “Mambo, zvakanaka kuti itusu tigare pano. Kudari mecida, ndaizovaka matumba matatu pano, rimwe renyu, rimwe ra Mosi no ra Eriya.” 5 Paainga ecivereketa, gwiti raivheneka, rakavafukija. Izwi rakavha ngo pagwitipo reciti: “Nga uwu Mwana wangu anodiwa, anondidakajisa. Mupurukirenyi.” 6 Vajiji pavakazvizwa, vakawa pasi ngo huma,* vothya maningi. 7 Jesu wakavakhwederera, wovapsasa eciti: “Mukanyi. Mucathya.” 8 Povakapenya, apana mundhu umweni wovakavona. Asi vakavona Jesu basi. 9 Pavaideruka pa dundhu, Jesu wakavavhunja kuti: “Mucadovhunja ari wese civoniso ici mbhera Mwana wo mundhu amuswe ko vakafa.”
10 Asi, vajiji vake vakamuvhunjisa kuti: “Waro ngenyi vatari vanonanga kuti Eriya anodikana kutanga kuviya?” 11 Jesu wakavadavira kuti: “Eriya ari kuviyadi, iyena anozonasirira zviro zvese. 12 Asi, inini ndinomuvhunja kuti Eriya wakaviya kare, ivona avazivi kumuziva. Asi vakamuitira zviro zvavainga vecida. Ngo njira yondhoyo, Mwana wo mundhu anozotambujwavo ndivona.” 13 Vajiji vakazozwisisa kuti waivavhunja ngo pamusoro pa Johani Mubhabhatiji.
14 Povakaguma kwainga no mbungano, mwanarume umweni wakamukhwederera, womugwadamira eciti: 15 “Mambo, itiranyi usizi mwana wangu, ngokuti ano njwiti,* ari kuhwaja. Kazinji anowira pa muriro no mukumwa. 16 Ndakaenda naye ku vajiji venyu, asi vakakonehwa kumurapa.” 17 Jesu wakamudavira kuti: “Imwimwi mubarihwana ucina rutendo no wakashata, ndinozova na imwimwi mbhera rini? Ndinozocungirira muitiro wenyu mbhera rini? Muviisei kuno.” 18 Jesu wakagogomera dhimoni riya, irona rakabuda kwaari, kuvhira pa nguva yondhoyo mwana wiya wakavanga. 19 Perapo vajiji va Jesu vakamukhwederera ngo pamutivi, vomuvhunjisa kuti: “Ngenyi takonehwa kugogomera dhimoni riya?” 20 Iyena wakavadavira kuti: “Ngo ndava yo kutenda kwenyu padoko. Zvokadi ndinomuvhunja kuti, kudari no mainga no kutenda kwakakura inga mucece wo* mostardha, maizovhunja dundhu iri kuti: ‘Ivhai pano uende inoo,’ irona rinozoenda. Apana camunozokonehwa.” 21 *——
22 Pavainga vakaungana mu Garireya, Jesu wakavavhunja kuti: “Mwana wo mundhu anozotengeswa mu nyara jo vandhu. 23 Ivona vanozomuuraya, wozomuswa pa njiku yocitatu.” Vajiji vakasuruvara maningi.
24 Pavakaguma Kafarnaume, vashabisi vo themberi* vakakhwederera Pedhru, vomuvhunjisa kuti: “Mujijisi wenyu aashabi kani?” 25 Iyena wakati: “Hina, anoshaba.” Asi paakanghwina munyumba, Jesu wakatanga kuvereketa eciti: “Unorangarira kudini, Simoni? Majimambo o nyika anoshabisa ani?” Vanoshabisa vana vavo kana vandhu vamweni?” 26 Paakadavira kuti: “Anoshabisa vandhu vamweni,” Jesu wakamuvhunja kuti: “Ndizvona, vana avashabiswi. 27 Asi kuti titame kuvanyangajisa, endai kujombe koveja, torai hove yaunotanga kubata. Paunoifunungura muromo, unozowana zingwenjere ro sirivha. Ritorei uende koshabira inini na iwewe.”