Isaya

5 Ndisiyenyi ndiimbire mudiwa wangu

Ndumbo inobhuya ngo pamusoro po mudiwa wangu no munda wake wo muuvha.

Wakasima muuvha wakanaka, unobara uvha jokupsuka,

Pakati pawo wakavaka rusingo,

Wakaitazve ndau inosvinihwa vhinyu mondhomo.

Ngo kudaro, iyena waivetera kuti ubare uvha jinonaka,

Asi iwona wakabara basi uvha jinoshasha.

 3 “Asi wari, imwimwi vagari vo Jerusarema no vandhu vo Judha,

Ndapota, ndinokumbira kuti mutonge inini no munda wangu wo muuvha.

 4 Ndaidikanazve kuitenyi mu munda wangu wo muuvha

Candicikazivi kuita?

Ngenyi pandaiimira kuti ubare uvha jinonaka,

Wakabara basi uvha jinoshasha?

 5 Wari, imanyi ndimuvhunje

Zvandinoda kuita no munda wangu wo muuvha,

Ndinozovhisa rusosa hwawo,

Iwona unozopiswa.

Ndinozophwanya mupfimbiji wawo wo mapuwe,

Kuti iwona ucikwe-cikwe.

 6 Ndinozoita kuti usare ucina ciro;

Auzosavihwi nee kurimwa.

Unozovhungwa ngo mamuti anomuzwa no sora,

Ndinozovhunja makore kuti atame kunisa nvura mauri.

 7 Ngokuti munda wo muuvha wa Jehovha wo hondo, ndivona Vaiziraeri;

Vandhu vo Judha ndizvona zvirimwa zvaaida maningi.

Iyena waimira ururami,

Asi mainga no kutama kururama;

Wakaimira urungami,

Asi vandhu vaicema ngo kushuphwa.”

 8 Nyathwa ku vaya vanobatanija nyumba no nyumba imweni

Vobatanija munda no munda umweni

Mbhera potama kuva no ndau

Imwimwi basi ndimwi muri kugara munyikemo!

 9 Inini ndakazwa Jehovha wo hondo ecipika

Kuti nyumba jakawanda, pikija jakakura joseja,

Ijona jinozoita mathere, jova ciro cinothyisa,

Jotama anozogaremo.

10 Ngokuti kintari murongomuna jo munda wo muuvha, jinozobudisa basi bhati* rimwe ro uvha

Homeri* imwe yo mbeu, inozobudisa basi efa* imwe yo mucece.

11 Nyathwa kwa vaya vanofumirisa voenda komwa doro,

Vanogareyo vecimwa mbhera usiku, mbhera vhinyu yovarejeresa!

12 Pa mabuso avo, pano cimadangari, zvinorijwa ngo shinda,

Ngoma, mutoriro no vhinyu;

Asi ivona avarangariri zviito zva Jehovha,

Nee avavoni mabasa o nyara jake.

13 Ngo kudaro, vandhu vangu vanozoendeswa ku uranda

Ngo kutama zivo;

Vanarume vavo vanokujwa vanozotama zvokuha,

Vandhu vavo vese vanozofa ngo nyota.

14 Ngo kudaro, Guva* raengejera kukura kwaro

Irona rashama muromo waro kupindirija mudida;

Vanarume vanokujwa vo Jerusarema, vandhu vanoita joweyowe, no vanoita mabuso

Vanozoenda mu Guvemo.

15 Vandhu vanozododokeswa,

Vanarume vanozododokeswa,

Majiso o vandhu vanozvikuja, anozododokeswa.

16 Jehovha wo hondo anozokujwa ngo kutonga kwaanozoita;

Mwari wo cokwadi, Mucena, anozozvicenesa ngo ururami hwake.

17 Mavhuta* anozohava mondhomo, oita inga kuti ari kutohava mu mahavo mawo;

Vandhu vo nyikanja vanozohira mu ndau yaigahwa ngo zvinyama zvaiha ushoni.

18 Nyathwa kwa vaya vanokweva kuposa kwavo ngo mapote okunyepa

Zvishaishi zvavo ngo mapote o ngoro;*

19 Veciti: “Iyena ngaaite basa rake ngo kukasika;

Ngaagume ngo kukasika kuti timuvone.

Cinangwa co Mucena wo Iziraeri, ngaciitike

Kuti itusu ticizive!”

20 Nyathwa ku vaya vanonanga kuti zvakanaka ndizvona zvakashata, zvakashata ndizvona zvakanaka,

Ku vaya vanodira cidima pandau yo ruvheneko, no ruvheneko pandau yo cidima,

Ku vaya vanocinja zvinovava ngo zvinotapira, zvinotapira ngo zvinovava!

21 Nyathwa ku vaya vanorangarira kuti vakangwara mu mavonero avo

Vozviita vakangwara!

22 Nyathwa ku vaya vakavanga pakumwa vhinyu

Na vaya vaashasha pakuthathanya doro,

23 Ku vaya vanonanga kuti mundhu uwu aana ndava ngo ndava yokudyekehwa

Na vaya vacikatongi mundhu wakarurama mu njira yakanaka!

24 Ngo kudaro, inga murazvu wo muriro unopisa ushwa

Ushwa wakavoma opsa pa muriro,

Muji javo jinozovoma,

Mafirori avo anozondhandhanika inga bukuta,

Ngokuti vakaramba mutemo wa Jehovha wo hondo

Votama kureremeja soko ro Mucena wo Iziraeri.

25 Ngo kudaro, ushungu wa Jehovha unozobwakira vandhu vake,

Iyena anozovatambanujira nyara, ovahwisa.

Matundhu anozotetemera,

Mutembo* yavo inozoita inga rishu mu makwanja.

Ngo ndava yo zvese izvi, ushungu hwake auzivi kupera,

Nyara yake icakandotambanujwa kuti avahwise.

26 Iyena wakadira citatijo kuitira majinja ari ndhambo;

Wakarijira mundozwa kuti ivona vaviye vecivha kumagumo o nyika;

Vonanyi! Ivona vari kuviya ngo kukasika.

Mabhande avo akanasa kusungwa mu cihunu,*

Zvimapote zvo sandariya* javo azvizivi kudajuka.

28 Mupasha javo jese jakarojehwa,

Uta javo jese jakanasirihwa kuitira kufura.

Masondo* o haci javo, akaita inga buwe,

Marodha avo akaita inga zibepo.

29 Kubhonga kwavo kwakaita inga ko mbhondoro;

Ivona vanobhonga inga zvimbhondoro.

Ivona vanozobhonga vobata cinyama

Vopinda naco, pacina anociponesa.

30 Pa njiku yondhoyo, ivona vanozocibhongera pasure pokucibata

Inga kutindhira ko jombe

Wiya anozosota panyika anozovona cidima cinotambuja;

Pikija ruvheneko, unozosvipa ngo ndava yo makwiti.