Jeremiya
31 “Pa mukuvowo,” izvi ndizvona zvinonanga Jehovha, “inini ndinozova Mwari wo mbhuri jese jo Vaiziraeri, ivona vanozova vandhu vangu.”
2 Jehovha anonanga kudari:
“Vandhu vacizivi kuuraiwa ngo banga vakaitihwa unyasha ndi Mwari mu zvipare,
Vaiziraeri pavaifamba vecienda ku ndau yavo yo kuzorora.”
3 Jehovha wakajivonesa kwandiri ari ndhambo wonanga kuti:
“Inini ndinokuda ngo rudo hucikaperi.
Ngo iyo ndava, inini ndakakukwevera kwandiri ngo rudo hucikacinji.
4 Ndinozokuvakisazve, iwewe wozovakiswazve.
Iwewe mbhandhwe yo Iziraeri, unozotorazve ngoma jako
Wozoenda wecitamba ngo mudakaro.
5 Iwewe unozosimazve uvha mu matundhu o Samariya;
Varimi vanozosima muti yo muuvha, vozoha mucero jayo.
6 Ngokuti inozoguma njiku yokuti varindiri vari mu matundhu o Efraimi vanozodaninja veciti:
‘Ngatende, ngatikhwire ku Ziyoni, kuna Jehovha Mwari wedu.’”
7 Ngokuti Jehovha anonanga kudari:
“Khuwanyi kuna Jakobe ngo mudakaro.
Khuwanyi ngo kudakara ngokuti imwimwi muri panyezuru po majinja.
Zvizivisenyi, simbanyi mecinanga kudari:
‘Jehovha Mwari wedu, ponesanyi vandhu venyu vakasara vo Iziraeri.’
8 Ndinozovaviisa kuvha ku nyika yo kanjikazi.
Ndinozovaunganija kuvha ku mativi ari ndhambo o panyika.
Pakati pavo panozova no mapofu no zvigono,
Vanakaji vano mimba no vanakaji vanonga vecida kubara, vese pamwepo.
Ivona vanozohwirirazve kuno inga ungano huru.
9 Ivona vanozoviya vecicema.
Inini ndinozovatungamirira pavanonga vecideketerera unyasha hwangu.
Inini ndinozovatungamirira kuno kumwa inopopoma,*
Mugwanja rakanaka, ravacikakhugunyiki.
Ngokuti inini ndiri baba wo Iziraeri, Efraimi idangwe rangu.”
10 Imwimwi majinja, izwanyi soko ra Jehovha,
Rizivisenyi pakati po zvirundu zviri ndhambo meciti:
“Wiya wakandhandhanisa Iziraeri ndiyena anozoiunganijazve.
Iyena anozomungwarira* inga zvinoithwa ngo muhavisi anohavisa mushambi wake.
11 Ngokuti Jehovha anozoponesa Jakobe
No kumusujunura mu nyara jo mundhu ano simba maningi kupinda iyena.
12 Ivona vanozoviya vozokhuwa ngo kudakara panyezuru po Ziyoni
Ivona vanozodakara ngo ndava yo unaki wa Jehovha,
Vanozodakara ngo ndava yo zvokuha, vhinyu imbza no mafuta,
Vanozodakarazve ngo ndava yo zvinyama zvo mavhuta no zvivana zvo n’gombe.
Ivona vanozoita inga munda wakanasa kudurujihwa,
Ivona avazoperizve simba.”
13 “Pa mukuvowo, mbhandwe jinozotamba ngo kudakara,
Majaha anozotambavo ngo kudakara pamwepo no vasharuka.
Ndinozocinja kucema kwenyu koita mudakaro.
Ndinozomunyaraja no kumupa mudakaro kuciripi kucamwa.
14 Ndinozopa vapiri zvokuha zvakawanda,
Vandhu vangu vanozoguta ngo unaki wangu,” izvi ndizvona zvinonanga Jehovha.
15 “Jehovha anoti:
‘Mu Rama muri kuzika mbhere, kucumba no kucema kukuru
Rakeri ari kucema vana vake.
Iyena ari kuramba kunyarajwa,
Ngokuti vana vake vapera.’”
16 Jehovha anoti:
“‘Ucacema, pukutai musoji jako,
Ngokuti basa rako rino mupfupo,’ izvi ndizvona zvinonanga Jehovha.
‘Ivona vanozohwirira vecivha mu nyika yo muvengi.’
17 ‘Kumbeji kwako kuno vetero,’ izvi ndizvona zvinonanga Jehovha.
‘Vana vako vanozohwirira ku nyika yavo kamare.’”
18 “Inini ndakanasa kuzwa kucumba kwa Efraimi,
‘Imwimwi makandipangira, inini ndakatendera kupangihwa,
Inga mwana wo n’gombe acito ajijiswa.
Ndihwirijenyi, inini ndinozohwirira ngo kukasika,
Ngokuti imwimwi ndimwi Jehovha Mwari wangu.
19 Ngokuti pandakahwirira kwamuri, ndakazvidemba;
Pandakazwisisa, ndakataka pa mupambare ndecicumba.
Ndakapseruka no kudodokeswa,
Ngo ndava yo zviro zvinopseruja zvandakaita ndiciri mwana mudoko.’”
20 “Kureva kuti Efraimi asipi mwanangu anosisira, mwana wandinoda?
Pandinozomupangira kuphinda no kuphinda, ndinoenderera mberi ndecimuceukija.
Ndizvona zvinoita kuti mwoyo wangu uneseke ngo ndava yake.
