Ezekiyeri

1 Mu gore ro cimakumatatu, mu mweji wo cirongomuna, mu njiku yo cishanu yo mweji wondhowo, pondainga ndakagara pakati po vandhu vainga kuuranda, phedo no murambo Kebhari, kudenga kwakafununguka ndotanga kuva no zvivoniso zva Mwari. 2 Mu njiku yocishanu yo mweji wondhowo, mu gore ro cishanu ro uranda hwa mambo Jehoyakini, 3 inini Ezekiyeri* mwana wo mupiri anodaninjwa kuti Bhuzai, ndakaashira soko ra Jehovha ndiri phedo no murambo Kebhari, mu nyika yo Vakaradhiya. Kondhoyo, nyara ya Jehovha yakaviya panyezuru pangu.

4 Pondainga ndecisota, ndakavona dutu guru* raivha kanjikazi, irona rainga rino gore rakakura no muriro wairazva* pomwe no ruvheneko wainga ngo mumbhiripiri maro. Pakati po muriro, painga pano ciro caiita inga simbi inon’ganikira. 5 Mukati mo muriro, mainga muno zviro zvaiita inga zvisikwa zvirongomuna zvinopona. Cisikwa cimwe nga cimwe, cainga no kumeso kwakatojana no ko mundhu. 6 Kherubhi rimwe nga rimwe, rainga no kumeso kurongomuna no mapapiro* marongomuna. 7 Makumbo azvo ainga akarungama, masondo azvo aiita inga masondo o cimwana co n’gombe. Iwona ain’ganikira inga utare wakapukuthwa. 8 Zvisikwa zvirongomuna izvi, zvainga zvino mukono jakaita inga jo mundhu pasi po mapapiro* azvo, mumativi ese o marongomuna. Zvese zvo zvirongomuna zvainga no kumeso no mapapiro. 9 Mapapiro* azvo aipsasana. Pa zvaifamba, izvona azvicaisikepi. Cimwe na cimwe cazvo, caifamba cakasota kumbeji.

10 Kumeso kwazvo kwainga kwakagarisa kudari: zvisikwa zvese zvo zvirongomuna, cimwe nga cimwe cainga cino kumeso ko mundhu, ngo mukono muho kwainga no kumeso kwakaita inga ko mbhondoro, ngo mukono boshwe kwainga no kumeso ko n’gombe. Cimwe nga cimwe cainga no kumeso ko hokotora. 11 Ndizvona zvainga zvakaita kumeso kwazvo. Mapapiro* azvo aigara akafununguka panyezuru pazvo. Cisikwa cimwe nga cimwe, cainga cino mapapiro maviri aipsasana. Mapapiro amweni maviri, aifukija muviri wazvo.

12 Cimwe na cimwe cazvo, caifamba cakasota kumbeji, zvecitevera kwazvaiyendeswa ngo mujimu. Pa zvaifamba, izvona azvicaisikepi. 13 Zvisikwa zvinopona izvi, zvaiita inga masimbe o muriro. Painga pano zviro zvaiita inga mwenje unobwaka* wecienda ini na ini pakati po zvisikwa zvinopona. Pakati po muriro, paibuda mbheni yairazva. 14 Zvisikwa zvinopona pozvaienda ini na ini, izvona zvaifamba inga mbheni iri kurazva.

15 Pondainga ndecisota zvisikwa zvinopona, ndakavona marodha ainga ngo pasi, ngo pamutivi po zvisikwa zvinopona zvino kumeso kurongomuna. 16 Marodha aya, ain’ganikira maningi inga buwe ro krizorito. Marodha ese o marongomuna, ainga akaezana. Mavonekero awo no maitihwe awo, kwaiita inga rodha rimwe riri mukati mo rodha rimweni.* 17 Paaifamba iwona aikwanisa kwenda ku mativi ese o marongomuna, acizivi kusikiswa. 18 Kukura ko marodha awo, kwaishamaisa maningi. Marodha ese o marongomuna, ainga akazara ngo majiso mumbhiripiri mawo mwese. 19 Zvisikwa zvinopona pa zvaifamba, marodha aifambavo pamwepo na izvona. Zvisikwa zvinopona pazvaimuka kuvha pasi, marodha aimukavo pamwepo na izvona. 20 Izvona zvaienda kwese kozvaindundihwa ngo mujimu, kwese kwaienda mujimu. Marodha aimuka pamwepo na izvona, ngokuti mujimu waiitisa kuti zvisikwa zvinopona zvishande, waingavo mu marodha. 21 Izvona pa zvaifamba, marodha aifambavo; pa zvaiima, marodha aiimavo; pa zvaimuka kuvha pasi, marodha aimuka pamwepo na izvona, ngokuti mujimu waiitisa kuti zvisikwa zvinopona zvishande, waingavo mu marodha.

22 Panyezuru po musoro wo zvisikwa zvinopona, painga pano ciro caiita inga tabwa inon’ganikira yobatana kuita buwe,* caiwajwa panyezuru pazvo. 23 Mapapiro* azvo ainga akarungama* ngo pasi po ciro caiitari inga tabwa, rimwe rakasota ku divi rimwe, rimweni rakasota ku divi rimweni. Cisikwa cimwe nga cimwe, cainga cino mapapiro maviri aifukija divi rimwe ro muviri waco, mapapiro maviri ofukijazve divi rimweni ro muviri waco. 24 Pandakazwa kutindhira* ko mapapiro* azvo, kutindhira uku kwaiita inga kutindhira ko bonda ro nvura, inga izwi ro Womasimba Ese. Pa zvaifamba, kutindhira kwazvo kwaiita inga ko masoca. Pa zvaiima, izvona zvaiwisa pasi mapapiro azvo.

25 Kwaizika izwi raivha panyezuru po ciro caiita inga tabwa cainga ciri panyezuru po musoro wo zvisikwa. (Pa zvaiima, izvona zvaiwisa pasi mapapiro azvo.) 26 Ngo panyezuru po ciro caiita inga tabwa caingari panyezuru po musoro wo zvisikwa zviya, painga pano zviro zvakatojana no buwe ro safira raiita inga kadera yo umambo. Waigara pa kadera iyi yainga mudenga, wainga akaita inga mundhu. 27 Ndakavona zviro zvaibwaka inga simbi inon’ganikira, inga muriro waibwaka waivha makaita inga mucihunu cake wecienda mudenga. Kuvhira mucihunu kwenda pasi, ndakavona zviro zvakatojana no muriro. Painga pano ruvheneko hwaibwaka maningi ngo mumbhiripiri mayo 28 Inga murarabungu* mu njiku yo kuna ko nvura. Aya ndiwona mavonekero o ruvheneko hwaibwaka, wainga uri ngo mumbhiripiri mayo. Zvaiita inga simba ra Jehovha. Pandakavona izvi, inini ndakagwadama ndopsasa pasi ngo kumeso kwangu ndoita mukumbiro, ndotanga kuzwa izwi ro mundhu waivereketa.