Kunasa kunanga, inini ndinozomuitira pena,” izvi ndizvona zvinonanga Jehovha.
21 “Diranyi mugano mucitaka,
Imisai zvitatijo mondhomo.
Nasai kusotesesa citaka, ngokuti igwanja raunozofamba ndirona.
Hwirirai iwewe mbhandwe yo Iziraeri, hwirirai ku madhorobha ako.
22 Iwewe mwana wokaji acizivi kugondeka, mbhera rini unozoenderera mberi wecikana-kana?
Ngokuti Jehovha wakasika ciro cipsa pa nyika:
Mwanakaji anozopsaka mwanarume ano cido cikuru.”
23 Jehovha wo hondo Mwari wo Vaiziraeri anonanga kudari: “Pandinoviisa vandhu vako kuuranda, mu nyika yo Judha no mumadhorobha ako munozonangwazve masoko aya: ‘Jehovha ngaakukomborere iwewe ndau yakarurama, iwewe dundhu rakacena.’ 24 Vandhu vo Judha no madhorobha avo ese, vanozogaremo pamwepo, varimi na vaya vanohavisa mushambi. 25 Ngokuti inini ndinozovangisa wiya wakaremba no kugutisa wiya ari kufa ngo njara.”
26 Ngokudaro, inini ndakamuka mu hope ndofunungura majiso angu, ngokuti ndainga ndakanasa kuvata ushoni kamare.
27 “Izwanyi! Jiri kuguma njiku,” izvi ndizvona zvinonanga Jehovha, “njiku jokuti, ndinozoita kuti vandhu vo nyumba yo Iziraeri no vandhu vo nyumba yo Judha vawande. Ndinozoitavo kuti zvifuyo zvavo zviwande.”
28 “Kudari inga ndakaenderera mberi ndecivasota kuti ndivavhite, ndivaphwanye, ndivawise, ndivaparaje no kuvaitira zvakashata, ngo njira yakaezana, ndinozoenderera mberi ndakavasota kuti ndivavangise no kuvasima,” izvi ndizvona zvinonanga Jehovha. 29 “Mu njikujo akuzonangwizve kudari: ‘Majibaba ndiwona akaha uvha jinoshasha, asi vana ndivona vakashashihwa mukanwa.’ 30 Kusiyapo izvo, umwe na umwe anozofa ngo ndava yo kuposa kwake. Wiya anoha uvha jinoshasha, ndiyena anozoshashihwa.”
31 “Vonanyi! Jiri kuguma njiku,” izvi ndizvona zvinonanga Jehovha, “njiku jandinozoita citenderano cipsa no vandhu vo nyumba yo Iziraeri no vandhu vo nyumba ya Judha. 32 Acizoiti inga citenderano candakaita no majicekuru avo pa njiku yandakavabata ngo nyara kuti ndivavhise mu nyika yo Ejipita, ‘citenderano cangu cavakaphwanya, pikija inini ndainga mune* wavo kamare,’ izvi ndizvona zvinonanga Jehovha.”
33 “Ngokuti ici ndicona citenderano candinozoita no vandhu vo nyumba yo Iziraeri pasure po njiku jondhojo,” izvi ndizvona zvinonanga Jehovha. “Ndinozodira mutemo wangu mu murangariro mwavo no kuutara mu mwoyo mwavo. Inini ndinozova Mwari wavo, ivona vanozova vandhu vangu.”
34 “Apana mundhu anozojijisa mudoni wake kana hama yake eciti: ‘Zivanyi Jehovha!’ Ngokuti vese vanozondiziva, kutangira mudoko mbhera mukuru,” izvi ndizvona zvinonanga Jehovha. “ Ngokuti ndinozoregerera kuposa kwavo, andizoceukijizve cishaishi cavo.”
35 Izvi ndizvona zvinonanga Jehovha,
Wiya wakaita zuva kuti rivheneke comasikati,
Wiya wakadira mutemo ngo pamusoro po mweji no ndhondho kuti zvivheneke cousiku,
Wiya anoita kuti jombe rinyanduke, wotambisa mavimbi aro,
Uwo ano zina rokuti Jehovha wo hondo:
36 “‘Kudari mutemo iji jikatama kushanda,’ izvi ndizvona zvinonanga Jehovha,
‘Mubarihwana wo Vaiziraeri waizotamazve kuva jinja pamberi pangu, kwenda no kwenda.’”
37 Izvi ndizvona zvinonanga Jehovha: “‘Kudari mundhu naaikwanisa kupima matenga no kukwanisa kuziva zviro zvese zvinocijikira maambo o nyika, inini ndaizokwanisa kuramba mubarihwana wo Vaiziraeri, ngo ndava yo zvese zvawakaita,’ izvi ndizvona zvinonanga Jehovha.”
38 “Vonanyi! Jiri kuguma njiku,” izvi ndizvona zvinonanga Jehovha, “ njiku jokuti dhorobha rinozovakiswazve kuitira Jehovha kuvhira ku Rusingo wo Hananeri mbhera Pacikina co Musuvo. 39 Bote rokupima ndirona rinozotambanujwa mbhera ku citundhu co Garebhi, rosikira ku divi ro Gowa. 40 Bani rese ro mutembo no ro marota no munda yese mbhera ku Bani ro Kedhroni, hina, mbhera ku Musuvo wo Haci, kumavhazuva, zvinozova ciro cakacena kuna Jehovha. Dhorobha iri, narini arizophwanyiwi nee kuparajwa.”